كبسولات فيتامين e احترت فيهم مو عارفه استخدمهم ؟؟

[قاهره عذالي]

عندي كبسولات فيتامين e
للبشره
شريتهم من محل
والفلبينيه تقولي ينفخ الخدود وينحط قبل المكياج ويرطب البشره ويثبت المكياج

شكثر قالت فوائدهم

بس انا مو عارفه افتح الكبسوله

مطاطيه وقاسيه مهما احاول افتحها واكسرها ما تنكسر مرنه لانها مطاط



هذي صورتهم علبة الكبسولات



وهذا شكل الكبسوله مو عارفه اكسرها احسها قاسيه وتمطمط معاي وتثني وقاسيه مدري شلون احطها على وجهي
الكبسوله شكلها عادي بس على احد الاطراف راس ضعيف جنه ثالوله


ابي بنات اللي مجربتهم تعلمني الطريقه ؟

وشكرا:eh_s(7):

 

[عظيمة الشان]

هلا حبيبتي عندي مثله بالظبط

اتعرفين الشي الصغير الي جنه ثالول

لفيه وايد لين ماتتبطل او اذا ماعرفتي قصيه بالمقص

وبسسسسسس

​

 

[قاهره عذالي]

مشكووووره يا قلبي سبحان الله وانا اقرى ردج حاولت وصار معاي وقمت اعصر الكبسوله
على وجهي كله


هي شنو فايدتها هالكبسوله وشنو تسوي يا عظيمة الشان ؟
ومشكوووره يا قلبي لردج

 

[وافرر]

الحمدلله انك عرفتى شلون تفتحينهاا

 

[عظيمة الشان]

مرررحبا

عفوا حبيبتي

افا عليييييييييج

اممم انه قالت لي المصريه الي شريت منها

احطها عقب حمام البخار او اي وقت

تنعم البشرة وتوحد اللون وتغذيها

وتقدرين تحطينها في خلطة انل للشفايف بعد

الي اهي

فازلين وزين نعناع وزيت القرفه ودم الغزال وهاي الكبسوله واايد تنعم البراطم

تحياتي حبيبتي​

 

[Mrs_Orchidia]

انزين صج تتفخ؟ لووول

ودي اجربها عشان توحد لوني بس مابي شي يتفخ الصراحة

 

[قاهره عذالي]

مس اوركيدا

ما نفخت وجهي
توني حطيتها بس احس نعمته

وهي للتغذيه وتنحط مع خلطات او بروحها عادي
وتنحط للهالات السودا وللجفون عادي
هذا انا مسحت عيوني بعد

ومسحت وجهي كله

هي تغذي اكثر البشره

 

[Mrs_Orchidia]

اي اهي يمكن ما تتفخ الحين .. بس خوفج مع الوقت و الاستمرار بالاستخدام تبين النتيجة

الصراحة هذا اللي مخليني اتردد اني استعملهم


جان زين اللي مجربين يفيدونا

 

[قاهره عذالي]

حبيبتي هي مكوناتها اولوفيرا وفيتامين e

هالمكونات تسوي نعومه ونضاره بالبشره وتعيد حيويتها

اما النفخ مادة الكولاجين فقط

فيتامين e هالكبسولات يحطونها بخلطات التنعيم والتبييض وماله علاقه هالفيتامين بالنفخ

 

[قاهره عذالي]

والكل يعلم ان فيتامين e هو المسؤول عن جمال وشباب البشرة لأنه مضاد للأكسدة وبالتالي يقضي على الخطوط الرفيعة التي تسبب التجاعيد ويعيد شباب البشرة ويوردها وينعمها
كما ان الألوفيرا توفر النعومة والترطيب والنضارة للبشرة بسبب ترميمها للخلايا الميتة وإعادة تجديد الخلايا

طريقة الإستخدام:
كل يوم مساءا قبل النوم بنصف ساعة نظفي البشرة جيدا ثم افتحي كبسولة واحدة وخذي السيروم ووزعيه على الوجه من تحت لفوق وأسفل العيون وعلى الرقبة وظاهر اليدين من فوق
يعني الكبسولة الواحدة تكفي للوجه والرقبة والكفين
لأن الغالبية يهتمون ببشرة الوجه وينسون الرقبة واليدين
وطبعا الرقبة واليدين مهمين جدا لأنهم يتعرضوا للتجاعيد مثل الوجه
وبعد ثواني ستتشرب البشرة المادة ولن يبقى الا أثر النعومة

الكبسولات تناسب البشرة الجافة والعادية والمختلطة اللتي الدهون فيها قليلة جدا
كما انه يناسب مختلف الأعمار وممكن ان يستخدمه النساء والرجال

والإستعمال اليومي لهذه الكبسولات كفيل بأن يعيد لبشرتك نعومتها ويقضي على التجاعيد او يقي منها في حالة عدم وجودها ومن أول استخدام ستلاحظي النعومة على بشرتك

هذا بحثي عنهم

 

[قاهره عذالي]

 

[A.Designer_90]

وين أحصلهم ؟

مشكورة صاحبة الموضوع

 

[قاهره عذالي]

كبسولات فيتامين e للبشرة

1- يفتح لون البشرة
2- فعال لتجديد خلايا محيط العين
3- لازالة التجاعيد
4- مسمن للخدود
5- توحيد لون البشرة
6- التخلص من الهالات السوداء تحت العين
7- فعال لإزالة تشققات الجسم
8- ينشط الدورة الدموية مما يزيد من إمتصاص البشرة للزيت والاستفادة منه
9- لنعومة البشرة
10- مبيض للأماكن الحساسة بالجسم




الطريقه ..


تفتح الكبسوله وتوضع على البشرة مباشرة قبل النوم وتدلك برفق حتى تتغذى البشرة بالزيت ..
منقوووول
​

 

[قاهره عذالي]

وين أحصلهم ؟

مشكورة صاحبة الموضوع

انا شريته من سرداب الشاهبندر بسوق الامارات بالجهرا بركن العطور والمكياج

وهو ينوجد بكل مراكز التجميل مثل بسمه وغيرها

ويمكن تلقين منه بسرداب الشايع

عندج صورة الكبسولات واسم الماركه

حتى بالاماكن اللي تبيع سوالف الفلبن تلقينهم

وفي بالصيدليه مثلهم بس يختلفون لان عادي تبلعينهم

اما هذول اللي حاطتهم مو حق بلع بس تمسحين بشرتج فيهم لان هم مضاف لهم الالوفيرا اللي يساعد على الترطيب اكثر :eh_s(7):

 

[لف ليدي]

ماعرفهم اب لعيونج

 

[last-moon]

اب اب اب اب اب ​

 

[diamond doll]

بنات انا عندي زيت فيتامين e من صيدلية بوتس والدكتورة قالتلي انه مركز اكثر من الكبسوله

بس شلون يتفخ ؟

 

[قاهره عذالي]

هو ما يتفخ كثر ما يعطي نظاره ونعومه للبشره ويساعد على توحيد اللون

 

[!الجادل الصعب!]

ما اثق بالسوالف هذي للبشره
خصوصا ان الي يبيعونها فلبن

 

[قاهره عذالي]

الجادل الصعب

الحبوب انتاج امريكا
usa