شلون أتقرب من عمتي ؟

[Mary]

مساء الكويتيات..
يقولون الثالثة ثابتة إن شاء اااه تزبط يا رب.<< مرتين أكتب الموضوع ومدري شيصير و يروح.
المهم طبعا هذي اول مشاركة لي أتمنى التفاعل الإيجابي إن شاء اااه.
اني متزوجة من سنة و شيء، علاقتي بعمتي"أم زوجي" الحمد لـ اااه جيدة. لكن بعد أبغيها تكون أقوى،فـ يعني حبذا لو تساعدوني شلون أخليها تحبني أكثر؟ يعني مو بس تحبني لاني زوجة ولدها و السلام.لا ابغيها تحبني لاني اسوي لها اشياء حلوة. هذي الاشياء الحلوة انتوا الي راح تعلموني إياها إن شاء اااه.ابغيها تطريني بالخير دائما،و ابغي زوجي مو بس يرتاح لعلاقتي فيها لكن بعد يستانس.كويـــتــيـــات، ابغي منكم تعلموني جم حاجة، جم فكرة حلوة تخليني اسحر عمتي باسلوبي و معاملتي؟اعطوني افكار عملية اقدر اطبقها يعني مو بس كلام عام. عشان يسهل علي التنفيذ.

 

[Mary]

؟؟؟؟؟
معقولة ما كو رد؟

 

[فـدوه]

تعاملينها كانها امج, يعني تسوين شاي و تحطين كيك و بسكوت و تقعدين تسولفين معاها. لا شفتيها قاعدة بروحها قوليلها امشي نطلع مع بعض نروح نسير على امي. يعني حسسيها انج منها و فيها

 

[انا لحبيبي .]

انتي ساكنه معها بنفس البيت ولا ببيت لحالك؟؟

 

[waterfall]

نفس ما قالت اخت فدوه عامليها مثل امج.
وان قالت كلمة اتزعل سامحي بلسانج وتصرفاتج واهم شي بقلبج يعني بالعربي طوفي، ولا تخلين ولدها يقطع عنها مده وانتي تخلينه يشوف امه دايما ولا تخلينه ينساها لانه الام حساسه بهالموضوع
وتاكدي انه هالشي ما يرجع اليوم ولا باجر
وراح اتشوفينه بالازمات ... بتلاقينها لا شعوريا راح توقف معاج ضد ولدها (عن تجربه طبعا)
يعني مثلا خصصي يوم لها تطلعون تتمشون تتسوقون اتروحون الصالون المهم اتغير جو البيت واتكون لج بروحج
يعني انا مثلا كل 3 او 4 اشهر احجز بنهاية الاسبوع شاليه انا وياها بروحنا.
وعلى فكرة الامهات لا شعوريا يحبون الهدايا حتى لة كانت رخيصه..
ولا تنسين خليها اول من يعلم بحياتكم مو يعني اسراركم .. قصدي ان حملتي والاشياء البسيطه ...
واهم من هذا كله كفاية انه ترفعين ايدج لله وتدعين لها هذا كفاية انه ربج يوصلها اهتمامج فيها
والله يوفقج

 

[ابدا يالغالي مانساك]

عامليها بحسن نيتج
مو عشااااان زوجك وبس عشان الله تعالي
المهم يالغلا
ان نزلتيلها لاتنزلين ويدج فاضيه ياما قهوه او حلي
لاتحشين بناااااااس عندها وفلانه سوت وفلانه ماسوت
خليج مالج شغل الا بنفسج
قللي الكلام لاتصيري
ثرثاره
خخخخخ
لاتزعلين

انا جووووووكم حريم انتي اللي قومي فيهم

انتي وشطاااااارتج
هذا اللي بباللي الحين

 

[قلبي سلومي]

على حسب العمة
انا تقربت وقمت اجيب لها هدايا وكل شهر اعطيها فلوس والقعدات والوناسة واستانست علي

بس لا كلموها حمواتي تعالي شوفي الحجي حمواتي يشيشونها وتروح لزوجي حرمتك وحرمتك

حرمتك ماتقعد معانا مع ان كل ما اقعد معاهم تقول لاتقعدين عندي بقعد بروحي وروحي للبنات استانسي ولا رحت للبنات كل وحدة تدخل غرفتها ويخلوني بروحي اسكت واصعد شقتي واروح وعقبها قمت اخفف القعدة وقامت تقول لزوجي حرمتك ماتقعد معانا لغاية ما شاف بعينه قال كيفج

وحرمتك وانا دوام وتعب والخميس جمعة خواته الناس تستانس وانا بالمطبخ اكرف الله وكيلج ادخل الساعة 7 وما اطلع الا 10 ونص وهم مستانسين ولا يتشرطون واكون رادة من الدوام ومو نايمة الظهر ووراي مجابل رجال شسوي ولرحت الخميس لاهلي يعصبون والخميس اللي بعده يطرشون مسجات بتروحين لاهلج خايفين ان الطبخ يروح عليهم

تعبت وربي هذا غير المشاكل زوجي شفهم قال بكيفج تجينهم ماتجين بكيفج انا تاكدت منهم حيل

 

[ام العبايه]

حبيبتى هذا شعور طيب وان شاء الله الله يجازيج على قد نيتج وانتى نيتج كلها طيب وان شاء الله بيسهل دربج ويوفقج

اهم شي قبل لا تطلبين رضا العبد اطلبي رضا رب العالمين متى ما الله رضا عليج وحبج فالباقى كله سهل لان محبة رب العالمين تتبعها محبة العباد تعاملى معاها كانها مو امج لا امج يمكن تمونين عليها وتغفرلج بس الحين تتعاملين مع ام ولد كثر ما تقدمين بتاخذين ان شافت خيرج قبل شرج بترتاحين وجهه وظهر يعنى موجوده مو موجوده انتى العزيزه دايما خلى عملج لله فهو الى يقدر ما تسوين ودايما خليه بين عيونج حاسبي نفسج ولوميها بترتاحين ان فذى جاها ضيف اكرميه وجبيه وان قعدت مع رفيجاتها وشفتها بدت تذم لا تندمجين وتقولين انا المقصوده كبيرى عقلج ان شفتها غلطانه شهدوج لا تتدخلين اذكريها بطبخه حلوه لا تصيرين امها وتعلمينها لا اتعلمى منها شي ما يعجبج وافقيها واخذى خاطرها وسوي الى انتى تبينه بطريقتج الصراحه حلوه بس مع ام الزوج لا موشي

 

[al-musk]

خلها تعرف انج مسالمه ومالج شغل باحد وماتطرين الناس الا بكل خير ولو كل اسبوع او اسبوعين تسوولكم مشوار وتغيير جو حده حلو والله يوفقج وبين فترة وفترة هاديها

 

[غـرامـي أنـت]

البنات ماقصروا

 

[مهههها]

هلا اختي بارك الله فيج
اسأل الله ان يسخرها لك كما سخر البحر لنبينا يونس

اللهم ارضى عني فليس بعد رضاك شيء مية مرة
اللهم ارضى عني ووعن امي وابي
سبحان الله والحمد الله ولا اله الا الله والله اكبر خمسين مرة بأي وقت طول اليوم
غير حقت الفريضة
واحمد الله كثير ا طول اليوم
وخليك على طهارة دائمن

اذا سويتي هاذي الاشياء الله بيسخر لج الارض ومن عليها

اذا انفعت معاج راسليني ع الخاص

 

[تعبت اداري...~]

Up...

 

[سوسو حبيبتى]

الاول كلمه الله ليش تكتبيها كذي؟؟؟ موضه مثلا؟؟ والا الكيبورد عندك فيه مشكله؟؟

ثاني شى مافى احلي من الصراحه وعدم المبالغه والنفاق .. عاملي الناس كما تحبي ان تعاملى

يعنى تخيلي نفسك صار ابنك كبير ومتزوج وشوفي كيف تحبي مراته تعاملك وعاملى حماتك كذي

وشكرا

 

[شقرديه كيوت]

الله يعطيج ع قد نيتج

 

[جولينار]

الله يسخركم لبعض


وعامليها أحسن معامله مثل ماتحبين زوجة ولد انشاء الله تسوي لك سوي لها ..

وكل شي بأجره ,,

 

[Ga6wa_7elwa]

شوفي لما يكون في الزواره خلج يايه مبجر وانتي يايه لا تدشين ايدج فاضيه اقل مافيها مري الفرع اخذي حلو والا سوي شي بسيط سلطه شي حق الغده من غير ما تقول لج،،اعتبري نفسج بنتها وساعديها ،،اذا سافرتي يبي لها شي وياج ،، بالمناسبات بخور دهن عود دراعه،،شوفي دقي سألي عنها ،علا طول لاتناجرينها اذا رحتو العمره اخذوها معاكم طلعت عائليه حسسيها تعاملينها نفس امج اذا مريتي الجمعيه سأليها يمكن تبي شي،،لما يكون فيه عندها عزيمة والا استقبال عاونيهم بس لاتحسسينها انج غريبه واذا نوعهم بسيط وانتي تكشحين ماله داعي تبينين انتي احسن او اغير خلج بسيطه وبس انشالله توصلين اللي تبينه

 

[أتراب]

خلج على طبيعتج ولا تبالغين
بس في شي مهم الكل يغفل عنه هو الانصات
اي الانصات لها وقت اللي تتكلم هالشي يسعدهم
ساعديها في شغل البيت في المطبخ حتى لو كانت عندكم شغاله
عاملي ولدها باحترام ومحبه وهالشي راح تشوفه بعيونها
وبالتالي بينعكس عليج


​

 

[Mary]

السلام عليكم ورحمة اااه وبركاته..
مشكورين كويتيات ع التفاعل و النصايح و اااه يعطينا ع قد نيتنا.
بالنسبة للي سألت إذا كنت أسكن بروحي أو مع بيت عمي. فالجواب هو: يس مع بيت عمي بس ف الطابق ال2. و بالنسبة للي سألت عن سبب كتابتي لكلمة اااه بهذي الطريقة،فالجواب هو: لأن هذي كلمة مقدسة،لها قدرها و ممكن مثلا تنحذف الصفحة فمش جيد ف حقها.و يمكن كمان حد يطبع الصفحة وتصير لها حسبة 2،و يمكن و يمكن..

ثانكس جدا..