قصة ولادتي بزين البنات ( الــزيــــن ) الله يحفظها ويخليها لي

[Miss Golden]

:eh_s(2): السلام عليكم ورحمة الله وبركاته



ماشاءالله ولا قوة الا بالله

بحمدالله وبفضله ومنته ولدت و يبت أحلى زيونة ( الــزيـــــن ) يوم الاحد 24 - 10 - 2010 بمستشفى السلام مع الدكتورة نجمة علي



راح اقولكم قصة ولادتي و عقبها الايجابيات والسلبيات اللي شفتها بوجهة نظري





بيوم السبت 23-10 كنت حاسه بتعب من بداية اليوم بس لاني بجر ماكنت ادري شالسالفة و قلت عادي لاني بالتاسع فشي طبيعي احس جذي ..

ولاني ماكنت مخلصة كنت شغلي و باجيلي شغله من مذركير فاتفقنا انا وريلي على اساس نطلع بهاليوم و نروح الافنيوز نخلص شغلنا...

طلعنا عقب المغرب وانا اعاااااني من عوار تحت بطني نفس ألم الدورة و احس ان حيلي مهدود.. تخيلوا بنات صفطنا اخر الافنيوز و رحنا تعشينا بأول الافنيوز و ردينا مذركير شرينا اغراضنا و وديناهم السياره و عقب رديت مشيت لي ستار بكس ريحت شربت قهوه و كيك و هم رديت مشيت لي السياره!! والله بنات لو اقوكم هنيه كنت اقول حق ريلي اني تعبااااااانه و حاسه اني بعالم ثاني مو مع الناس!! احس جني غرقانه واسمع اصوات الناس مادري شلون جني مو معاهم كلش
حتى اذكر وانا بستاربكس مادري شلون قعدت ..!! تقريبا شبه انسدحت وانا مو حاسه بنفسي وريلي يقول لي قعدي عدل شفيج جذي جدام الناس وانا اقوله والله مو بكيفي احس فيني شي :eh_s(2):





المهم رديت الشقة و اذكر والله دشيت داري وانسدحت بهدومي و حجابي عالفراش قطيت روحي قط و غفيت يمكن ساعه شي جذي...


قعدت ورحت الحمام وانتوا بكرامه جان القى افراز لونه بني فاتح على اصفر ...@@ طبعا اخترعت بس قلت هذي اكيد تجاديم الولاده الظاهر ولادتي هالاسبوع شي جذي...

رحت فراشي و لا ريلي يايلي شاف حالتي مو طبيعيه قلت له والله احس اليوم مو مثل كل يوم غييير فيني شي..

دقيت على أمي قلت لها و يحليلها لبست هدومها و نطرتني تقول اخاف اي وقت تروحين المستشفى دقوا علي انا ناطره..

هنيه الساعه 1 وشي بالليل


و دقيت على حماتي قلت لها بعد قالت لي غسلي ظهرج بماي دافي و ان شاءالله خير




المهم ريلي نام.. وانا حاولت بس ماقدرت وييين اقدر انام وانا بهالحاله

رحت الصاله و اذكر شبكت و دشيت التجمع و كتبت الاعراض اللي احس فيها ويحليلهم البنات ماقصروا قالولي شكلج ولاده و هذا طلق روحي قعدي ريلج



اللي حسيت فيه عوار قويييييي اييلي يروح ويرجع كل شوي فبطني تحت.. يخليني ماقدر اقعد يعني اذا يالي انسدح من قوته


اول شي كان يروح و يرد كل نص ساعه


قل الوقت و حطيت الساعه جدامي صار كل ربع ساعه


بعدين كل 10 دقايق


واخر شي صار كل 6 دقايق


هنيه صارت الساعه 4 ونص الفير جان اقوم والبس عباتي و اقعد ريلي واقول له خل نروح المستشفى شكلي ولاده


طبعا لاني بجر قال لي يمكن مو ولاده شرايج تنطرين ليما ارد من الدوام!! قلت له لاااا انا نطرت وصار كل 6 دقايق مابي انطر خل اروح اجيك واتطمن عالاقل..

طلعنا ورحنا المستشفى ودقينا على امي اللي كانت ناطرتنا ومانامت الليل كله حبيبتي ..


وصلت و فحصوني ولا انا مفتوحه 4 سم!!! @@

قالت لي على طول غرفة الولاده


دخلوني غرفة الولاده و لبست هدوم العمليات و عطتني ابرة شرجية و دخلت الحمام وانتوا بكرامه .. طلعت ولا امي وصلت و معاي بالغرفة


بنات هنيه العوار يروح ويرد و كنت بوعيي عاادي الساعه كانت 6 الصبح

يت الدكتورة كانت مو نجمه حزتها دكتورة باكستانيه ثانيه اسمها فرزانا.. بطت الماي و راحت

شوي شوي صرت 5 سم...

العوار زااااااااااد صرت ماقدر اتحمله عطوني الكمام اللي خدرني صج و خلاني بعالم ثاني


عقبها..............


والله ما اذكر غيير العوااااااااار مال الطلق اللي ذبحني والله .. الدكتورة عطتني 3 ابر تخدير مسكن بالدرب مع الكمام تخيلوا و هالشي خلاني انااااااااااام واقعد بس عالعوار واصااارخ اقول آآآآآآآآآآآآآآآي من قلبي وامي حبيبتي تقول لي لا تقولين آآي يبرد الطلق و كانت قاعده تطلق وياي تخيلوا تقول لي دفعي سوي جذي..

انا كنت بعالم ثاااااااااااااني والله اذكر قلت عقبها بناااااااام ماقدر طلعووووها



المهم عقب كل هذا الحمدلله طلعت زيونه وكانت حبيبتي زرقة لونها على كحلي من كثر الطلق والدفع واهي متعذبه حبيبتي .. شفطوا راسها شوي عشان تطلع لان ماكان فيني قوة ادفعها.. و طلعت شاربة ماي بعد يا حياتي

عقب ما شقووني خيطتني الدكتورة و العوار تام معاي ليلحين ترى بس الله يخلي المسكنات.. وان شاءالله مع الايام يخف اكثر واكثر لين يروح..

لما طلعت أذكر صرخت صرخه هزت المستشفى كللللله هذا اللي اذكره و شفتها زرقه جان اناااااام عقبها لاني ارتحت انها طلعت


زيونه طلعت صغيرونه ترى و حدهاا نتفه كيلوين و شي.. وانا كنت بالاسبوع 37 ويومين...

يعني اتوقع خيره من الله اني ولدتها بأول التاسع و كانت نتفه لانهم شقووني و تعبت فيها حييل مع انها نتفه..

و الحمدلله على كل حال








ملاحظاتي على المستشفى والولاده بشكل عام..

الدكتورة نجمه تهببببببل الصراحه ماشاءالله عليها تحسونها بنات أم حبيبة وقريبة للقلب :eh_s(21):

الممرضات كلهم يهبلووون وايد حليوين وحبوبين حتى سسترات الرضاعه قعدوا معاي و علموني وكان بالهم وسيييع يحليلهم

الغرفة اللي اخذتها جناح الثريا وايد حلو و مرتب.. اذكر يمه جناح الجوهره ماشفته لان لما قالولي ولاده ماكنت شايفة الغرف و خليت ريلي يختار لي على ذوقه..

اهم نقطه...

وقت الولاده.

الكمام فكرته حلوة و صج خلاني ادوووخ وادش بعالم ثاني


بس


ابر التخدير الثلاث اللي عطوني اياها ماكان لها داعي!!

يعني اهمه يبوني اتخدر وما احس بس وقت الطلق ماقدرت ادفع و هالشي خلا الطلق يبرد






بنات اسمحولي ترى الموضوع صار لي فوق الساعتين وانا اكتب فيه لاني لاهيه ويا زيون يعني صج محتاسه..

اعذروني اخاف اي وحده تسألني سؤال ومارد عليها بسرعه.. وبنفس الوقت احس اني نسيت وايد شغلات ماكتبتها


بس حبيت انزل الموضوع لان وايدين كانوا ينطرونه





الله يسهل الولاده عالجميع ان شاءالله و يرزق كل محرومه بالذرية الصالحه ويطرح بعيالنا البركه يارب

 

[Miss-_-Fl0wer]

مبروك ماياج والحمدلله على سلامتكم

 

[Miss Golden]

مبروك ماياج والحمدلله على سلامتكم

الله يسلمج ويبارك فيج حبيبتي و الفال لج ان شاءالله

 

[mooma]

مبرووووك ما يااج و الحمد لله عالسلاامه و الله يبلغج فيها ان شاء الله

 

[غضى]

قلللللللللووووش مبروووك ماياج والف الحمدلله على السلامه
ووتتربى بعزج وبعز ابوها انشالله

 

[سعوديه أصيله]

مبررروك

الحمدالله على سلامتك وتتربى بعزكم ان شاءالله:eh_s(7):...

 

[ام القمرالمطيري]

فديت الزين ماشاالله ربي يخليها لج وتتربى بعزكم

والف الحمدلله ع سلامتج

بس صج بارده .. تحسين بالم وتتسوقين .. انا لو قرصه من خوفي ركض عالمستشفى خاصة لما كنت بكر .. لاني ماعرف شي واخاف ان معاي طلق وانا مادري

المهم الحمدلله ع سلامتج حبوبه

تنصحيني اولد بالسلام ..؟ مع انه البنات يذمون المستشفى الحين يقولون واجد تغير عن اول

 

[Miss Golden]

مبرووووك ما يااج و الحمد لله عالسلاامه و الله يبلغج فيها ان شاء الله

الله يبارك فيج حبيبتي مشكووره ماقصرتي :eh_s(17)::eh_s(17):

 

[Miss Golden]

قلللللللللووووش مبروووك ماياج والف الحمدلله على السلامه
ووتتربى بعزج وبعز ابوها انشالله

الله يبارك فييج والفال لج حبيبتي

مشكوره وماقصرتي :tek:

 

[Miss Golden]

مبررروك

الحمدالله على سلامتك وتتربى بعزكم ان شاءالله:eh_s(7):...

الله يبارك فييج حبيبتي مشكووره حياتي :balo:

 

[Awash-82]

حبيبتي الف الحمدلله على سلامتج يالغاليه ومبروووك ماياكم عاااد الحين صج بديت اتصروع المفروض انا معاج 11-11 ولادتنا الحين بديت اخااف صج الله يستر مع ان هذا ثاني بيبي بس الخوف متملكني حبيبتي الحمدلله انج ولدتي وارتحتي تتربى بعزكم ان شاء الله

 

[Miss Golden]

فديت الزين ماشاالله ربي يخليها لج وتتربى بعزكم

والف الحمدلله ع سلامتج

بس صج بارده .. تحسين بالم وتتسوقين .. انا لو قرصه من خوفي ركض عالمستشفى خاصة لما كنت بكر .. لاني ماعرف شي واخاف ان معاي طلق وانا مادري

المهم الحمدلله ع سلامتج حبوبه

تنصحيني اولد بالسلام ..؟ مع انه البنات يذمون المستشفى الحين يقولون واجد تغير عن اول

الله يسلمج حبيبتي ماقصرتي :33_1185028183:

انا لما كنت احس بألم قلت يمكن شي طبيعي خل اتعوذ من ابليس وامشي و اخلص شغلي.. خصوصا اني استبعدت اني اولد الحين.. حاطه فبالي ان البجر تاخذ شهرها فقلت بولد شهر 11
وبنفس الوقت مابي اتدلع على بوالشباب .. لان العوار كان خفيف واقدر اتحمله وانا بالسوق


وبالنسبه للسلام انا وااااايد حبيته.. البنات ماكو شي ماذموه و غيرهم مدحوه يعني اختلاف راي..

الله يهون عليج انتي والكل ان شالله

 

[Miss Golden]

حبيبتي الف الحمدلله على سلامتج يالغاليه ومبروووك ماياكم عاااد الحين صج بديت اتصروع المفروض انا معاج 11-11 ولادتنا الحين بديت اخااف صج الله يستر مع ان هذا ثاني بيبي بس الخوف متملكني حبيبتي الحمدلله انج ولدتي وارتحتي تتربى بعزكم ان شاء الله

لول عواش انتي اللي معااي بالتوقيع

اخيييرا شفتج :friends:


لا تتصروعين عاادي حبيبتي البيبي مايطلع الا بيومه

بس في شغلات تسهل وتساعد مثل التمر والرطب

المشي

كثرة الجماع


الله يسهل عليج ان شالله

 

[Awash-82]

اي والله كنت ناطره قلت يا انا قبل او انتي ونتلاقى بقصه ولاداتنا المشكله انا من نص الثامن اييني عوار ويروح وقبل امس قالتلي الدكتوره كل شي اوكي بس ناطرين الطلق والله يستر
شكلي بمشي على تراب البحر اليوم عشان الحق اكون معاج من مواليد شهر 10 لووووول

 

[.،:"$الـعـوبــــة$":،.]

رد : قصة ولادتي بزين البنات ( الــزيــــن ) الله يحفظها ويخليها لي

الف الحمدلله على سلامتك ، ومبروك البنوتة عسى الله يبلغك فيها عروس يارب ،،:eh_s(7):​

 

[Miss Golden]

ههههههه حبيبتي والله عواش

لا تحاتين وايد واللي ايي من الله حياه الله.. ماكو الا الخير

شهر 10 ولا 11 كلهم حبايب و جيران :d

اهم شي تقومين انتي والبيبي بالسلامه

 

[Miss Golden]

رد: رد : قصة ولادتي بزين البنات ( الــزيــــن ) الله يحفظها ويخليها لي

الف الحمدلله على سلامتك ، ومبروك البنوتة عسى الله يبلغك فيها عروس يارب ،،:eh_s(7):​

الله يسلمج ويبارك فيج حبيبتي

مشكووووووره يالغلا ماقصرتي :aha:

 

[باربي للابد]

الحمدلله على السلامة والف مبروك البنوته عسى الله يبلغج فيها عروس انشالله

عاد انا اراجع بالسلام وعند نجمه الحمدلله تجربتج وايد تشجع :icon30: ​

 

[Miss Golden]

الحمدلله على السلامة والف مبروك البنوته عسى الله يبلغج فيها عروس انشالله

عاد انا اراجع بالسلام وعند نجمه الحمدلله تجربتج وايد تشجع :icon30: ​

الله يسلمج ويبارك فيج حبيبتي :tek:

ايي والله انا وايد ارتحت لها..

الله بهون عليج ان شاءالله وتشوفين البيبي بحضنج

 

[Awash-82]

حبيبتي الله يسلمج عاد سيري علي بقصه ولادتي اذا الله سهل ان شاء الله وبوسيلي زيووونه الكتكوته