ريـمــاس
New member
- إنضم
- 6 أغسطس 2009
- المشاركات
- 581
- مستوى التفاعل
- 0
- النقاط
- 0
السلام عليكم بنات يايبتلكم طريقه دجاج صيني لذيذه وسريعه ماتاخذ وقت جربوها وانشالله تعجبكم...ادري في البعض من يسمعون سفن آب مع دجاج يترددون او يقولون لا استغفر الله (لقاليق)بس جربوها وراح تعجبكم
المقادير:
عدد2 بصل كبيره مقطع شرائح طوال(ترس طاسه)
مكعب ماجي
3صدور دجاج منزوع الجلد وبدون عظم
ربع بياله صويا صوص( ماجي)
كوب كاتشب بارد( ماجي)
كوب كاتشب حار(ماجي)
فص ثوم مدقوق
ملعقه صغيره دبس الرمان
ليمون اسود ناعم
بهارات
1 سفن آب
الطريقه:
احمس البصل بشوية زيت لين يذبل بس ديروا بالكم لايحترق وبعدين اضيف الدجاج على البصل(طبعا الدجاج تكونين مغسلته ومنظفته عدل وشايله الجلد ويفضل انج تكونين مقطعته مكعبات وتفوحينه شوي مع رشة بهار وفلفل اسود عشان تروح الزفره مالته)
المهم وبعدين اتضيفين الدجاج على البصل وتحطين بهاراتج ومكعب ماجي ودبس الرمان ورشة ليمون اسود واهم شي الثوم لاتنسينه وحمسيهم عدل لين تشوفين الدجاج ريحته خنينه
وبعدين حطي عليهم الكاتشب الحار والبارد والصويا صوص وحمسيهم مع بعض واخر شي ضيفي عليهم السفن آب
وخليه ساعه الا ربع على نار متوسطه لين الصلصه تثقل شوي والدجاج يستوي وقدميها مع خبز وسلامتكم. وبالهنا والشفا
ملاحظه.. لاتحطون ماي كلش-ولاتكثرون بهارات عشان الطعم لايتغير
واتمنى الطريقه تعجبكم جربوها وقولولي رايكم بنات
