عروس جديده ومأساتي مع تنظيم الوقت؟؟؟؟

[جـاذبـ&انثى&يـة]

السلام عليكم

حبايبي انا صارلي شهر من تزوجت واحس مو قادرة انسق الوقت مابين تنظيف البيت وترتيب شكلي وانزل على حمولتي واقعد مع زوجي؟؟؟؟؟؟؟؟؟؟؟؟؟؟؟؟؟؟

انا بوضح لكم نظام شقتي عبارة عن غرفه نوم وصاله وحمام ومطبخ

وانا موظفه

زوجي مايحب ياكل من طبخ الخدامة لازم انا اطبخ ولا لازم اتفنتك يعني نظام العيش ودياي مايحبه

ونظام دوامة العصر ومايطلع الا المغرب او العشا فلازم اغديه واكسر عن عيني شوي من التعب

ولازم اسوي له عشا مع اننا نتغدى متأخر !!!!!!!!!!! بس لازم عشا ومو اي شي !!!!!

حمولتي يلحون علي يوميا انزل بس مو قادره مو عارفه انسق وقتي مادري احس ضايعه

طبعا نسيت اقولكم ان خدمهم يغسلون ملابسنا وانا وصيت الخدامة تكوي ملابسي اما ملابسه اهوا فارض علي اكويهم << فرضيات سي سيد اتمنى تساعدوني على استغلال وقتي ؟؟؟

 

[وردة بيتنا]

موفقة اختي

يعني الحين عندج

- الدوام

- غدا ريلج

- عشا ريلج

- كوي هدوم ريلج

- الحمولة


اول شي ذكري الله . و هدي بالج

متى تردين من الدوام ؟ . و متى الغدا ؟ جم الوقت بينهم ؟

عقب الغدا عندج شي ؟ . عيل اكوي هدوم ريلج . او انج ترتاحين . او تروحين عند الحمولة .

و عن العشا . يمديج تكونين مرتاحة و عقبها تسوين العشا


و عن الحمولة مو شرط كل يوم . اعتذري لهم و قوليلهم انتوا على راسي و احبكم والله سامحوني حيل مضغوطة و مشغولة والا جان ودي اقعد عندكم طول اليوم فبحاول كل ما قدرت انني اقعد معاكم واستانس

 

[مجنونة نت]

ما دام طلبتي المشورة معنآهآ انتي سنعة والله يوفقك ان شاء الله

أول شي واهم شي ان لا تخلين شي يتراكم ابد.. يعني الصحن اللي يطيح غسليه اول باول.. وبالصالة رتبيها اول باول

والحمام وانتي بكرامة يوميا اذا دخلتيه مثلا الظهر بسرعة بسرعة غسليه .. انا حاطة بحمامي جف بخاخ الحمامات وهاربيك للمراحيض

وبخاخ تنظيف الزجاج وداك للسيراميك.. طريقتي.. لما استخدم الحمام ( الله يعزكم ) ارش داك ع المغسلة وهاربيك بالمرحاض..

وعلى ما انظف المرايا بمنظف الزجاج يكون الجف أخذ مفعوله.. افرك المغسلة بسرعة واسبعها.. ثم افرك المرحاض واسبعه.. بعدها ارش

الداك ع الارضية وادعكها بمكنسة بعدين اسبعها وامسحها.. واطلع من الحمام وهو ريحته تهبل ونظافته يا سلام.. وما اخذ مني حتى 10 دقايق

وللعلم اذا استمريتي على شغلة تسوينها يوميا سبحان الله الجسم يتعود عليها.. وتصير عندك عادة الغسيل اليومي للحمام.. وبدون تعب

المطبخ.. لما تطبخين وانتي تطبخين اول بأول غسلي المواعين وامسحي الطاولات.. والارفف.. والله يعافي بخاخ ديتول للمطبخ يسهل المسح وينظف

يعني لا تطلعين الا المطبخ يلمع وما يبقى غير الصينية والصحون اللي تاكلون فيها.. أدري لما تخلصون اكل بتحسين بتعب وثقل.. ما عليه

تحملي شوي واغسليهم وارتاحي منهم.. نجي للصالة.. خلي ايدينك فيها طول اليوم.. يعني اول باول ترتيب وتعطير.. صدقيني ما راح تنحاس

وبيصير الشغل سهل فيها.. نجي للأهم غرفة النوم.. تعلمي من تقومين ترتبين السرير قبل اي شي.. واذا فيه شي طايح تشيلينه والتسريحة اول بأول

ترتبينها لا تخلين شي عليها.. وخلي البخور صديق غرفتك.. يعني دايم بخريها.. بيبقى الكنس والمسح.. يوميا سطل فيه مطهر السيراميك بعد ما تكنسين

الصالة والغرفة امسحي.. ولأن شغلك مرتب اول بأول ماراح تاخذين وقت.. ولو تحسبيها بالوقت كل الشغل ما راح ياخذ ساعة يوميا من غير شغل الطباخ

الحين انتي نظفتي البيت وخلصتي وبخرتي.. ادخلي الحمام وخذي دوش.. والبسي وتمكيجي وتعطري.. واذا يوميا تكشخين وتتمكيجين بتاخذ يدينك على المكياج

وتصيرين تخلصين بربع ساعة ..

نجي للكوي.. بالنسبة لي اكوي بالصالة لما يكون زوجي مو موجود او نايم.. اكوي وانتي تناظرين تلفزيون او تتكلمين بالتلفون.. والله بتخلصين

وانتي ما حسيتي بالوقت.. ولا تكوين كل يوم.. خلي الكوي بالويك اند.. او مرتين بالاسبوع ..

ادري كلامي كثير بس لو تنفذينه بالحرف بتخلصين الشغل وتتكشخين وتنزلين لكن تأكدي ان هالشغلة تبي لها جهد.. وان شاء الله زوجك ما يشوفك الا اسنع وحدة

 

[بمبة المفترسة]

شوفي غرفة النوم ماتحتاج تنظيف ترتيب بس والتنظيف بالاسبوع مرة تخمينها وتمسحينهاا وبخور وهالسوالف
والمطبخ بعد تنظيف اسبوعي بس مسحيه مساح يومي
والصالة بعد بس ترتيب خوو ماكو يهال ولوية وحوسة مجرد ترتيب والتنظيف اسبوعي خليه
والغسالة ممكن تاخذين اوتوماتيك
والكوي وزعيه على ايام الاسبوع كل يوم اكوي شوي
بعدين ليش ما تتغدون مع حمولتج اسهل لج ؟؟؟!!!!!!!!
الطبخ حاولي تقصصين البصل والثوم وتحطينه بالثلاجة وقت الطباخ يكون جاهز بس تطلعينه
البقدونس مثلا والطماط والجزر قصصي كل شي وحطيه بمواعين بلاستيك عشان ما تتعنين كل مرة وحطيه بالثلاجة
الدقوس مثلا سوي كمية وحطية بالثلاجة مجرد تسخنينه وقت الحاجة