شورو علي من ارضي امي ولا زوجي

[جنون الهوى]

سلام عليكم
مبارك عليكم باقي الشهر
ابي رايكم
اخت زوجي بتتزوج بعد العيد
واخت زوجي راعيه مشاكل وبلاوي دايم مشاكل مع اخواها>>زوجي<<
ما تحترم اخوها:rgewrg:
حتى قدامي لسانها طويل عليه


قلت لزوجي ابغى فلوس علشان اجهز عمري لزواجها واشتري لها هديه طبعا
تخيلو زوجي راافض يقول ماراح اعطيك فلوس وماراح تحضرين الزواج
وش اسوي انا عن نفسي مابي احضر الزواج
بس امي واخوتي يقولون الا احضري هذا اول زواج عندكم لان خوات زوجي كبار في السن ومابعد تزوجوا ماتزوج فيهم الا وحده وهذي الثانيه
امي حلفت تقول انا بعطيك الفلوس اللي تبينها لك ولهديه حماتي
وزوجي حلف اني ما اخذهاا وانا ضعت في الطوشه بين حلفين
المشكله لو انه بخيل بقول بس اهو يقوول ماهمتني الفلوس
لو تبين نروح نسافر وقت الزواج ماعندي مشلكه ​

شورو علي من ارضي امي ولا زوجي​

 

[ربي سبحانك]

الصراحه انا انصحج انج تطيعين زوجج حبيبتي

 

[الـوايـلـيـة]

مايبيلها تفكير اكيد تطيعين زوجج
اخته واهوا ادرى والمفروض اهوا يلزم عليج تحضرين بس ماتدرين شصاير بينهم اذا انتي تقولين جدامج لسانها طويل من وراج شلوون
اريح لج بلا مخاسير بلا عوار راس

 

[جلكسيه اس 3]

امبين زوجج مو كاره اخته الا حاقد عليها
انا من رايي لا تروحين واذا اسالو قولي ما خلاني اروح
و حتى اذا اسالوج افلانه تزهبتي قوليلهم انه مو راضي
بجذي محد راح يقدر يتشره عليج

 

[opera]

الحل عطاج اياه ريلج

سافري معاه وقت زواجها

ليش محتاره


وهذا احسن حل .. بس عاد مو تسافرين نفس يوم زواجها لااا .. سافري قبلها وردي عقبها ..

 

[سنااااي]

خلاص سافري محد نافعج اذا خسرتي زوجج لا امج ولا خواتج ولا حماتج..... وحماتج بذاك اليوم مدرت عنج حضرتي والا ماحضرتي.....

أم شــــــــــــــــي زوجج لاتكســـــــــــيرين كلامه وامج عادي تعذري لها وحتى لو ماسفرج تعذري بأي شي قولي كنت تعبانه وحاطين لي مغذي او اي شي .... امج ماراتنفعج اذا خسرتي زوجج وخاصه اذا مو مقصر معـــــــــاج سارفري...

 

[بيتي بوب بس كويتيه]

قولي لامج ألي يبيه ريلج وخلي اهيا تكلمه اذا تبيج تروحين وملزمه
واذا ما رضا روحي سافري واستانسي احسلج

 

[ظل الياسميـن]

خلاص اسمعي
كلام ريلج وسافروا

ابركلكم
عشان اذا صار شي بالعرس بتقول
كل من سبة مرت اخوي سوت جذي وليش ماسوت جذي

ابعدي عن الشر وغنيله
وروحي استانسي ابركلج

 

[صادقة بكلمتي]

والله حبيبتي رضا الوالدين من رضا الله بس بصراحه امج ما عندها سالفه يعني ريلج ادري باهله واخته ودام مو بخل وبسافرج انا اقول زوجج ابرك امج لو زعلت موجودة وبترضا ولازم الل يهديها تكون خايفة على مصلحتج مع ريلج اكثر من اي شي لا انا اقول طيعي زوجج هو باقيلج شتبين باخته وترا انتي تتبعين شوره ما عليج ملام يعني انا اقوللللللللللللللللللللللل ساااااااااااااااافري وفرحي وفرحي زوجج واخته الله يستر عليها ويتمم لها ويستر على جميع امه سيدنا محمد عليه افضل الصلاة والسلام

 

[جوري 2007]

مايصير تروحين وهو مو راضي بس انتي حاولي تقنعينه بالكلام الحلو

قوليله موحلوة جدام الناس اني مااحضر ويدرون انك مانعني من اختك !! قوليله صير احسن منها وهذي اختك من لحمك

ودمك ومن هالكلام ،، واذا عند فكرة السفر حلوة ،، منعا للاحراج ،، الله يهديه ،، ادعيله

 

[غلات اهلها]

انا اقول حبيبتي انه تسمعين كلام زوجك ممكن تسافرين على راي زوجج و امج مو عايشة معاكم عشان تعرف الوضع

 

[موج-البحر]

دقي عليها وباركيلها وتعذري لها باي شي وطيعي زوجج والله يهديكم

ونصحيه ان قطااعه الرحم مو زينة حراام

 

[LuLiTa]

انا اقول بهـ الامور شورج بـ ايد ريلج ... و هذي اخته و اهو ابخص فيها فـ اذا قالج لا تروحين فـ لا تروحين ... اذا صار شي بينج و بين ريلج ما راح تنفعج حماتج و عرسها... و اساسا اهي مو داريه عنج حضرتي ولا لأ


الاحسن سافري انتي و ريلج ابركلج

 

[ام فواازي]

سافري مع زوجج ابركلج وقولي لخالتج ان ولدها مو راضي انج تحضرين العرس عشان ماتزعل

 

[اميره1980]

انا اقول طيعي زوجج احسن و بنفس الوقت لا تبينين حق امج انج منتي رايحة العرس و حزه العرس سوي روحج مريضة و اعتذري عن حضور العرس و زوري العروس في بيتها قبل العرس و باركي لها و اعتذري لها باي عذر عن عدم حضور العرس

 

[*سحآبة*]

إسمعي كلام زوجج
وطنشي ... مو شرط تحضرين عرس اخته !

 

[om_7amad]

انزين ليش ما تسافرين قبلها وعلى بو انه بتردين بنفس يوم عرسها،وسوي نفسج انه طارت عنكم الطياره او مافي حجز او اي شي و ردي بعد زواجها

 

[مولاي الفرج]

اللي يقوله زوجج سويه ومحد بيشره عليج

 

[أم راشد المطيري]

انا اقول سمعي كلام زوجج وسافروا

 

[الـــغـــلآ]

على فكره

البنت لازم تطيع امها و ابوها بس اذا تزوجت لازم تتقدم كاعة زوجها على طاعة امها و ابوها

يعني تسمعين كلام زوجج فهمتي

ومعروف ان الزوجه تطيع زوجها بكل شي الا فيما يعصي الله


وانتي كلمي زوجج قوليله مو حلوه اني ما احضر شنو بيقولون عني


وانتي بالنهايه ما تدرين الخيره وين يمكن يكون هالعرس فيه شر لج


انا لو مكانج اسافر قبلها و ارجع بعدها و اتعذر ان توهقت هناك و تاخرت غصبن علي