طلبتكم يابنات الكويت

[dmoo3_el7ob]

السلام عليكم
ماشاء الله في فالقسم هني مبدعات في الهدايا والتغليف واشوف عندكم اشياء مب متوفرة عدنا فياريت ادلوني على اماكن تبيع سوالف التغليف وتزيين الككاو لاني اشتغل في هالسوالف وانشاءالله بي الكويت في الصيف( مشتهية برد شوي) فابا اشتريلي شوية اغراض....

ولا تردوني

 

[srabeel]

في محل أنا ما رحتله بس وايد يمدحونه إسمه بياع الورد بحولي مقابل مستشفي دار الشفا

هذا إلي أعرفه وإن شاء الله البنات ما يقصرون معاج

 

[dmoo3_el7ob]

تسلمينية الغالية وقوليلي وين مطعمج عسب اذا يت اعزم عمري فيه

 

[srabeel]

أخت دموع إنتي من السعوديه ؟؟

وحياج الله بالمطعم بس لا تنسين قولي للمسؤول إنج من الويب سايت علشان يسويلج خصم تستاهلين

 

[dmoo3_el7ob]

لا الغالية انا من دبي ليكون ما بدخلوني

 

[srabeel]

أفا عليج يا بنت زايد تشيلج عيونا حياج الله بديرتج يا الغاليه

 

[أم الحلوة جمان]

هلا اختي
مثل ما قالت الأخت سرابيل في محل بسرداب عمارة بياع الورد اسمه زهور الشرقية
في منطقة حولي مقابل مستشفى دار الشفاء الجديد كله شغل تزيين كاكاو ز هدايا مواليد و قرقيعان و هدايا ....الخ
وفي بعد محل في بلوكات الصفاة اسمه باريس فاشن هم هذا في سوالف بعد .. و حياج الله اختي في ديرتج الثانية الكويت...
والله يهنيكم بحلاة دبي الصراحة رووووووووعة

 

[srabeel]

أم الحلوة أي صوب بالبلوكات أنا ترى ما ادل عدل إذا تعرفين ما عليج أمر تدليني عدل وأسعاره إشلون صايره

 

[dmoo3_el7ob]

أم الحلوة تسلمين على المرور وما قصرتي

 

[dmoo3_el7ob]

sarabeel

فديتج ما تقصرين بس ما قلتيلي وين المطعم

 

[أم بدير]

أم الحلوة أي صوب بالبلوكات أنا ترى ما ادل عدل إذا تعرفين ما عليج أمر تدليني عدل وأسعاره إشلون صايره

هذا الله يسلمج صوب التراث الهندي تعرفينه؟
قبل لاتدشين المبنى اللي فيه التراث الهندي تشوفين عند البوابه على طول محل يبيع كلف وشباصات وهالسوالف
هذا باريس جاليري وعنده فرع ثاني لما تدشن المبنى اللي فيه التراث الهندي تلقينه وراه صوب محلات الكلف وبوغازي
أسعاره اعلى من السرداب اللي بحولي
تلقين عنده بين فترة وفتره شغلات حلوه بس مو على طول​

 

[نجدية2007]

صراحة ابي هدية حلوة حق صديقتي بعيد ميلادها plz

 

[srabeel]

مشكوره أم بدير ما تقصرين والله

 

[srabeel]

دموع الحب بيتلج عنوان المطعم إن شاء الله تدلين المطعم وتشرفينا

هذا العنوان :
المنقف
مجمع الساحل التجاري رقم (5)
الدور الاول
مقابل المدرسة الباكستانية

وهذا العنوان بالتفصيل ، شوفي عزيزتي إذا كنتي يايه من الديرة على خط فحيحيل السريع رجعي فوق تحت عند جسر نادي فحيحيل بعدين أول لفة يمين راح يصير على يمينج مطافي المنقف ومحطة تناكر عقبهم مدرسة ياسيين الطبطبائي وعقب المدرسة لفي يمين وكملي سيده راح تشوفين على يسارج مركز سلطان أول لفة فوق تحت لفي فيها وبعدين إخذي أول لفة يمين تمشين شوي على يمينج المدرسة الباكستانية وعلى يسارج مطعم بهارات محل المطعم صاير فوق مطعم دومينوز بيتزا .

 

[أم الحلوة جمان]

هلا اختي سرابيل
توني ياية ارد عليج ولا ماشالله عليها ام بدير دايما سابقتني لا و دلالتها احسن مني لو انا اللي بوصفلج جان ماوصلتيله
مثل ما قالت ام بدير لما تدشين بلوك الصفاة من الباب اللي جدامه البلوكات اللي فيها أمادور و عماد و الجذور راح تلقينه برة يم الباب على ايدج اليمين
و صح مو دايما تحصلين عنده من فترة لفترة ينزل شغلات حلوة
انا كنت ماخذة منه على ولادتي الأولى علب خشب على شكل قلب و غطاهم فضة محفرة والله كانت حلوة و فخمة حطيت داخلها ورد مجفف و كاكاو .

 

[أم الحلوة جمان]

صراحة ابي هدية حلوة حق صديقتي بعيد ميلادها plz

اختي وايد في اشياء ممكن تهدينها :
1- شنطة أو بوك (أو طقم) ( سامبا مسوي تنزيلات و أسعاره حلوة)
2- شيلة ماركة ( اذا كانت متحجبة ) ( عندج شيلات فولار وايد حلوة وراقية)
3-طقم عطور و كريمات
4-خاتم فضة أو اسوار أو قلب أو تراجي ( أو طقم كامل )(عندج سيلفراما شغلاتهم وايد حلوة)
5-محل شوارفسكي عنده هدايا حلوة
6- ساعة ( روحي محل on Time ساعاتهم حلوة ) و هم guess و سواتش.
7-ممكن تروحين سنتر بوينت و تاخذين لها شغلات حلوة حق غرفتها ( براويز - شمعدانات - اباجورات ....)
9-اذا تحب المساج و الاسترخاء ممكن تاخذين لها gift voiture من سبا تايم على اي نوع مساج و اهي بعدين تتصل فيهم وتحدد الموعد اللي تبيه ( مدته 3 أشهر ).
10- و أخيرا اذا انتي محتارة و ماتدرين شنو تشترين ممكن تاخذين لها كوبونات من اي محل من محلات الشايع بالقيمة اللي تبينها و اهي عاد تشتري فيهم اللي تبيه بكيفها و مدتهم سنة .

و ان شاءلله اكون افدتج يا اختي نجدية.