فيدونا يامرضعات

[ميس:)]

السلام عليكم يا امهات الي رضعت طبيعي 100٪تعلمنا شلون شنو كلت عشان يدر الحليب ؟وهل كنتي تشفطين ؟ وفي حال حصلتلج طلعة شتسوين ؟هل استخدمت موانع حمل ؟ وشنو الصعوبات في الرضاعه فيدونا الله يجزاكم خيير

 

[فرح79]

موضوع حلو وبدنا طرق لزياده الحليب للاعتماد على الرضاعه انا بصراحه ارضع طبيعي واعطيه رضعه بالليل صناعي

 

[؛؛sokrrah؛؛]

تبين شي خيال شفاط فلبس افنت
اللي ب٦٠ دينار عند نذركير
خياااااال
اشفطي واذا داومتي خلي بثلاجة

 

[om-3abodey]

انا ماجربت الرضاعه الطبيعيه الا جم مرة ومتحسفه اني ما رضعت

 

[ميس:)]

بس مويقولون الشفط ينشف؟! انا اشفط ومايطلع وايد. ووين باجي المرضعات ؛)*

 

[om MaRyooM]

انا حدي ارضع شهرين للاسف
مايطلع وايد حليب مادري ليش


امي تقول في حريم خلقه جذي سبحان الله





المهم

اذا صارتلي طلعة اكون شافطة ومخليه الحليب بالثلاجة
احسن شفاطة مديلا الصفرة الكهربائية بسنتربوينت او بالصيدليات تحصلينها



والرضاعه كلها على بعضها صعبة ويبيلها اصراار وعزيمة
واستغفار وايد عشان لاتعصبين لوول

 

[برايفت]

أنا ما عندي إلا ولد واحد و لا دخلت الصناعي إلا في عمر الست شهور و غصب عشان الحج ..
بعد كل رضعه لازم اشرب علبه أو علبتين ماي الصغيره
و شبه يوميا ً أشرب كاس حليب بارد
و التمر ينصحون فيه بس اكله ع مزاجي

لما أطلع يعطونه رضعة تمر أو ينسون أو نعناع
بس كانت عندي علبة الحليب الصناعي احتياط لا أتأخر أو يخلص حليبي فجأه أو في المستشفى أو الأماكن العامه ( مع إني أكون ماخذه معي تمر أو ينسون ) بس يكون موجود احتياط و نادر استخدامي له

ماجربت الشفط ابد إلا في الحج شفطت في مكه و ما تحملت ألم الحليب و خذيت حبه تخفف الحليب
و تحسسسسسفت لانه من جد خف لما رجعت ولدي تعلق بصدري زياده و كره الرضاعه و هو شبه ناشف
قريت عن حبوب مدره للحليب ما لقيتها ، و نصحوني في الحلبه ما تحملت ريحتها
بس شريتها كـ حبوب من gnc و رجعت للماي اشربه بشكل مو طبيعي و الحليب البارد يعني السوائل بشكل عام و المص كنت اخليه عليه و أصلا هو ما يفكه بسهوله
و الحمدلله رجع مو نفس قبل بس صار يكفي ولدي لكني للحين مستمره ع الصناعي رضعتين باليوم طبعاً مع الاكل

حيييييل مريحه الرضاعه خصوصا ً بالليل من إني أغسل و اوازن الماي و اخض الحليب و ارضعه و لما يكون صغير لازم اطقه ع كتفي يطلع الهوا اف معاناه
الصدر بس طلعي و كملي نومتك وياه :d
بس الشي اللي مستحيل أسويه إني أرضعه و أنا منسدحه و هو جنبي حيل أخاف من هالسالفه !
و تضعف كلن يقولي ضاااعفه و جسمي رجع لقبل الحمل بنسبة 90٪ مع إني ما اعرف الرجيم خير شر بالعكس الرضاعه تجووع و تعططش !

بالتوفيق للجميع ()

 

[nadoo]

رفع
رفع

 

[@الياسمين@]

انا الحمد الله ارضع طبيعي .. رضعت بنتي الاولى والحين هم ارض بنتي عمرها 9 شهور
الرضاعه يبيلها اصرار وصبر وطولة بال
اهم شي انج تهتمين بأكلج وانا دكتوري نصحني اني استمر على الفيتامينات واهم شي الحديد والكالسيوم
لان المرضع الصراحه تتعب ولازم تعوض ... وصار فيني بالمره الاولى كله كنت ادوخ وطلع فيني نقص حديد
وبالنسبه حق الشفط ينفع باول ايام .. اما لمن يكبر البيبي وتاخذين عالوضع مايفيد الشفط
لان اغلب اليهال اللي يرضعون طبيعي مايتقبلون المميه لو شنو حتى لوكان حليب الام

 

[c a t w o m a n]

الحلبة حيل تدر الحليب و الصعوبات تييج بالياهل أول شي من يشرب شوي ينام يقوم يرضع ينام يرد يقوم و هكذا عندي هذا أصعب شي

عوار الصدر فترة و يروح بالنسبه للطلعات شفطي و خليه بالثلاجة والشفط ما يأثر بالعكس يزيد لأن نفس تكنيك الرضاعة

أنا أستخدم ميديلا الكهربائية وهم أعطي صناعي

ولاتزهقين إهي بالبداية تعب بس تالي تاخذين إنتي و البييي عالوضع و يصير فكه أقوى يشرب أكثر و ينام أكثر

 

[عسل مرت قيمر]

انا ارضع طبيعي اميه بلميه وماعمري شريت حليب صناعي من يبت ولدي الحمدللله


ماشاءالله تبارك الله ماشاءالله

لي رجعه افيدج بتفصيل بس لاني مواصله مع ولدي من امس

 

[ست 666]

انا ارضع 100% ولدي اسم الله عليه الحين عمره 3 شهور و نص

انا عن نفسي احس الرضاعه الطبيعيه اريح من الصناعي اول اسبوعين شوي يحوشج عوار وانتي ترضعين صوب الرحم و بعدين يروح و انتي حامل حطي كريم حق الحلمه عشان تلين لي وقت الولاده

اذا طلعت مجمعات ادش اي مصلى اغطي نفسي و ارضعه و اذا بالسياره قعدت ورا و رضعته
و اذا زرت احد دشيت اي غرفه فاضيه و رضعته سهلي الموضوع و اهي تتسهل معاج
نصيييييحه حق الي ترضع لا تقولين مافيني حليب شربي سوائل واااااايد و اكلي تمر و بزيد ان شاءالله
البيبي يمر بمراحل ..مره تلقينه يشرب شوي و يوخر و تييج ايام تلقينه ما يبي يوخر عن صدرج هذا ماله شغل بكميه حليبج
اهي طفرات يمر فيها البيبي شي طبيعي هذا .. يشرب الكميه الي يحتاجها
سبحان الله جسم الام يتبرمج مع حاجه البيبي يعني صدرج يكون الكميه الي محتاجها ولدج او بنتج

بالنسبه للوقت تاخذ الرضعه من 15 الى 20 دقيقه تقريبا
و اذا كبر شوي يبلش عاد يلعب يعني بس يبي يمصمص
انا عن نفسي علته على المصاصه حق هالاوقات
و اذا كنت طالعه و يبي حليب تنفع المصاصه تسكته شوي لغايه ما اوصل مكان اقدر ارضعه

بس نصيييييييييييييييييحه اخذوا حبوب كالسيوم
انا كنت داشه النت بحط مشكلتي و لقيت موضوعج قلت افيدكم

اسناني ولت ... الضرس الي جدام شوي انكسر و الم مو طبيعي باسناني الي ورا قامت تتفتت بالاطراف لدرجه ان راسي و رقبتي تاثروا بالعوار
كله من نقص الكالسيوم لان الحليب يسحب كميه كبيره من الجسم
قاعده افكر اروح اخذ ابر كالسيوم بس يعورون و مالي خلق عوار

انا تدرون شنو الي خلاني ارضع طبيعي
عرفت شنو مضار الحليب الصناعي
الحليب الصناعي ماخذينه من البقره و البقره توفر نسبه كبيره من البروتين في حليبها
تخيلوا ان احنا قاعدين نعطي عيالنا كميه بروتين الي تحتاجها لبقره
عشان جذي اليهال على طول عوار بطن و غازات و يتعصرون مساكين

اذا رضعتي طبيعي 100 % ماراح بطنه يعوره الا اذا انتي اكلتي شي يسبب غازات يعني انتي الي تتحكمين بالحليب


الحوامل الله يتمم عليكم حملكم و تشوفون بيبياتكم بحضنكم يارب سالمين متعافين
و الوالده الله يخليلج بيبيج و تشوفونهم عرايس و معاريس يارب

لي رجعه للموضوع

 

[الباحثات عن الجمال]

[font=&quot]
[/font]​

​

[font=&quot]لإدرار الحليب[/font][font=&quot][/font]​

1- [font=&quot]بذور الكمون مغلي ويضاف للتحلية للكوب الواحد معلقة عسل نحل ونصف ملعقة سمن فإنه يزيد من إدرار الحليب .[/font][font=&quot][/font]
2- [font=&quot]تناول السيدة المرضعة لنبات الحمص مع السمسم وعسل النحل.[/font]
3- [font=&quot]تناول كوب من حبة البركة المحلى بعسل النحل ثلاث مرات يومياً.[/font][font=&quot][/font]
4- [font=&quot]تناول البقدونس والجرجير والشبت والفجل.[/font][font=&quot][/font]
5- [font=&quot]تناول اليانسون والكراوية والحلبة بالعسل.[/font][font=&quot][/font]

 

[نجمة فجر]

جزاكم الله خير
انا احاول ارضع 100% ومخليه الصناعي حق الضرورة اذا طلعت وتاخرت بس
وبالليل ما اتخيل بعز نومي بقوم اسوي حليب عزة الله الحليب اي كلام والماي حار وبنطره يبرد راحت النومه

بس تقوم الحمدلله الحليب جاهز ودافي ومعقهم ولا يحتاج شي طلعي رضعي نامي مع بيبييج

 

[غلاعتيبه]

up
up
up

 

[ميس:)]

يعطيكم العافية ونبي ردود اكثر عشان يتشجعون الحوامل ويعزمون عالطبيعي

 

[noha33]

أحسن مدر للحليب هو مغلي بذور الحلبة تغلينها زين وتشربينها دافية مع ملعقتين عسل أسود
وفي فينامينات خاصة بالرضاعة موجودة بالصيدلية
pregnaplan breastfeeding
استعمل الشفاط medela minielectric لأني أداوم
زين لأنه يشتغل بالكهربا وهم بالبطاريات وأنا بالدوام أسكر مكتبي وأشفط وبدين ألف البطل وأخلي الحليب بالثلاجة ولما أكون بالبيت أرضع
شفط الحليب يزيد الانتاج لأنه يعطي إشارات للمخ إن الطفل يحتاج حليب أكثر والعكس صحيح اللي ما ترضع وايد وتقول ما فيني حليب تعطي اشارات للمخ ان الطفل مو محتاج فالحليب ينشف بالتدريج
لما أكون برة حسب الطلعة بس لازم يكون معاي ممية صناعي احتياطي ولو قدرت أرضع طبيعي أرضع

 

[طيبة83]

حبيبتي شوفي هل موضوع عن ادرار الحليب

http://www.q8yat.com/t931802.html

وهل موضوع عن صعوبات الرضاعه

http://www.q8yat.com/t927023.html

اما هل موضوع فهو موسوعه كاملة ومن احلى المواضيع عن الرضاعة

http://www.q8yat.com/t344886.html

 

[طيبة83]

انا ارضع 100% ولدي اسم الله عليه الحين عمره 3 شهور و نص

ما شاْء الله الله يكثر من امثالج

بس نصيحة لا تقولين للناس هل كلام

انا كنت مثلج وصخوني بعين صادني احتقان وصخت ونمت في المستشفى وبعدها نشف الحليب من صدر واحد!