لما تروحون الشاليه مع جماعه او حموله شلون تقسمون المهمات؟؟

[سبائك]

السلام عليكم


بصراحه هالسؤال يراودني من زماااااااااان


الحين اذا بتروحين الشاليه مع جماعه(حمولتج او اهلج)

شلون تقسمون أمور الماجله والطباخ بينكم؟؟


يعني منو يتكفل بالماجله اييبها ومنو هناك يتكفل بالطباخ؟؟


وفي حالة رحتي الشاليه مع ريلج وعيالج وقلتي حق خالتج تيي وياكم شلون يصير الوضع؟؟

تدرون مع الريل واليهال انتي الي تحددين شنو الي ينطبخ حق الغدا والعشا بس اذا صارت الخاله وياكم شلون يصير الوضع؟؟

 

[اشواق2008]

والله مادري انا ما عندي عيال وجربت السفره و خالتي معانا كل شي اخذ رايها فيه من طباخ وطلعه وكله


وبس ما حبيت امر ما اشارك

 

[أساور]

اذا انتوا اكثر من عايلة قسموا الماجلة
يعني ناس تييب الخبز والتوست
ناس تييب ماي وكلينكس
يعني على حسب شلون تقسيمتكم
والطباخ انا افضله جماعي

 

[q8tia27]

حبوبه احنا بالنسبه لنا اذا رحنا مجموعه عمام وعمات وجذي نجتمع بالزواره ونحط قطيه بينا مثلا كل عايله يقطون 30 او 40 حق الماجله واثنين يتكفلون بالمشترى يعني ايدام وخرابيط وعيش وهالسوالف والصحون يعني كلشي يشترون واكل حق الصغار كاكاوات وبطاط وحب وممكسرات لزوم الشغل والباجين مثلا وحده عليها عدة الجاي يعني مطاطير واستكانات ولزومع وحده مثلا عليها جدور كبار للطبخ ومقالي وقوري الجاي والقهوه يعني جذي وناس عليهم مثلا يسون مسابقات واسئله نحدد بالزواؤه ونتفق عشان مايصير لخبطه ولا وصلوا هناك براحتهم الحريم كل يوم ثنتين يطبخون وحده تطبخ والثانيه تعاونها وحده تسوي سلطه وحده تسوي حلو يعني نوزع مو غصب ربع تعاونوا ماذلوا يعني شاليه وناسه مو مال وحده تضايق عمرها وتنطر الثانيه تشتغل كل وحده تسوي الشي عن طيب خاطر واذا الخاله معاكم شاوروها شخاطرج خالتي شمشتيه جذي واذا مو ابالها شي سوي الي تبينه وسلامتج على فكره انا مو متزوجه بس انا اتكلم عن امي وعماتي شلون طريقتهم وانشالله تستانسون

 

[موزة ام فارس]

والله مادري شقول لج
بطبعي اذا رحت مع جماعة اتخسبق فووووق تحت
بس اذا معاج خالتج عادي اخذي رايها وهي تقول لج
تيك ات ايزي



بس بيني وبينج ..
أنا وحده كرهت الطلعة مع الناس

 

[هوى الدار]

احب اطلع مع ناس ميانه بس ونقسم الشغل والمصرف بينا

ان شاءالله البنات يفيدونج

 

[Lonly Girl]

احنا اذا طلعنااا ناس مسؤولين عن الريوووق حقنا وحق اليهال والخدم ونااس مسؤولين عن الغداا وناس مسؤولين عن العشه والشواااي ونااس مسؤولين عن العصاري أو كل يوووم على وحدة جذيه
موفقة

 

[جكورة]

إذا رحنـا جماعه نتفق نقط قطيه مثلا كل عائلة 30 دينار حق الماجلة الأساسية ريوق وغدا وعشــا...

وكل عائلة تشتري خرابيط لعيالها ولها مثلا بيبسي + بطاط + حب من هالسوالف من حسابها الخاص غير القطــة..
ومثلا نتفق وحده عليها الحلويات والشاي والقهوة والثانية الطبخ والثالثه التنظيف وكل من يجيب من عنده على كيفه ( فواكه + ذرة + مشويات + مكسرات.....) بس كل شئ بالإتفاق وبعد مشاورة الرؤؤس الكبيرة بصنف الأكل هههه