طريقه شرح الدكتور والبرزنتيشن والواجبات // حياج معاي // اقولج وقوليلي تجاربنا الخاصه

[مــاروكــو]

دكاترة الشريعة الي خذيت عندهم

الدكتوره سوزان السمان لمادة فقه العبادات
الماده حيل سهله وسهلتها الدكتوره حيل حبوبه ومتساهله ونظامها امتحان واحد عليه 30 وفاينل عليه 60 والحضور 10
وعندها بونسات سهل الحصول عليها ..

الدكتور بدر ابراهيم الرخيص لمادة الثقافة الاسلامية
نظامه امتحانين عليهم 15 درجه والفاينل 60 والحضور 10 حيل حبوب الدكتور كان يعيدلنا امتحاناتنا اذا درجاتنا مو زينه
ونظامه مو كتاب نوت هو يعطينا.

الدكتوره خوله لمادة علوم قرآن
الدكتوره حيل طيوبه محاضرتها نص ساعة تعطينا اسأله وتحدد معانا اجوبتها ع الكتاب
نظامها امتحانين عليهم 20 وفاينل 60 والحضور 10 ..

 

[Duoi]

* * * د. محمد العبد الغفور - أصول تربية

- ) خووش دكتور هادي و راقي بالتعامل محترم سمح ويقدر ظروف

-) وطريقته يطلب 3 اشياء

1- برزنتيشن
2-تقرير زيارة مدرسية
3-تلخيص كتيب تربوي

-) الكمية في الفاينل مو كل الكتاب
اهو يحدد لكم لا وين
احنا من مبحث التدريس إلى نهاية الكتاب


-) امتحاناته يبيلها شوية تركيز

اهو يقول لكم اتركو سؤالين ومرات يقول 3 اسئلة من الاسئلة الموضوعية
حسيتوا انها صعبة
اتركوها وانا بحسبها لكم صح ,,


المدتيرم الاول سهل نوعاً ما
والمدتيرم الثاني شوي صعب يبيله تركيز

اما الفاينل سهل الحمد الله

- الله يوووفقه ^^

الدكتور ممتاز انصح به
وبشدددده

 

[Japanese]

الله يوفقكم بنات

حظكم تدرسون بالعربي :<

 

[Duoi]

الله يوفقكم بنات

حظكم تدرسون بالعربي :<

لا مو الكل يدرس مواه بالعربي
العلمي يدرسون المواد بالانجليزي
سو مو الكل يعني

 

[آلغرنوقهَ]

أنا الكورس اللي طاف خذيت 3 مواد

حضاره اسلاميه عند نايف سهيل
الدكتور زين ويطلب من البنات شرحو
ويعطي الكلاس كله درجه كامله بالشرح ..
وامتحاناته يعشق التواريخ و يعني سهله شوي خذيت عنده بي بلس


وخذيت قراءات واساليب عند / راشد جراري
المهم ما عطاني حقي خذيت سي ماينس عنده .. الله يسامحه
ونصحيه لحد يفكر ياخذ عنده ابد ابد

وخذيت مدخل علم نفس عند / منى الجناعي
ياحلوها اخلاق اخلاق اخلاق وان شاء بسجل عندها ماده ثانيه
خذيت عندها اي ماينس وتعطي ميدتيرمين وفاينل

 

[آلغرنوقهَ]

اي ونسيت اول الكورس كنت ماخذه عند / دلال الهدهود ( تربيه مبكره )
و ماكنت مرتاحه لها تعاملها مو شي

بس الحمدلله سحبو مني الماده ليش مادري بس زين افتكيت :d

وبنطر دكتور ثاني ينزل هالماده عشاناخذ عنده لانه الي خذو عندها
يقولون ظلمتنا بالدرجات

 

[دانة قحطان..))]

بنااااااااااااااااااات بليز منو خذت عند الدكتور قاسم الصراف مقرر قياس و تقويم
شلون طريقة بالدرجات البحوث الامتحانات
و اللي عافيكم اللي تعرف لا تبخل علي
ويعطيكم العافيه​

 

[المستقل]

سلام عليكم

انا سجلت تمهيدي عند دكتور محمد صابر النظلي تمهيدي 090

في كتاب انجليزى جديد اول كورس يبدا فيه للعلوم الاجتماعية من شهر 1 / 2013 ؟ شلوم طريقة الكتاب ؟؟

وشلون هالدكتور وشنو نظامه ؟؟ تكفوووون ضرووورى

 

[miss foshy]

مرحباااا بنات انا مسجله مادة وكتوب فيها للصحيفتين اللي اتعرف اتفيدني؟

 

[miss $_$ semsem]

سلام عليكم

انا سجلت تمهيدي عند دكتور محمد صابر النظلي تمهيدي 090

في كتاب انجليزى جديد اول كورس يبدا فيه للعلوم الاجتماعية من شهر 1 / 2013 ؟ شلوم طريقة الكتاب ؟؟

وشلون هالدكتور وشنو نظامه ؟؟ تكفوووون ضرووورى

وعليكم السلام انا درستي التمهيدي : يفهم و ينجح تطمني صج مرات مزاجي هههههه بس ترا زين بالتمهيدي تطمني

 

[كيكه الكويت]

استفسار عن فوزية حسين ارض و كون

 

[NaYoob]

ابي اسال عن عادل الشرف تنصحوني فيه لمادة تعليم اساليب التفكير او اياد السالم

 

[shine girl]

لو سمحتوا بنات لاتخربون الموضوع
الموضوع خاص بطريقة شرح الدكتور والبرزنتيشن والواجبات
في شكثر مواضيع خاصه للأستفسارات

 

[.حــنــان.]

دكتور مناور الراجحي
ببجي منه خذيت عنده تاريخ اعلام تواريخ و اشهر لي الراس
و طريقه شرحه خايسه
يقول ابيكن تفمون الماده كانها قصه و اخرتها صدمنا بالامتحان وين قصه الله يهداك كله خفظ بحفظ حيل دسمه و مايخلي شي ماييبه بالامتحان
و برزنتيشن عن دول الخليج حليو



نايف الشمروخ تاريخ حضاره
الدكتووووور عجييييييب طيببببب محتررررم اول مره اشوف دكتور متواضع مثله
وايد يذمونه بس عشان امتحاناته صعبه
بس يبيلها دراسه من قلب عشان تييبين قريد حلو
بس صح الدكتور ينحب يينن


كميل فرج الله انجليزي 141
لا تعليق لا تعليق لا تعليق
واااااااااي يعشق الدوام يموت عل دوام
واذا بيعطينا اوف عقببب حننننه و تحسين شلعنه قلبه من مكانه كلللش مايغيب ما شالله عليه
يعني يا ريال يا زلمه ارحمنا كل يوم كل يوم نجابلك !!!
بس وايد طيب شررحه مو ذاك الزود بس مو بالعته



مبادئ تربيه جاسم الكندري
وايد زين الدكتور وايد يسولف حبيب

 

[نبض الجود]

انجليزي 161 (د,امينه الادريس)

عجيبه عجيبه المنهج حيييل خفيف وسهل معآهآ ، وتعطي اوفآت ،
ونظآمهآ ميدتيرم وفاينل ، وكوزآت على كل يونت وآخر كوزين او ثلآثه عطتنآ فيهم بونص ،

وتسوين 4 بريزينتيشنات ، قدمنآ 3 وواحد بونص ،

والاحلى ان نص الكورس اوفآت
وكشرح توب والمحاضره عجيبه ماينمل منهآ ،
بآختصآر آنصح فيهآ آكيد :$


،


تمهيدي كيميا (د,احمد طحل)

قبل لااسجل عنده شكثر قاموا يذمونه ويقولون مايفهم .....الخ
بس غآمرت وسجلت ، وطلع احسن دكتور يدرس كيميا ،
جد اول مره استوعب الكيميا عدل واخذ درجات مرتفعه ،
الحمدلله صج انه يستغل الوقت لي اخر شي , بس كلش مآنحس بالوقت وتروح المحاضره بسرعه ،
ونظامه كلش مايعطي اوف ،

عموما تمهيدي كيميا يعتمد على الدوره ومو مهم الدكتور لانه تصليح كمبيوتر,​

 

[NaYoob]

شيماء التتان >> الخالدية

خذيت عندها تمهيدي

شرحها واضح وبسيط ينفهم حق المستواهم عادي

تعطي 5 امتحانات وتختار احسن 3

على كل جابتر في برزنتيشن وسهاله

تحاسب على الغياب وايد اذا اقل من 3 ما تعطيج انذار ولا تنقص من الدرجات

تعطي هوموركات حالها حل اي دكتور وعليهم درجات وتحاول تساعد البنات اللي درجاتهم مو زينه

 

[NaYoob]

نايف الشمروخ >> تاريخ الحضارة العربية الاسلامية

شرحه وايد حلوو وتندمجين معاه بالمحاضرة

عنده امتحانين مدتيرم 20 الاول و 20 الثاني

يحاسب على الغياب

يخلينا نسوي بوربوينت وحده سهالات

الامتحانات اسألته دقيقه يعتمد على دراستج اذا دارسه عدل تضمنين درجات حلوه

بس اذا دراسه بو طقه اكيد مرح تحصلين درجه هذا الشي طبيعي

ويعطي موعدين * تختارونهم حق امتحانات المدتيرم والفاينل

ماعنده تحيز ويعامل الكل بعداله اكثر شي عجبني بالاستاذ

 

[NaYoob]

أمل الهاشم ما ادري الهشام >> تاريخ الكويت

انحاشوا منها

مع انه خذيت قريد حلو بس بعد كراف اليهد بس هم ما انصفتني

شرحها مو شي جنها تقرى

تسوي نفسها تضحك وكل كلمة والثانيه انا وانا احسن.. وتقرض بالناس

وتتطنز درجه اولى وتخرع البنات يا حليلها ههههههه

واغلب الشعبه ساقطين عندها

وعندها الحضور مهم مع المشاركه

اي واذا انتوا انجلش سكوول او برايفت سكول على قولتها رح تحبكم ههههه وتبديكم على الكل وتضمنون a

 

[miss $_$ semsem]

1- فاطمة عياد : سيكولوجية ذوي الاحتياجات الخاصة :-

ترفعج قريد + امتحاناتها سهلة + ماتاخذ كل مرة الغياب بس تحفظ الاشكال وتهتم ترا حيل بالغياب + مرات تلقونها تتحلطم بس حرام طيبة وماتظلم بالدرجات كلش + اطلبت تسوين واجب موضوعين كل واحد صفحتين بس سهل وتضمنين الدرجة ان شاء الله .

*- حصة النصار : ضغوط :-

ثاني مرة اخذ عندها لأن ماشاء الله حقانية + منظمة وكل شغلها بالبلاك بورد و شرحها واضح وهذا اللي حبيته ان ما تخليج ضايعة بالطوشة + نفذي اللي تبيه وبشري بالخير + البونس اهيه اذا بتحطه بتقول لكم شنو تسوون والمادة مقسمة على ما يلي :_
20 للواجب ومقسمة كذا واجب وبينهم فترة كافية و طريقة حلهم توضحها لكم وان شاء الله بجيبكم الدرجة
35 للمدتيرم
و 40 عالفاينل
5 عالحضور وهذا مهم يعني حاولي ماتغيبيبن واساسا محاضراتها حلوة بسرعة تمر ان شاء الله .
والدكتورة تعاملها راقي

3- فضل الفضلي : مقدمة ادارة عامة :-

حبوب ودمه خفيف ماشاء الله ومحاضراته خفيفة ويفهم و امتحاناته يبيلها تركيز نوعا ما بس تييبين درجة زينة اذا دارسة حرام ويرفعج قريد و نظامه نكتب بالنوت .

4- هدى جعفر : علم نفس صناعي :-
اول مرة اخذ عندها بس تهببببل خوش دكتورة محترمة وامتحاناتها سهلة و المادة كلها حلوة حتى المعيدة خوش وحدة يعني المادة سهالة ان شاء الله .

5- كامل الفراج : سلوك وعقاقير :-
غني عن التعريف خووووووش دكتور ومحاضراته صج مفيدة ومحترم ويراعي الطلبة وايد وكان امتحانه اوبن بوك لأن المادة نوعا ما وايد اسامي والكتاب فيه اسماء وايد بس خوش دكتور الله يوفقه .

 

[نبض الجود]

انجليزي 161 (د,امينه الادريس)​

عجيبه عجيبه المنهج حيييل خفيف وسهل معآهآ ، وتعطي اوفآت ،
ونظآمهآ ميدتيرم وفاينل ، وكوزآت على كل يونت وآخر كوزين او ثلآثه عطتنآ فيهم بونص ،​

وتسوين 4 بريزينتيشنات ، قدمنآ 3 وواحد بونص ،​

والاحلى ان نص الكورس اوفآت
وكشرح توب والمحاضره عجيبه ماينمل منهآ ،
بآختصآر آنصح فيهآ آكيد :$​

،​

تمهيدي كيميا (د,احمد طحل)​

قبل لااسجل عنده شكثر قاموا يذمونه ويقولون مايفهم .....الخ
بس غآمرت وسجلت ، وطلع احسن دكتور يدرس كيميا ،
جد اول مره استوعب الكيميا عدل واخذ درجات مرتفعه ،
الحمدلله صج انه يستغل الوقت لي اخر شي , بس كلش مآنحس بالوقت وتروح المحاضره بسرعه ،
ونظامه كلش مايعطي اوف ،​

عموما تمهيدي كيميا يعتمد على الدوره ومو مهم الدكتور لانه تصليح كمبيوتر,​

اسحب كلامي عن مس امينه:eh_s(11):​