شنو اهم المواقف الي تذكرينها بالغزو

[qomerq8]

[/CENTER]السلام عليكم
شلونكم شخباركم

الموضوع ومافي ان كل وحدة فيكم تقول شنو أكثر قصة تتذكرها أيام الغزو قصة تبجي :0bee2e8d89:أو تضحك:dddds: أو أي موقف شافته أو سمعته
يلا ورونا ردودكم الحلوة​

​

يا أحلى بنات​

 

[بنتq8]

موقف يبجي عمري ما انسااه واتذكره داايم جدام عيني ووقت اسرووه ابوي ويدي يبجي بحوش البيت وقت درا بالخبر


بس الحمدالله ابوي رجع بسلامه

 

[qomerq8]

يعطيج العافية حبيبتي
والحمدلله على سلامة الوالد والله يطول بعمره

 

[Hello_kitty]

ذكريااااااااااااااتي بالغزو يبيلها مجلدااااااااااااااااااات

بس ابرز شي في بالي لما بشهر اكتوبر على ما اعتقد اعلنوا ايقاف التداول بالعمله الكويتيه واستبدالها بالعمله العراقيه

وكنا طالعين بالسياره مع امي وابوي وبالضبط في الشارع اللي بين سلوى والرميثيه وكان كله بسطااااات وبياعه

واحنا نمشي بالطريج فجأه شوي شوي نشوف الشارع مليان فلوس كويتيه مشققه ومقطوطه على الأرض

واححنا ما ندري شسالفه ولا كنا سامعين عن الإعلان

وجدامنا نقطة تفتيش وسأل العراقي ابوي معاك فلوس كويتيه؟ قاله ابوي لأ

فتش مخابي ابوي ولا يلقى عشرة دناااااااااااانير جان يمسك دشداشه ابوي ويسحبه من صدره

ويخزه واهو يصرخ تدري هذي شنو عقوبتها ؟؟تدري شنو عقوبه اللي يتعامل او يكون عنده عمله كويتيه؟؟

عقوووووبته الإعداااااااااااااااااااااااااااااااااااااااام!!!!:krkrkr:

ومسك العشره وشققها نتفها وقطها تحت ريله وداسه بالجوتي حيــــــــــــــــل

حسبي الله ونعم اوكيل فيهم هالموقف وايد عور قلبي ومادري ليش دمعت عيني وقتها مع اني كنت طفله

حسيت بالذل بالمهانه ابوي ساحبينه من دشداشته ويهدده بالإعدام وفلوسنا الكويتيه:q8: رمزنا مشققينها وقاطينها بالشارع تنداس جنها ورقة كلينكس!!

 

[الغاليه نونو]

انا حزتها كنت مطلقه وعيالي كلهم معاي <<< صامده بقوه "

هذاك اليوم نادتني امي جان تقول لي حريجه يمه اشكبرها ودخان موطبيعي رحنا فوق السطح والا شنشوف دخاان من صوب الجابريه جان اقول حق امي بدق سيارتي سلف بروح الجابريه بشوف شسالفه امي قالت نطريني انا بروح معاج والله ونرووح والا بيت دشتي حارقينه العراقيين والكويتيييييين اهل الجابريه كلهم واقفين طاقتهم البوهه موقادرين يسوون شي خنت حيلي المهم عقبها قلت حق امي يالله نرجع البيت المهم ركبنا السياره وبطريجنا والا زحمه مووووطبيعيه المهم علي ما يانا الدور جان يقول العراقي ولجججججج انطيني البوطاقه قلت هاك ونطت امي جان تقول له ترا انتو مللتونا واذيتونا بهالزحمه جان يرد جبح ويهه يقول حق امي هااااااااااااااااااااا هسه احنا اذيناكم يالله ولججججججججج طبقي مناك = يعني سفطي يمين
رحت سفطت وانسفطت مصاريني من الخرعه واقول حق امي زين لج الحين شيفكنا من هالكاولي سببتي علينا
يانا الكاولي جان يقول حق امي اقول خاااله انتي وين بيتج جان تقول له قريب عطنا بطاقتنا خلنا نروح قال حق امي الحين نوصلج انتي البيت ونريد هاى ام لسان طويل نوديها نأدبها ونقصر لسانها وانجيبها
وانا مبققه عيني من الخرعه بس مسويه نفسي بطله
جان اقول له انا اوصل امي وارجع لكم بس وخر خلني امشي قال لا عيني المأمور يقول ناخذج والحجيه نوديها البيت برسم الخدمه
انا طبعا تشهدت علي عمري ووصيت امي علي اليهال وقلت لها عيالي امانه برقبتج امي تصيييييييح فديت قلبها جان تنزل وتروح حق المأمور علي قولتهم وتقعد والله سااااااااااااعه ونص تترجااااااه علشان يطلق سراحنا ههههههههههههه حسسسسبي الله علييه وعلي عمره
جان يقول حق امي شووفي هسه اخليييج بس والله لووشفتكم نوبه ثانيه اطبق عليكم السماوات طبق عزرائيلكم انا اجيبه بيديااااااه

امي قالت له مايصير خاطرك الا طيب
تالي قال لها اشعدكم بالسياره من فلوس امي يت بطلت جنطتي لا احم ولا دستووور وخمطت كل اللي بالبوك وعطتهم ياعله زقووم في بطونهم
وركبت امي السياره جان تقول ريلج عالبنزين ودوسي بسسسسسسسسرعه عالبيت
والله مادري اشلون وصلت البيت وعلي طووووووول من دخلنا البيت سجدنا سجدة الشكر وقلت حق امي حريمتج اوديج مره ثانيه اي مكااااان بغيتي تودريني واتيتمين عيالي هههههههههه


وبعدين اقول لكم موقف ثاني ياكثر المواااقف كثراه"

 

[Q8 programmer]

السسسلام عليكم
والله الغزو فيه مواقف وايد مو شويه
بس اكثر شي انه انا كان عمري 7-8 سنين
من خرعتي من صدام ماكنت انام وعيوني مصكره كله مبطله عيوني واتخيل ظل صدام بالطوفه
ودوني مطوع يقرا علي مانفع كنا بسعوديه وظليت انا وعيوني مبطله وهالشي سبب لي اني البس نظارات وضعف نظري
والخرعه ظلت فيني لي رابعه ثانوي ماانام بروحي او بالظلمه بس حاليا ويييه راحت هالخرعه من زمان
ولما موتوا صدام اهلي قالوا لي شوفي مات لا تخترعين بعد مع انه كانت رايحه مني الخرعه
بس صج معاناة
بس الحين كبرت ونسيت وصرت انام بروحي

 

[ورده بنفسجيه]

اول الغزو برميثيه كنا ساكنين وطلعنا شايلين الاعلام اكثرنا حريم وبنات وعيايز والرياييل دار مدارنا بس من بعيد احنا قلنا لهم ما نبيكم

وشايلين الاعلام وصور شيوخنا ورحنا عند الدوار الصغير اللي يم الهارديز الحين وهم ساطرين بدباباتهم حسبي الله عليهم

وساكتين عنا يضحكون علينا الله لا يوفقهم ولا يوفق الحي فيهم يقوم وينقز كويتي عمره 16 سنه ويسب فيهم ويصرخ والله جان تيييله رصاصه

برقبته ما اشوف الحريم اللي غشيانه واللي طارت ولدي ولدي والشجر اللي بالشارع طاح من الرصاص اللي رشوا علينا

الله لا يوفقهم ويقولون انسوا وين ننسى

 

[Q8_QT]

​

والله المواقف اللي تبجي وااااااايد
بس اللي ماانساه يوم خذوا ابوي من جدام بيتنا وكنت واقفة يمه وقتها كان عمري 12 سنة
وماأنسى امي بعد عمري شلون تبجي واعتزلت الكل ليما الحمدالله رجع بالسلامة
ياقلبي كان شكله يعور القلب طاقها مشية من شرق مكان اسره ليييييي بيان مشي علي ريوله خاف لايذبحونه جدام عيونه
طبعا مايبيله لحظة اللقاء لاتنسى حددددها مؤثرة
واسعد اللحظات يوم التحرير ويوم رجعنا بيتنا لأن بعد اسر ابوي غيرنا البيت فكانت ردتنا بيتنا اجمل حدث بعد التحرير

 

[&رعبوووبه&]

والله الصراحه احنا كنا مصيفين بمزرعة ابوي باحد الدول العربيه وصار الغزو واحنا برى الديرة

وبعدها رحنا للسعوديه

والموقف اللي مستحيل انساه اني كنت راح انخطف لولا ان الله ستر باللحظه الاخيره

وطلع ولد ييرانا الله يرحمه واصرخ على الشباب اللي ساحبيني للسيارة دزوني وانحاشوا

ايام سووودة

 

[ii DareeN ii]

مكرر