السلام عليكم امهاتنا العزيزات :eh_s(17):
عندي مجموعة نقاط ان شاء الله بتفيدكم حق تربية ابنائكم .. اتمنى تعجبكم
و اللي عندها شي تبي تضيفه لا يردها الا لسانها
اول شي كلنا ندري ان التربية تغيرت عن قبل . . و الطريقة اللي تربيتي عليها يمكن جزء منها صالح للتطبيق في الوقت الحالي و جزء اكبر ما يفيد
هالنقاط حق كل الفئات العمرية حق عيالكم
باسم الله نبدي :-
لا تزفين عيالج جدام الناس الغرب او اطفال بعمرهم ... راح تنمحي ثقتهم بنفسهم و يكرهونج مع الايام
لا تقارنينهم مع اطفال ثانين ... كل شخص له اطباع و ذكاء خاص فيه و هذي خلقة ربي
لا تعايرينهم بعيوبهم ... ( شمتنج ماكو هدوم قدج , عمرج ما سويتي شي يرفع الراس ... )
كوني صديقة بناتج
حسسي عيالج الاولاد انهم رياييل و تقدرين تعتمدين عليهم ... و انهم احسن من عيال الناس و انتي فخورة فيهم .
اذا رحتي جمعية و ولدج معاج ... عطيه الفلوس يحاسب ... خليه يسأل الريال وين هذا و بكم هذا .. قوي شخصيته .
حنني قلب عيالج على بعض .. اذا عيد ميلاد واحد فيهم خلي الباجي يزهبون له هدية كلهم يشتركون بقيمتها او كيكة كلكم يسوونها ... ( على الرغم من ان ناس عندها حرام العيد ميلاد و بدعة .. الا اني احس ان الله يعلم اللي بنيتي و ان نيتي اقرب عيالي من بعضهم )
بنتج عطيها الثقة مع متابعة
تعرفي علي صديقات بنتج و عفي شنو نظام سوالفهم .. كوني صديقتهم .. كوني مراهقة و سولفي نفس سوالفهم معاهم عشان لا يحسونج متحجرة .
دايما لمي عيالج بنات او صبيان بوسيهم ... و خليهم يلمون و يبوسون بعض ..فهمي بناتج ان لو تدور الدنيا مالج الا اخوانج و فهمي صبيانج نفس الشي ان لو تدور الدنيا مالك الا خواتك
خلي اولادج الصبيان يطلعون البنات ... يوم مطعم .. يوم سينما .. خلوهم يندمجون مع بعض
دايما خلوا في حوار بينكم ... سولفي معاهم عرفي تفكيرهم و صلحي اللي مو عاجبج فيه و ناقشيهم فيه
الاطفال الصغار .. دايما كلموهم عشان يطلعون اذكياء
اشتروا الكروت اللي عليها صورة حيوانات او فواكة او ارقام و كل يوم اقرولهم اياها
كل ما تشوفين شي قولي اسمه بالعربي و بالانجليزي عشان يتعلمون
حببي الدراسة بعيالج .. قوليلهم باجر ان شالله تكبرون و الحياة قاعدة تصير غالية .. لازم ندرس و نجتهد عشان ندخل الجامعة و ناخذ الشهادة و وظيفتنا تصير زينة ... شوفوا الخدم مساكيم ما درسوا عشان جذي صاروا خدم .
نمي هواية عيالج .. الهواية تحميهم من الضياع .. يعني عقب ما يرد من المدرسة و يتغدى خل يحل واجباته و عقب خل يروح نادي سباحة او كرة او قران او كمبيوتر ... المهم انكم تمصون طاقتهم عشان لا يصرفونها بمكان ثاني .
فهمي عيالج ان اي شي مو زين تسوونه باجر الناس تقول ( فلانة ) ما تعرف تربي ... انتو ترضونها علي ؟
الاطفال بعمر صغير نلاحظهم يبجووووووووووون الا يبون الشي .. ترى اسم الله عليهم على الرغم من صغر سنهم الا انهم اذكيا .. حقريهم و لا تعطينهم اللي يبونه .. عشان يتعلمون و يتأسسون صح
دايما احتوي عيالج
لا تنتقدين ابوهم جدامهم
خلي ابوهم يشارك التربية و خليه بعينهم الاب المثالي
دايما عرفي ربع عيالج .. بنات او شباب
اذا عندكم ديوانية خلي عيالج يجمعون ربعهم فيها .. و بين فترة خلي ابوهم يدخل يسلهم غليهم و يعرف مايتهم
تذكرون هالجملة اللي عطوناياها بالمدرسة ( التعليم في الصغر كالنقش على الحجر ) او نقولها ( التربية في الصغر كالنقش على الحجر ) ربوا عيالكم عدل
لااااازم تدخلون عيالكم دورات تحفيظ قران .. عسى يشفعون لنا
الاطفال نهاااائيا لا تطقينهم .. اذا تعودوا على الطق باجر تصير شخصيتهم ضعيفة و بكل مكان اليهال يطقونهم و يهزؤونهم و تنمحي شخصيتهم
لا تصارخين على عيالج .. علميهم على نظرة و كلام بصوت واطي بلهجة جد و مرة بمرة بمرة راح يتعلمون
البنت بفترة المراهقة تكون ثقتها بنفسها مهتزة .. خل ابوها دايما يمدحها و يعزز ثقتها بنفسها
علمي عيالج لا يتهاوشون مع بعض .. خليهم على قلب واحد
و تسلم ايدي ههههههههههههههههههههه
مجهود شخصي اتمنى يعجبكم ... و ابي تدعون عسى الله ينولني اللي فبالي
