صينية سمج فيليه بالفرن اتينن .. بس للأسف بدون صور

[رفرف]

شلونكم ياحلوات ؟؟

اليوم جربت اسوي صينية سمج فيليه اول مرة بحياتي اطبخ سمج ..
بنتي تحبه وماعرف اسويه وانا مو زود اصلا مع السمج بس احب الفيليه ..
خبصت وسويتلي اكلة اتينن صج لذيذة طيرناها بالعافية قبل لا اصورها


المقادير :
كيلو سمج فيليه مثلج انا خذيت امريكانا
معجون طماط تقريبا نص علبة صغيرة
بصل حلقات او شرايح مو مشكلة تقريبا ثنتين
ثوم مدقوق
طماط مقطع انصاص دوائر
زيت + زبدة 3 مكعبات صغار
تقريبا قلاص ماي
ليمون
بهارات (ملح - فلفل اسود - بهارات سمج - لومي ناعم)
كريمة كيديدي شوية ربع او ثلث العلبة



الطريقة :

اول شي حطيت الزيت يعني مو وايد حق قلي ولا شوية زوين .. ومعاه الزبدة حطيتهم ع النار
فوقهم البصل والثوم والطماط ومعجون الطماط
تالي حطيت السمج قطعة قطعة احطها وارش فوقها بهارات سمج وفلفل اسود وملح وازيد الماي شوي شوي .. اغطي المقلاة شوي اخليها تطبخ واقلبها تالي اشيلها احطها بالبايركس ..

لي صفيت السمج بالبايركس ارش فوقه شوي بهارات سمج بعد (كله اخاف لا يصير زفر) وفلفل اسود ولومي ناعم فوق كل قطعة شوي ..

والمقلة الحين باللي فيها احط فوقها قفشتين كبار او ثلاث عصير ليمون او حسب الرغبة انا احبه حامض
وشوي كريمة مو وايد يصير لونها برتقالي ..
واصب الصلصة فوق السمج .. اغطيها وادخلها الفرن شوي
وبس بالعافية ترى حدها لذيذة تحسفت ليش ما صورتها ..

 

[ام عمار]

مشكووورة حبيبني

 

[بنت الفقيد]

تسلم ايدج

 

[سارونه الكويت]

تسلم ايدج لازم اجربها شكلها بتطلع لذيذه

 

[جارة القمر]

تسلم ايدج


وبالعافييييييييييييييييييية


وأمبين لذيذه

 

[haninoooo]

يمال العافيه والله
توني اسولف مع ريلي عن العشا
وعندي الفيليه السمج بس ولا مره جربته وطبخته
ومحتاره مادري شسوي فيه
قلت ماكو غير منتداي العجيب اشوف طريقه للفيليه ولقيت طريقتج بويهي والحين جاري التنفيذ
مشكووووووووورة

 

[MassComm]

يسلموو الايادي

 

[رفرف]

حياكم الله ..

واللي تجربها انشالله تعجبها وتقولنا شلونها

 

[حناينq8]

تسلم الايادي

مبين نفسج حلو بالطباخ ماشالله

 

[sugar&spice]

تسلم الايادي

 

[رفرف]

حياكم الله

 

[sugar&spice]

سويته اليوم غدا حق ريلي,,,,,,,,,,,,,, قالي وااااااااااااااايد لذيذ

حسافه ماذقته كنت بالدواااااااااااااااااااااااام

تسلم ايدج ومشكوووووووووووووره

 

[رفرف]

تسلم ايدج شوقر وبالعافية على ابوكم

 

[& شهد &]

تسلم ايدج رفروفه

 

[ضحكة الدنيا]

تسلم ايدج
وبالعافيه