عندج سوالف حزاوي مواقف ولا كلمات أهلج الأولين يقلونها ما قمتي تسمعينها وايد الحين..

[Q8_QT]

سؤال ختامي,,,

شنو يعني يتقرفض؟

تقرحت عيوني من مجابل اللابتوب!

امبي من الساعه جم شابكه!

من قبل اذان المغرب.......

طبعا مع عده فواصل

نراكم على خير جميعا

وكل وحده تدش تسلم على نفسها لول

بلاكت ماتدرون شكثر احبكم؟
يخليكم ربي :hjy5jewf:

(بوردح من مسلسل قاصد خير)

هههههه شفت السؤال ورديت ماني قادرة أطلع أدمنت علي هلموضوع
وهم آنا من زمان شابكة وأحس خلااااص عيوني قفلت
متقرفص يعني برررررردااااان لام جسمه من البرد عدل ؟

 

[Betty]

cutie pie ههههه الله يطول بعمر والدتج صـــــــــــــــــــــــــــــــــــــح يعني جنه كلمة "قلعتج" بشكل اذرب لول

Betty القمر اهني ياسلام نورتي يا عسل .. ومير والله وايد يستخدمونها حتى اختي لوول بس انا ما استخدمها كلش مو يايزتلي خليني على هاو ابرك .. واهي تييي بمعني "لو"

حبيبتي coffee تسلمين يا قلبي المنتدى منور بوجودج :eh_s(7):
و صاجه تعني لو او على الاقل انا كل ما اقولها البنات يسألوني يينونا هالجيل جيل الهاي و الباي جني مو منهم لوول :eh_s(3):

 

[Betty]

ئي والله صاجة حبيبتي هالثلاثي ((حياة ، خالد ، غانم )) قمة الإبداااااااع وبالذات مسلسل خالتي قماشة
لووووول اشكثر احبه هلمسلسل وليلحين آنا وخواني نردد اغنيته وعلي كثر ماأشوفه مااااااأمله
ماطول عليكم يبتلكم اليوم جم كلمة لقطتهم من ريلي والباجي من الانترنت :
دار الجيل = المكان اللي يخزنون فيه الأكل
البنجرة = الغرفة اللي فيها دريشة مرتفعة وكانوا ينامون فيها بالصيف
التعريشة = مكان القعدة بالحوش
بحاصة = الأرض الصلبة قليلة التراب
الجندل ((الشندل)) = الخشب اللي يسوون فيه السقف
سوجري = الصروال اللي فوق الركبة
شماطيط = الملابس المقطعة
طحيحة = متوفر بكثرة
وسلامتكم وتعيشون

وي تصدقين اغلب الكلمات هذي ما عرفها :bbbiu:
يالهوي اخاف يسحبون مني الجنسيه :eh_s(10):

 

[Betty]

اهلااااااااااا بكم جميعا

جايووو في كلمة انا اقولها بس لاحظت في ناس يقولونها غير!! صحيحي لي ايديده
التغ او بو لتغه... في ناس يقولون لدغه او بو لدغه (مو حيه لا هههه )

زين من الكلمات الحلوه اللي احبها واللي للاسف صارت نادره بين ازواج هالايام:
غناتي- حشاشة يوفي

ههه واما الردود العصبية عند الاوليين اذا احد كلا قلبهم بالحنه:
اذا وحده قالت يبه .. يرد: واحطبه (يعني اخشبه)
اذا وحده قالت يمه.. ترد: وقمه (مادري شنو قمه يمكن من الغم)
اذا وحده قالت اختي او اخوي.. يرد: خوا ينبج

وهم تذكرت "القليلبه" ايام القهوه الشعبية هههه اسمها حلو ومشتق من التقلب اللي يصير فينا واحنا محشورين داخل صندوق الخشب.. ومادري ليش من اذكرها اذكر اغنية فيروز" ياداره دوري فينا ظلي دوري فينا

من رخصتكم والا اترخص الحين (هم احبها لول)

ذكرتيني باغنية العيدروسي قليلبه قليلبه عاد ناسيه كلماتها بس تونس واي ذكرتيني بايام العيد قبل صج لها طعم اذكر كل عيد لازم نروح نلعب هالالعاب الشعبيه مو الحين اليهال اذا بعيدون يروحون الافينيوز و لا مارينا و ذكرتيني بيوم البحار بعد واي شنو كان ونيس قبل مو الحين قميظه

 

[Betty]

بنات اهداء لكم

http://www.youtube.com/watch?v=VUKVrSBtGOM

 

[Betty]

امبييييييييييييييييييييييييييييييييييييييييييييييييييييييييه

موضوووووووووووووع خطييييييييييييييييييييييييييييييير

عجيب

احلى حقبة بتاريخ الكويت اهيا ايام قبل

النفس الصافية

والقلوب البيضا

وانا تصرقعت بهالموضوع

علشان جذي بحط لكم شوية صور من البيئة الكويتية القديمة االي اشتهر برسمها الفنان المبدع الله يطول بعمره ايوب حسين

وتقبلوا مشاركتي معاكم

هذي اول صورة

طلعنا من باب السوووووووووووووور

بيرقنا بيرق منصووووووووووووووور

شكل الفرجان القديمة

بياعة السمسمية

احد البيوت الكويتية القديمة من الداخل

الغدا الكويتي الاصيل

وعلى فكرة انا من عشااااااااااااااق الفنان ايوب حسين لان رسوماته ودج تغوصين بداخلها وتعشين بنفس المكان اللي اهوا راسمه

ياحلو ايام قبل وسوالف قبل​

هلا BlackRose صاجه حبيبتي حسين الايوب ماشاء الله عليه مبدع كان مسوي معرض شهر 3 او 4اللي طاف عسى رحتيله ما شاء الله اغلب اللوحات اللي كانت معروضه يا محجوزه او مبيوعه

 

[Betty]

بنات شنو يعني سليمه تصكه ؟

 

[local]

اغنية امي ويدتي لليهال الصغار.. ان الزوج عنده حرمتين وحدة ضعيفة عصقولة.. والثانية متينة فاهو يعني لهم"
الضعيفة
"يا عصاقل ويا مصاقل .. حبكم في القلب صاقل"

وحق التبتوبة
"يا سمينة ويا متينة .. ويادبادب المدينة"

 

[local]

بنات شنو يعني سليمه تصكه ؟

معناها "مالت عليك" واهي مسبة وان الراي اللي تقولينه أو الكلام اللي توجهينه مو راضين عنه

 

[Betty]

اغنية امي ويدتي لليهال الصغار.. ان الزوج عنده حرمتين وحدة ضعيفة عصقولة.. والثانية متينة فاهو يعني لهم"
الضعيفة
"يا عصاقل ويا مصاقل .. حبكم في القلب صاقل"

وحق التبتوبة
"يا سمينة ويا متينة .. ويادبادب المدينة"

مشكوره لوكال يعطيج العافيه هالاغنيه سمعتها من وحده قبل و كنت اسأل عنها ناسيه تكملتها

 

[Betty]

معناها "مالت عليك" واهي مسبة وان الراي اللي تقولينه أو الكلام اللي توجهينه مو راضين عنه

صاجه حبيبتي بس كلمة سليمه نفسها شنو تعني و ( مالت عليك ) شنو اللي مال عليه اهما شي واحد شنهو ؟

 

[Q8_QT]

صاجه حبيبتي بس كلمة سليمه نفسها شنو تعني و ( مالت عليك ) شنو اللي مال عليه اهما شي واحد شنهو ؟

مساااااااالخييييير حبيبتي
سويتلج بحث على معنى سليمة ولقيت لها أكثر من معنى ويقولون إنها من الكلمات العربية الفصحى
طلعت اللي شفته أقرب للمعنى عاد انتي نقي واحد منهم :
سليمة : دعوة و أصلها يعود لامرأة مجنونة اسمها ( سليمة ) و قيل ( سلمى ) كانت تسير في الشوارع و تضرب المارة فيقال : ( سليمة تصكك ) اي تضربك
وسمعت بعد إن معناها غيمة وناس قالوا إن معناها الدنيا والصكة تعني موت الأم أو الأبو"الله يكافينا الشر "
وســـلامـــتـــج وتـــــعـــيـــشـــيــن

 

[Betty]

مسا النور حبوبه انا سامعه معنيين الاول ان اهيا الطوفه جني سمعتها من غنيمه الفهد تينن اموت على هالمره الله يحفظها و سمعت بعد ان تعني الارض و الموت يعني لمن تصك عليه الارض الواحد يموت مشكوره حبيبتي و بانتظار باجي البنات و خبرتهم

 

[orangeya]

هههههه شفت السؤال ورديت ماني قادرة أطلع أدمنت علي هلموضوع
وهم آنا من زمان شابكة وأحس خلااااص عيوني قفلت
متقرفص يعني برررررردااااان لام جسمه من البرد عدل ؟

عدل يبه عدل :ggdw:

 

[coffee]

يا هلااااااااااااااااااااااااا ها نحنو عدنا حسافه طافني التجمع خيــــــانه هههه

Q8 QT اللي اعرفه متكتك يعني فيه عرض ومتروس .. يعني عرضه بنسب متقاربه من طوله مثل مدحدح مدربح

Betty على خبري سليمه تصكج يعني مرض يصيبج مثل اصخونه شي جذي بس مو متاكده

زين شنو اهو المرواس ؟

 

[ليمار الكويت]

ويي انا الحمدلله لحقت على امي الله يطول بعمرها ويدتي الله يرحمها كانو يحازوني وتعلمت وايد كلام عتيج منهم والحين لما اتحجى ولا اقوول ولا اغني حق ولدي غناوي قبل حمولتي يضحكون علي يقولونلي شخباري الي يحازون عيالهم الحين حطيله بارنيي ويقعد يغني معاه بس لا قاعده احاول اني ماقط هالحجي من لساني عشان اعلمه عيالي ان شاء الله هذا كلامنا واذا الكل نسى بندثر ولغتنا بتروح

 

[Q8_QT]

يا هلااااااااااااااااااااااااا ها نحنو عدنا حسافه طافني التجمع خيــــــانه هههه

Q8 QT اللي اعرفه متكتك يعني فيه عرض ومتروس .. يعني عرضه بنسب متقاربه من طوله مثل مدحدح مدربح

Betty على خبري سليمه تصكج يعني مرض يصيبج مثل اصخونه شي جذي بس مو متاكده

زين شنو اهو المرواس ؟

أهلا وسهلا فيج حبيبتي شرفتيييييني :eh_s(7):
ومتكتك معناها اللي جسمه متناسق من ناحية الطول والعرض بغض النظر عن الضعف والمتن
والمرواس هو آلة ايقاعية صغيرة الحجم تتكون من اسطوانة خشبية مجوفة قطرها 15 سم وطولها 15سم أيضا يشد عليها من الناحيتين قطعتين جلديتين يطلق عليها( الرقمة) ويتم الشد بواسطة خيوط سميكه
ويستعمل المرواس في الكويت والبحرين وقطر كآلة ايقاع لفن الصوت فقط بأنواعه العربي والشامي والخيالي وأصله من الهند
هااااا شرايج فيني ؟ :eh_s(6)::eh_s(6):

 

[Q8_QT]

شنو يعنى صرناي ؟!!!!

 

[orangeya]

يا هلااااااااااااااااااااااااا ها نحنو عدنا حسافه طافني التجمع خيــــــانه هههه

هلا فيج ... ياعسى ربي يخليج... ولبيت مكه يوديج ...

شرايج بهالدعوة؟
شخبارج حبوبة؟ من زمان عنج؟ @@

ماعندنا خيانه

قلنا قبلها بجم يوم... مع التذكير بس يمكن كنتي لاهيه
بس ولا يهمج يالغاليه

اليايات اكثر ان شاء الله
مالج الا طيبه الخاطر :tek:

 

[orangeya]

ويي انا الحمدلله لحقت على امي الله يطول بعمرها ويدتي الله يرحمها كانو يحازوني وتعلمت وايد كلام عتيج منهم والحين لما اتحجى ولا اقوول ولا اغني حق ولدي غناوي قبل حمولتي يضحكون علي يقولونلي شخباري الي يحازون عيالهم الحين حطيله بارنيي ويقعد يغني معاه بس لا قاعده احاول اني ماقط هالحجي من لساني عشان اعلمه عيالي ان شاء الله هذا كلامنا واذا الكل نسى بندثر ولغتنا بتروح

هلا بالطش والرش ...

هلا فيج حبيبتي حياج الله معانا
وعفيه عليج

انتي جذيه :eh_s(15):

بلا بارني... بلا بروي

ماكو احلى من العتيج
عطينا من هالغناوي اللي اتغنينها حق اوليدج عسى ربي يخليلج اياه

نبي مشاركاتج معانا ,,, لا اتخليييييييين؟

انا عن نفسي فاطالب وبشده انج تغني لي غنايه من الغناوي اللي عندج .................. :sfg: