- إنضم
- 23 أكتوبر 2008
- المشاركات
- 4,591
- مستوى التفاعل
- 34
- النقاط
- 0
السلام عليكم ورحمة الله وبركاته ،،
شلونكم بنات ان شاءالله بخير ،،:eh_s(17):
أول شي عيدكم مبارك ،، وكل عام وانتوا بخير ،،:eh_s(7):
بنات انا حملت عالحبوب ،،
لأن الدكتورة وصفت لي نوع خفيف حيل وانا ماعندي خبره بالحبوب ،،
وانصدمت بحمالي ،، اول شي لأن بنتي للحين صغيره ،،
وبعدين لأن ولادتي فبنتي هذي شفت شي ماينشاف كاني اول مرة بحياتي اولد ،،
والحمدلله على كل حال ،،
المهم،،
بحمالي هذا ماحسيت بشي ،، انا دايم من قبل احمل احس بنفسي لأني اتعب ونفسيتي اتغير ،
تاخرت علي الدورة ورحت حللت وطلعت حامل ، تضايقت وانصدمت وبكيت،:krkrkr:
بس هالمره ماحسيت بشي لاتعب ولاشي، وقلبي نغزني ،:eh_s(10):
وفجاه نزل مني دم بني بس دايم ينزل معاي بعيالي واخذ مثبتات وتمشي الامور الحمدلله ،
رحت لعاليه الفضلي ،
طبعا الدكتورة عليها نفسيه صراحه !!:bbbiu:
سالتني عن اخر موعد دورة قلتلها ماادري لأن دورتي ماكانت منتظمه بعد ولادتي هذي كلش !
قالت كم شهر لك حامل قلت ماادري توني مسويه تحليل بس ،،
عصبت وحالتها حاله حمدالله والشكر ،
يعني انتي دكتورة شوفي وتاكدي ! انا لواني عارفه كل شي ماجيت لعيادتك !:080402ask_prv:
قالت قومي نسوي سونار سويت سونار والنفسيه صارت صفر اول شي من اسلوبها ،
ومعاملتها وطريقتها وكل شي !
قالت بكل برود واصلا ماكانت تكلمني اعتقد تكلم السستر ،
( حمل عنقودي مافيه نبض هذي ثاني حاله تمر علي هالاسبوع دخلوها تنظيفات ) !!!
انا مت بمكاني ! انصدمت وتضايقت حيل !
قلت متاكده دكتورة اخاف توه صغير ؟ قالت لا متاكده دشي تنظيفات !
قلت ماني مسويه تنظيفات لين اتاكد ،
يعني ياناس اوكي انتي دكتورة والامور هذي عاديه عندك بس انا شذنبي تصدميني بهالطريقة !
قامت وصفت لي مثبت اللي هو الدوفستون وبيبي اسبرين ،
وسويت تحليل هرموني عشان اعيده بعد يومين !
ماتخيلون نفسيتي شلون صارت ! اسوي نفسي عادي وانا ميته قهر وبكي بروحي !:eh_s(2):
كسر خاطري حسيت ربي عاقبني لأني ماحمدت ربي على نعمته !:0bee2e8d89:
تحسفت حييييييييل استغفرالله !
استغربت ليش وصفت لي الدوفستون اذا هي متاكده ان الجنين مافيه نبض ّ
واستغربت اكثر انها وصفت لي بيبي اسبرين مع اني قلتلها ان نازل معاي دم والاسبرين مسيل للدم،
من بعد ماكليت البيبي اسبرين زاد معاي الدم وصار احمر ّ!
نطرت يومين وسويت تحليل هرموني مرة ثانيه وطلع نازل الحمدلله على كل حال ،
قمت كليت اعشاب الدورة !:eh_s(4):
مع ان الكل قاللي اشربي بس عشبة القشعه !
بس انا لازم اتفنتك !:eh_s(22):
من بعد ماشربتها بكم ساعه حسيت نفس دزة الولاده وفجاه قطعه دم كبر الكف ودم اشكثرره
غرق ملابسي كاني غاسلتها بدم !
رحت قطيت ملابسي وتسبحت وبدلت واستغربت من هالقطع !
توقعتها الجنين او المشيمه لأني غشيمه بهالسوالف ومحد قاللي !
صبرت وكل 5 دقايق نفس السالفه والله يابنات ملابسي كلها مايردها الا الزباله تكرمون من
كثر الدم ،
وعادي ماكان معاي عوار وماحسيت بتعب ،
خدامتي لما شافت الدم خافت ودقت على زوجي لأني مخليه رقمي ورقمه عندها للضروره ،
وقالتله وماطلعت من الحمام الا هو بوجهي انصدمت ومابي يشوف الحمام والزباله المفوله اشياء ارف !
ويبي يدش يكلمني وانا ادزه !
قال اوديك الطبيب قلت لا مافيني شي وفعلا ماكنت حاسه بشي غير هالدم والكتل اللي تطلع ،،
ومن الساعه 11 لي الساعه 2 وانا هذي حالتي ومعانده مابي اروح الطبيب !:bbbiu:
اخر شي قعدت بالحمام ماعاد طلعت لأن مايمديني اطلع الا وانا عافسه الدنيا !
لين اخر شي حسيت حيلي انهد ،، شوي حسيت الدنيا تفتر فيني ،
قلت خلاص بروح الطبيب اخيرا اقتنعت وقلت لخدامتي تحط شراشف كبار وتصفطها بسياره زوجي من صوب اللي بقعد فيه والله مستحيه يصير شي قدامه مدري ليش !
وانا بالحمام فجاه اختنقت ! احس النفس وقف ، لاهو راضي يطلع ولا يدش ،
ابي افتح باب الحمام احس كفوفي تتفخت ونملت وموقادره اتحكم فيها ،،
والله اني فاتحه الباب برسغي ،
طلعت الا خدامتي قدامي واناديها ابيها تمسكني حسيت الدنيا تظلم بعيني شوي شوي لين صارت سودا ! وطحت ، ماعاد حسيت بنفسي ولاحسيت بشي ،
شوي افتح عيني اسمع صرااااااااااخ وصياااااااح وبكي !
وتسكر عيني غصب ،،
تفتح مره ثانيه وزوجي بالسياره يناديني ويحركني كل شوي بس مو قادره ارد عليه ،
وترد تسكر عيني مره ثانيه ،
قمت اتذكر امي الله يرحمها لما ماتت ، وشلون كانت اتشهد ، لاشعوري حسيت اني ارفع اصبعي واتشهد،
لين فتحت عيني بالهادي والدكتورة تسويلي سونار داخلي وسمعتها تقول خلاص بس باقي الكيس !
دخلوها تنظيفات ، واقوم اتنح لاااااااااا ، ماادش تنظيفات !
دام مابقى شي ماني داشه تنظيفات !
انا مافيه حل وسط ! يامنصرعه يااقوم اخورها ؟!
وقعوني على مسؤوليتي بالغصب قدرت اكتب وطلعت ،
وحرام زوجي مسويلي اجراءات الدخول بس رفضت وطلعت ،
وركبت السياره ،
فتحت عيني الا انا بطيبه !
صرنا طاش ماطاش !!؟:eh_s(1):
يقول زوجي اني طحت عليه بعد بالسياره حرام والله مات من الخوف ،
يقول وجهك صار اصفر حتى شفايفك ماعاد لها لون ،
المهم عطوني ابره الله يجزاهم خير وخلوني عالمغذي 4 ساعات ،
وحسيت بالعافيه من بعد ربي ،
وزوجي عندي يشرح لي شنو صار ،
يقول طحتي فجاه وشلتك واهزك حيل وماتردين يقول والله حسبتك ميته ، وقمت اصفقك عشان
تصحصحين يقول وكل ماصكيتك كف ، فهود ولدك رده لي مره ثانيه وهو يهاوش يقول خلها خلها لاتطقها !
وبنتي الكبيره فديتها حرام للحين والله تكسر الخاطر قامت تصيح وتبكي وليومكم هذا لازقه فيني
بشكل مو طبيعي وتخاف تروح اي مكان بروحها لو الحمام لو المطبخ وماعاد تحب تقعد بروحها كلش،
وخدامتي الهبله اللي بدت بالصياح وخرعت عيالي مالت !:eh_s(14):
يقول وبالطريق اناديك ماتردين يقول لين شفتك ترفعين اصبعك اتشهدين،
يقول قلت خلاص هذي تودع ،
سوولي فحوصات طلع معاي نزيف حاد وانيميا ! وانا قبل كم يوم مسويه تحاليل عند عاليه مافيني شي!
الحمدالله على كل حال ،
شوي حسيت بنفس دزة الولاده مرة ثانيه بس طبعا العوار لايذكر يعني مافيه مقارنه !
وطاح الكيس نتفه دائري ،
إإه انقهرت وانا اشوفه ، احس بالذنب وماني عارفه ليش !:eh_s(2):
وطلعت والحمدلله على كل حال ،
والحين لازم امشي على حبوب شكثر ،
صدق ابن ادم مايحس بقيمة العافيه الا لا فقدها ،:0bee2e8d89:
الهدف من هذا كله ،،
اول شي ان الحمل نعمه ، والله مهما كان لازم نحمد ربنا عليها ،
ثاني شي لازم انتابع اول باول عند دكتورة متخصصه تفيدنا وتعلمنا سبحان الله لو احتاج الجنين
شي نلحق عليه ،
ثالث شي لاااااااااااااا تفنتكووووووووووووون !
اخذوا الشي اللي الكل مجربه ،
اذا حسيتوا الدم زاد مثل ماصار معاي لاتنطرون لين تموتون !
يعني ترا ياكثر حالات الاجهاض اللي تنتهي بالموت من غير شر للكل ،
رابع شي اذا احتاج الامر تنظيفات سووا التنظيفات اضمن واريح ،
انا لأن الكل كان يسب بالتنظيفات سويت نفسي سنعه والله العظيم بغيت اروح من كيس اهلي !
وعلي ذنب لأني اهملت نفسي ! وكنت بيتم عيالي !؟
،،،،،،،،،،،،،،،،،،،،،،،،،،،،،،،،،،،،،،،،
الحين ابيكم تنصحوني باللي تعرفونه ،
اول شي بطني منتفخ حيل اكثر من يوم كنت حامل ؟!
ثاني شي ابي اركب لولب وين تنصحوني اروح ؟
ثالث شي نفسيتي تعبانه حيل فجاه تخنقني العبره فجاه تصك فيني الدنيا !
مو قادره اتحكم بمشاعري !؟
احس اني تعبانه احس جسمي ثقيل ، مو قادره حتى اشيل بنتي الصغيره !!:eh_s(2):
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
وبس ، عسى الله لايحط احد باللي صار فيني يارب ،
اهم شي اني انسق الموضوع وحاطه صور !حمدالله والشكر ! والله لعب بحسبتي هالاجهاض!
التعديل الأخير:
