Bamya
New member
- إنضم
- 28 يوليو 2007
- المشاركات
- 3,131
- مستوى التفاعل
- 0
- النقاط
- 0
السلام عليكم
تخيلــي معـــاي نفســـج بهالقصـتيـــــــــن
(((((السيناريــو الأول)))))))
كبرتـــــي
تزوجتـــي
صار عندج عيــــال تعلــق فيهم قلبــــج
وعشان هالعيــــال ... تمرمرتي ..
تبين لهم حياة أحلى من حياتج ..
تبينهم يعيشون احلى عيشة ..
تبين ترسمين لهم مستقبل ماكو منـــه
.
.
.
.
.
بس الشــــــــروط صعبـــة
عشان يعيشون بحياة كريمة :
لازم تفارقينهم
وتفارقين زوجج
تتغربين
وحطي في بالج انج بتنذلين بالغربة
.
.
يستاهلون صح؟
يالله لمّي أغراضج
و تعطري بريحة عيالج
واخذيلج من حياتج ذكرى ... تكون لج الخل و الصديق بغربتج
طيارتج تنطرج!!
للمجهـــول
=============================================
((((السيناريــو الثاني )))))
طـــول عمـــرج تحلميـــن بحيــــاة حلــــوة مفخفخـــــــة
بس الله ما كتــب
او ظروفج منتعج
وكبرتـــي بدون شهـــادة تكفـــل لج رغد المعيشــــة
رظيتي بأوطى معيشة
نصيبج .. شتسوين؟
.
.
بس حظج عــــوي
أمج وأبوج كبروا
أيام الاتكالية والربادية اخمطتها منج الأيام
الأدوية كل شهر فاتورتها كل ما لها وتزييييد
المستشفيات شابة ناااار
ووالدينج نظر عيونج بهالدنيا ريلهم ما قامت تشيلهم
لو يحصلج تقطعين من لحمج وتبيعينه عشانهم ... بس ما يكفي
شاللي بيدج تسوينه؟
.
.
.
.
لمّي أغراضج
سلمي على أهلج
وسلمي على أحلامج الوردية
طيارتج تنطرج!!
للمجهـــول
==========================================
((((السيناريو الثالث)))))
جامعية اشحلاتج
بس السفر مزوغ قلبج
حلمج تشوفين بلدان ثانية وثقافات ثانية
خدومة وتحبين الشغل
للأسف ما لقيتي وظيفة بتخصصج
ما لقيتي شي وقتج ومخباتج
وبما انج من زمان بخاطرج السفر
فكرتي
وفكرتي
وعرفتي طريجج وينه
وبكل سعادة لميتي اغراضج
طيارتج تنطرج!!
للمجهـــول
===============================================
((مـــــــــــوضــــــــــوع النقــــــــــــــاش))
بعد السيناريوهات اللي قريتوها وعشتوها
أكيد عرفتوا شنو المجهـــول اللي أقصــده
و وين طبت الطيارة يا ترى؟
هذيل نماذج من حياة خدمنا وخدمكم طال عمركم
وايد ناس يشوفون الخدم على انهم machine تشتغل تكرف ليل نهار
يحملونها فوق طاقتها
يغيب عن بالهم انها إنسانة حالها حالنا .. لها عايلة سواء أم . أبو. اخوان . خوات . زوج . أبناء
يامعودين حتى لو مقطوعة من شجرة
تبقى اسمها >> إنســـــــــانة <<
يايه تشتغل وتكسب معاش بمجهودها
مجهود ما أتوقع وحده منا ممكن تتخيل انها تتحمله بيوم
وايد حريم ما يتقبلون من الخدم كلمة لأ .. تعبانه .. مريظة << أعذار طبيعية كل إنسان طبيعي يمر فيها
وايد حريم ما يعطون خدمهم إجازة ولو يوم واحد رااااااااااااااحة<< تخيلوا تداومون كل يوم 24 ساعه طول ايام الاسبوع ... قمة الإحبـــــــــــــــاط والله
وايد حريم يبهذلون الخدامة ويسبونها .. حتى أصغر عيالهم يمد ايده عليها ... << تقدر ترد عليه؟ تخسي صح؟ لأنها لما دشت البيت صارت مجندة .. عبدة (استغفر الله) .. سموها مثل ما تبون .. أو خلونا نقول .. صارت ملكية خاصة يتصرفون فيها مثل ما يبون .. يبيعون ويشترون فيها
وهالآدمية تحت كل هالذل والغربة والظلم .. تاكل بنفسها .. تفكر بعيالها .. بزوجها .. بأهلهــا .. بديرتها وحياتها
تخزن
وتخزن
وتخزن
وايي لها يوم تنفجــــــــــــــــــر
مو دايما يقولون اللي يعصب يفقد أعصابه ويطلع عن طوره ويعتبر بمثابة السكران؟؟
تطلع حرّتها من هاللي ذلوها وهانوها وظيقوا عليها دنيتها فوق ما اهي ظايقة
تلومونهم عقب كل هذا على الجرايم اللي يسوونها؟؟
أنــــا ما أدافــــــــع عنــهــــــــــم
لكن بنفس الوقت
ما ألومهم كثـر ما ألوم الحريم وفعايلهم بخدمهم
هذيل الخدم ناس هدّوا بيوتهم وحياتهم وأحلامهم ورظوا بالمذلة والمذلة ما رظت فيهم
حطوا نفسكم بمكانهم
تضرين ناس يعاملونج معاملة طيبة؟
تذبحين شخص كان يصبح ويمسّي عليج كل يوم بكلمة حلوة
تحرقين بني آدم يتنقّص لج هدية مهما كانت تافهة بين فترة وفترة
مستحيل
أدري ان النفس البشرية أمّارة بالسوء والشيطان شاطر
وما أنفي ان في خدم شياطين
بس مو لدرجة انهم يايين عندنا عشان يذبحونا!!
احنا اللي دفعناهم لهالجرايم
.
.
.
إذا الخدامة ما اشتغلت الشغل اللي في بالج فهميها .. مره .. مرتين .. ثلاث .. ميخالف اشدعوى بتقرى أفكارج وتطبق اللي تبينه من أول مره؟ صبري عليها .. واللي تقدرين تقولينه وانتي تصارخين اكيد تقدرين تقولينه وانتي هاديه
واذا شفتيها شيطانه زفّيها .. مو تسفلين بأم اللي يابتها .. بس زفّيها وخلاص
اذا ما عجبتج خير شر رديـــــــــها المكتب واشتري راحتج
بس لا تييبون البلاوي لبيوتكم .. ولا تظلمون ترى الظلم ظلمااااات يوم القيامة .. تتحملون دعوة المظلوم؟
.
.
.
والله ما يبيلها شي
وهالكلام كله مو تفلسف
انا طبقته على نفسي ولقيتهم يشيلوني بعيونهم انا الوحيدة من بين كل خواتي اول ما أنادي وحدة فيهم بدقيقة ألقاها جدامي وتتبوسم
ليش؟
مو من زود الصحبة والله .. بس أبتسم بويوهم على طول
.. أصبح وأمسّي عليهم ... أييب لهم هدايا من شهر لي شهر .. أسولف معاهم ساعات لما وحده فيهم تكون قاعده تعدل داري أو كبتي .. أتغشمر معاهم بالصاعدة والنازلة مثل ما أتغشمر مع خواتي لا استكبروا ولا شافوا نفسهم ولا نزّلت من مكانتي باللي سويته
.
.
صفّوا النية معاهم بتلاقونهم يخدمونكم بعيونهم
أدري طولت عليكم
أتمنى تتفهمون الهدف من موضوعي بدون انتقاد
ومشكورين
التعديل الأخير:
