عيالي حيل كاسرين خاطري

[اغفرلي يارب]

السلام عليكم بنات شلونكم حبيت افظفظ لكم اشويه عن ضيجه بصدري كل ليله انوم عيالي غصب اطفي الليتات واقعد معاهم لما ينامون طول هالفتره يتحلطمون ويبجون وانا اقولهم نامو مو زين عليكم السهر وعندي ولدي الصغير ام زوجي تنومه الضهر غصبن عنه عمره سنتين من الساعه 3لي غايه الساعه 5 او 6 وبالليل ما يبي ينام وانا عندي دوام من اشوي نام متضايق بس نام بجيت بجي ساعدني ياربي ساعدوني بنات هل هذا شي عادي وطبيعي والله ضايق خلقي

 

[BABY MASTER]

وعليكم السلام والرحمة

حياتي مااعتقد اللي تسوينه صح,,

اول شي ولدج اللي عمره سنتين الله يحفظه لج مااعتقد فيه لزوم تنومينه الظهر لمدة ساعه او ساعتين شي طبيعي عقبها مايبي ينام بالليل!!

ثانيا انتي تداومين قولي لخالتج او الخدامة تقومهم الساعه 10 الصبح,,و بحركتهم ولعبهم طول النهار بس يجي الليل ع طول بتلقينهم تعبانين و بس يبون النوم,,,

هالطريقه تستخدمها اختي مع عيالها و الحمدلله ماتواجهها اي مشاكل ليما تنومهم وتسوي نفسج تصكر الليت وتقعد معاهم وهدوء الغرفه وبسرعه ينامون,,,

اتمنى اكون افدتج,,

موفقه

 

[( المـلاك )]

حبيبتي قولي لخالتج لا تنوم الصغير الظهر
توه صغير و مالها داعي نومة الظهر
و بالنسبة لعيالج و احساسج
صج والله شي يضيق الخلق و يعور القلب لما تنومينهم غصب واهم يبجون
بس اذا انتي دوام الصبح وصي الخدامه او اي احد بالبيت
يقعدون العيال كلهم س 9 ولا 10 الصبح
و خليهم يتريقون
و حطيلهم العابهم و خليهم يحوسون و يسوون اللي يبونه
بس ديري بالج عليهم لا ينامون العصر
و بجذي تلقينهم بليل مبجر يدوخون و ينامون بروحهم من غير بجي و لوية ..

=)

 

[ديانا سبنسر]

سوي نفس ماقالو البنات

 

[om_dodo]

اب

اب

 

[miss-winter]

لا كلش الي تسوينه موطبيعي اذا اهما اجازه الحين خليهم يسهرون شويه عطله ماوراهم شي
بس اذا صغار حييل ينامون وقت ماتنامين والله يخليهم لج يارب

 

[كرز حالي.]

رد : عيالي حيل كاسرين خاطري

لا تخلين عيالج يقيلون قعديهم الظهر وخليهم لليييييييل

 

[يوآش يوآش]

رد : عيالي حيل كاسرين خاطري

قولي حق ام ريلج

لا تنوم ولدج الظهر

لانه يسهرج بليل ..

وان شالله تتعدل نومتهم

 

[فطفط نجد]

ماشاء الله البنات فادوج.....فعلا خلي خالتج ماتنومه العصر عشان ترتاحين الليل

 

[miss mama]

مافيها شي اذا ولدج نام الظهر شوي.. انا ما اعارض افكار البنات بالعكس

بس هذا انا ولدي عمره سنتين ونص لازم انووومه الظهر ويقعد 5 او 6 المغرب..ويرجع يناااااااام على ال 12 او الوحده عاادي ...ساعات اذا ما نام العصر تخيلي يكسر فيني تصير الساعه 10 بليل ينااام ويقط روحه اي مكان .عبالي ارتحت لا ..]قوم الساعه 12 بليل !! والسبب انه مانام العصر !!!

اذا على الصغير تقدرين تحكمين فيه لو ينام ساعه بالنهار عادي

والكبارر خليهم يقعدون من الصبح لا تنومينهم..المسئله ترا بس يبيلها تنظيم منج انتي وراح ترتاحين وتعدين عيالج على هالروووتين


قعدي وسوووووووي جدول صغير لعيالج ولنفسج حاولي انج تطلعينهم وتخلينهم يلعبووون ويطلعون الطاقه الي فيهم...اخر الليل بتلقينهم يدوروون الفراااش وينه



ميخالف نظمي وقتج بس ..= هذا هو حل مشكلتج

بالتوفيق

 

[فطومه]

شوفى حبوبه مدام كاسرين خاطرج غيري هالطريقه اللى تسوينها

اول شى الصغيرون لاينام الضهر انتى حزة الضهر قعدى مع عيالج وجابليهم ترىالخاله تطق جبدها وتنوم الصغير


قعدى ولعبيهم وسولفى معاهم وقبل النوم الصغير سبحيه ونوميه اما الكبار سولفى معاهم وتغشمري وحازيهم لاتجبرينهم


وتغصبينهم بالعكس خل يحبون هالحزه لانج معاهم حطى لهم ابجوره وشغليها لهم وقولى لهم قصص تالى اقري وسمى عليهم

وخل ينامون ولاصار الصبح خل يقعدونهم مثلاالساعه ستع موالا حزه متأخره ؟


وبعدين طولى بالج ترىالبجى ماينفع ولايحل المشاكل والله يخليهم لج

 

[bnt_shyo5]

حبيبتي يخلصون من المدرسه
تجين انتي !!
خليهم على راحتهم عططله يعني شي طبيعي
بيسهرون اذا كلش كلش
خليهم ع الساعه 1 بليل ينامون والساعه 10
الصبح او ع الظهر جذي يعني يقومون
ريحي باااالج اولا تكبرين السالفه

 

[شمس الشموسة]

انا ضد ان اليهال يسهرون في العطلة

يعني العطله فيها وناسة وراحة بال بس السهر لأ

لانه متعب للصحة،، يقدرون يستانسون طووول اليوم يعني ماصارت الا الليل

حبيبتي سوي نصايح البنات او اشركيهم في نادي الصبح أو العصر عشان يحسون بالتغيير ومن ايي الليل بيكونون تعبانين وبينامون

 

[للصبر اخر]

رد : عيالي حيل كاسرين خاطري

اللي تسوينه مو غلط بالعكس انتي تبين مصلحتهم
بس لاتخلينهم يبجون قولي لهم قصه او ادعيه صدقيني ماراح يبجون
قولي لهم اللي ينام مبجر ويقعد مبجر احط له نجمه جذيه يتشجعون
انا عيالي لهم وقت معين يقعدون فيه وينامون فيه بعد مايصير انام واهما لي الحين سهرانين ماتدرين شنو يصير بغيابج
يعني مرات اجبرهم على النوم والحين تعلموا انه كلمتي وحده

 

[أحبه موت]

حبيبتي انتي وايد مأزمة الموضوع والحل بسيط وسهل عيالج لا ينامون الظهر كلمي خالتج ام زوجج قوليلها لا تنومهم قوليلها انا اتعب معاهم بليل وما اقدر عليهم ويبجون مايبون ينامون
او كلش كلش الحين صيف حرام خليهم يستانسون شركيهم بنوادي خل يستثمرون طاقتهم بشي مفيد عشان اذا ردوا يردون تعابنين وهلكانين يبون الفراش وبجذي ماراح تتعبين معاهم

 

[Killer^Girl]

لاتنومه الظهر
وفهميها ان لو نومته انتي تتعبين طول الليل
او خليه عندج هالفتره لاتودينه لها عشان ماينام
وبعدين غلط كلهم بوقت واحد يدخلون ينامون
دشي مع واحد واحد ونوميه اول وبعدين ييبي الثاني
ودايما هدديهم ان الي ماينام ماراح يروح الالعاب مثلا

 

[دانه بعين رباني]

انا مع البنات وهم عين الصواب

وعسى الله يصلحهم

 

[؟؟دلع البنات ؟؟]

البنات كفو ووفو وكل كلامهم صح
بس حاولي اتعدلين نومتهم
الياهل اذا تحرك وايد ولعب يتعب وينام امبجر ..اما اذا اعيالج بالمتوسط لا والله كبار ويفهمون خليهم يستانسون
عندي اختي الصغيره تستانس على السهر ماتنام الا اذا شافت الشمس طالعه تحس انها سوت انجاز بس كل يوم اهاوشها واخليها تنام 2 حدها
والله يخلي لج اعيالج ويحفظهم

 

[الأماكن]

رد : عيالي حيل كاسرين خاطري

ولدج عمره 2ونص ... ولازم يريح الظهر ... خليه ينام شوية ساعتين ... ساعة ... يكسر فيها نعاسه ...

قعديه الصبح 9 أو 10 ... بعد الغدا ينام له شوي ... و يقعد العصر و يلعب و يلعب ... ولا جا اللليل ... داااااااخ و يبي النوم ...

اغلب عيالنا جذي ... ولدج صغير حراااام لا ترهقينه

انا عيالي جذي و هم صغار ... ولااااا كبروا ... فيهم شدة قعدة من الصبح للعصر

بس قولي لخالتج لا تنومهم العصر ... او المغرب ... غلط

 

[جرجيرة]

سهلات حبيبتى لاتضيقين خلقج البنات ماقصروا عطوج كل الحلول