السلام عليكم حبيباتي
شلونكم شخباركم عساكم بخيرتأخرت وايد إني أحط قصة ولادتي تدرون ظروف النفاس وإلخ.... وهذه ثاني ولاده لي الاولى كانت بالحكومه اسمالله عليه فواز والحين فارس
أبشركم ولله الحمد أني ولدت ولادة طبيعيه كان بيوم الاربعا 1/8/2012 يعني واحد من شهر اغسطس
والحمدالله وكانت دكتورتي خالدة المجيبيل عسسسسسسسل هالدكتوره قمة في أخلاقها وتعانقها الراقي ومرحه وتلطف الجو وتاخذج بغشمرتها دائماً والي يراجعون عندها أكيد يعرفونها
طبعا ولادتي كانت بالأسبوع 37 و4ايام
الله يسلمكم قبله بيوم الي اهو الثلاثا كنت رايحه مراجعتي العاديه سونار وتخطيط وغيره اول ما دخلت عليها تبي تفحصني طبعا من دشيت التاسع واهي تبي تفحص وانا مو مخليتها ،،، نرجع نكمل فحصتني ولا بس 1 سم الاسبوع الي قبله كنت ماخذه جيستين دم نظرا لان معاي أنيميا منجليه فمع الحمال أخذ دم بالشهور الاخيره
وعلى اساس هالشي أهي ماتبيني أخذ من شهري كله عشان ما ينزل دمي مره ثانيه وأخذ دم كثرة نقل الدم. مو زينه وسبب لي ارتفاع في نسبة الحديد مو زين وكل شي اذا زاد عن حده ينقلب ضده
المهم عقب الفحص سوتلي سونار ولا تشوف البيبي مخرج في بطني بس يعني مو من زمان مخرج بس بادي يخرج وعلى قولتها الماي هابط يعني بتولدني بتولدني وقالت ان 37 الاسبوع عادة البيبي مايخرج بس أنا لان من كثرة الحديد يمكن جذي صار
وقررت انها تحطلي البالونه وارد البيت فيها طبعا تذبح من العوار شي مو طبيعي ماقدر اوصف لكم شكثر تهور حطة البالونه وقالت لي ارجع البيت فيها عادي هالحجي كان الساعه 5 المغرب يوم الثلاثا قالت لي روحي البيت اخذي شور تأدب وصلي وحطي جنطتج وردي على 7 أنا خفاره وموجوده بكون ولاتحاتين
طبعا أنا قمت اقط خيط وخيط وويهي يقلب ألوان وادق على أمي واختي وابجي يؤمنها ريلي الي موديني مراجعتي واهو طبعا مستأنس مكيف لأني بولد
رديت البيت اسرع من السريع خذيت لي شور وصليت العصر كانت طايفتني الصلاة وحظيت حنطة فواز وجنطتي وأهلي بعدين كملو اغراضي لأني مثل ما انتوا عارفين مومستعده نهائياً
وديت ولدي فواز بيت اهلي وطار فيني ريلي على رويال حياة كانت الساعه بالطريج 7 ونص تقريبا وصلت هناك ورحت علطول الدور الخامس وامي واختي ورانا لاحقينا بسيارتهم
دخلوني ويتلي دكتوره الخفاره مصريه حيل حبوبه لبسوني طبعا قبلها لبس الميانين بس شحلوه والله ابيض ذرب وعطوني الحقنه الشرجيه وسريع على الحمام تالي الدكتوره المصريه فحصتني و2 سانتي وماشالله ايدها خفيفه عكس الدكتوره خالده هالحجي كانت الساعه 8 وشي بعدين بالتسع بعدين يتلي دكتوره مصريه ثانيه حطتلي تحميله وعقب جم ساعه جذي كانت 12 باليل صار 4 سم طلقي كان حيييل بارد خفت والله حيل من القيصريه لأني طولت وايد تدرون داشه وانا مافي طلوق ولا بوادر ولادة وامي واختي معاي بالغرفه معاي ماهدوني
ودوني غرفه ثانيه طبعا دكتوره خالده كانت تروح وترد علي ماخلتني كلش فديتها توصي دكاترة الخفاره علي وتوصيهم وتعطيهم تعليمات
وانا متفقه مع الدكتوره على إبرة الظهر من قبل وخذيتها لما فتح الرحم عندي 5 سم وعطاني إياها الدكتور عمر الخطيب وماشالله ايده خفيفه ويسولف وياخذ ويعطي بالسوالف وانا مو صوبه كلش ومالي خلقه من العوار لان أهني صج زاد علي العوار ومن عقب الابره حيل ارتحت ماحسيت بالطلق ودكتورتي خالده يت قعدت عندي وحطتلي طلق صناعي يعني قبلها تحميله والحين طلق صناعي وبعدين قللوا الدوا مال إبرة الظهر عشان ادز معاهم واحس معاهم بالبوووش
ولدته الساعه 9،5الصبح يوم الاربعا صح تعذبت لأني طولت وايد بس الحمدالله كله بأجره وصدقوني بنات احسن شي الاستغفار والدعاء وقت الولادة أنا كنت بس ادعي واستغفر وامي واختي معاي نفس الشي
الصراخ ماعمره سوا شي الاستغفار وبس
والحمدالله يبت أحلى فروسي ولما شفته نسبت التعب كله وقعدت بغرفه الكاميليا واستقبالي كان ثاني يوم عقب التراويح استقبلها أهلنا وحبايبتا
حسابي طلع كله 1550 شامل الولادة وإبرة الظهر والمسكنات وغيره بجناح الكاميليا
ماشالله العنايه تهبل وخدماتهم أحلى ودكاترة الاطفال ممتازين ودكتورتي اتييين عليها شويع
وأي استفسار حبيباتي أنا حاضرة
*
التعديل الأخير بواسطة المشرف:
