لـماذا الصيني؟

[tattoma]

السلام عليكم ورحمة الله وبركاته

بعد خبرتي في مجال الديكور والتصميم لاحظت إن الناس دائماً تفضل السلع الصينية على الألمانية والإنجليزية والأمريكية والإيطالية لأنها أرخص بوايد..

وبعد ما صار السوق الـمحلي بالكويت أغلبه صيني بناءً على طلب الزبائن وإقبالهم على الشراء منه، ودي أعرف وجهة نظر الجميع:

لـماذا تفضيل الـمنتج الصيني؟ هل فعلاً لأن أرخص؟


شخصياً بعض الـمواد مستحيل أشتريها صيني لأنها خطر على الصحة وعلى البيت خاصة الأدوات الكهربائية وأغلب الصناعة الصينية ما تعمّر وقت طويل لأنها رديئة


أتمنى الجميع يشارك بالموضوع لأن يهمني جداً دراسة السوق ووجهة نظر الناس بهذا الخصوص​

 

[al-musk]

موشرط بس لأن السوق متروس صيني فالواحد يضطر يشتري طبعا كل واحد وميزانيته .. بالنسبة لي أحب الشغل المضبوط بس الي ماعندوش مايلزموش.. يعني الواحد ساعات يضطر يتنازل عشان المادة .. وهم من مصادر كثيرة وموثقة ماركات كثيرة وعريقة كل تصنيعها بالصين لأن الأيدي العاملة رخيصة .. فالسوق هو الي حتم هالشي.. بس طبعا في اشيا اساسية الواحد لازم ياخذها جودة فيوخر عن الصيني .. وهم في صيني جودة ..

 

[صاعقة بيوتي]

لا بالعكس انا ماحب الصيني بادوات المطبخ واحاول قدر الامكان تكون مشترياتي الماني لانها تعمر اكثر وصحية اكثر وبتقعد معاج عمر

 

[كـويتية]

لان تشوفين السوق كله صيني فنظطر نشتري

وعلى قولتج ارخص ف بعضهم ماعندة ميزانية وايد

فيروح ويشتري من صيني

شخصياً افضل الانجليزية والالمانية على الصيني

لأن انا ابي شيء يعمر

ثانكيوو على الموضوع اللي لازم كل وحده تعطينا رأيها من كل النواحي عن المنتجات الصينية

 

[tattoma]

الصراحة تفاجأت بردودكم! وفعلاً الصيني بكل مكان بالسوق ومرات وايدة يقول لنا اللي يبيع إن المنتج ألماني أو إنجليزي وهو في الواقع صيني.. يعني نصب!

الصيني صح درجات ولكن اللي عندنا أغلبه الدرجة الـمتوسطة إلى الرديئة..

أما بالنسبة للمصانع اللي موجودة بالصين مو مشكلة إن العمالة تكون أرخص الـمشكلة في المواد نفسها من وين إييبونها؟ إذا من الدول الأوربية مو مشكلة بس إذا المواد صينية جداً خطرة على الصحة خاصة البلاستيك والمعادن وغيرها​

 

[انتاج كويتي]

السلام عليكم . بالفعل موضوعج يشد الانتباه.بالنسبه للصيني انواع فيه شي راقي وغالي وقليل بالسوق وفيه الاوروبي والامريكي بس صناعه صينيه وفيه اوروبي التصنيع والمنشا.بس غالي وقليل بالسوق .... وفيه الاحسن والاجود واللي يدوم ولا هو حسوفه .. ( المنتج الوطني ) سعره فيه ومنا وفينا ومشكوره علي الموضوع الجميل انظر الصور بالتوقيع .

 

[tattoma]

السلام عليكم . بالفعل موضوعج يشد الانتباه.بالنسبه للصيني انواع فيه شي راقي وغالي وقليل بالسوق وفيه الاوروبي والامريكي بس صناعه صينيه وفيه اوروبي التصنيع والمنشا.بس غالي وقليل بالسوق .... وفيه الاحسن والاجود واللي يدوم ولا هو حسوفه .. ( المنتج الوطني ) سعره فيه ومنا وفينا ومشكوره علي الموضوع الجميل انظر الصور بالتوقيع .

مشكورة على التعقيب والاهتمام.. الـمنتج الـمحلي وللأسف غير موثوق عند الناس وأعترف بجودة البعض لكن للأسف الناس ما تثق..

أعطيج مثال: الـمصممين اللبنانيين والـمصريين من واقع تجربتي نصابين (الغالبية)، ولكن الكويتية ما عندها مشكلة تدفع للأجنبي ولا تدفع للكويتي..!

دشيت بيوت للأسف الذوق مأساة وردئ جداً.. لـما أكتشف التكلفة أنصدم ويكون الـمصمم أجنبي!

 

[بنت العقربيه]

انا عندي موضوع كامل في قسم المناقشات الجادة يمكن من سنة وكان الموضوع الى متى كل شي صنع في الصين للاسف لو تقرين الردود بيجيك احباط

ابوي يقعد يدور على الاوربي او الامريكي ومايلاقي الا بطلعه الروح واحيانا يضطر يطلبها من برى والناس صارت تبغى الرخيص وعلى بالها انه افضل لاكن لو تحسب الفلوس الي تحطها بهالمنتج وكم مرة بتغير من نفس المنتج بيطلعون سعر المنتج الاصلي والممتاز من الالماني او الامريكي مو متوفر بكثرة مثل الصيني وللاسف وزارة التجارة هي الي تدعم المنتجات الصينية وهم عارفين بسؤها والمشكلة تزداد ولا عندك احد
لكن ياليت نلاقي بديل عربي شامي خليجي ندعم بعضنا يالعرب افضل لنا ولهم
خصوصا ان الصين بهالوقت لازم نقاطعها لانها تدعم بشار المجرم لقتل اخواننا المسلمين في سوريا الله يكون بعونهم ويفرج همهم يارب عاجلا غير اجل
واخر دعوانا ان الحمد لله رب العالمين

 

[tattoma]

انا عندي موضوع كامل في قسم المناقشات الجادة يمكن من سنة وكان الموضوع الى متى كل شي صنع في الصين للاسف لو تقرين الردود بيجيك احباط

ابوي يقعد يدور على الاوربي او الامريكي ومايلاقي الا بطلعه الروح واحيانا يضطر يطلبها من برى والناس صارت تبغى الرخيص وعلى بالها انه افضل لاكن لو تحسب الفلوس الي تحطها بهالمنتج وكم مرة بتغير من نفس المنتج بيطلعون سعر المنتج الاصلي والممتاز من الالماني او الامريكي مو متوفر بكثرة مثل الصيني وللاسف وزارة التجارة هي الي تدعم المنتجات الصينية وهم عارفين بسؤها والمشكلة تزداد ولا عندك احد
لكن ياليت نلاقي بديل عربي شامي خليجي ندعم بعضنا يالعرب افضل لنا ولهم
خصوصا ان الصين بهالوقت لازم نقاطعها لانها تدعم بشار المجرم لقتل اخواننا المسلمين في سوريا الله يكون بعونهم ويفرج همهم يارب عاجلا غير اجل
واخر دعوانا ان الحمد لله رب العالمين

والله الصراحة أصبتِ.. وأتفق معك على كل كلمة..

أنا مفكرة أييب رخام من إيطاليا وأثاث من أمريكا بس متخوفة من الخسارة لأن الناس تحب الصيني