كمام ~ ابرة ظهر !

[الـــغـــلآ]

السلاام عليكم و رحمة الله و بركاته


بنات عندي سؤال و اتوقع شكثر بنات عندهم نفس سؤالي


ايهم احسن كمام ولا ابرة ظهر ؟

انا كنت ناويه علئ ابرة الظهر بس رفيجتي ذمتها لي عن تجربه و قريت اكثر من تجربه بالمنتدى تعبو بعدها

و قلت خلاص كمام .. و قريت انه ياثر ع المخ و الذاكره عاد انا مو ناقصه بدون شي تجيني حالة اعيد السالفه 3 مرات و كل مره مااذكر اني قلتها :/ :eh_s(4):

و يقولون ان مانعين الكمام بامريكا و السبب انه مضر لخلايا المخ

عاد قلت خلاص مابيه ابي ابرة ظهر ... ورجعت التجارب السلبيه من ناس ثقه تاثر فيني :eh_s(2):




الحين شسوي ؟ ابي استقر على شي ساعدوني و نبهوني اذا في شي مو عارفته !


و شكرااا مقدما

 

[أحلى عروس 2012]

انا ولدت قبل شهرين الحمد لله
مااخذت شي كنت متخوفه مثلج
وألف الحمد لله تحملت الالم
نصيحتي لج لا تاخذين ولا شي
تحملي الالم ماراح يصير فيج شي كلها كم ساعة وتعدي

 

[اكسبلانكا]

أنا مجربه ابره الظهر بصراحه عجيبه ولا حسيت بشي لا عوار ولا تعب بالعكس كنت قاعده اسولف ويا أمي واضحك
بصراحه نعمه من الله وماعنقد لو فيها ضرر ان الدكتور ينصح فيها
أنا خذيتها بولادتي الاولى بالمواساه وهالمره ناويه باذن الله اخذها بالسيف والله يسهلها علينا

 

[اسواريه]

ابره الظهر لها اضرار بعد السنين لو انج ماخذه ابره وحده
اخذي الكمام ماراح تحسين بشي كل الناس تاخذ الكمام ماضرهم شي عاااادي مايأثر بالعكس احسن من الابره واضرارها
والتسهيل من ربج سبحانه في ناس تتحمل الالم وفي ناس ماتتحمل ادعي ربج يهون عليج

 

[ملكه الحطب]

انا ماخذه ابره الظهر وبالعكس مافيها شي وهالمره هم ناويه اخذها وكل شي حبيبتي ياثر مع السنين حتى اذا ولدتي بدون شي هذي امهاتنا ماخذوا شي وهم تكسروا على مر السنين وطبيعه الجسم لازم يضعف مع السنين وانتي بالعشرينات مو نفس الاربعين طبعا وامهاتنا كل شي جديد يطلعون فيه عيب اذا حتى الواتس اب يااثر فيج يقولون خخخهههههه وانتي استخيري وتوكلي ع الله واكتبي باليوتيوب عن ابره الظهر والكمام وشوفي ردود الدكاتره مو ناس

 

[اخت خالتهم]

انا كمام وحداااا عجيب
انا اقول كمام

 

[Koko7taty]

سوري حبيبتي انا بجريه ماقدر افيدج بس برفع الموضوع

Up

Up

Up

 

[Ranoon]

انا بكرية بعد

وبأخذ كمام
أما إبرة مستحيل !!!

 

[M!SS.LOBY]

الله يسهل عليج

 

[Model Look]

البجر تاخذ ابره لانه تطول بالولاده

انا وااايد طولت يوم ونص طلق وعطوني اياها الساعه 8 الصبح ولدت 3 ونص العصر يوم معطيني اياها مغتوحه 6 سانتي

 

[قآنون كيفكـ!!]

اختي ابرة ظهر مرتين والحمد لله ماشافت الا العافية
ورفيجتي بعد

استخيري شوفي شنو ترتاحين لة اذا محتارة
عسى الله يسهل عليج ياربب

 

[البرنسيسة غلا]

_



أنتي مقبلہ على ولاده لـ أول مره وماتدرين شنو اللي راح يصير حتى لو قالولج يصير جذي ويصير جذي بتحسين بغير اللي قالوه فـ أحسن لج خليج على الكمام افضل .. وعلى قولةة أمي تحملي ولا تروحين المستشفى بدري إلا إذا وصلتي خلاص ، لا تروحين من الاول ويلعبون فيج ..
والسهالات من رب العالمين لا من كمام ولا ابرة ظهر ..


اللہ يهون عليج يالغاليہ



_

 

[++صدفة++]

انا جربت الولادة مرة وحدة بس جربت وايد اشياء فصرت خبرة
انا جربت الطلق الصناعي والكمام والابرة
اول شي قلت اخذ الكمام مع اني كنت ناوية اخذ الابرة بس حزتها ما كان فيه دكتورة تعطيني اياها كان موجود دكتور وانا رافضة فكرة ان ريال يشوف اي جزء من جسمي فقلت اخذ كمام
اول شي استانست عليه لأن يدوخ وما كنت نايمة فقدرت انام شوي
بس لما حمى الطلق ما قدرت استحمل لأن صج الكمام يدوخ ومخج بعالم ثاني بس تحسين بالالم يذبح .. وهالشي خلاني اهستر ومادري زفيت منو وسبيت منو فخليتهم ينادون لي دكتورة التخدير من بيتها عشان تعطيني الابرة
لما اخذتها فجأة حسيت ان العوار اختفى جنها سححر نمت نومة عميقة ما قمت الا لما بغت تطلع بنتي عشان اسوي بوش
صج صج صج احمد ربي على نعمة ابرة الظهر صج اللي اخترعها ما قصر فينا
ان شاءالله المرات الياية اول شي بخليهم ينادون لي الدكتورة عشان لا اضطر اخذ الكمام
على فكرة: الكمام من كثر ما شفطت منه سبب لي صداع ظل وياي اكثر من يوم يعني مو 100٪ مضمون مثل ما يقولون

 

[al_kadee]

انا بنت عمتي اول ولاده لها تعسرت حيل يوم ونص تطلق والم فضيع وتقول يعطوني كمام احس بدوخه بس الالم مثله ماخف اما ب ولادتها الثانيه ولدت ب رويال حياة وخذت ابرة ظهر وتمدحها حيل تقول نعمه من ربي وفرق شاسع عن الولاده الاولى والاجانب الحين كلهم معتمدين على ابرة الظهر واصلا الكمام اللي خطر عالمخ رفيجتي تقول ب نفاسي كله مفهيه و دايخه واحس اني مو مع العالم لدرجة ان امها ودتهت مطوع يقرا عليها واخر شي طلعت من سبب الكمام وخالتي نفس الشي خذت ابرة ظهر تقوا والله قاعده اشوف قناة القران الكريم واقرا الايات معاهم وماحست ب ولاااا شي بفضل ربي تقول بس وقت طلعة البيبي خلوني ادفع معاهم حتى قالت الحين احمل وما احاتي الم الولاده الفضيع وبعدين بنات الطب تطور بفضل ربي ليش ترفضون هالشي وتعرضون نفسكم للالام المبرحه عادي حتى الجهال ياخذون بنج بالعمليات ما اشوف صار فيهم شي هذي رحمه من ربي احمدوا ربكم عليها وانا بٲذن الله باخذ ابرة ظهر والله يثبت حملي ويطمن قلبي لاني تعبانه

 

[Aloe Vera]

انا والدة مرتين ماخذيت لا كمام و لا ابرة ظهر كان العوار عادي
كان يعور بس مو عوار اللي لازم ابرة ظهر عادي

انتي حطي في بالج شغله حاولي تتحملين اذا ماقدرتي اخذي كمام اذا مافاد كلش اخذي ابرة ظهر
بوقت الولادة تقدرين تقررين مو الحين

و انا الحين حامل و مو ناوية اخذ لا كمام و لا ابرة الا اذا كلش ماتحملت

الله يسهل عليج

 

[كتالونيه]

كمام احسن

 

[اخت الدكتور]

الكمااااام يوديييج عالم ثااااااااااااني وناااااااااااااااااااااااااااااااااااااااااااسه

 

[أبكاني ذنبي]

انا في ولدي خذيت كمام ومثلج كنت محتاره الين اخر لحظه

تحسين كل شي جنه حلم حتئ الالم وماكان شي لايطاق


والسهالات من رب العالمين


بس بحملي هذا مادري متردده

 

[.. Ro3a ..]

بحملي ببنتي خذيت الكمام الهادي معروف قوي
حيل حيل دوخني ما خلاني اركز بولاشي
وكل شوي اصيح عليهم ان يبي يغمى علي منه وما خفف الالم حيل كنت اتألم
وهاوشت الكل وتمسكت وترجيت الكل حيل كرهته حتا بنفاسي راسي كله يعورني واحسه طاير
وكله دايخه واحلم بالولاده ولما انام احس الدنيا تفر كلهم قالوا لي منه ):
عاد هالمره ببحث عن احسن دكتور تخدير بالهادي عشان اخذ الابره بس سمعت اللي عنده مشاكل بالظهر
ما يصير ياخذها ؟!!
ببحث عن هالشي والله يسهل علينا ولادتنا

 

[امـ خــزامـى]

انا اخذت كمام بس على قولة خواتي انت بنتك نتفه طلعت على طول وطلقك بارد
عشان كذا مااقدر افيدك

بس للامانه الكمام احس من بعده صرت انسى كثيييييييييييييييييييييييييييييييييير

الله يهون عليكم