قصة ولادتي بمستشفى السلام د.نزهت

[حبيبة عز]

بنات قصة ولادتي

ولدت في مستشفى السلام عند دكتورة نزهت
تقييمي للمستشفى وايد حلو ونظيف واهتمام من السسترات
وتقييمي لدكتورتي نزهت الحمدلله كانت هاديه وصبرت علي

يوم السبت تاريخ 25/2 حاشتني حكه وحساسيه بجسمي

عطتني الدكتورة مرهم ومافاد معاي

يوم الأحد الفجر حاشتني طلوق كل 5 دقايق

ولما رحت سوولي تخطيط يقولون مافي ولاده لان الرحم فاتح سانتي بس روحي امشي وتعالي بعد 4 ساعات

راحت الطلوق ومارحت وقعدت أمشي

يوم الثلاثاء بتاريخ 28/2 زادت الحساسيه والحكه وسولفتلكم عنها

رحت حق دكتورتي وسوتلي تحليل انزيمات الكبد طلع مافي شي الحمدلله

بس الدكتورة خافت لان هذا التحليل مو أكيد100٪

وقالت ماراح أجازف فيج وبالبيبي لان البيبي سمالله عليه ممكن يموت إذا مانولد بالاسبوع ال38

وانا كنت توني داشه بالاسبوع ال38 ومافي بوادر ولادة

سوتلي دخول الساعه 10 بالليل يوم الثلاثا

وحطولي تحاميل تفتح الرحم وكانت كل 4 ساعات

وبلشوا فيها من الساعه 12 بالليل
والثانيه الساعه 4 الفجر والثالثه الساعه 7
الصبح والرابعه الساعه 9:30 الصبح تقريبا وكانت التحميله الاخيرة*

وحاطيلي جهاز التخطيط وممنوع أتحرك
والطلق زاد حيل بس الرحم مفتوح 1 بس

والفحص يابنات تعبت منه حيل*

والساعه 12 الظهر نزلوني غرفة الولادة
وركبولي طلق صناعي ودرب انتي بايتوك
غير الادوية اللي كل شوي تحطهم بالدرب

وزاد الطلق وحطولي كمام بس الالم مو طبيعي والرحم مو راضي يبطل

بعدين قرروا يحطولي ابرة ظهر ووافقت
لان الطلق قوي ويبون يوسعون الرحم لانه مسكر

واللي حطتها لي دكتورة مصرية صغيرة عسل والله شحلاتها وشحلاة نفسيتها وسوالفها
شرحتلي طريقتها ووقعوا ريلي عليها ان احنا موافقين نحط ابرة الظهر

وحطتها لي يابنات وتذبح تعور
وقالتلي لا تتحركين لان مكانها خطر
ونقزت لما حطتها لي بس الله ستر
وشمخت ايد السستر مسكينه من الالم

وكانت تمر علي دكتورتي نزهت بين فترة وفترة ودكاترة الطوارئ بعد

وسستر خاصه بس مجابلتني ومجابله ملفي ومجابله التخطيط

ورفضت أحد من أهلي يدخل معاي غرفة الولادة لاني ماحب وامي وريلي عصبوا علي لانهم كانوا يبون يدشون معاي وانا رفضت

ودخلت دكتورة طوارئ وشافت الرحم بطل 1 سانتي ونص بس والطلق قوي طلق ولادة
جان تقولي بسويلج توسعه وانا عادي الحمدلله ماحسيت بفضل الله وابرة الظهر
والله يابنات انها رحمة من الله هالابرة

وكل شوي يوسعون وصارت الساعه 3 العصر وتعبت حيل جان تدش دكتورتي نزهت وبطت ماي الراس وقالتلي صدقيني ماراح تجي الساعه 12 بالليل الا البيبي بحضنج ان شالله
اوعدج لا تخافين

وبلش الرحم شوي شوي يتبطل وصار المغرب وقامت السستر تحوس اقولها شفيج تضحك وتقولي وناسه خلاص بنشوف البيبي الحلو لان رحمج بطل 7 سانتي والساعه 9 بالليل وفتح 9 سانتي

وريلي وامي كانوا كل شوي يدشون يتطمنون علي ويطلعون
وريلي حياتي كان حده خايف علي وقالي كلمة خرعتني قالي مو مهم ولا شي بالدنيا حتى البيبي مو مهم اهم شي تقوميلي بالسلامه

ودخلت علي دكتورتي نزهت ياحلوها وياحلو نفسيتها وهاااااديه تريح والله
وتضحك تقول شعنده ولدج مو راضي يطلع اليوم شكله مو عاجبه التاريخ

المهم بنات بلشت ولادة والسستر كانت تقولي بوش وانا ماعرف شلون اسوي بوش
مرة اتعصر ومرة اصارخ وتالي علموني اني لا ابطل حلجي واتعصر جني بروح الحمام عزكم الله

وحاولت أسوي بوش قوي علشان يطلع الراس بس ماقدرت وقالتلي الدكتورة راح أساعدج وسوت شفط بسيط علشان تمسك الراس
ولما مسكته سويت بوش كل ماطلبوا مني
لاني ماحس بالطلق من ابرة الظهر
بس هم كل ماشافوا الطلقه قويه على الجهاز يقةلولي سوي بوش
في سسترات 2 وحدة تشجعني وتطالع مع الدكتورة والثانيه تضغط على بطني
ليما طلع البيبي وشالوه حطوه على بطني
شعور وايد حلو وماينوصف
ودخلوا ريلي وشاف البيبي وفحصه دكتور أطفال

وكان تاريخ ولادتي مميز 29/2/2012

بعدها بلشت خياط وماشفت شي لاني خايفه
وبعد ما امي وريلي تطمنوا علي والسسترات وخلصت الولادة ودعيت ان ياربي لاتحرم احد من نعمة العيال يارب نمت وارتحت

الحمدلله الذي بنعمته تتم الصالحات
الحمدلله الحمدلله الحمدلله

وريلي زعل من الدكتورة وقعد يلومها ليش شفطت ولما شافتني ثاني يوم قالت لا تزعلون الراس بيتعدل ان شالله وانا ماشفطت الا لما شفتج ماتقدرين تساعديني
انا ما كنت ابيج تولدين قيصري علشان جذي صبرت عليج يومين وانتي مفتوحه بس 2 سانتي وانا مالومج لانج ماقدرتي تسوين بوش لان مافيج ولادة واحنا حاطيلج كل شي صناعي علشان نولدج
فصعب عليج فلا تلومين نفسج*

والحين الحمدلله قاعده مع ولدي اللي سماه ابوه خالد
وامي تبدله لان نتيفه ماقدر امسكه اخاف
اتوقع طالع علي لان انا حبتي صغيره

والحساسيه ليما الحين مستمره معاي
وحايشتني كآبه منها

احساس حلو بس ضايق خلقي على ولدي
لان راسه شوي فيه تفخه فوق من الشفط
امي وخالتي خوفونا وتوترنا ويحاتون

بس الدكاترة طمنونا ان راح يتعدل الراس بعد اسبوعين ان شالله

منو ولدت شفط وتعدل راس البيبي
وصار زين سمالله عليه
لاني سمعت سوالف تخوف*

وسوري طولت عليكم

 

[الشيخه11]

الحمد لله ع السلامه
ومبروك البيبي ويتربى بعزكم

 

[L O V E]

الحمدلله على سلامتج وسلامه ولدج

 

[ام فطوووم]

الف الحمدلله عالسلامه
وانشالله ربي ايقر عين كل بنت محرومه من الضنى واتفرح قلبهم
وولاتحرمنا وتحرمهم
وانشالله راس البيبي راح يتعدل الصراحه بس ماصارتلي هالتجربه بس كنت اسمع
ان اول شي ايكون جذي الراس بس عقب فتره ايرد
لاتحاتين حبيبتي

 

[H&M love]

الحمدلله على سلامتج و مبروك ماياج
لا تحاتين حبيبتي الشفط مايخرع
كل سوالف الحريم خرابيط
انا اختي شفطوها
و هم و اهي تولد شفطو بنتها
و صج كان راس بنتها شكله غلط
ماصار شهر الا و اهو طبيعي
مالج شغل من كلام الحريم
حق التخرع جاهزين
و لو كان صج خطر
جان ماخلوه بالمستشفيات

 

[هدولى]

الف حمد الله علي سلامتج وانا ولدى البجر شفط كان راسه اشطوله والحين تعالي شوفيه اسم الله عليه لا تحاتين حبيبتى واطمني .

 

[عنووشه]

حمدالله علي سلامتج

وانا ترا قبل سنه ولدت بنتي واشفطوها لانه حزت الولاده جتني خرعه ونطت بنتي فوق واضطر الدكتور يشفطها



ومافيها الا العااافيه


ترا كله خراااابيط اللي تسمعينه

 

[أموني نوني]

الحمدالله ع السلامة ومبروك مايبتي
والشفط عادي بالعكس يساعد الدكتور في مثل هالحالات
انا ولدي شفط وصج راسة طلع شوي طويل وفي نفس تفخت ماي وفشت راحت مع الايام والراس تعدل مع مرور الوقت
واختي كانو شافطينها كاهي اسم الله عليها شحلاتها
وهم بنت اختي ومافيهم الا العافيه لاتحاتين
الشفط نعمة للي مثلنا ع هالنعومة ووين نقدر نشد 

 

[shjoonaa]

الف الحمدالله على سلامتج ويتربى خالد بعزكم

 

[بنت جنيف]

الحمدالله على سلامتج ولاتحاتين بالشفط عيالي اثنين منهم شفطوهم بسً الحمدالله الراس تعدل وصار طبيعي

 

[نونا حلوه]

حمدالله ع سلامتج عادي لاتحاتين راح يرد طبيعي

 

[[[ عيون جابر ]]]

الحمدلله على سلامتج وسلامة البيبي ومبروك ما ياج
ولاتحاتين ع الشفط ولد خالي شفطوه ومافيه الا العافيه يختفي الاثر بسرعه

 

[يمنيه مغتربه]

مبروك ماياج ولا تحاتحين راس البيبي انا بنتي جبتها راسها طويل مو من الشفط لا انا اللي مع التزحم وقفت على راسها وماقدرت اكمل وقامت الدكتوره تهاوشني بس الحمد الله ربك ستر وماصار أسبوع الا وراسها أش حلاته لان امي الله يحفظها كانت تجيب زيت سمسم دافي شوي وتحطه على رأسها وتحاول تعدله ليما صار احسن فلا تحاتين هاذي أمور عاديه

 

[*امووونه*]

مبروك ما جبتي يتربي بعزج وعز ابوه
علي سالفة الشفط لا تحاتين بنت اخوي شفطوها كاهي ما فيها الا العافية

 

[FJ style]

الحمدلله ع سلامتج حبيبتي
لا تحاتين الشفط كلللللش
عاااادي وبيتعدل


بس انا بفهم شغله
ليش كنتي بالاسبوع ٣٨ وغصب بتولدج
ولا فيج طلوق ولا شي
المفروض دامج بجر تنطر عليج لي الاسبوع ال٤٠ بالكثير

انتي مافيج ولادة ولانفع معاج لا طلق صناعي ولا تحاميل ولا توسيع

الصراحه حرام عليها اللي سوته
انا من خبرتي بعيالي ليش اني بااااردة بالطلق
احس غلط اللي سوته

اكبر دليل ان البيبي مو راضي ينزل
وهم الماي بطوه وهم الطلوق خفيفة

الصراحه دكتورتج مو مضبوطة
انتي بجرية من جذي عبالج صح طريقتها
انا مو دكتورة لكن كبجرية غلط تسوي معاج جذي

 

[ABEER FLOWER]

ماشاء الله

ألف الحمد لله على سلامتج وسلامة " خالد "

يتربى بعزكم

: )​

 

[أكذب عليك]

حمدالله ع سلامتج
ان شالله اولد عند مزهت والله يكتب اللي فيه الخير
ولاتحاتين خلود لانه اعرف ناس شفطول وبعد الاربعين متعدل راس البيبي

 

["~FOoFOo~"]

الحمدالله ع سلامتج مبروك ماجاج
بنفس اليوم اللي ولدت فيه
وعلى الشفط انا اولدي اللي قبله اشفطوا رأسه والحمدالله رأسه تعدل لاتخافين يتعدل

 

[ام الحلوااات]

الـــحــــمــــد للـــه عـــلـــى ســــــلامـــتـــج ومـــبـــرووووك عـــلـــيـــكــم الــحـــلــــــو خــــلـــــــود

 

[A7bny =)]

الحمدالله على سلامتج وسلامة البيبي ومبروك عليكم خلودي ياحلات اسمه الله يخليه لج ويبلغج فيه معرس