صينية اقراص الكفته مع الخضار الشهيه...احلى طعم

[حلوة ومملوحة الكويت]

السلام عليكم ورحمة الله وبركاته​

(الحمدلله الذي اطعمني هذا الطعام ورزقنيه من غير حول مني ولا قوة)​

صباح ومساء الخير عليكم​

اشلونكم حبيباتي​

صينية لذيذه وسهله..تقدرين تاكلينها مع الخبز او مع العيش​

والطعم شهي..​

نبتدي بسم الله الرحمن الرحيم​

نحتاج كيس لحم مفروم ..تنقعينه بماي دافي واهو بكيسه..وعقب اذا فك من الثلج تحطينه بمشخال فتحاته صغيره حيل وتغسلينه على الخفيف عن اي دم فيه..وعقب تعصرينه بايدج لين يروح منه اي ماي زايد.​

نضيف عليه بصله مفرومه ناعم + نص شدة كزبره+ فصين ثوم مدقوقين ناعم+ نص ملعقة اكل بهارات مشكله+ نص ملعقة اكل فلفل اسود+ ربع ملعقة اكل كمون مطحون+ربع ملعقة اكل كركم + ربع ملعقة اكل كزبره مطحونه+ نص ملعقة اكل ملح..واذا حابه تزيدين حسب تذوقج ورغبتج.​

وضروري نضيف على ماسبق ملعقة اكل طحين ونعجن بايدنا ليما يتجانس اللحم مع كل الاضافات الي اضفناها.​

​

​

نشكل اللحم لاقراص..او كور اذا حابين​

ونحطه بصينيه ندخلها الثلاجه لمدة ساعه ..يتماسك اللحم من البروده..​

​

ملاحظه: الي ماتبي تسوي الكفته بنفسها تقدر تشتري الكفته المثلجه سواء الدائريه او الاقراص..متوفره بالجمعيات وتعطي نتيجه حلوة.​

بالمقلاة.. نحط اربع ملاعق زيت زيتون ..ونبتدي نحط اقراص الكفته ونقلبها بخفه اذا حسينا ان لونها ابتدا يتغير ..نبيها بس تكتسب اللون المحمش​

وهالعمليه تحتاج مجرد دقايق بسيطه. ​

​

نشيل الكفته بعد تحميرها البسيط..على صوب لحين الحاجه لها..​

نقص بطاط حلقات... وجزر بشكل طولي ​

نقلي البطاط نص استواء بدهن غزير..لا تقلونه حيل..وعقب نطلعه​

والجزر نقليه مجرد انه يذبل..لانه مايحتاج طبخ حيل​

​

​

بجدر نحط ماي حار ونضيف له أربع ملاعق معجون طماط+ ربع ملعقة كركم+ نص ملعقة بهارات مشكله+ ملعقة اكل كاتشاب+ ربع ملعقة اكل فلفل اسود+ ربع ملعقة كمون + رشة هيل+نص ملعقة كزبره مطحونه+ مكعب ماجي+ ملعقة اكل نعناع يابس..طعمه حيل مميز بهالصينيه+ ملعقتين اكل زيت زيتون.​

نحرك الماي مع البهارات الي ضفناها ليما تختلط معاه عدل..وعقب ناخذ منه مقدار 3 قلاصات..وهالمقدار راح يكون الصوص الي نسقي فيه الصينيه قبل لاتدخل الفرن.​

بصينية الفرن تحطين حلقات بصل والكميه حسب رغبتج​

ومعاها اصابع الجزر وحلقات البطاط المقليه.​

​

ونضيف فلفل بارد مقطعينه بشكل طولي والكفته..ونبتدي نوزعهم في الصينيه بشكل متجانس..​

​

ونسقيهم بثلاث قلاصات من الصوص الي سويناه بالجدر ..والقلاص مثل ماهو واضح بالصوره قلاص الجبن الكبير​

​

ونرش على الوجه شوية نعناع يابس وفص ثوم مهروس..يعطون طعم حلو..​

​

نسكر الصينيه بالقصدير..وندخلها الفرن الي نكون مشغلينه من تحت وفوق​

​

نخليها لمدة 30 دقيقه..وعقب نكشف وجه الصينيه ونخليها تتحمر وتتحمش ..والصوص يثقل من عين الفرن الي فوق..​

​

وتفضلوا..الصينية اللذيذه... صينية اقراص الكفته مع الخضار...​

​

​

​

​

وسويت معاها هالعيش المشخول...​

​

​

​

​

لو تكرمتو عزيزاتي لحد يرد..بكمل تنزيل باجي الصور...​

 

[حلوة ومملوحة الكويت]

نكمل​

​

​

​

​

​

وتقبلوا تحياتي
بنتكم
:aha:
حلوة ومملوحة الكويت
:33_1185028183::33_1185028183:
،،،،​

 

[>جنانها<]

يمي يمي ماشاءالله تشهي وصفه سهله ورائعه

تسلم ديااتك يالغلا

 

[ABEER FLOWER]

ماشاء الله

ربي يحرم هالأيـاااادي من النار

ويعطيج ألف عافيه يارب​

 

[عزوتي خمس صقور]

واااااااااااااااااااي
شكلها لذيذه​

 

[oshi_q88]

ماشاء الله

 

[جارة القمر]

تسلم ايدج




حبيبتي

 

[روح الفانيليا]

تعذيب والله و انا يوعاااااااااااااااااااانه بطني يصيح

 

[~*~الملكة~*~]

شكلها يشووق

بس حسيت المرقه شوي خفيفه شلون لو ابيها اثقل

وتسلم ايدج

 

[أملي بعد الله]

الله تهبل عوافي عليكم يارب .. واو وربي موب قادرة الصور تشهي ههههههههههه أحب طباخج :$ الله يوفقج يارب .. وتسلم إيدينج

ياحظ عيالج :'( اهيء اهيء :"(طبخج لذيذ

تبارك الرحمن الله يوفقج وعوافي عليكم ياااااربي

 

[تبيني آرضى عليك]

روووووووعه تسلم ايدج

 

[Snow angel]

ماشاء الله تبارك الله

روعه تشووووووق

يسلمووو هاليدين ياقلبي

 

[آلعناآأ]

،



يم يمي

بسوي نفس طريقتج بالضببببببط بسس ماراح اقلي الخضره بخليها تستوي بالصوص

وبحط شوية نشا عشان يثقل الصوص يممممي

تسسسسسسسلم ايدج يامميزه

 

[حلوة ومملوحة الكويت]

جنانها<, post: 30738223, member: 341935"]يمي يمي ماشاءالله تشهي وصفه سهله ورائعه

تسلم ديااتك يالغلا

الله يسلم عمرج حبيبتي
منورره الموضوع
هلااا
،،،،​

 

[حلوة ومملوحة الكويت]

ماشاء الله​

ربي يحرم هالأيـاااادي من النار​

ويعطيج ألف عافيه يارب​

جزاج الله الف خيير
مشكوووره عبوره
ياهلاا ومرحبا فيج
،،،،

​

 

[حلوة ومملوحة الكويت]

تسلم ايدج




حبيبتي

الله يسلم عمرج حبيبتي
مشكوووره​

 

[حلوة ومملوحة الكويت]

شكلها يشووق

بس حسيت المرقه شوي خفيفه شلون لو ابيها اثقل

وتسلم ايدج

الله يسلمج حبيبتي
لو تبين تثقلين المرقه زيدي قفشة اكل نشا على الصوص وحوسيه قبل لا تسقسن الصينيه فيه
انا عيالي يبونها شوي خفيفه
مثل مرقه للعيش
ياهلاا ومرحباا
،،،​

 

[فيلجاويه كيوت]

تسلم الايادي

 

[حلوة ومملوحة الكويت]

الله تهبل عوافي عليكم يارب .. واو وربي موب قادرة الصور تشهي ههههههههههه أحب طباخج :$ الله يوفقج يارب .. وتسلم إيدينج

ياحظ عيالج :'( اهيء اهيء :"(طبخج لذيذ

تبارك الرحمن الله يوفقج وعوافي عليكم ياااااربي

الله يعافي قلبج ياعمري
دمج عسل..ضحكتيني:eh_s(6):
منوورره الموضوع
ياهلاا ومرحبااا
،،،،​

 

[حلوة ومملوحة الكويت]

روووووووعه تسلم ايدج

الارووع مرورج
ياهلاا ومرحباا فيج
،،،،​