علموني إذا ناسبة شي !!

[espresso]

هالللو صبايا


اليوم رحت سجلت بناتي الله يحفظهم بنادي صيفي ...

لأنه من بدت العطلة و ىنا ماكلة هوى معاهم ... ماني قادرة أسوي شي بالبيت منهم الله يحفظهم ... يمشون تحت أباطي حني بطة و فروخها تحتها !!!

طوووووووووووووول النهار .. والله مت ... وما يبون الخدامة لأني ما أخليهم عندها كله وياي !!

المهم سالفتي الآتي :

أبي أنفض البيت نفاض ... عدل مدل بسويه ...


و أبي أخلص كل شغلي انشالله ... من خياط و سوق و طبيب ..,,,,ووووووووووو .. الخ


بقولكم شنو بسوي .. و انتوا ذكروني بأي فتفوته ممكن أسويها و استغل وقتي فيها !!

يعني :
1. يوم حق غرفة نومي : تنظيف رف رف في الكبت ومسحه و إعادة ترتيب قطعة قطعة من الملابس و جرد القديم
2. يوم حق غرفة اليهال : جرد الملابس و مسح الكبتات وتصنيف الألعاب و تحريك السراير و تنظيف أسفلها و أخيرا تغيير الشراشف
3. يوم حق غرفة المكتب : جرد كتاب كتاب .. ورمي الأراق اللي ما أبيها .. تنسيق الأوراق الفلة اللي حق الدوام و اللي حق مقادير الأكلات ووو .
4. يوم حق المطبخ : تنظيف الأجهزة ومسح الكبتات و غسيل الثلاجة و كتابة لستة رمضان "كبب -لحم - وصفات .."

5. يوم لتنظيف الدرايش للبيت كله و البيبان و فتحات التكييف و اللوحات و مقابس الكهربا و الديكور و الحوائط المبقعة ..

طبعا آنا ما قلت لكم إنه خدامتي صج مو توها توها واصلة بس في حكم اليديدة .. ليش ؟؟
لأنها من وصلت ما قدرت أجابلها عدل عدل .. مع اللوية و اليهال و الدوام


فكل اللي طاف لازم أسويه و الخدامة تكون فوق راسي ومعاي


و كل يوم اخصصه حق شي يكون معاه طبعا الطبخ اليومي " الغدا " لأنه أبيها تتعلم الطبخ من ألحين لين رمضان على ما يخلص إلا إنشالله تكون متقفنه الصنعة
لأنه برمضان راح أطبخ انشالله عقب الدوام فتكون الخدامة معاي

وأبي يوم أكود كل ملابس التقصير و التصليح و .. و .. للخياط أوديهم
ويوم حق طبيب الأسنان
ويم أقز و أطلع و أستانس و أشرب كوفي و أتسوق ..ههههه


ها ؟؟؟ ذكروني ؟؟ شنو أكو بعد ؟؟_03ba:

 

[الرهيييفه]

على جذيه مابقى شى من الاجازه

يعطيك العافية مقدما

 

[espresso]

ههه ... ليش ؟؟

فيه وقت انشالله ... النادي اسبوعين بس !!

تسلمييييييييييين عالرد

 

[espresso]

شدعوه ... وين الردود الحلوة ؟؟؟

 

[sweet patchouli]

الله يعطيج العافية
و عساج على القوة

لا تنسين بالمطبخ اتاكدين المعلبات و صلاحيتها

و البهارات غيريهم حق رمضان اخذي شي يديد احسن

و الماعين القدم و المطارات اللي ما تبينها

كل رمضان اشتري كل شي يديد بس اوزع اللي عندي قديم اول

و بعد شنوو؟؟؟؟؟؟


تكرمين الجواتي هم سوي عليهم فرز

بس صج ياحلو التنظيف يعطيج راحة نفسية

​

​

​

 

[No0oNh]

عساج عالقوه ويا رب تخلصين وتفتكين

 

[كويتية ذهب]

ماشاء الله عليج مابقى شي
انا لايعة جبدي من شقتي بدقها دق عن بكرة ابيها
وانفضها نفاض واوافيج بالاخبار عاد متى ربج يفرجها؟
يمكن السنة الجاية جانا من الحيين تقرين موضوعي

 

[الحراير]

الله يعينج طلعي البردات وغسليهم

 

[عهود الحب]

غيري ترتيب الغرف
حركي السراير حركي الكبتات اذا تقدرين
تغيير اماكن قطع الاثاث يجدد الروح بالبيت


سوي جرد عالبهارات مثل ماقالوا لج البنات
وانا طريقتي الزق ستكر عالعلبة واخليها تكتب اسم البهار بلغتها
علميها عدة طبخات
خليها تكتب الطبخة بدفترها
عادي
انا مخصصة لها دفتر بالمطبخ وتكتب بلغتها كل شي


علميها تحط الاوراق الصفر اللي يلزقون عالثلاجة او بمكان محدد بالمطبخ
وكل ما خلص شي تكتبه بلغتها وتبلغج اول بأول



خل تمسح لج اللمبات والبنكات اذا في بنكة وحملة التنظيفات لازم هي تتفنها اول مرة تعلمينها ثاني مرة بروحها تسوي كل شي

والله يوفقج يالغالية مع حملة التنظيفات


انا خلصت 3 غرف بيوم واحد مع خدامتي وعيالي كلهم ينظفون وعينهم مشلوعة بس طبعا هذاك اليوم الغدا والعشا من المطعم توفيرا للوقت والجهد



باقي لي بس غرفتي وكل يوم باجر باجر باجر

 

[عهود الحب]

نسيت سوي جرد على مواعين رمضان ههههههههههههه
وكل عام وانتي بخير وعساج تعودينه وكل سنة تصومينه

 

[طيرشلوا]

خل تمسح لج اللمبات والبنكات اذا في بنكة وحملة التنظيفات لازم هي تتفنها اول مرة تعلمينها ثاني مرة بروحها تسوي كل شي

ياعهود ودى انى اخليها بس هالقلب الخايس اذا ماقمت ونفضت ما ارتاح

لازم بين فترة والثانية انفض عاد تونى اليوم مخلصة تنظيف غرفة اغراض الروضة

قطيعة جن الاغراض تولد ياكثر ماقطيت من حوسة ووزعت لعيال اخوانى العاب

احس تو الغرفة بين وجهها ومابقالى الا المطبخ وتنظيف اللمبات لانى من زمان بادية

هجوم متوحش على البيت واكثر ما استانس سواق شارعنا لانى اناديهم يقطون اغراض

مع خدامتى والى حصل زولية والى حصل شغلات يحتاجها

ياحليلهم من اناديهم مايقولون لى لا

عسا اللة لايغيرهم علينا