علم الكويت وحكامها فقط

[ii DareeN ii]

اليوم وانا اتصفح الجريده قريت هالقرار وبصراحه عجبني الا واهو يمنع وضع اي صور لزعماء او اعلام خارجيه

من رايي ان هالقرار صائب ويه متاخر لكويت لها سيادتها والمفروض الولاء يكون خالص للوطن والمفروض الوافدين يلتمون بهذا القرار وحتى المواطنين الي يحطون صور لغير علم لكويت او شخصيات غير كويتيه من حكام يلتزمون بهالقانون والا راح يتعرضون لسحب السياره وهذي ورده مني للحكومه على هذا القرار :tek:

فيما يلي الخبر


حجز أي سيارة تحمل صور زعماء وأعلاماً خارجيين
ضمن قراراته الجريئة والوطنية، أصدر وزير الداخلية الشيخ جابر الخالد قراراً بحجز أي سيارة تحمل ملصقات عليها صوراً أو أعلاماً أو عبارات تابعة لأي دولة غير الكويت أو لأي أحزاب خارجية أو أشخاص خارجيين، واستثنى الخالد من ذلك علم الكويت ورموز البلاد من حكامها.

تاريخ النشر: الثلاثاء 4/3/2008

 

[زيـنـه]

قرار جرئ و بوقته

بس الكلام الحين

هل سيتم تطبيقه ؟

 

[سنفــــور كســــول]

القـرار حلـو لكن ينقصه شي برايي

مافيها شي لوحطيها اعلام خليجيه المفروض يعدلون فيه ويخلووون حتى الاعلام والحكام الخليجيين عادي


لان حفظوونا مقوله تقول خليجنا واحد .....




وتسلمين

 

[سنفــــــور غضبـــــان]

من وقف معانا بالغزووو بعد الله .. من فزع لنا ؟؟


السعودية والامارات والبحرين ومصر


ودول وااااااجد


شفيها اذا مصري حط علم ديرته ؟؟


شفيها اذا سعودي حط علم ديرته ؟؟

 

[ii DareeN ii]

اول شي حياكم الله سنافر خوش نكات احب السنافر


الباب اذا صار في تجاوزات مراح يتطبق واحسن ان حطو هالقرار الولاء حق الوطن وبس واحنا عمرنا مانكرنا دول الخليج ولا وقفتهم ويانا الحمدالله نذكرها بكل مكان من شعب وحكام بس هذا قرار صائب من الحكومه والي يبي علم ديرته يحطه في بيته والوطنيه مو في علم الي بيحط علم وصوره يحط صوره علم وديرت الي قايمه فيه متى ماراح ديرته يحط الي يبي بسنا ولائات حق غير الديره

 

[jolie_q8]

انا اشوف القرار مو منطقي وماله داعي

وجهة نظر

 

[جروح تبتسم]

مادري بس استغرب من هالقرار .............. مايطلع من الكويت ..!
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
بس اتصدقون ساعات افكر انا لو ادرس بره او مسافره لاي ظرف من الظروف من غير شر
لاي دوله سواء كانت خليجيه او عربيه او حتى اجنبيه
ماافكر اني احط العلم او صوره الشيخ ع السياره !!!!!!!!!!!!!!!

 

[Oceans princess]

القرار جرئ .... وطني .... يوقف الولاءات العلنية عند حدها .... وزير الداخلية الشيخ جابر الخالد عسكري سابق وكان قائد القوات المسلحة أثناء الغزو العراقي على الكويت .... وعين بعد ذلك سفير لدولة الكويت لدى المملكة العربية السعودية .... ونحن بحاجة لمثل هذه القرارات التي تعيد الهيبة لقانون ولرجال الداخلية .....

أحدثت القوائم التي اعتمدها وزير الداخلية للتجنيس ردات فعل عنيفة من بعض أعضاء مجلس الأمة ومنهم من هدد باستجوابه وقابل سمو الأمير لهذا الغرض وهو النائب المليفي نائب منطقة مشرف وبيان .... والذي أحدث هذه الضجة هو تجنيس الوزير لسائقه الخاص ياسر صبيح والذي ينتمي لأصول عراقية اتهمه البعض ومن منطلق أسانيد وأدلة بالإضرار بمصالح الكويت والكويتيين إبان الغزو ....

هذه الصورة المهتزة للوزير .... انقلبت لصالحة 180 درجة في أعقاب أحداث التأبين سيئة الذكر وما اتخذه من قرارات احتسبت لصالحه ....

أيضا هناك القرارات التي اتخذها الشيخ خالد الجابر وتستحق التصفيق ... منها :

1- المعاملة بالمثل في مسألة فرض رسوم للتأشيرات الممنوحة للكويتيين من البلدان الأخرى .... يعني الدولة اللي تفرض على الكويتي رسوم وتأشيرات تفرض عليها وزارة الداخلية نفس الرسوم والتأشيرات وبنفس القيمة ....

2- قيامه بملاحقه سائق هندي كان يقود مركبته بسرعة جنونية ومعه أطفال .... فقام وزير الداخلية بملاحقته بسيارته الخاصة لإنقاذ الأطفال وتسليمه شخصيا للمخفر الذين فوجئوا بدخول الوزير عليهم ....

3- من قرارات الوزير الجريئة والتي تحسب له منع اتصال المجرمين أو المخالفين الإتصال بسفاراتهم أثناء التحقيق في المخافر أو النيابة ومنع كذلك حضور أي مندوب عن السفارات الأجنبية التي سعت وتسعى دائماً للإلتفاف حول القانون بنصرة مواطنيها وأنتم تعرفون منو هذه الجاليات ؟؟؟

4- إقامة دعوى قضائية ضد النائبين في مجلس الأمة بسبب الأحداث الأخيرة وعدم تراجعه عن هذه الدعوى على الرغم من المحاولات المستميتة التي سعت لثنيه عن هذا القرار ....

5- اتصاله بالسلطات البحرينية وهي دولة جارة وعزيزة وتربطنا بها روابط إخوة لتقديم احتجاج رسمي لدى السلطات البحرينية بسبب مشاركة مواطنين بحرينين في أحداث التأبين المشؤومة ...

6- قيامه بإحالة المشاركين في أحداث التأبين من جاليات لبنانية وإيرانية وبحرينية للتحقيق تمهيداً لإبعادهم عن الكويت ...


بعد كل هذا .... ألا يستحق هذا الوزير من الكويتيين التصفيق ... :ggdw:

 

[غيدآء]

وااااااااااااااااااااااااو


بصراحه قرار لا يعلى عليه برااافووو


وبسنا تطبيل وتصفيق حق غيرنا خلونا نحس شوي انه الكويت لها هيبه مو طوفه هبيطه لكل من مر عليهاا


وهالشي يبرررررد القلب ...



اللهم احفظ الكويت وشعبها من كل مكروووه

 

[عالي مستواها]

صراحة أحسه قرار تعسفي !!

ياما علم الكويت ولا أحجز السيارة ؟!

غريب أمرهم ..

 

[مرت ريلي]

بصراحة بعد قراءة الموضوع والردود
انا من المؤيدين لهالقرار وبشدة

 

[OmRashed]

خوش قرار يبرد القلب .. وكان المفروض من زمان يقرونه

مشكوره على هالخبر الحلو

 

[ii DareeN ii]

حياكم الله وعلى اي مواطن يشوف شي مخالف على سياره يبلغ عن رقم السياره عن طريق رقم عمليات الداخليه 777 وعن نفسي انا اول وحده بسويها لو شفت شي مخالف

 

[عالي مستواها]

ما عتقد بيتطبق القانون إلا على ناس وناس

مابي احدد اكثر واوضح قصدي عشان ما أزعل أحد

أيام المسيرة اللي طافت شفت ولا عشرين سيارة حاطين أعلام أمريكا شكبرها مغطيه سياراتهم كلها .. يعني بيوقفون هذول بعد ؟! وفيه ناس حاطين أعلام دول عربية وخليجية وانا وحده منهم .. ماني مسويه شي غلط عشان أخفيه بالعكس أقولها بفخر

الوطنية يعززونها بطرق ثانية مو يفرضونها علينا فرض .. حنا كشعب عندنا وطنية ونحب ديرتنا واللي نعرفه ان حكومتنا ذكية وحازمه أو على الأقل نتمنى تكون كذلك

كون فئة أساءت للكويت وأوضحت بصريح العبارة أن ولاءها لدولة ثانية المفروض تتعاقب وكلنا نشهد على العقاب هذا مو نمنع تعليق الأعلام على السيارات وأعاقب الناس كلها بس خوفــًا من فئة معينة لا تزعل

أخ بس لو عند دولة ثانية اللي صار جان سفروهم ما فيها روح تعال

ما عليه حدي مشتطه بس القانون مع احترامي ماله معنى ينم عن ضعف !!

 

[بيآدر الكوويت]

السلام عليكم
انا اقول لو الله يفكنا من الهنود والاجانب احنا بخير بس احنا نبي العيد الوطني بروحنا يعني بختصار
بس الكويتين نبي نحتفل عدل
منقوله مقبول ان شاء الله
ارجو الرد بسررررعه اوكي بنات ديرتي
معاكم بنت الكويت
عضويه جديده بس اول مره ارد

 

[غير كل الناس]

غررررررررررررررررريب

 

[MaRiuM]

هذي عنصريه!!!!!!!!!انا ادرس بره و الطلبه الكويتين كللللللللللللللللللللللللللهم حاطين اعلام الكويت ماحد قالنا شي!!!!!!

 

[خجل مطير]

القرار هذا غلط غلط
ليش يعني جذي الحين الشعب يحب
ابوة جابر ويقدرة هذا القرار يمنع الشعب التعبير

 

[Arosha]

الكويت
يا بعد كل نفس بروحي
يا اغلى تراب

والله انها ديرة خير ما مثلها ديرة

طول عمرها الكويت خيرها حق كل الدول العربية يعني شفيها اذا يومين ما رفعتوا اعلام باجي الدول
اقول ترى اسمه عيد الكويت الوطني مو عيد اي دوله ثانيه شكو يعني رازين اعلام دول ثانيه
تدرون هذول يضحكوني والله مادري عبط والا ما يفهمون
خلونا نفرح بالكويت يعني تخيلو مثلا وانتو بالمسيرة تشوفون مثلا 100 علم كويت بينهم 20 او 30 علم دولة ثانيه لو اجنبي اول مره بيي الكويت وبيشوف المسيرة لي شاف علمين بيسغرب بيقول شسالفه ديرتهم لها علمين والا غيروه توه والا شسالفه ولال كل دول الخليج عيد تحريرها 25 فبراير ؟

جنه لما يصير عيد ميلاد واحد من اليهال لما غصب كل اليهال يبون يغنون لهم هبي بيرث دي تو يو شتبون كل واحد عيد ميلاده بروحه كل ديرة عيد تحريرها بروحه عن اللقافه والي وده يرفع علم ثاني مالقى الا هاليوم عناد والا شنو خلو الكويت تتزيين باعلامها خيكون هاليوم كويتي 100%
كويتي وبس
احس الي يرفعون علم ثاني ولاؤهم ناقص شكو علمين والا علم غير الكويت والله يقهروني
واذا مو كويتي وتبي ترفع علم ديرتك ما في مانع ارفعه ورزه بس مو الا باليوم هذا دام هالارض ضفتكم وتدرون بفضلها عليكم ياخي احتفوا مثل باقي شعبها فيها وعشاناها خلوها تبرق علمنا اخضر اسود ابيض واحمر وبس


منهو مثل الكويت
منهو مثل الكويت
منهو مثل الكويت

فديتها عمري لج يا اغلى ديرة