شنو طريقتج برمضان؟؟؟

[Ms. luxury]

السلالم عليكم ورحمة الله وبركاااااتوهو...
حبيباتي حريم كويتيات السنعات ...شنو جهزتوا حق رمضان أقصد أغراض الجمعية ..
أنا كل سنة أدخل الجمعية وزححححمة وأخب نفسي وبالأخير أرجع كل يوم أو يومين أدخل الجمعية على غرض ناقص أكلة معينة ومادري شنو!!!! وأتعب زوجي كل يوم في إحضار هالشغلة اللي ناقصتني .
وبما أن طريقتي أنا ماأكود أطباق و60 صنف ..فقط مثل غدانا بأيام الفطر العادية الطبق الرئيسي <<هذا بعد مانصلي المغرب .أما قبل الصلاة(أول مايأذن) شوربة وتمر وماي وإن اشتهينا سمبوسة وكبة ..
والصراحة اللي سويته فقط اني طحنت الهيل علشان أسوي المحلبية والقهوة وبر الوالدين والأشياء اللي تحتاج هيل نسويها وايد برمضان وناكلها على الساعة 10 جذي والسحور كل يوم عيش ولبن وأحيانا بيض وخبز وتفاح لقطع العطش وناوية أسوي غرشة كبيرة أجهز الشيرة فيها بس مادري ليش تقطن الشيرة عندي وتطلع بلاوي داخلها لأني أخليها برا موبالثلاجة مع ان بيت أهلي أشوفهم يخلونها برا ومايضرها شي ماشاء الله
هذا أنا قلت لكم اللي سويته واللي بسويه وأتمنى كل واحدة تقولي طريقتها خل نستفيد من بعض يمكن تعجبني طريقتج وأسويها

 

[تيم]

عليكم السلام ورحمة الله وبركاته

هلا أختي حياج الله

أنا طريقتي تقريبا مثلك

ما أشتري قبل رمضان من السوق إلا اللحم نصه أخليه مفروم ونص عادي للتشريب والرطب السكري بس

الناس قبل رمضان يصيرون مثل الميانين !!! زحمه الجمعيات مادري ليش كأن الثلاجة فاضيه

الشغل السنع أن الوحده تعرف شنو تبي تسوي برمضان كل يوم بيومه

أنا عندي جدول لكل رمضان بس مو كل شي اسجله، أسجل بس الزيادات على وجبة اليوم

فوجبة اليوم : تشريبة، شوربة، سمبوسة أسوي عجينتها بنفسي قبل رمضان بأيام، وكبة ألفها بنفسي قبل رمضان بأيام بعد ، والقيمات ضروري كل يوم ريلي ما يعرف بدونها ، والسلطة ، والعصير ، وأهم شيء التمرية بطريقتي الخاصة ولبن البقر الطازه

هذا كل يوم ما يحتاج أسجله بالجدول

لكن الزيادات تكون مثل الهريس واليريش والحلويات مثل الجلي والمحلبية والكريم كراميل وغيرها هذي أعرف أي يوم راح اسويها فأطلبها بوقتها من ريلي يشتريها

أما السحور فناكل بواقي الفطور حرام ينقط ، مو مهم شنو اللي بقى المهم ينوكل الموجود ، فريلي حريص على أن ما ينقط شي من الأكل ومرات عيالي يبون بيض أسويلهم

وسلامتكم

أسأل الله أن يبلغنا رمضان ويعينا على صيامه وقيامه ويتقبل منا إنه سميع مجيب

 

[جارة القمر]

وأنا لحد ألحين ما سويت شي غير الكبب والشينكارا


ولا شريت ولا شي


ما أدري ليش مالي خلق المطبخ


أنا بالنسبة لي فطوري تمر وماء وشوربة وساعات كبب


ما اشتهي اكل لم أقعد علي الفطور


بس من تصير الساعة 10


ودي أكل كل اللي بالمطبخ


وأنا بيت حمولتي يحبون التشريب والبلاليط غير جذية ما يبون علي الفطور

 

[املاك ss وافي]

احنا طريقتنا بالسعوديه مو كلنا انا عن نفسي اول مايأذن اكيد تمر وماي وقهوه وروب ولقيمات وبعد الصلاه شوربه واللي انا مسويه من فطاير ومقالي وبس والساعه 1 نسوي رز ويكون بعد سحور بنفس الوقت اما غيرنا لايحطون كل شي على الفطور وياكلونه مره وحده

 

[Ms. luxury]

مشكورين بنات ...تصدقين أملاك طريقتج عجبتني ..
ودي أسويها باقترحها على أبونا!!!!!!
موصح قلت لكم ماني داشة الجمعية ولاني مجهزة هالسنة؟؟!!
اللي صار ان أمس قاعدة أنطر رقمي يوصل بمستشفى هادي وشوي إلا ريلي قال خلينا نقضي شغلنا وطلعنا ومادري اشلون وافقت اني أدخل الجمعية معاه بس شنو هذا اشدعوة كأن الجمعيات بتسكر برمضان أو كأن يايتنا مجااااعة :جمعية الفيحا أنا أتكلم عنها كلها عرووووض وأواني هدايا مع اللي تشترينه وخبة والناس اشكثرهم ودور على المحاسب الله يستر عيل ليلة رمضان شنو بيصير؟؟!! ودي أمسك الكاميرا وأوقف أصور بليلة رمضان عند جمعيتنا !!!!
بس أنا الحمد لله ماكثرت بس شريت ماجلة الشهر لأن كل شي خالص عندي أساسا
......
وموفقين وتقبل الله منا ومنكم مقدما

 

[جارة القمر]

أي والله الجمعيات


زحمة موت


وحتي السوق

 

[ضحكة الدنيا]

انا ان شاء الله بروح اليوم اجهز كل شغلى حق رمضان

ومبارك عليكم الشهر مقدما

 

[أم عزيـز]

قبل رمضان اشتري الشغلات الرئيسيه

مثل الدياي واللحم والزبده والكريما والبصل والثوم والطماط والزنجبيل
والشوربات والمعكرونه وطبعا الكريم كراميلا والجيلي والتمر والدهن

بس الشغلات اللي اشتريها برمضان الخضره بجميع انواعها ما عدا البصل والثوم يكون عندي من فتره
بس الخضروات الورقيه اشتريها بحزتها وهم الروب واللبن بحزته عشان ما يخترب
والخبز الرقاق او الصاج اشتريه بحزته

بس ابتدي اجهز الشيره من الحين حق القطايف وصب القفشه واللقيمات
والكبب طبعا اكون شاريتها قبلها بفتره والسمبوسك بعد

 

[هيبة ملك]

رمضان بس أنا وأمي

فنشرب قهوة وتمر وأي شئ بسيط

بعد التراويح ناكل خفيف شوربة

فطاير أي شئ


ونقعد نسولف وأنا أجهز شغلي حق الدوام

عال12 أسوي عشاء تتعشى هي وتنام

وأروح أنام أنا وأصحى عالسحور قهوة وشاي

ولبن

وهذا هو روتينا

 

[هيبة ملك]

صج

ماشرينا شئ غير الضروريات مثل اللحم

والتمر

والباقي مقدور عليه خل تخف الزحمة شوي

 

[أم حيدر]

هالسنة تجهيزي غير

ولا شي زيادة الطريقة الاعتيادية الشهرية - ولما احتاج شي بروح اشتري

والله حرام نشتري بهالاغراض ومانستعمل وعقب ما نسوي تنظيف وجرد بعد جم شهر كله انتهت صلاحيته

الاساسيات فقطططططططط اللحم مفروم وكفته اهم شي وكرتون دجاج وكرتون صدور دجاج وكان الله غفور رحيم

اي نسيت ولفيت كبة وسمبوسة

 

[autointoxication]

السمبوسه بأنواعها غير جذي اي شي ينقصنا نشتريه بحزتها

 

[srsr]

انا بالنسبة لي مااتفطر في بيتي يوم بيت اهلي ويوم بيت اهل زوجي فاشتري الجيل العادي مثل كل شهر والجمعية موجودة لابغيت شي رحنالها
مادري ليش الناس يانه على اغراض ارمضان اصلا برمضان الأكل بقل من 3 وجبات الى وجبة وحدة يعني لازم ايجيلون اقل من كل شهر مادري هذا رايي

 

[روزالكويت]

انا ريلي بيفطر مع ابوه واخوانه كلهم جذى عادتهم كل سنه وانا بعد بفطر عند امي او عند اهل ريلي وما احتاج اشتري حق رمضان لاني بروحي اطبخ حق منو اللهم طلبت كبب وسمبوسه ورول خضار جاهزين للقلي حطيتهم بالفريزر حق الزواره واذا ابي اسوي حلو او طبق بشتري مقاديره قبلها بيوم وبس شحقه التخزين اللي ماله داعي وتنتهي صلاحيتهم بسرعه وبس ياقلبي..

 

[*ملكة*]

أنا عادى ما أجيل الا النواقص .. برمضان فطورنا شوربه وقهوة ووتميرتنا ونقوم نصلي وعقب نحط ان جان في عيش او كبب او سمبوسه او مكرونه اى شي او نقصة من احد اللى متوفر حزتها

بنات في ناس يجيلون بالهبل وتشوفون الزحمة ما يحتاج اقولكم .. بس تدرون هذولا شيسون هذولا الاغلبيه عندهم افطار صائم او موائد رمضانيه خيريه .. أو تكون العايله على طول عندهم يوميا يعني البيت العود .. وهلم جره .. يعني مساكين مضطرين يجيلون حق عدد كبير دوانيه وحريم وجهال والباجي انتو ابخص فيه .. والله يتقبل منا ومن الجميع ومبارك عليكم هالشهر الفضيل .

 

[Ms. luxury]

اي والله بنات أحسن خلكم جذيه والله الوقت يضيع باعداد الأطباق المنوعة واللي أغلبها يزيد ويقعد بالثلاجة جم يوم وينقط..
الحمد لله يعني كلكم ربات بيوت سنعين ..
أنا الحين ريلي يقول بنغير طريقتنا هالسنة ..أول مايأذن نفطر تمر وماي وشوربة وبس وبعد صلاة المغرب شاي وقهوة لأن يقول كل مرة يطفح من الفطور الأول وبصلاة التراويح يتعب ويدوخ فطلب ان نخلي الطبق الرئيسي (جان عيش أو صينية بالفرن أو غيره) نخليهم بعد التراويج تقريبا تكون المعدة فاضية ومتهيئة وتتقبل وطريقتنا في الوجبة الرئيسية كل مرة بس صنف واحد..
وعندي بنيتي هالسنة ودي أصومها خل تتعود كل مرة بس أنا وريلي وودي هالسنة أعلمها تصوم بس أيام المدارس بفطرها ..تهقون طريقتي صح معاها.

 

[قمر ضاوي33]

والله ما شريت ولا شي ابد

الفطور مع حمولتي لأني ساكنة عندهم واذا بسوي طبق اشتي اغراضه بحزته الجمعية مهي طايرة

والسحور عيش ابيض ولبن

 

[زري منثور]

والله احنا برمضان تنزل أمي السوق وتجيب كل الأغراض اللي ممكن نحتاجها بالشهر

لأن احنا تصير عند عزومات خصوصا" أخواني يعزمون ربعهم بالدوام

وبالنسبه للشيره ياقلبي أنا اسويها واخليها بعلبه وتبقى من أسبوع لأسبوع ونص

ولايتغير فيها شي بس انا أحفظها بالثلاجه وخصوصا" مع حرارة الجو الحين المفروض مانترك شي بالمطبخ

لان الحراره تغير الطعم

 

[سفيرة العشق]

والله انا طريقتي اسوي جرد اول بأول

وقبل رمضان بيوم احشي السمبوسة واثلجها

وازهب الشيرة

وبس ما اكثر
العام ريلي اشرى كرتون خبز رقاق وحرام انقط

هالسنه قلتلة انا اللي بمسك ماجلة رمضان خصوصا ان مافي احد ا انا وزوجي وعيالي الصغار

وريلي اكله خايب

نظامنا اول ما يأذن نشرب ماي وتمر ولبن

وبعد الصلاة نحط فطورنا مو مو ثقيل يعني تشريب وشوربة وسمبوسة وبطاط

وبعد صلاة التراويح عاد نحط الحلو والقهوة ...

بس احس ماله داعي هالخبة

حرام الاكل ينقط كل يوم ....

ومبارك عليكم الشهر

 

[**أم السنع**]

بالنسبة لي آنا عند حمولتي وما اجهز الا الشي الضروري يعني الشهري واللي ابيه ابو الشباب يجيبه من الجمعية حزتها ماله داعي التكود والهوشة عند الكاشير ليلة رمضان
ومبارك عليكم الشهر