شلون بشرتيهم بحملج

[Om_HoBi]

السلام عليكم
شلووونكم شخباركم


موضوعي حلو لكم
اللي حملت مره و 2 و 3 و 4 و ....

تقولنا شنو سوت اول مادرت انها حامل و شلون بشرة زوجها و اهلها و هل سوت مفاجأه ولا بس بالقووول


انا عن نفسي حملت مره 1
و بهالحمال اوووول ماحللت بالبيت جان اقول حق اختي و رفيجتي مصريه معاي بالدوام اني حامل بالواتساب ?
و ثاني يووم رحت حللت هرموني و كلش كلش ماكانت الطريقه حلوه اللي بشرت فيها ريلي ليلحين متحسفه عليها
كان مريض و نايم بالصاله جان اقعده و احط الورقه جدام ويهه و ماكان مستوعب و قلت له انا حامل و كان تعبان فماكان في ردة فعل :eh_s(16):

بس عاد مابي اشرح كل فرد بالعايله شلون درى ???

 

[New_bride]

احلل تحليل منزلي

ريلي يكون مترقب عند باب الحمام تكرمين
اما الاهل

اول مره صورت التحليل وطرشته حق اختي قلت لها شنو هذا

ماكنت مستوعبه ولا مصدقه
وبعدها خبرت امي وابوي وابو زوجي وامه

بس الحمل ماتم

ثاني مره كنا مسافرين مع اختي وزوجها
زوجي قال نروح الصيدليه نشتري التحليل
عاد من شريته رحت حللت واول ماطلعت شفت اختي بويهي جان اقولها انا حامل

حطيت التحليل بالجنطه ورحت قعدت عند ريلي وفتحت الجنطه شوي وخليته طالع
اول مانتبه هو عالتحليل طار من الوناسه وتم يبوس يدي قدام الناس


المره الثالثه حللت وطلعت ابجي من الخرعه وهو فهم شسالفه
واول وحده كلمتها ام زوجي كنت ابجي وهي متأثره معاي والحمدلله الله يتمم لي ولكل حامل

 

[taioba]

كانت متأخرة علي أسبوع سويت تحليل يوم الجمعة الفجر بعد ما صَلَّيْتَ وطلع لي خط واحد حطيته ورحت نمت
قعدت من النوم قبل صلاه الجمعه ودخلت الحمام بتوضا ونسيت الاختبار وانا اتوضا طالعت ولا خطين حمر واضحين
ما علمت زوجي قعدته من النوم لصلاه ورحت للمستشفى عشان أسوي تحليل دم وطلع إيجابي
رديت شقتي وقلت حق زوجي رمضان السنه الجايه راح يكون غير
جان يقولي ليش ؟؟
قلت له لان ولدنا ان شاءالله راح يجينا
طبعا انا بجيت واهو دمعت عينه وقعد نص ساعه يقول لي احلفي انج ما تجذبين
وبعدين رحت بيت أهلي معاي كيكه وقلت لامي شنو عندج الصيف الجاي
قالت لي ماكو شي
قلت لها زين عشان حفيدج بيجي بالصيف ان شاء الله
وأمي استأنست لان اول حفيد لها
وأختي قلت لها انا حامل جان تبجي :eh_s(11):
وبس اهل زوجي اهو دق عليهم وقالهم ودقو باركولي
وبابا انا دقيق عليه قلت له لان كان مسافر وأستأنس حيل رد جايب معاه هديه البيبي وأمي تقول خو تو الناس :ggdw:

الله يثبت حمل كل حامل ويرزقنا الولد السليم ويرزق كل محرومة الذريه الصالحة يارب :yaaaaaarb:

 

[صدفه نسيتك]

عن نفسي زوجي يكون وياي وقت التحليل بس مره سويت له مفاجاه حطيت ملابس البيبي بكبته الملابس وقعدد يضحكك و يضمني ..اما اهلي اقولهم وجها لوجه و بس رفيجاتي مايدرون الا لما يسالون والله يتمم علي يارب و عليكم

 

[tota77]

انا اول حمال لي .. حللت وحطيت ورقة التحليل بممية ياهل مع كرت عند مخدته

اول مادش عيونه طاحت عالمميه .. شعوره كان ( الكشره من اذن لي اذن )

بس قدر الله وماتم الحمل ...

بعدها حملت الحمدلله والبشاره كانت اني رحت حللت وكنت مشتركه بنادي دقيت عليه قلتله وقفت اشتراكي عصب .. جان اقول ترا انا حامل هم استانس وقالي ردي البيت وتركي النادي ;p


..

طبعاً الاهل ابلغهم بعد ماتاكد واراجع الدكتوره ..


عندي اهم شي ردت فعل ريلي ..

 

[gala q8]

ربي يتمم عليكم يارب ,

انا مو متزوجه بس ذكرتوني بمرت أخوي راحت حللت بالبيت مرتين و إنصدمت لان طلع لها خطين .. قالت لأخوي تالي قال لها بااجر من الصبح احنا بالمستشفى وراحت بيت امها حللت هم طلع خطين قالت لامها .. امها قالت لها لاا لازم أوديج مستشفى خاص الحين ما انطر لي الصبح .. وراحوا يحللون طلع صج حامل فأتصلت على أخوي بلغته و مسكين ما صدق يابها من بيت اهلها ..


ام مرت اخوي قامت على طول إتصلت على امي تبشرها مو مصدقه .. انا أمي يايه لي تركض تقول لي مرت " فلان " حامل الحمدالله .. الله يسهل عليها ولادتها و يثبت كل جنين فبطن امه يارب .. ~

​

 

[ام عبد العزيز م]

للرفع

 

[CuTe KuwaiTia]

أنا كنت قاعدة اتغدا مع ريلي بالبيت وتكرمون ياتني لوعة وزوعت الاكل و قاعد يضحك كان حاس و كان طايف على الدورة يومين فماكان في عنصر مفاجأة رحت العصر مستشفى السلام حللت وبشروني بالحمل الحمدلله ، تقريبا كان يدري وأهلي كانو مسافرين بشرت أمي بالوتساب كانت سالفتي عادية مو مثل الأفلام و الحين الحمدلله صارلي ١٣ يوم والدة الله يحفظ لي عائلتي الصغيرة اول بيبي لي حسّيت الوقت مر بسرعه و كل الحمال والولادة صارت ذكريات سبحان الله​

 

[لوولوو_88]

انا ما كنت متوقعة ولا زوجي لأنه ريلي كان يعالج و علاجه شهرين قالو بعده ممكن أحمل بس من أول شهر من العلاج تأخرت دورتي يومين و حللت بالبيت و طلعت حامل قمت اتنافض و أبلع بجيتي لا يحس زوجي هههههههه

و قلت بأجر احلل هرموني و ابلغ زوجي و فعلا تأكدت أني حامل و اختي العوده كانت معاي و أول من عرف

رحت الجمعية شريت جوتي بيبي و مصاصة و غلفتهم و حطيت التحليل الهرموني و كرت مكتوب بابا أحبك و الوعد شهر 9 أو 10 على مزاجي هههههه و حطيتهم بكرتون

المهم قبلها بفترة ريلي شرالي موبايل بدون مناسبه فقلت له ابي ارد لك الهديه و صدق يا حرام هههههه

بطل البوكس بغا يقرأ الكرت قتله لاااااا بطل الهديه اول ههههه

بطلها @@ مو مستوعب فجأه بقق عينه قالي حاااامل قتله أي و انا مهستره ضحك و ابجي يقولي جذاااااااابه جذااااااااابه شلووووون و متى و ليش خشيتي هههه من الصدمة مسكين و كنت اصور فيديو

و بس غورقت عينه و لمني و سيده بشر أمه من فرحته و انا رحت لامي و بشرتها ♡

و الحمدلله على عطاياه كاهو ولدي الله يحفظه عمره 4 شهور

ربي يرزق كل من يتمنى ♡

 

[taioba]

لولو الله يبارك لج فيه ويخليه لج اذكر كنتي معاي بتجمع عرايس اغسطس 2013 :eh_s(17):

 

[مستشاره قانونيه]

حزتها كنت مسافره بالصيف بلندن وتاخرت وقلت حق زوجي اشترلي تحليل وراح الصيدليه وخذالي تحليل ويابه الفندق عاد اهوا ناطرني ولا يطلع في حمل وحده استانس وقام يضحك مومصدق بعد عمري وراح الصيدليه يتاكد اذا صح ولا لا وكان اول حمل لي وصورت التحليل واطرش حق امي واختي بالواتسب بتأكد ويباركون لي بس للاسف والحمدلله على كل حال يافرحه مااتمت ماتم 3 شهور وقف نبض البيبي وسويت تنظيفات ان شاء الله ربي يعوضني قريبا وابشره باذن الله ,كل شي خيره

 

[لوولوو_88]

يا حلوج يا طيوبه كان عرسي 30/8 ههههه .. آمين حبيبتي جزاج الله خير

 

[Om_HoBi]

Up
Up
شاركوووونا

 

[deeeh82]

اول مرة حللت وطلعت حامل كان سنه 2009 طبعا كنت مع زوجي وسبحان الله كأني حاسة قبلها بكم يوم كنت في مستشفى مبارك بس مادري ليش نسيت وكانو بيسوونلي اشعه بس انا قلت حق دكتور الاشعة اني يمكن اكون حامل واخاف اسوي اشعه ، عاد بعد ما خلصت من مستشفى مبارك رديت البيت وحاشني صداع وكنت باخذ بندول وسبحان الله هونت مادري ليش ياني احساس اني ما اخذه، عاد اقولكم لمه سويت التحليل و طلعت حامل قالتلنا موظفة المختبر مبروك المدام حامل، انا طبعا هدوء ماستوعبت، وريلي مسكين من الوناسة تغير لونه ، عاد اول ما ركبنا السيارة دقي على امي واهيا في لبنان جان اقولها اني حامل ، طبعا انصدمت من ردة فعلها لانها العادة اذا استانست اتيبب بس هالمرة ما يببت، عاد انا عصبت جان تقولي: اي حبيبتي انا الحين عند عمتج اكلمج بعد شوي، جان اطخ . المهم لمه ردت البيت دقت علي جان تيببلي حبيبتي. ودقيت على اختي جان تستانس حبيبتي.


المرة الثانية تاخرت علي الدورة ١٠ ايام جان اروح المختبر مع ريلي ونفس الشي بشرونا وبعد دقيت على امي وابوي وبشرتهم واستانسو

المرة الثالثة طولت على ما حملت تقريبا ٣ سنين، بس ما الله قسم ، رحت موعدي بالمستشفى وقالي الطبيب مافيه نبض وسويت تنظيفاتي بمستشفى الولادة.


ادعولي بنات الحين ان الله يهون علي لاني بهالحمال وايد وايد وايد تعبت، والله يسهل على كل وحدة حامل ويرزق كل محرومة يا رب ،،،،،