شنو احسن دوا يذوب البلغم حق الياهال

[ombaza]

شللونكم بنات
يا رييت تقولون شنو احسن دوا حق البلغم لانه فييه الف نوع ونوووع
وشكراااا

 

[جمانه]

مشاركة: شنو احسن دوا يذوب البلغم حق الياهال

والله والله يا ام بزه


كنت اليوم ابي انزل موضوع عن هالشغله بالذات

لان بنتي لا تنام ولا تقعد ولاهي مرتاحه ...........على هالحال صار لها ايام

وان شاء الله البنات يفيدونا

 

[Maltesers]

مشاركة: شنو احسن دوا يذوب البلغم حق الياهال

والله انه ولدي اول ما نولد قالولي استخدميله ( بمبر ) ناشف وشريته من الحواي والحمدلله راح البلغم والبمبر وايد زين حتى حق الكبار

و لمن كبر اشوي استخدمت له تحاميل حق البلغم واااايد زينه ..


هذي الادويه احسن شي جربتها .. وان شالله البنات يفيدونج

 

[بريسم]

مشاركة: شنو احسن دوا يذوب البلغم حق الياهال

انا ولدى كان صدره تعبان و مليان بلغم لما كان صغير و على طول كله منوم بالمستشفى

ليما لقيت له العلاج المناسب :

لما يكون تعبان و اوديه الدكتور و يقولى لازم كمام كل 6 ساعات كنت احط كمام مرة واحدة و لما ارد البيت أطحن حبة سوداء و اخلطها مع زيت زيتون اصلى و اسخنها شوى على النار و أدهن صدره فيها و ظهره و أغطيه عدل عشان ما يبرد ... و أكرر هالشى مرة ثانيه الظهر لما ينام و على حسب شدة البلغم كل مرة ... مرة يحتاج مرتين و مرة ثلاث مرات بس و عقبها يقوم من احسن ما يكون بلا كمام و لا شى

و الشى الثانى اعطيه ملعقة عسل اصلى مع الحليب الصبح

اذا كان الوقت شتاء فيكون مرتين الصبح و الليل

و اذا كان صيف مرة وحدة بس

و الحمدلله و الشكر استغنيت عن الأطباء و المستشفيات و الكمام

و فيه دواء للكحة انصح كل الامهات فيه لازم يكون على طول بالثلاجه للكبار و الصغار

هو بالعسل و الاعشاب .. ما ادرى شسمه بس اقول للصيدلى عطنى دواء الكحه ابو وردة

و فيه نوعين بوردة حمراء و بورده خضراء نوع للكحه الجافه و نوع للكحه ببلغم

و فظيع صراحه يغنيج عن روحة الطبيب

 

[حبيب قلبي]

مشاركة: شنو احسن دوا يذوب البلغم حق الياهال

فى دوا بالصيدلية ما اذكر اسمة بس اهو على القرشة اورقه خضرا وايد زين ينفع وما يضر انا على طول استعملة حق عيالى

 

[كويتية بالغربة]

مشاركة: شنو احسن دوا يذوب البلغم حق الياهال

انا استخدم حق ولدي دوا الكحة اللي عليه وردة وهو اسمة (melrosum)
ودوا البلغم اللي اسمه (Rhinathiol) والحمد لله زينين
وما استغنى عن الاعشاب وخاصة ورق الجوافة والزيزفون الدكتور وصاني فيهم
والحين وين مااسافر لازم الاربع اشياء هذي معاي

 

[DioRa]

مشاركة: شنو احسن دوا يذوب البلغم حق الياهال

حبيبتي جربي بروسبان النقط اهوا من الاعشاب ومافيه كيماويات انا استخدمته حق ولدي وماشالله خلال يومين ماكوشي