عزازيل .. كتاب اكثر من مجرم

[mad-artis]

بصراحه انا رحت الحج هالسنه

وقررت اني ابتعد عن كل الامور الغلط او الي تشتت فكري انا كمسلمه

شدني الكتاب والضجه الي صارت حوالينه


قريته .. وصلت نصه بيومين وبصراحه خفت صار جنه مرايه تعكس الجانب السيئ فيني .. استحيت من نفسي ومن ربي


انا شنو انا من الي ينكتب

خلاني اسأل نفسي اسأله وهز كل معتقداتي وزعزع ثوابتي .. بديت احس اني فعلا غلط رحت الحج
وانا قلبي مو مستعد واني خسرت بروحي الحج فرصه عمري

انا فعلا ضعت

 

[دلع السلاطين]

انا قريت الكتاب وماحسيت بلي حسيته انتي ومااثر بمعتقداتي ولا ديني

لانه بس عرفني علي النزاع المسيحي بين الكنائس

ياريت توضحين من اي ناحيه هالكتاب اثرر وشنوو لاشياء الي استحيتي منها لما قريتي الكتاب
ياريت توضحين لي بس
يمكن اكون غافله

 

[MiSs kw]

رد : رد: عزازيل .. كتاب اكثر من مجرم

انا قريت الكتاب وماحسيت بلي حسيته انتي ومااثر بمعتقداتي ولا ديني

لانه بس عرفني علي النزاع المسيحي بين الكنائس

ياريت توضحين من اي ناحيه هالكتاب اثرر وشنوو لاشياء الي استحيتي منها لما قريتي الكتاب
ياريت توضحين لي بس
يمكن اكون غافله

نفس سؤالها
من اي ناحية اثر فيج
انا بعد قريته و حاله حال باجي الكتب الي عن المسيحية و اللاهوت
واي جزء من الكتاب اثر فيج
حددي اي لفافه عشان افهم
؟!؟!؟!؟!؟!؟!

 

[آحبه حب هآلكني]

رد : عزازيل .. كتاب اكثر من مجرم

يعطيج العافيه

 

[lailosh]

انا ما قريت الروايه

بس اذا انتي من الناس الي يتاثرون على اشياء بسيطة لا تقرين عن الاديان مع اني اشجع على قراءة عن الاديان عشان شي حلو نعرف ثقافه الاديان السماويه وحتى الارضيه

بس اذا انتي من النوع الي يتأثر وخري من هنوع من الروايات والكتب

 

[هوية غريب]

رد : عزازيل .. كتاب اكثر من مجرم

أنا ما قريت الكتاب .. لكن بالنسبة للقراءة بشكل عام لازم تبتعدين عن المواضيع اللي انتي مو مستعدة لها ولفهمها ..

وإذا كنتي قاعدة تبنين نفسيتج وإيمانج شوي شوي من ناحية عقيدتج كمسلمة غلط انج تروحين سيدة على العقائد الثانية وتقرين عنها راح تتشتتين وما راح تعرفين الصح من الغلط

اوقفي على أرض ثابتة - اللي اهيا العقيدة - وخلي تصير مثل الجبل في قلبج وتالي اقري عن أفكار وعقائد أخرى

وياريت توضحين شنو مشكلة أفكار الكتاب معاج ..


همسة في إذنج: المؤمن ما تهزه كلمات قلائل إذا كان الإيمان الصحيح راسخ في قلبه وعقله وروحه ..
الله يوفقج

 

[mad-artis]

اسفه علي الرد المتاخر

الكتاب ما شككني في ديني او بوجود ربي او الاسلام

الكتاب خلاني اقول حق نفسي انتي شنو تسوين .. هل الايام الي انا معتمده عليه اهو بصلاتي والسنن والصيام والخ الخ
خجلني من نفسي كوني كنت اظن نفسي واااو انا الي محد يكلمني بالدين مؤمنه واعرف ربي واعرف الصح من الغلط وحافظه جزء كبير من القران ممكن الي النص والوحيده الي تحجبت بعايلتنا بين البنات وحتي امي .. ورحت الحج قبل امي العوده وامي ..

لكن فعلا استحيت من نفسي لان كل هذا كان فكر .. الفكر الي اترسو راسي فيه الداعيات الاسلاميات .. وما كان بقناعه .. ما سويت جذي لاني احب سويته لاني اخاف .. حسيت بالضعف الديني والدنيوي بعد
الدين مو اني اخاف من ربي ومثل ما يصورونه لنا بالمدرسه وله بكتب الدين ان اهو خلقنا عشان يعذبنا او يحرقنا في جهنهم .. لكنه دين تسامح وحب .. وانا هالنقطتين الي استخلصتهم من روايتي ..

لكن قريته وقرايته كانت الصفعه الي صحتني انا بهالعمر وللحين ما وصلت للايمان لدرجه

وسلامتكم ..

 

[هوية غريب]

رد : عزازيل .. كتاب اكثر من مجرم

حبيبتي .. كلامج حلو .. :eh_s(17):
والأحلى كلام رب العالمين لما خاطب نبيه عليه الصلاة والسلام وقال له (طه ، ما أنزلنا عليك القرآن لتشقى)

بس بسألج سؤال .. انتي قلتي في نهاية كلامج اللي بأول الموضوع (أنا ضعت) ..
وتقولين في نهاية كلامج اللي بآخر الموضوع (الصفعة اللي صحتني) ..

حياتي انتي حددي .. ضعتي .. ولا صحيتي؟؟ ترى الفرق كبير

وصدقيني الكلام اللي استخلصتيه من كتب الدين أو المدرسة ان ربنا خلقنا عشان يعذبنا مو صحيح .. ولا مكتوب بكتب الدين والمدرسة هالكلام .. يمكن انتي فهمتيه غلط وهذا اللي صحيتي منه ..

عموماً الله يوفقنا ويوفقج للي يحبه ويرضاه .. :eh_s(7):

 

[mad-artis]

بالضبط
مشكله النت ان مهما تكلمنا ما توصل لا الفكره ولا المشاعر

انا فعلا ضعت وما اكتشفت اني ضايعه بفكري الي من الصفعه الي صحتني
الي اكتبه مسيحي مؤمن بقلبه اكثر مني

 

[دلع السلاطين]

صح كلامج النت مهما تكلمنا مايوصل مشاعرنا او الشي الي نبي نوصله
انا الي فهمته من كلامج انه انتي كنتي تصلين وتصومين وتأدين كل العبادات لانج تخافيين من العذاب ومن النار وكانت عبادتج لربج بس لانج تأثرتي بكلام الداعيات الي كان اسلوبهم ترهيب وليس ترغيب بالدين

حبيبتي في الكثير من المشايخ والمطاوعه والداعيات فاهمين الدين غلط
يفكرون انه بالترهيب وزرع الخووف بقلوب الناس ينشرون الدين ويساعدون علي انه الناس تتقرب من ربها اكثر
وهذا غلط لانه بهالطريقه يخلون الناس بدال ماتتقرب تنفر وتخاف

ولاتنسين انه دينا لاسلامي دين يسر مو عسر
وانتي بما انج وعيتي وعرفتي الصح تقدرين تبدين وتعبدين ربج العباده الصحيحه الي تكون خالصه لوجه وحبا فيه ومو خوف منه

 

[MiSs kw]

رد : عزازيل .. كتاب اكثر من مجرم

اها
الحين فهمت
و عدل كلامج الروايه تخليج تفكرين و تتعمقين بالدين طبعا اقصد الاسلامي مو المسيحيه
و يخليج تراجعين نفسج ... هل انا مقصره ؟ هل انا اعتبر انسانه ملتزمه ؟
الدين مو بس تادية الواجبات و الطاعات و العبادات
في شغلات ثانيه
انه نتامل بالدنيا و بكل شي حولنا
اني اسوي طاعاتي بحب و لذه مو تأدية فرض و بس
ليش ما تكون علاقتنا مع ربنا علاقه حب
اهو احق بالحب من البشر
ليش الخوف منه ... يعني ليش ما نمتنع عن الامور المحرمه حبا و اكراما له .. مو خوف

 

[هوية غريب]

رد : عزازيل .. كتاب اكثر من مجرم

الحمد لله على نعمة الصحوة ،،

مافي مانع نقرا عن مؤمني الديانات الأخرى .. لكن الأجمل والأكثر تأثير لنا أن نقرأ للمؤمنين بعقيدتنا الصافية .. ان نقرأ للشخصيات الإسلامية اللي تميزت بأخلاقها وتسامحها .. وهالشي موجود في قصص الكثيرين من اللي قريت لهم .. كأهل البيت والصحابة والتابعين والأئمة وغيرهم ،،

راح تلقين الحب والتسامح في قصصهم ، أنصحج فيهم

وفي نقطة مهمة البنات قاعدين ينفونها وهي مذكورة في كتاب ربنا (يدعون ربهم خوفاً وطمعاً) .. المؤمن بين جناحي الخوف والرجاء .. مو الرجاء فقط

ومثل ما ذكر الخوف .. ذكر الحب (قل إن كنتم تحبون الله فاتبعوني يحببكم الله) .. ودعاء النبي عليه الصلاة والسلام بما معناه (اللهم إني أسألك حبك وحب من أحبك وحب عمل يقربني إلى حبك)

التوازن في الأمور مطلوب .. لكن الركون إلى الخوف فقط .. خطأ
والركون إلى الحب فقط .. أيضاً خطأ

 

[MiSs kw]

رد : عزازيل .. كتاب اكثر من مجرم

و في بعد شغله

تذكرون هالجزء

هيبا :عزازيل ! جئت
عزازيل : يا هيبا قلت لك مرارا اني لا اجئ ولا اذهب انت الذي تجئ بي حين تشاء فانا اتي اليك منك و بك و فيك

هالجزئية علمتني انه ممكن انا اتحكم بوجود ابليس و وسواسه بحياتي لانه وجوده مني
اذا انا كنت ضعيفه و خايفه لمجرد الخوف من العذاب
راح اكون ضعيفه
لكن لو كان التزامي و امتناعي عن المحرمات نابع من حب لله سبحانه و تعالي
راح يكون قوي و صعب حضور ابليس


انشاالله نكون بايمان كامل بالحب ... دون الخوف

 

[عهود الحب]

رد : عزازيل .. كتاب اكثر من مجرم

اقري القرآن
ينمسح كل أثر لهالرواية وغيرها
سورة البقرة كفيلة بتقريبج للروحانية أكثر و أكثر

 

[هوية غريب]

رد : عزازيل .. كتاب اكثر من مجرم

انشاالله نكون بايمان كامل بالحب ... دون الخوف

كلامج حلو .. ما عدا هالجزئية ..
الإيمان لا يكون إيماناً دون أن تتكامل كل جزئياته .. خوف .. رجاء .. حب .. حياء .. شوق .. رضى .. ثقة .. وغيرها أمور كثيرة أمرنا بها في القرآن والسنة

الله سبحانه أمرنا بالخوف منه في القرآن (فلا تخافوهم وخافون إن كنتم مؤمنين)

وأمرنا بالخوف والرجاء معاً (يدعون ربهم خوفاً وطمعاً)

وأمرنا بالحب (ومن الناس من يتخذ من دون الله أنداداً يحبونهم كحب الله .. والذين آمنوا أشد حباً لله)

وفي الشوق .. دعاء النبي عليه الصلاة والسلام (اللهم ارزقني لذة النظر إلى وجهك الكريم والشوق إلى لقائك) .. وفي هذا عظيم الحب والشوق

وامتدح المؤمنين بالرضى (رضي الله عنهم ورضوا عنه .. ذلك لمن خشي ربه)

وأمرنا بالثقة به (إنه لا ييأس من روح الله إلا القوم الكافرون)

لكن أن نأخذ جزئية ونطرح أخرى .. فسيتنقص الإيمان وتنتقص معه روح العبادة ولذتها

 

[MiSs kw]

رد : عزازيل .. كتاب اكثر من مجرم

اقتنعت

ماراح اجادل لانه كلامج صحيح و مقنع

مشكوره حبيبتي
صححتي لي فكره غلط

 

[:: Diva ::]

ما عمري استمتعت بردود كثر هالردود الي بهالموضوع

صاحبة الموضوع :* بوسه على راسج
و كل وحده ردت عليج :* على راسها


قمه في الرقي و الوعي و الادراك
حبيتكم

 

[al-musk]

الكتاب حده خطير وعجيب..انصح الكل يقراه

 

[ليلو جبريت]

رد : عزازيل .. كتاب اكثر من مجرم

احب ردود العضوات في هالقسم

احترام + لباقة + ادب + رقي

اهنيج يالمشرفه على هالعضوات

 

[mad-artis]

تسلمون حبايبي .. الله لا يحرمني من خوات مثلكم ردوردكم امر جميل وراقي

وصدقوني جاري من اليوم اني ابدي صفحه يديده من ربي ونفسي

هاذي فايده الكتب من هالنوع انها تنور زوايا ما فكرنا نمر صوبها وتفتح لنا طرق للعبور اعمق واسهل من طرقنا الغبيه الي حفظونياها