كرهني بحياتي!!!!!!!!!!!!!!! للمتزوجات فقط

[Pupiipop]

بنات تكفه ساعدووووووني
انا عمري 20 سنة و متزوجة و اخر الشهر عيد زواجنا الثاني و عندي بيبي و ماخذه ريلي عن حب و قاعدين بشقة بروحنا مو مع اهله

بس مشكلتي مع ريلي الاحترام!! كلش ماكو احترام! اهوا ما يحترمني و انا ما احترمه من يوم تزوجنا نتهاوش جدام اهلنا عادي مايهمنا. بعدين حسيت ان عيب اللي قاعدين نسوي و بديت احترمه و اقدره حتى لو متهاوشين و ما ابين حق احد.. بنات انا تزوجت عمري 18 مو فاهمه يعني شنو زواج يعني شنو مسؤولية و اهلي وافقوا عليه تحت ضغطي و اصراري .. لانه بالاساس ابوي ماكان موافق احد يخطبني و انا توني صغيرة .. و وافق و ماكسر فيني..

مع الايااااااام..........
كثر الهواش خلاااني كرهتتتتتتتتتتته!!

لاعت جبدي منه و قمت اطنشه و ما اسوي اللي بالي بالكم!!

مثال 1 : حمالي كان كله مشاكل و هوااااااش و انا بالشهر الثالث بغى يطقني بس كنت ببيت اهله و امه سمعت و تدخلت و قالتله انشالله تنكسر ايدك لو طقيتها مرة ثانية احترم نفسك و عيب و ........الخ

مثال 2: انا الحين ببيت ابوي و هذي صج المشكله اللي كرهته اكثر و اكثثثثثثر ...اولت امس كنا قاعدين نتناقش على ولدي يعني شي عادي.. مادري شصار جان يصرخ و انا عليت صوتي بس ماصرخت طبيعي بالنقاش الحاد تعلى حدة الصوت!! بنااااات جان يمسكني من ايديني الثنتين عاااااااصرني بنات ورم زنووودي و يقولي انتي زباله لاتعلين صوتج و صكري حلجج و انجعمي و يطقني على حلجي اكثر من مرة و انا قاعده اقوله انت قليل ادب و حيوااان شكو تطقني!! كنت منصددددددمه!! السالفه ماتسوى اللي سوى!!!!

وعروقه اطططلعت و ويهه صار احمممممممر استغفر الله حسيته شيطااااااااااان!!
قتله لوو فيك خير و لو انت ريال دق على ابوي قوله انا طقيت بنتك. دق على ابوي و قاله و دق على ابوه و قالهم ييون عندنا لانه خلاص انا ما ابيها و مادري شنو.. و تخيلووووا و انا قاعده ابجي و اهوا قاعد مشغل اغاااني!! و شايفني ابجي !! حقييييير!! المهم بعد ما ياو عندنا ابوي قاله شكو تطقها!!! موضوع صغير موضوع جبير ما تمد ايدك عليها!!!!! و اهله طبعا قاعدين يبون يعرفون شصار قتلهم خلاص احنا ماكو بينا توافق و اهوا مايبيني و انا ما ابيه.. حياتنا مارح تمشي على هالاسلوب ! انا غاليه عند اهلي مابي اعيش معاه!

جان ابوه يقول انتو توكم على البر و انا ماشوف انه فيه سبب مقنع!! قتله الطلاق مو لازم اكون وحده خاينه ولا مثلا يمر على زواجي 30 سنه و عيالي شكثر بعدين اتطلق!!!!!! قتله ماكو توافق ماكو احترام..!! اكو ناس تطلق بعد يومين زواج و لا بعد 6 اشهر زواج.. يعني مو شرطط!!! انا اختياري من البدايه خاطئ و اختياره من البدايه هم خاطئ!

قتله ماابيه خلاص كررررررررررهته!!! و ماقدر اكمل حياتي مع واحد كارهته

جان ريلي يقولهم هذي حالها حال القنفه!!!!!!!!!!!! ماتسوي شي حتى فروضها الزوجية ماتسويها و تقولي مااقدر و ابي انام و مادري شنو ( للعلم عندي تكيس على المبايض و صارلي شهر تيني الدورة كل اسبوع تخيلوا بنات اخلصها يومين بالضبط و ترد تييني يتلي هالشهر 4 مرات و اهوا يدري و قتله ودني عند دكتورتي اللي اتابع معاها لانه الدوا مو مسويلي شي!!!) و قتلهم انا عندي كيت و كيت و اهوا مايوديني الطبيب و يقول ماعندي فلوس!!
و بنص الحجي يقول جدام ابوي .. ماكوووو مره بالدنيا تعلي صوتها علي و اللي تعلي صوتها (تكرمون) بالنعال تنطق!!!!!!! جان ابوي يقولي قومي قومي بدلي و ييبي اغراضج و اغراض ولدج !! قاله هذي قلة ادب حتى الكبار مو محترمنا!! و لام محترم ابوك اللي قاعد!!!!!!!!!!! و مشيت مع ابوي

بنات تخيلووواا حتى اهله انصدموا فيه!! و كرهته و مارح اسامحه وايييييد شايله بقلبي و هذي مو اول مره انام ببيت ابوي وايد اروح حق اهلي و جم يوم يرد يراضيني و ياخذني.. و انا قبل لي نمت عند ابوي اقعد افكر فيه و اقولهم دقوا عليه و ابطل صور عرسي و مادري شنو..

المرة اللي طافت قبل شهرين مشيت بسبة قلة الادب و الحقارة هم نمت عند ابوي و كلللللللش ماكنت ابي ارد و كارهته بس هم يه يراضيني و رديت (مع العلم من داخلي كلش ماكنت ابي ارد بس قلت خل اعطيه فرصه وقتله كل واحد يغير اسلوبه و نحترم بعضنا و قالي اوكي و حب على راسي و انا بعد نفس الشي)

بس هالمررررررررررة صج ما ابيه لانه انسان حقير و مغرووووووووووور!! على شنو ماااااااااددري!

بنات انا من زمان محترمه نفسي و ما اتهاوش معاه جدام احد ولا اعلي صوتي.. بس اهوا مغروووووووووور و قليل الادب .. و انا ببيت اهلي مو متربية على جذي !! و ابوي و امي ماكانو يطقوني!

و فوق هذا متحمله حالتنا المادية الخايسه.. متحمله شقتي مو صغيرة و ما ييبلي خدامه ! بس مرات امي تييبلي خدامه و اهيا تحاسبها بعد!

و اذا بغيت شي امي تشتريلي اختي تشتريلي !! اهلي يعطوني فلووس!! اهوا يالاااا يالللااا يعطيني 5 دنانير و بس جم مره عطاني حق عطور و عطاني اشتري ملابس حق الحجاب و تحجبت عشان ربي و تالي عشاااانه!! عشان حيييل يغار علي..كل شي انا اسويه!! طباخ ياهل غسيل امسح اخم عندي جامعه و محاضرات و مهتمه بدراستي !! شنووو المطلووووووب!!

بنات تخيلوا والله رايحه سوق الذهب بايعه ذهب من عندي عشان اسويله عيد ميلاده و يايبتله هدايا غاليه و شموع و زينه و كنت بروح جوكلت بار عقب جم يووم عشان اوصي على كيكة عيد ميلاده و عيد زوجنا لانه بنفس اليوم! و شارية بدله حلوة عشان اطلع فيها معاه و كنت ناويه اعزمه بفندق!! و اهوا يدري اني قاعده ازهب حق عيد ميلاده !!! بنات حقييييير مايسوى!!

واتحمل اسلوب ابوه و حمواتي و بنات عايلته دايم يقطون علي حجي.. سواء بظهري ولا جدامي! و اهوا مايرد عليهم !!!!!!!!!!!!!!!!! و كله ينتقدوني ! و انا الحمد لله حلوه و كشخه و قلبي طيب و على نياتي و الكمال لله! احمد ربي انا مو مغرورة و لا شايفه روحي على الاوادم نفسه! و قسم بالله اقل الناس اعاملهم بقلبي و ماتكبر على احد!

والله ماكنت ادري انه حياتي رح تكون جذي مهااااااانه .. وايد اشياء ماقتلكم عنها
بس انا خلاص كرهته ما ابي افني حياتي عليه!!!
بنات صرت عصبية حييييل و كله جسمي يعورني و كله ارررررررجف حالتي زق من يوم تزوجته و كله نفسيتي خايسه و ابجي بروووحي !! مو ذاكرتله شي حلو!

ابوي و امي يقولون كيفج اللي يريحج نسويلج ياه تبين تعطينا فرصه اوكي ماتبين كيفج انتي اللي عايشه مو احنا..ابوه و امه يقولون مشاكلكم ماتسوى و مادري شنو !! كل مره هالحجي! كل مره يقولون هذي اشياء تافهه و سخيفه و مالها داعي!

ساعدوني الله يخليكم حتى صلاة استخارة مو عارفه اصلي كله ينزل علي دم.. و السمووووحه اذا في بدليات قاعده ابجي و منقهره و مو شايفه عدل​

 

[nooshaaa]

يا حياتي والله اني حبيتك من زمان
الله يهون عليكي ويفرج همك آمين يا رب

 

[العنوووووووود]

بصراحه وبدون زعل انتي غلطااانه غلطانه غلطانه والغلط راكبج من راسج لريولج

زوجج على ما تعودينه وانتي عودتيه على عدم الاحترام تعلين صوتج وتسبينه وتهاوشين جدام اهلكم

انتي عطيتيه انطباع غلط عنج من بدايه زواجكم عبالج لما تغيرين الفكره الي براسه بسهوله ؟؟؟

وراج شغل ومشوار طويل عشان تحسنين صورتج جدامه وتعودينه على احترامج

الريال مهما كان غلطان عصبيه المره وصراخها عليه تقلب الموضوع عليها وعلى راسها

امبيييييه تخيلي انتي تهينين رجال والله عييييييييييييييييب محد يتحمل رجال ينهان والرسول تعوذ من قهر الرجال شلون تقولين له انت مو ريال ؟؟؟؟!!


عدلي من نفسج واشتغلي على سستم يديد خلي الريال يتغير من ناحيتج الطلاق مو حل

 

[أعشقني]

يمكن جايتكم عين اقرو الرقيه
خاي امج تقرا عليج وتسبحي بماي مقري فيه
الله يسخركم لبعض يارب ويكتب لكم الخيره
الله يهديه يارب ويهديج
الرجال يبي معاملة احترام يعني هو صج غلطان وايد
وانتي بعد غلطتي لما قلتي له حيوان هذا ريلج تحترمينه المفروض ولازم تفرضين احترامج عليه
يعني راجعو حساباتكم مافي مشاكل تنحل بصراخ وهواش
شوفو شنو تكرهين فيه وخليه يغيره وانتي شنو يكره وغيري من نفسج
انتو صغار وبينكم ياهل ، حرام تتطلقون
الله يفرج همكم يارب

 

[ياليتهم يشعرون]

بصراحه انتي اسلوبج خايس الحين انتي تسولفين وكلمات تلوع الجبد تقولينها من غير احترام

 

[فوفو22]

انتي شخصيه استفزازيه

و لو انت ريال دق على ابوي

انا عليت صوتي

اهوا ما يحترمني و انا ما احترمه

لاعت جبدي منه و قمت اطنشه و ما اسوي اللي بالي بالكم!!

شايفني ابجي !! حقييييير!!

تعبت وانا انسخ وفيه كثير ملاحظات عليج

يا ماما كل فعل له رده فعل
وردود افعال زوجج من فعلج انتي

في كثير زوجات لما تشوف زوجها وصل مرحله معينه

تحط لسانها وبحلجها وتسكت

تعلمي ضبط الانفعال والاعصاب

فوفو

 

[يمكن اتغير]

بغظ النظر عن الموضوع بس انا استغربت من كلمة حياتي ..... هالكلمة المفروض ما تنقال مهما كان

 

[دنيا الغلا]

لحظه بس
حبيبتي انتي غاليه عند الاهلج ومعززه ومكرمه
خليه يستريح بس وعيشي حياتج وربي ولد وكملي دراستج وعالجي نفسج
وزوجج هذا مامنه فايده
واحمدي ربج بسس ان اهلج متفهمين وابوج شافه على حقيقته
والطلاق هو الحل
اهم شي الكرامه ..!
والله يعينج حبي
وانتي توج والطريج جدامج طويل وهذي بس سنتين وصار فيج جذي
رياييل اخر زمن يمد ايده على حرمه

 

[غرام حمد]

الله يعينج انتي وياااه علا نفوسكم شدعوة محد فيكم
يكون احسن من الثاني ويطوف اذا بتظلون جذي صدقيني
ماراح تستمر حياتكم لازم تضحين وتمسكين بيتج وتربين
ولدج احسن لج صدقيني الوحدة الي تطلع من بيت ابوها
مالها رجعه له وهي معاها يهال لازم تتحملين عشان ولدج
وادعي الله يهديه ويسخره لج ولولده يااارب

 

[بعد روحي]

دنيا الغلا : ياليت تقولين خير او تسكتين ، اهيه غلطانه فوق هذا كله اهيه تتطلق
وماكو حل غير الطلاق ؟
حبيبتي اذا عندج مشاكل مع ريلج لا تسقطين حلولج على مشاكل الناس..

:

شوفي حبيبتي صاحبة الموضوع
ماهكذا تورد الأبل ، لازم يكون فيه شد ورخا ..
إذا اهو شد انتي ترخين .. واذا انتي شديتي اهو يرخي
مافيه ريال يرضى بكلامج اللي قلتيه..
وانتي غلطانه من ساسج لي راسج..
لازم يكون فيه إحترام! لازم تحترمينه .. مايكفي احترامج له جدام الناس
انزين وبينج وبينه وين الاحترام ؟
وامبينكم ياهل .. شلون تخلونه يعيش بوسط هالمشاكل!!!!
الطلاق مو حل ومشاكلكم بسيطة يبيلها شوي عقل

الله يهدي سركم..​

 

[lunetta]

شوفي حبيبتي انتي توك صغيره والحياه يبي لها صبر بس هم انتي بعد غلطتي
يعني المفروض ماتقولين له انت مو رجال وش هالكلام الله يهديك
اسمعيني على كلامك انتي تزوجتيه عن حب الحب هذا وين راح مين اللي موته ؟؟؟
اللي موته تصرفاتكم انتو الاثنين .... الطلاق ابدا مو حل .. لو اهو بس اللي غلطان كان اقولك تطلقي بس هم انتي بعد غلطاانه
شوفي هالفتره ريحي اعصابك لان فعلا انتي اعصابك تعباانه منه واهو بعد تلقين اعصاابه تعباانه
خذي بريك مع نفسك ابتعدي عنه ولا تستعجلين بأي قرار وانتي منفعله ابد ابد
اللي الحين لازم تسوينه تاخذين بريييييييييييييك لازم بريك ابتعدي عنه ولا تكلمينه ولا تحتكين معه لا بمكالمات ولا برسايل
صلي واستغفري ادعي الله ان يهدي قلبك وبالك ويهديه هذا اول شي
ثاني شي : قاعده لازم تحطينها بحياااتك حب من غير احترام مستحيل مستحيل تقدرين تكملين ولا اهو بعد
كثير بنات متزوجات مافي ذاك الحب مع ازواجهم بس الاحترام موجود وماشيه الحياه
لاتفكرين الحين بالطلاق وانتي منفعله
فكري مع نفسك وحاولي تتذكرين الاشياء الحلوه بينكم
ماعتقد انك كارهته وانتي تجهزين لعيد ميلاده وعيد زواجكم بس انتي الحين متضايقه
غيري نفسك واسلوبك معه
يعني بعد فتره اذا كلمك لازم تقولين له ان انتي تحبينه وخايفه هالحب يروح
وان انتي مرحله بحيااتك الان تحتاجين الاحترام اكثر من الحب
فهميه وكلميه بهدوء وثقه واسلوب جدي وصارم ان الاحترام لازم يكون موجود مهما كان الخلاف بينكم
ولا يمد يده عليك وانتي بعد لازم تغيرين اسلوبك الزواج يبي له ضبط اعصااب بالدرجه الاولى وامسكي لسانك
وقومي بواجباتك عشان مايمسك عليك ممسك واهتمي بدراااستك بالدرجه الاولى وبنفسك

 

[بقلبي انت]

شوفي حبيبتي انتي توك صغيره والحياه يبي لها صبر بس هم انتي بعد غلطتي
يعني المفروض ماتقولين له انت مو رجال وش هالكلام الله يهديك
اسمعيني على كلامك انتي تزوجتيه عن حب الحب هذا وين راح مين اللي موته ؟؟؟
اللي موته تصرفاتكم انتو الاثنين .... الطلاق ابدا مو حل .. لو اهو بس اللي غلطان كان اقولك تطلقي بس هم انتي بعد غلطاانه
شوفي هالفتره ريحي اعصابك لان فعلا انتي اعصابك تعباانه منه واهو بعد تلقين اعصاابه تعباانه
خذي بريك مع نفسك ابتعدي عنه ولا تستعجلين بأي قرار وانتي منفعله ابد ابد
اللي الحين لازم تسوينه تاخذين بريييييييييييييك لازم بريك ابتعدي عنه ولا تكلمينه ولا تحتكين معه لا بمكالمات ولا برسايل
صلي واستغفري ادعي الله ان يهدي قلبك وبالك ويهديه هذا اول شي
ثاني شي : قاعده لازم تحطينها بحياااتك حب من غير احترام مستحيل مستحيل تقدرين تكملين ولا اهو بعد
كثير بنات متزوجات مافي ذاك الحب مع ازواجهم بس الاحترام موجود وماشيه الحياه
لاتفكرين الحين بالطلاق وانتي منفعله
فكري مع نفسك وحاولي تتذكرين الاشياء الحلوه بينكم
ماعتقد انك كارهته وانتي تجهزين لعيد ميلاده وعيد زواجكم بس انتي الحين متضايقه
غيري نفسك واسلوبك معه
يعني بعد فتره اذا كلمك لازم تقولين له ان انتي تحبينه وخايفه هالحب يروح
وان انتي مرحله بحيااتك الان تحتاجين الاحترام اكثر من الحب
فهميه وكلميه بهدوء وثقه واسلوب جدي وصارم ان الاحترام لازم يكون موجود مهما كان الخلاف بينكم
ولا يمد يده عليك وانتي بعد لازم تغيرين اسلوبك الزواج يبي له ضبط اعصااب بالدرجه الاولى وامسكي لسانك
وقومي بواجباتك عشان مايمسك عليك ممسك واهتمي بدراااستك بالدرجه الاولى وبنفسك

:eh_s(15)::eh_s(15)::eh_s(15):

 

[Gifts&Occaions]

الله يعينج

 

[رق رق]

الله يهديكم انتو لثنين
اثنيناتك غلظ اشذنب الولد؟؟؟؟

 

[فاقده حنان ابوه]

الله يعينج والله

 

[شيخه_البيض]

كلماته وايد استفزازيه وحركاته ماتدل على انه ريال عاقل وفاهم

انتي على قولتج من تزوجتي وتتهاوشون جدام الاوادم. نعم خييييير ليش هالشيء يصير وشنو الشيء القوي. اللي يخليكم ماتمسكون نفسكم عن الهواش

وكلش مافي احترام بيناتكم

انتي تزوجتي على شان تعيشين حياه سعيده مع اللي حبيتيه ولا على شان يخليج تتحسفين على الحب اللي حبيتيه


انااتكلم عن نفسي لو أنا مكانج ثانيه وحده ما اقعد عنده

بيتعدل وسوالف الخرابيط هذي مو عندي متى بيتعدل عقب ما امرض عقب مايروح شبابي ليش أعيش حياه تعيسه وانا بامكاني أعيش أحلى حياه.

بالعكس بعيش حياه حلوه لمن ابتعد عنه غصبا عليه بيمشيلي نفقه لي ولولدي واذا ابي خدامه بويب وسايق بعد وعناد فيه على هالمعامله أجار شقه واخليه يتحسف على كل اللي سواه معاي

هذا رأيي الشخصي

 

[Bronze ● lady]

الله يكون بعونكم

 

[إماراتية ملقوفة]

الله يهدي النفوس

 

[انجال]

الحيااة مو كلها عسل ..

وموكلها حب ..
ولا كلها مشااكل ..

التضحيه واجبه .. والرجال مثل الياااهل لا تقولين له لا الانه بيعاند ويزيد التفاهم حلو واذا صرخ عليك اسكتي الايام جدامك بتوضح وكلها ايااام ان شالله وترجعين لحضنه ولذكريات الحب معه ..

الله يهديك ويهديه ..
ارسليله مسج حلو طيبي خاطره على انه بلساان ولدك .. انه مشتاق لك وانه يبي منك السموحه على امه وترجعون لبعض تراها قكره حلوه لو ترسلين باسم ولدك على انك تعبانه بقراكم وانه امه دااايما تسوالف عن حبكم ..

والله يالغاليه الدنياااااا ما تسوووى ..
وحلو التساامح والعفووو وجو العايله

نتواصل انجال

 

[honey lust]

بأختصار : انتي ما حطيتي هالموضوع الا لانج متردده و للحين تبينه و تحبينه

ضبطي انفعالاتج و عرفي ريلج عدل و حطي اببالج ريلج غير عن امج و ابوج و صدقيني بتمشي حياتج معاه