عمليتي شد البطن مع دكتورة جي برويال حياة

[lolo2005]

السلام عليكم بنات
حبيت اقولكم عن تجربتي وانشاءالله تستفيدون منها
انا طولي 157 ووزني 69 ومشكلتي كانت بطني لان من الحمال صارت مأساة واخر بطن لي قيصرية الي ما ترقعت كلش
الحمدالله توكلت على الله ورحت للدكتورة جي برويال حياة وانا كنت ابي دكتورة مو دكتور
ونفسيتها واييد حلوه وحبوبة وشافت بطني وقالت لي انه بتسوي شد بالبطن وشفط بمنطقة المعده عشان تساوي بين طبقات الجلد
وكلمتني المسؤله عن الفلوس وقالتلي حسابي 3500 وقلتلها ليش شدعوه انتي حتى ما شفتي بطني قالت خلاص 3200 قلتلها ابي بعد خصم شدعوه حذي بطني صغيره قالت ها خلاص 3000
المهم قالولي شامل كامل كل شي قلت ميخالف
وكان موعد عمليتي 22/1/2012 وسوولي تحاليل قبل العملية بخمس ايام
والحمدالله نسبة الدم كانت زينه بس الكولسترول والدهون الثلاثية واييد كانت مرتفعه بس قالولي ما ياثر
ولله الحمد رحت موعد العمليه ساعه سبع الصبح والدكتورة وصلت ساعه 7:20 ونفسيتها حلوه وتضحك معاي واطمني وتقولي لاتحاتيين تبين اسوي بعد شي غير الشد قلتلها ابي بس اطلع لعيالي لان كنت حدي ميته من الخوف
وورسمت على جسمي
ولله الحمد سويت العمليه وطلعت من العمليات كانوا حاطين لي جهاز الموروفين للألم واستمروا بمراقبتي يومين مع المسكنات والمضاد وادوية الي تمنع التجلطات
صراحه عنايتهم حلوه واييد والدكتورة لما خلصت عملياتها يات شافتني وطمنتني انه الامور كلها تمام ولله الحمح
وشلت البربيش بعد خمس ايام والالم اتحمله مع المسكنات بس مشدهم الله بالخير
وصراحه ما عجبوني لما شفت بنات بالمنتدى مسويين شغلات واييد على 3200 و3500 قلتلهم مو عاجبني السعر قالولي عيل انزل 200
يعني بالعربي موضوعهم مكاسر
وانا الحين صارلي ععشر ايام بس صراحه بعدها بطني وارمه وتعورني بس يوم عن يوم المشي اهون الحمدالله
وما اقدر امدح او اذم بشغل الدكتورة لان بعده ما صارلي واييد
وملابسي ما تغيرت علي
ولأي استفسار انا بالخدمه
ويارب الله يسهل اموركم

 

[om-a7madeno]

الحمدالله عالسلامه حبوبه و مبروك اللوك اليديد

متابعييييينج انشالله

 

[the white heart]

الحمدلله على السلامة ويا رب تشوفين النتيجة الي تسرك .. متابعينك

 

[عسووووولة]

الحمدلله على سلامتج حبيبتي

 

[راعية الذيب]

الحمد لله علي سلامتج

​

 

[lolo2005]

الله يسلمكم يا قلبي
وباجر عندي مراجعه عشان يغيرون لي الضماد
صج هذا ثالث مره اروح يغيرون لي الضماد

واي تطورات ببلغكم.

 

[lolo2005]

اليوم رحت موعدي والسستر شالت الضماد ومسحت على الجرح ب(بيتادين )ونشفته وردت حطت الضماد وشفت الجرح واييد كبير وصراحه قلبي قام يعورني المهم قلتلها ابي تكتبون لي كريم عشان اثر الجرح لان اذكر لما ولدت قيصرية الدكتورة بس شالت الغرز كتبت لي كريم حق الجرح
بس السستر قالت لاء مو الحين بعدين وانا صراحه خايفه انه ما احط كريم من الحين وما يروح الاثر لانه واييد وشكله كلش مو حلو فشرايكم الي تعرف تقولي الله يوفقكم
وحطت لي موعد حق المساج اللمفاوي وههذا تقول عشان يحرك الدورة الدمويه
وانشاءالله خير
وعفيه البنات الي سويتوا عملية شد عند دكتورة جي بعد جم يوم حطيتوا كريم وشنو الكريم وعادي جذي ولا لاء
لان انا الدكتور ما يشوفني بس الممرضات وخايفه
وتسلمون

 

[الأميرة جوري]

الحمد الله علي السلامه وان شاء الله النتيجه مرضيه يارب

 

[the white heart]

اليوم رحت موعدي والسستر شالت الضماد ومسحت على الجرح ب(بيتادين )ونشفته وردت حطت الضماد وشفت الجرح واييد كبير وصراحه قلبي قام يعورني المهم قلتلها ابي تكتبون لي كريم عشان اثر الجرح لان اذكر لما ولدت قيصرية الدكتورة بس شالت الغرز كتبت لي كريم حق الجرح
بس السستر قالت لاء مو الحين بعدين وانا صراحه خايفه انه ما احط كريم من الحين وما يروح الاثر لانه واييد وشكله كلش مو حلو فشرايكم الي تعرف تقولي الله يوفقكم
وحطت لي موعد حق المساج اللمفاوي وههذا تقول عشان يحرك الدورة الدمويه
وانشاءالله خير
وعفيه البنات الي سويتوا عملية شد عند دكتورة جي بعد جم يوم حطيتوا كريم وشنو الكريم وعادي جذي ولا لاء
لان انا الدكتور ما يشوفني بس الممرضات وخايفه
وتسلمون[/QUO
حبيبتي لولو خلي عنج المحاتاة أدام الدكتورة قالتلج مافي داعي سمعي كلامها ... ولا تفكرين بشكل الجرح ترى كل شي وله حل ومع الكريمات ان شالله رح يخف الأثر ترى النتيجة تطلع عقب شهور ولا تضيقين خلقج خلاص العملية صارت وان شالله ماكو الا العافية ورح تشوفين النتيجة الي تسرج أنتي بس روحي مواعيدج وامشي مع الدكتورة خطوة بخطوة .. والله يوفقج يا رب

 

[freethinker]

اول شي الحمدلله عالسلامه حبي

ثانيا ترى وايد الدكتوره مبالغه بالسعر شدعوه عليها

ثاالثا : بخصوص كريم الجرح .. انا مسويه صدري صارلي اسبوعين الحيين !! تووه الدكتور يقوولي حطي كريم مال الجروح .. لان اكو غرز للحين مايشيلونهم توجج جدمج درب!
وازيدج سافرت ولا يطلع دم خفيف من الجرح دقيت عالدكتور قالي اجلي سالفة الجل .. لمدة 3 ايام بعد لان تووه شايلي الغرز

فعاددي اذا قالتلج تو الناس لان صح !! يبيلج تشووف جرحج وتروحين جم مره .. تشيلج الغرز عقب ينشف مكان الجرح وتحطين الكريم

وسلامتج :d

 

[taybaa]

حمدلله على السلامه

 

[lolo2005]

الله يسلمكم يارب
بس انا ما في دكتورة شافتني
الي تشوفني بس الممرضه لان الدكتورة سوت العمليه وثاني يوم سافرت
وبخصوص الغرز يقولون هذي غرز يمتصها الجسم من غير ما يشيلون شي من جذي انا خايفه انه الاثر ما يروح وبطني بعدها متفوخه من جذي ابي اتأكد اذا شغلها صح ولا في غلط وكلما اكلم الممرضات يقولون عادي عادي
خو اهم شهامهم

الي تعرف الله يخليكم تبلغني
والله يوفقكم كلكم ومشكورين على دعواتكم الحلوه

 

[freethinker]

حبيبتي دام دكتورتج من رويال طلبي احد ثاني يشووفج دكاترة رويال شطار مالوت التجمييل ! خلي دكتور ثاني يراجعلج

 

[lolo2005]

بنات فديتكم
والله شكله عقلي بيطير من الخوف
بس ساعدوني اليوم سبحت ونشفت وعقمت الجرح وحطيت الضماد بس الجرح يعورني
وبس فصخت الكورسيه حسيت اني مو قادره اتكلم وانه مقصوصه بالنص والتنفس صار صعب جذي عادي ولا بس انل
ميخالف يننتكم ادري بس شسوي اجركم على الله

 

[أحلى البشر]

الحمد لله على سلامتج

ماتشوفين شر

 

[!! Ba6a 7lwa !!]

الحمدلله على السلامه

 

[فيلجاويه كيوت]

حمدالله على السلامه وايد فادني موضوعج
اهم شي العوار حدي خايفه منه
شكثر قعدتي بالمستشفى؟
والبربيش شالوه قبل لاتطلعين؟
شديتي العضلات ولا بس الجلد؟

اسفه اذا ثقلت عليج بالاسئله

 

[lolo2005]

الله يسلمكم من كل شر يارب
حبيبتي ام ديما وحمني عسى الله يسهل امورج كلها يارب
وقعدت بالمستشفى يومين
وطلعت مع البربيش وخامس يوم شالوه
واذا شديت الجلد ولا العضلات والله مادري
انشاءالله الزياره اليايه اسألهم
بس انا اقولج الدكتورة نفسيتهل روعه بس بطني بعدها متفوخه وهذا ما احكم عليه الحين يمكن يروح ما اظلمها والخيوط يقولون تجميل الجلد يمتصهم يعني ما يشيلون غرز لاتحاتيين
سهالات من رب العالمين
والعوار تتحملينه انشاءالله لانه مع المسكنات واول ما تطلعين من العمليات بالسلامة يكون مركب عليج الموروفين للالم
وصراحه اسعاهم نار وحسيتهم قصوا علي من قلب
لان الممرضه قالت لي كل الي كان فيني جلد يعني ما شفطوا الا معدتي وتصدقين الخواصر مثل ما اهما ما اشفطتهم وهذا شي ضايقني واييد ولا حتى سوتلهم نحت ولا شي من جذي مضايقه
بس انشاءالله تستفيدين من تجاربنا وتحصلين اكثر من ما تتمنين يارب

 

[CH.22]

الحمدلله على سلامتك..
بتشوفي النتيجة بعد 6 اشهر او سنة كاملة
بالبداية يكون جسمك منفوخ اكثر ههههه :eh_s(15):


طمنينا عليك

​

 

[M&Ms]

الحمدالله على سلامتج انا ودي اسوي العملية بس يقولون الشفط راح يطلع بمكان ثاني ماخبرتج الدكتورة عن هالشي وشنو نصحتج بعد ؟