شوفي حبيبتي
اذا كنتي تقصدين الحد الادنى من عدد الاسهم او الوحدات اللي ممكن تشترينها في السهم فهي تنقسم بهالشكل على حسب سعر السهم في السوق ...
من 1- 50 فلس اقل عدد اسهم يمكن شراءه 80000 سهم
من 51 - 100 فلس " " " " 40000 سهم
من 102 - 250 فلس " " " " 20000 سهم
من 255 - 500 فلس " " " " 10000 سهم
من 510 - 1.000 دينار " " " " 5000 سهم
من 1020 - 2.500 دينار " " " 2500 سهم
من 2520 - 5.000 دينار " " " 1000 سهم
من 5.050 - 9.900 دينار " " " 500 سهم
هذا بالنسبة لاقل عدد اسهم تقدرين تشترينها حسب السعر ... عاد انتي حسب راس مالج تشترين بمضاعفات عدد الاسهم
بالنسبة لمخاطر الادوات الاستثمارية .... اولا السوق فيه عدد من الادوات الاستثمارية المختلفة ... فيه التعامل بالكاش واهو انج تشترين اسهم بالكاش وهاذي مافيها اي مخاطره لان اسمهج موجودة سواء صعد السهم او نزول مافي خوف
الخوف في حالات اللتالية
في شي اسمه آجل وهذا يكون بعد نهاية التداول مثلا سهم اثناء التداول سكر بسعر 300 فلس ... وانتي عندج 10000 دينار ... اذا بتاخذين السهم كاش تقدرين تشترين 30000 سهم مو اكثر ... لكن في ناس تبي ارباح اكثر فتشتري بالأجل ... وهو انج تشترين كميه اكبر بقيمة اقل مثلا ... سهم اللي ب 300 فلس بالآجل تقدرين تشترين لغاية 70000 سهم ب 40% بس دفعة اولى عند الشراء و الباجي تسددينه لما تبيعين السهم بربح .. المخاطرة في هذا النوع من التعاملات انج تشترين عقد الآجل بسعر اعلى من سعر السوق يعني سهم سعره 300 فلس بالاجل تشترينه ب 320 فلس مثلا ... بعدين عقود الاجل عندج مدد في شهر - وفي 3 شهور وفي 6 شهور وفي 9 شهور وفي 12 شهر ... لكن حطي في بالج اذا سهم عليه اخبار او غيره مستحيل تحصلينه معروض بمدد طويلة دايما تكون المدد قصيرة وهذي فيها مخاطرة ثانية ... بعد من ضمن المخاطرة في عقود الاجل نفترض انج شريتي عقد اجل لمدة 3 شهور ب320 فلس ... وبعد اللاث شهور بدل ما يرتفع السهم نزل سعره عن السعر الي انتي شريتيه فيه مثلا صار 280 فلس .. اهني فيه عدة مخاطر اول شي انتي بعد نهاية مدة العقد مطالبة انج تسددين باجي الدفعة اللي ما سددتيها من قيمة العقد اللي اهي 60% اذا ما كان عندج مبلغ يغطي قيمة باجي العقد راح يبيعونج العقد غصب حتى لو بخسارة ... او يعرضون عليج تجديد مدة العقد لمدة شهر مقابل 10% من قيمته لمدة شهر واحد ... يمكن خلال الشهر يرتفع ويمكن ما يرتفع ويخسر زيادة وهذي بعد مخاطرة ... طبعا اذا ما قدرتي تدفعين باجي قيمة العقد ولا قدرتي تجددينه اهني راح تبيعينه بخسارة ... وخسارتج راح تكون دبل عن خسارة اللي شاري بالكاش ... بالتالي الآجل يبيله واحد عنده خبر قوي ويشتري السهم واهو مطمن انه راح يصعد
النوع الثاني من مخاطر الادوات الاستثمارية اهو البيوع المستقبلية وهذا النوع مثل الاجل لكن يفرق عنه انج تشترين اثناء التداول في السوق و الشراء عادة يكون من المعروض ... واهني اذا شريتي السهم وارتفع انتي محظوظة واذا شريتي ونزل هم نفس المخاطر اللي في عقود الاجل راح تصادفج في البيوع المستقبلية ... وعادة مدد عقود البيوع المستقلية 3 شهور بس ...
في عندج نوع ثالث اللي اهو الاوبشن وهذا شرعا ما يجوز تتعاملين فيه لانه يعتبر مثل القمار
النوع الرابع المارجن واهو انج تحطين راس مال مثلا 10000 ويعطونج على راس المال مارجن لغاية 60% واحيانا 100% حسب الشركة اللي تقدم الخدمة ... و المارجن اهو يضيفون على راس مالج مبلغ اضافي مثلا بدل ما يكون عندج 10,000 دينار يصير عندج 16000 دينار تشتغلين فيهم بالسوق ... بس يحطون عليج شروط منها اذا قل رصيدج في وقت من الاوقات عن 16000 بمقدار 1000 دينار مثلا بسبب نزول سعر السهم يطالبونج بانج تسكرين هذا الفرق والا يسددون المارجن من راس المال وتكوني بهالشكل خسرانه
في اداة استنثمارية احتمال انها تطبق وهي الشورت سل وهذي يتعاملون فيها بالسوق الامريكي ...
وفي ايضا التعامل بالسندات والاوراق المالية المضموونه هذي ممكن انها تطبق خلال فترة قريبة ...
المهم البورصة و السوق بحرها كبير ويبيلها وحده متفرغة حيل حق هالموضوع
