رد: فزعتكم
شوفي التجهيز
لشيين
التجهيز حق اول ليله ويوم الزفه
والتجهيز الثاني لج من ملابس من عطور من مكياج من برنامج عروس وحمامات واهتمام وهم اكسسوارات ساعات جناط ذهب
نبدا اول شي بليلة الزفه :
1- الثوب الابيض افضل لج الاجار عشان لايطيح الثوب الابيض بجبدج
الاجار خليه من 400 الى 750 مو اكثر من جذي
المكياج والتسريحه تحجزين بالفنادق والصاالونات اللي تسوي العرايس
مثل رشا شيك
صالون ماي فير ليدي ( ساس سابقا) بفندق النخيل
صالونات الرقعي :
لمسة فن عند ايميلي
صالون الهام الشلبي اللي كانت بفندق كونتننتال
صالون كوننتنال
صالون حنان دشتي
المسكه :
الحين الموضه ثوب فيه لمسة فخامه مع مسكة ناعمه
الجوتي مرات تحصلينه مع الاجار وفي محلات تفصل لج الجوتي حق الثوب الابيض عشان يرفع لج الثوب شوي وتقدرين تمشين فيه
الاكسسوار حق ثوب العرس
ممكن تشترين فضه او اكسسوار كشخه وافضل لج الاكسسوار لان الفضه ان بعتيه او الذهب الابيض مايجيب ربع سعره
حجز مثلا سايق مع سياره او ليموزين يتحمل مشاوريج بيوم الزفه
المصوره :
في واجد مصورات حسب ميزانيتج
عندج مصوره مرايم
بابارازي
زيزي
فينيسيا
الراعي
الذهب :
حسب مهرج من طقم الى طقمين او تشترين طقم كبير وحلو
اذا عندكم صباحيه او مسائيه ثاني يوم لازم تسوين له ثوب وتحجزين مكياج باي صالون تحبينه
اول ليله لما يخلص العرس لبسي قميص طويل مع روبه لونه ابيض او اوف وايت ببيج وخامته دانتيل بحرير
من عند محل نعومه لازم يكون حلو ورزه وغالي عشان اول ليله
خلصنا من اول ليله :
نجي للملابس :
البجايم ( كثري منها اذا انتي بشقه لحالج وعايشه برا بيت حمولتج)
اشتريها من محلات ماكس ومحلات لاسنزا ومحلات سنتر بوينت وهم محلات شحليله وايس كريم عندهم شغلات حلوه
خاصه محل ايس كريم بالسليل الجهرا تجنن البجايم اللي عنده وطبعا لا تنسين جنزات على بديات على دراريع قصيره وحلوه للشقه
طقم فوط لج اخذي طقمين لج مع فوط مع شغل الحمام واغراضه من الجمعيه
قمصان النوم
خصصي لهم مبلغ وتقسيمه
يعني خلي اول عشر ايام او اسبوعين قمصان طوال يعني قميص طويل مع روبه ويكون الوان اخضر - بنفسجي - احمر - اسود - عنابي ..
وبعدين اشتري قمصان النوم اللي تجي قصيره او حفر مع بجايم الحراير
يعني يبيلج 30 قميص كل ليله تبدلين وبعد الزواج عاد اشتري ووقتها بتعرفين طبع زوجج اذا يحب قمصان النوم اكثر او البجايم
الدراريع :
مافي احلى من العربيد للتفصال
فصلي من 12 الى 15 دراعه وسوي منهم 6 او 8 فخمات لان بتكثر العزايم بعد الزواج واللقاءات واحلى شي للعروس الداراريع اللي شيفون واللي حراير
البدلات :
اشتري لج كم بدله نظام نفنوف او تنانير مع بلوزاتهم
الجناط والجواتي :
اخذي الالون الاساسيه اللي تمشي مع كل لبس
مثل اللون الابيض - الاسود - البيج - البني - الرمادي مثلا
واخذيهم كشخات
وخصصي تكرمين نعال حلوه ونوعي فلات وكعب طويل
الاكسسوارات :
اختاري اكسسوار ليوم زفتج
واشتري اكسسوارات تلوق على ملابسج الكشخه اللي شريتيها وجيبي من سنتر بوينت علبه ترتبين فيها اكسسواراتج
المكياج :
عندج مكياج سنتر بوينت حلووو
مثل : ( لوريال - برستيج - ريميل - ريفلون - ايسودوا - نيفيا )
ومكياج منصور بعد
بس مكياج منصور عندهم استاند عطور شفاف اشتري اكبر واحد وغلفيه بمحل تغليف هدايا عشان يكون منظره حلو لما تحطين مكياجج فيه باللتسريحه لما يودون اهلج اغراضج يحطونه على التسريحه ويلمون فيه المكياج
العطور اشتريهم قبل العرس بشهر شهرين وخليهم بمكان باردد يعني مثلا بغرفتج ويكون التكييف على طول شغال وخليهم بعلبهم وكراتينهم عشان مايخربون
عندج العطور الفرنسيه الغاليه اللي من بيضون او المركزي الفرنسي
اشتري من 6 الى 8 عطور
واختاري واحد منهم يكون عطر اول ليله يعني تعطرين فيه لما تلبسين قميص اول ليله الابيض
واخذي لوشنه معاه عشان شوي تدهنين على ايدينج ورجولج
عندج عطر الور شانيل او كوكو شانيل دائم هو عطر العرايس باول ليله
العطور الفرنسيه الحلوه
اودو مزمزيل من جيفنشي اللي بالعود حلو
لاكوست لوف اوف بينك
شوبارد هابي سبيرت
كوليستار الوردي
عطور استي لودر كلها حلوه
عطر جادور من ديور بعد حلوو
وانتي وذوقج
باقي العطور اشتري من محلات اجمل والرصاصي وسويس اربيان والفايز والشايع والعربيه للعود وسيد جنيد
الشايع عندهم عطر هاجر حلوو
القرشي عندهم مسك العروس مهم للعروسه تشتريه
وعندهم البخور الملكي كل العرايس يشترونه
وعندهم بعد عطور شعر بخاخ حيل حلوه خاصه اللي بريحة دهن العود واللي بالورد الطائفي
وهم عندهم عطر اسمه رامان فضييييييييييع ب28 دك فعلا فخم وراقي
الرصاصي عندهم بخور المميز يهبل والله اني للحين ادعي للي دلتني عليه حتى يجي معاه مبخاره هديه
وهم عندهم بخور شيخ الشيوخ وبخور راقيه
بالنسبه لعطورهم عندهم عطر اسمه رصاصي بور فيم حلووو حييل وعندهم دهن عود حلو اسمه عنبر العود
وعندهم عطر بعد اسمه عود المسك
محل اجمل عندهم كلونيا اشرقت حلوه للفراش وعندهم بعد عطر جديد حلوو نسيت اسمه
عندهم عطر اسمه ساكريفايس حلووو بعد ويجي مع مجموعته وعطر اسمه غرامي هم ادمنته فتره
سويس اربيان عندهم مجموعة كشخه ومعطر جو اسمه سلمى-كشخه حيييييييل حلووو
مجموعات الجسم :
عندج مجموعة سويت كاميليا من محل زهور الريف
مجموعة المسك من بدي شوب
وعندج مجموعة اللافندر من بدي سنتر بعد حلوه ومجموعة زهرة النرجس وهم هالمحل عنده شموع معطره وفواحه
خلطات الجو :
عندج من محل اسمه اطياب زكيه معطر جو اسمه انيس الروح
من الرصاصي في اكوا بتول واكوا كوثر
من اجمل في معطر جو ليلة خميس
من الفايز عندهم معطر جو اسمه مرايم ريحته جنها رشوش حلوه
طبعا لاتنسين الساعات والملابس الداخليه يفضل يكونون اطقم واغراضج استشوار وسيراميك واكياس للملابس وعلاقات خام مدري وين يبيعونهم بس انا اشوف لهم دعايات بمجلات الاعلانات وشغلات من سنتر بوينت لترتيب اغراض من اغراض الحمام والملابس الداخليه وهم ستاند عطور يبيعونه هم محلات اللي يبيعون الكماليات ويغلفون الهدايا في محل فوق بمجمع المنار مول يبيع ستاندات مغلفه وخالصه وهم محل الروقي للعطور عندهم ستاند عطور مع اضاءة شفت اعلانهم عنه
وعندج هم طقم مبخره
وفواحات كهربائيه وفواحات بالشمعه وفي فواحات اعواد تلقينها عند بدي شوب حلوه تنحط بالحمام
ولاتنسين برنامج العروس بالصالون قبل العرس
وتنظيف الاسنان وتبييضهم قبل العرس بعياده
والحمامات المغربيه ابدي فيها على الاقل كل اسبوعين حمام وان قرب على عرسج شهرين كل 10 ايام سوي حمام
ومع الحمامات لازم خلطات وترطيب الجسم اهم شي عشان لا يتشقق من الفرك والحمامات
واذا بشرتج فيها مشاكل عالجيها
واهم شي اهتمي بصحتج واكلج وارتاحي من داخل ان انشاء الله يتم بسهوله
وهم بليلة زفتج
عندج محلات الافراح تقدرين تختارين زفه اغنية او شعر يحطها الدي جي حق العرس على دخلتج للصاله اذا عرسج بصاله
ملاحظه
اذا ساكنه ببيت حموله فصلي دراريع ناعمه وكثري منها تلقين منها بمحلات دراعات ساره بس كله قياساتهم كبيره
يعني خصصي دراريع للحموله ناعمين لو تروحين الخياط ومنج الخام والكلف وتفصلين لو من كتالوج والا من مجله ومن كيفج او من صوره بالنت بس الاهم تروحين خياطين مايخربون وخياطهم مضبوط
