صعبه حالتي ...

[أمل q8]

مساء الخير




شلونكم خواتي والله يشهد علي أني صايره أشتاق لكم وأرتاح أني أشكي لكم والله يعينكم علي يارب :eh_s(17):


مشكلتي خواتي هالمره حدها مأساويه وتحتاج لعلاج نفسي سريع وفتــــــــــــــــــــــاكـ.






مشكلتي هالمره عقلي بتقولون شفيه عقلج أحسه عقل ياهل وماراح يكبر تفكيري محدود بأمور الحياه وأي مشكله تمر علي هالأمور بتقولون شلون ماوراي شي أشرحلكم شلون بس عفيه بنات لاتضحكون عطوني رايي وريحوني الله يفرجها عليكم ..


عمري علي مشارف الثلاثين مشكلتي الوحده بس بداري قاعده مالي أحتكاك بالبيت وحتي لو بحتك فيهم حريم أخواني وكل وحده لاهيه مع ريلها وعيالها فصرت أسيرة هالدار وقامت أتعيشني بأدوار والله بنات أقعد أتخيل أني أحب واحد وأسولف معاه ليما أستسلمت للأمر وأحطه علي محطه عندنا وأحصل مذييع وأحصله بتويتر واقعد ألاحقه ليما أخذت رقمه وسولفت معاه كانت نيتي زواج الشهاده لله بس عقب شفته شخص حشاكم واطي وسوالفه كلها بالخرابيط وقلة الحيا بصراحه لاعت جبدي مني وخليته يولي عقب رديت أنزويت علي نفسي وعشت أسيرة خيالات تعبتني أدري بتقولون حاولي تطلعين من هالجو وحاولي تشتركين بمعاهد حاولي تطلعين مع رفيجاتج كل هالجو سويته تخيلوا أقعد أتخيل أنه يشوفني وطالعه معاه أو وأتسوق أنا وياه أو تصير أحداث بدوامي أقعد أسوي نفسي أتناقش معاهم سوالف مالها معني حييل تعبتني عسي الله يرزقني بالزوج الصالح يارب ويرزق بنات الحلال ترا الحمدلله أصلي وأذكر ربي وكل صبح أحب أقرأ وتر من القرأن الكريم بس صج تعبانه ...





وماتقصرون بأذن الله ...

 

[Tom ♥ Jerry]

.


مشكلتج ما عندج يا ابيض يا اسود !

يا انج تنعزلين عن العالم كلا
او انج تكلمين شباب و تراسلينهم بالنت و خرابيط

حبيبتي طلعي و روحي و تعالي
اذا ما عندج هدف حطيلج هدف روحي دورات لغات اي شي
استفيدي من وقتج بشي مفيد و تعرفي على بنات يدد

طلعي من دارج الي محكورة فيها و شوفي الدنيا
و ابدي صفحه يديده من اليوم
انتي بايدج التغيير

 

[لمى الهاجري]

حبيتي انتي تشتغلين ؟؟؟؟

 

[nour el denya]

إذا تحبين لتويتر ليش ماتستخدمينه أستخدام صح كتبي أشياء مفيد حق الناس يعني مثلا سويلج أكاونت أذكار أو نصائح غذائيه أو نصائح جماليه منها تلهين و تستفيدين من وقتج و ماراح يصير تفكيرج محدود

صدقيني علاج مشكلتج أنج تلهين و تشغلين وقتج

 

[قطوة@@]

شغلي وقت فراغج بشي مفييد

نمي هوايه تحبينها اذاا تسمعين اغاني قطيعهم

طلعي و تعالي زوري اهلج رفيجاتج غيري جوو

 

[الدنيا لحظه**]

ياحبيبتي لاتطالعين الدنيا بتشاؤم كله بيدج حبيبتي في دوره اسمها تطوير الذات وايد زينه حق مشكلتج والملل اللي انتي فيه خلج قويه وشوفي الدنيا بحب واملج خليه كبير الزواج مو كل شي بالدنيا والعنوسه مو نهايه العالم ياقلبي عسى ربي يفرج همج وغمج

 

[Patcholli]

ليش وحده ماعندج ام وابو خوات وارفيجات ..؟؟

ليش ماتحتكين فيهم وحتى لو لاهين بالريل والعيال شدعوه انا ارفيجاتي كلهم متزوجات ومعيلين ماشوف الموضوع بهالسوء
متى مابغينا نتيمع نستأذن من ازواجنا ونتيمع ماصدق ان في متزوجه مجابله الريل 24 ساعه وماتطلع ولا تستانس ولا تتسوق ..

احتكي فيهم اختي ابرك من سوالف الشباب وانج ترخصين عمرج حق انسان واطي وحشره ويحاول يستغلج ومايبيج الا حق شغله وحده واهي الخرابيط والعياذ بالله ..

بالعكس اهلج حولج استمتعي بوجودهم .. وبيمعتهم وبسوالفهم وبمواقفهم ليش معيشه روحج بنكد .؟؟

حتى لو ماتزوجتي هذا مو نهاية العالم ومو معناته انج تدفنين روحج بين اربع طوف .. وايد بنات اعرفهم بعمرج واكبر منج مو متزوجات ياحلوهم وياحلو سوالفهم وعايشين حياتهم ظحك وسوالف وطلعه ويمعه ويحضرون مناسبات وعايشين حياتهم
انتي ليش قافله على روحج ومنطويه ..؟؟

الله يرزقج بالزوج الصالح وحتى لو مارزقج قولي الحمدلله وعيشي حياتج مالج شغل بالناس ولا تفكرين وايد بهالكوضوع خليها على الله وبس ..

 

[جنون العاطفه]

انتي محتاجه احد يسمع لج ويهتم فيج

كل شي متوفر عندج استخدمي عدل بس ..

حاولي تقرين كتب عشان يكبر تفكيرج وتعرفين ان الدنيا ماتسوى كل هذا !
والله يهديج ي رب ​

 

[قمر بيت أبوها]

انتي مشكلتك الفراغ العاطفي
بدال ماتحبسين نفسك اخذي عيال اخوانك ولا خواتك وطلعيهم او العبي معاها بالبيت
اقرأي بالكتب المفيده
والأهم من كذا كل مالقيت وقت فاضي عندك أقري قرآن أقراي كتاب الله اللي يرفع منزلتك بالجنه ويشغلك بالاخره عن الدنيا
ومو معناتها ماتزوجتي خلاص حياتك انتهي بالعكس انتي ملك نفسك تقدرين تسوين اشياء المتزوجه ماتقدر يا منشغله مع عيالها يامتهاوشه مع زوجها انتي انطلقي بحريتك بس بالطريق الصحيح
والله يرزقك ويوفقك يالغلا

 

[أم علي المندوبة]

ما عندج حل وسط الله يهديج، أشغلي نفسج بصلة الرحم و خلج اجتماعية ليش تعزلين نفسج؟ شوفي اللي تأخر زواجهم و بخير و نعمة من الله، اللي قايمة بأهلها و اللي لها مشروعها الخاص و اللي ناجحة بشغلها و اللي و اللي، خلي غرفتج للنوم و تبديل ملابسج بس و اذا بتقعدين فيها صلي او اقري القرآن و ادعي رب العالمين يهديج و يصلح حالج

 

[معزوفة عشق&]

كل اللي ابي اقوله قالو اخواتي الله يجزيهم خير
المفروض اول شي عشان تبداين صفحه بيضاء ومشرقه حاولي قدر الامكان تتناسين وتتجاهلين الماضي واعطي لنفسك بٌش للامام
جيبي ورقه وقلم ونظمي يومك يعني زي مثلا ساعه اقعدي عالنت نص ساعه اقري ورد من القران ونص ساعه اذكار واستغفار > لزووم تخصيص وقت لله
اشتركي بنادي رياضي اذا حابه او معهد او زيارة اصدقاء وصلة رحم
اذا انتي تحبين وتميلين للطبخ كل يوم سويلك طبق حلو ع وقت المسساء ..
حاولي تساعدين نفسك بنفسك لا تقولين ماقدر وانا حياتي كذا وعيشتي صعبه لا ..
الدنيا ماتقعد على وتيرة وحده الا ماتتبدل للاحسن والافضل بشرط احسسني الظن في الله وتوكلي عليه وحده ..
واخر شي اوصيك بقيام الليل والله ثم والله بتلقين العجب فيها باذن الله اكثري في الثلث الاخير من الليل بالدعاء في السجود والاستغفااااااااااار
اسال الله لك السعاده والتوفيق

 

[عادت ذكرياتي]

شغلي وقتج بذكر الله

 

[!! دلوعته !!]

اب اب

 

[غراوي]

هذي مشكلت العنوسه ياااااااااااابوي
توديج بستين داهيه اسئليني انا

وغير جذي اذا كان جو البيت ما يساعد على التعايش
كلن لاهي بنفسه او ماكو توافق اسري
ااااااااااااخ يالتوافق الاسري

المهم الحين حاولي شوي عاد تطقين نفسج طراق تصحين فيه عمرج وتقولين انا لي متي بقعد على هالاوهام
ابدي ادعي وصلي الليل عالاقل خلي عمرج يضيع بطاعه حتي لونها بسيطه

ياربي شلنا غير ربنا ندعيه ونعلق الرجا والامل فيه
والله انا كنت نفسج احلام يقظه لين تعبت كل يوم اتخيل لي زوج واسوي سيناريو لحياتنا
والله لوني اكتب القصص اصك على ووداد الكواري
لين مليت فجاه وقلت لنفسي شفيني مريضه نفسيا بس عايشه باوهام
والله قاعده كثر ماقدر اشغل نفسي وقتي اغلبه عالمنتدي شسوي
وبليل اختلي مع ربي ياحلو القعده مع ربج تشكين له جنه قاعد قبالج سبحانه جل شانه


باجر انشاءالله بتتزوجين وماتلقين وقت تحكين راسج فيه

قولي امييييييييييييين ياللهي ارب ماتطوف هالسنه الا انا وانتي وكل بنت بالمنتدي متزوجه ومرتاحه يااااااااااااااارب ياكريم

 

[dalo0oa121]

انا مثلج بالضبط والسبب الدوام كرهوني بعيشتي
اللي وياي صج نكد يجيبون المرض لدرجة قمت اعزل نفسي ومب مرتاحة

 

[عروق نجد ksa]

الله يرزقك الزوج الصااااااااااااالح ياااااااارب وكل بناااااااات المسلمين


آآآآآآآآآآآآميييين

 

[رشــــة مطــــر]

بالعكس ياقلبي مشكلتك لها مليون حــًل ولاتنظرين للحياة نظره سوداوية ابتعدي عن التشـًاؤؤم يخرب بيته خخخخخخ
خلي حياتك كلها أأأأأأأأأأمـًـًـًـًـًـل وتفأأأأأؤؤل بالخير ولاتنعزلين برووحك لا غلطً اطلعي مع رفيقااتك اجلسسي مع اهلك اشغلي نفسك بأشياء تفيييدك بالدنيا وبالأخـُـُرة ’’’ حتى انا احس احيانا بطفش وملل ويجلس االشيطاان يزين لي اشيااااء مالها دااعي لكن مافتح للكلـًب مجال خخخخخخ حاولي تسوين لك جدول يومي مثلآ تصحين الصباح تصلين تقرأين جزء بسيط من القرآآن تحسين براحه فضيععععه وتقرأين الوُرد اليومي ( الاذكـُــُـار) ترجعين تنامين كم سأعه تقومين تفطرين تحسسين بالحياة تطلعين مكان حلو مع الاهل سوق حديقة زيارره اقارب .....الخ وتحددين يوم فالاسبوع لزياره رفيقااتك مره يزورونك ومره تزورينهم سوالف ضحك وناااسه فرفششه ....تشتركين في دورات علميه ثقافيه دينيه ... الخ تحضرين محااضرات المجااااال مفتوح لك ’’ تسجلين في دورات تجميل تتعلمين تتثقفين تستفيدين تحسين انك انجززتي شيء يفيدك بالدنيا والاخره , واتمنى لك التوفيق والحياااااااااااااااه السسسسسعيده والزوج الصصصصالح َ
ودمتٍي بوًد

 

[مُخملْ]

،
حَبيبتيْ أنتي سمعيني :
مِشكلتجْ أنج مَوقفة سعادتج وحياتجْ على رَيِل!
الحياة مب زواج وبسْ ، يعني اذا انتي للحين ماتزوجتي
العيب منجْ ؟ لاي حبيبتي هذا نِصيب وماتعرفين النصيب متى
ايي ْ، ربّجْ مقدّر أمورجْ وكل اللي فيه خير بيتجدّم لج بس اصبريْ

لازمْ تشغلين نَفسجْ بالشي اللي انتي تحبينه ، والاهم أنّج تكونين موقنة
أن رزقج بيي لي عندجْ " وَمنْ يتقّ الله يجعل له مخرجاً ويرزقه من حيث لايحتسب"
أنتي وصلتي لهالعمر يعني تعرفين شو ورا هالشباب ونظرتهمْ للي تكلّمهم ، فكري ألف
مرة قبل لاتكلمين شبابْ !
لاتبيعين سمعتج وسمعة أهلج برخيصْ ، شتسوا عليج لو حد عرف باللي تسوينه؟!
حبيبتيْ ، اتّقي الله في نفسجْ ، كل خير مقدّر وكل شَر مقدّرْ، لاتسلكين أي طريج ملتوي
عشان تحققين اللي تتمنينه من مبدأ -الغاية تُبرر الوسيلة-!

،

انتي تقولين أن تفكيرج محدودْ ، اقري والكتاب مفعوله سحري
بتقضين وقت ممُتع ومنها بتبعدين عنج هالافكار وبنفس الوقت راح تستفيدين
وتوسعين مداركج وتفكيرجْ .
اقري كتب علم النفس / تطوير الشخصية / التفكير .. وايد راح تفيدجْ ،
وصدقيني وبتختفي كل هالافكار اللي تحوم حولجْ ، بس عَزميْ

،
احتكَي في اهلج صديقاتجْ ، لاتحكرين نفسج ولاتنعزلين عن العالم
حبيبتي مب نهاية العالم انجْ ماتزوّجتيْ ، انظري لنفسج نظرة حُب
لاتنقصين من قَدِر نفسجْ عشان اشيا مب في ايدجْ

.

الله يفتحها عليج ويصلحج ويهديج ويبعد عنّج هالافكار ويرزقج باللي يسعدجْ ويهنّيجْ