عندج حساب خاص لنفسج؟؟وزوجج يدري ولاخاشته عنه @@

[om MaRyooM]

السلاااااااااااااام




بنات كل وحدة تقول رايها


انتي من النوع اللي تخشين مبلغ او استقطاع شهري من معاشج لحساب ثاني خاص فيج ؟؟للايام ؟ ؟

وريلج يدري ولا مايدري

؟؟


بالنسبة لي ماسويتها للحين بس هالشي احسه ظروري وايد
الوحدة ماتظمن الزمن صراحة فلازم يكون عندي حساب خاص فيني مولازم زوجي يدري

وبنفس الوقت لازم يكون في حساب ثاني مشترك بيني وبين زوجي للطوارئ يعتبر استقطاع كل شهر

لاسمح الله احد استمرض او حادث سيارة او سفرة مفاجئة اي ظرف فجاة لازم الواحد يكون عنده حساب للطوارئ






انتو شرايكم

 

[Dancing^Queen]

اهلين ام مريومه

خوش موضوع حبيبتي تسلمين عليه

بالنسبه لي الذمه الماديه مفصوله
في عندنا حساب توفير مشترك احط فيه احيانا مو دايما ومبالغ متفقين عليه

بس توفيري الخاص فيني بروحي مايعرفه ولاحسابي الجاري يعرفه ومو لازم يعرفه
احس جذي امان
اذا درا شنو عندي يعتمد عليه ويصير حلالج حلالنا (هذا مبدأ كل الكويتين ) وانا ضده حلاله حلالنا وحلالي لي بروحي بالشرع والدين ماني ملزومه ومفهمته هالشي ومتفقين عليه ومنتهين ولله الحمد

 

[Patcholli]

انا معاج ام مريوم ^_^

مو بس عشان سالفة اني اشاركه لان بيتحكم وبيقعد يحسبلي ويقولي يمعي لا تصرفين يمعي لا تصرفين

نفس الحين حاطتلي مبلغ ويوم جكني وقعد يحن علي اني ما اشتري الشي الي كنت ناويه عليه يقولي اخذي بهالمبلغ ذهب سعره فيه

مابي ذهب :/ مو غصب ؟؟ وايد يتدخل بهالسالفه كله يبيني اشتري ذهب بس عشان قيمته فيه يبا احنا حريم نبي جذي ونبي جذاك مايصير اعلق على شي واحد عشانك وانا انحرم من شي خاطري فيه ..

بالنسبه لي عاد انا ما ارد عليه طالما انها فلوسي بس تعالي شوفي الطناقير والزعل :/ كيفه خل يزعل مايشوف شر لول

 

[جـــواهر]

مستقطعه ويدري عنه لكن ماااايتدخل بمعاشي نهااائياا احنا جذي متفقين
امن حساب للطوارئ ماسوينا لاصار شي لاسمح الله اثنينا مااانقصر ع بعض
الحياة تشاارك

 

[نـعـومـه]

انا ماصارلي الا سنه موظفه وان شاءالله بسويها اخش جزء من معاشي لازم الواحد يسوي جذي وموبالي اذا زوجي يدري ولا لا عادي اذا درا وهم عادي اذا مادرا

والفلوس اللي ايمعها نصها تكون لبيت العمر

احس لازم الزوجه تشارك لبيت العمر ولو جزء بسيط لانه هم هذا بيتها

 

[om MaRyooM]

حياكم بناات مشكورين



patcholi
لوووول ظحكتيني .. شوفي اهوا له وجهه نظر على فكرة
بس معاج حق .. على قووولتج احنا حريم ونبي جذي وجذاك خخخ

 

[bobo lover]

ما عندي وما فكت فيه لان توني ما اشتغلت
ودي اسوي هالفكرة واتوقع ما راح اعلمه

 

[ناتشوو]

ليش الحساب المشترك؟
ضده
مهما كانت العلاقة طيبة
خاصة احنا الحريم منّتنا قشرة!
واذا صار ماصار ممكن اساعد
بدون حساب مشترك
ومو لازم يعرف تفاصيل فلوسي وين تروح حساب ثاني
ولا باستثمارات برة!
حتى لو الوحدة تساهم بالبيت مو ضروري يعرف
باقي معاشها وين يروح

 

[Perfume]

انا عندي حساب وزوجي يدري لما يصير عندي فلوس زايدة احطهم فيه بس ما يتدخل ابداً بفلوسي
وان شالله اذا اشتغلت بسوي استقطاع حقي وزوجي حالياً مسوي استقطاع بعد

 

[سارة ة]

ماعندي الا اعانتي وحاط عينه عليها

 

[fofo90]

اي عادي عندي حساب استقطع من معاشي
وخاشته للزمن واهوا يدري عنه بس مالاداعي يدري جم فيه ..

 

[الأميرة جوري]

عندي حساب خاص ويدري فيه عادي بس ماكوحساب مشترك بينا

 

[ام الدرر]

بالنسبة لي ماعندي ولا فكرت
لاني اخلص معاشي وافتر على معاشه
قبل جم سنه كنا الاثنين نسوي استقطاع عشان اقساط المدارس الخاصة
لان كان علينا ديون
بس الحين الحمدلله افتكينا
احيان ايمع مبلغ ويدري عنه لسفر او اشتري شي بخاطري (جنطة -ساعة )غاليه
بس ما يتدخل ​

 

[miss swan]

بنات تعرفون مخاطر الحسابات المشتركه
كل وحده تيمع بحسابها وخلاص ولين وقت الحاجه تطلعين منه
او سفره تببين تتقاسمين انتي وياه مصاريفها تطلعين منه
انا عن نفسي عندي حساب توفير واهو ماايدري اني ايمع فيه بس يدري عنه انه عندي حساب
لانه ريلي نوعه مايسأل جم عندج مو معطيته مجال
​

 

[المها الابيض]

لازم الوحده تستقطع من معاشها والافضل بدوون مايدري الزوج بالنسبه لي
عندي حساب استقطاع من معاشي(بس للأسف دايما اسحب منه )
واتوقع يدري عنه لأني مرات بالسوق اطلع جدامه
بطاقه السحب الثانيه
وبالنسبه للحساب المشترك >>>> انا عيالي للحين صغار وتوالناس على المدارس
وماني متشجعه اسوي حساب مشترك يمكن اذا كبروا عيالي اسوي

 

[Um Tuki]

عندي حسابين غير حسابي الاساسي اللي ينزل فيه الراتب ..

طبعا زوجي يدري عنهم و اصلا مافيهم شي ..

و لو فكرت اني أيمع حق روحي في حساب هذا شي راجع لي فلوسي لو شلت منها كيفي .. ماظن في شي غلط .. !

اهوه نفسه ينصحني اصلا اني ايمع لي لو كل شهر 20 دينار

و انا مع اللي تفتح حساب و تقط فيه كل شهر حتى لو 40 دينار .. و ياليت ماتعلم زوجها .. ماتدرين بنواياهم الرياييل ..

 

[love love]

موضوع مفيد

يعتمد عالزوج

اذا يساعد تخشين فراح يشجعج بس اذا كان عينه عالفلوس الاحسن مايدري

وهم تعتمد عالعلاقه في رياييل طناقر ان درى مرته تخش سواها سالفه وثقه وزعل

عن نفسي اشجع عالتوفير ان قدرتي

 

[om MaRyooM]

حياكم بنات


وشكرا على مشاركاتكم الطيبة

ونصيحة
خشو خشو
هههه

 

[فديت سالم]

مااادري انا مووو موظفه بس زوجي موو مادي بس اذا احتاج يااخذ مني ،، بس اتوقع اذا خشيت عنه بسوي فيهاا زعل جاااايد وعدم ثقه ومااادري شنوووو
واتوقع اذا درى او احتجته بشي بقوولي مالي شغل فييج ،،، يمكن معاه حق بس انا اتكلم عن الاحتياجات البسيطه كل شهر اذا نقصني وممكن يخليني اشيل بناتي ،،،،،، كلهاا افتراااضاات لاني موو متوظفه علئ وجه وظيفه ان شااااءالله بس اتووقع زوجي جذي ،،،

 

[om MaRyooM]

حياكم بناات