ليش تصرخين ؟؟

[Patcholli]

صباح الخير :eh_s(17):



شلونكم خواتي العزيزات عساكم بخير ؟؟


بنات شرايكم فبعض الحريم اللي نصادفهم بالاماكن العامه سواء سوق او جمعيه او مستوصف او شارع او حتى مخبز ومصبغه .. اللي تمشي وتتكلم بصوت عالي او تصرخ او تسولف بالتلفون والفريج كله يسمع مكالمتها وحوارها ..؟؟

يعني ..


اليوم كنت بالجمعيه اشتري شوية غريضات حق الدايت وكنت صوب الخضروات ..

واسمع وحده من بعيد تلعلع مادري قاعده تزف منو وتقوله .. ياشقول قتلك ابي بطيخ بطيخ مو رقي ..!! تعرف شنو يعني بطيخ ..!! اقوله بطيخ ايبلي رقي ..!!

ماشاء الله عليها كل الي بالمكان درو انها تبي بطيخ ..
مع انها بعيده عني حيل بس صوتها جنها قاعده بعربانتي ..

وحده ثانيه هم بالجمعيه (( الظاهر جمعيتنا فيها ان )):eh_s(10):

واقفه صوب المرتديلا وقاعده تنقي وعيالها ماشاء الله يركظون بالجمعيه شرق وغرب
وتصرخ فلان ييييب مرتديلاااا .. لااااااا مو هالنوع .. هاذا يقولون فيه مواد حافظه ..!!
يعني ماندري شنو ناكل .. كلشي طلعو فيه عيب .. ماندري نصدق منو ونجذب منو << كل هالحوار بيني وبين نفسها

بس انا واللي بالجمعيه كلنا درينا شنو تفكر فيه ..

وحده ثالثه بالمستوصف ذاك اليوم واحنا ناطرين عالشباك واهي تسولف .بتلفونها .
والله اللي يبي ايي حياه الله واللي مايبي مايشوف شر مانجبر احد ..
اي اقولج بالطقاق لاتحنين عليهم .. اللي يبيج يدل طريجج ..
وتتحلطم وتشيش وتسب وتحش وبعدين تقول الله يهديهم شنقول بعد لوول .. انتو شنو ماقلتي عشان شنقول بعد ..


اكتفي بهال 3 مواقف وفي بعد وبعد بس اتوقع وضحتلكم الصوره

يعني

بعض الحريم الله يهداهم يتكلمون بصوت عالي مايحطون اعتبار ان اهم بمكان عام وان في ناس وان في الفاظ مالازم تنقال بمكان عام واصلا مو حلوه المره تتكلم بصوت عالي خاصه اذا المكان في رياييل حلاته تكون ساكته ومالها حس وصوتها ماينسمع مو تمشي وتنشر غسيلها وسوالفها جدام خلق الله .. اوكي حتى لو ماقالت شي غلط او ما سبت احد قصري حسج .. لاتصرخين ..

مادري انا ماحب كلش هالشغله انتو شرايكم ؟؟

تشوفون انها شغله بايخه وماتلوق على الحرمه ؟؟

او انه شي عادي جدا ..؟؟

خلونا نتناقش ..​

 

[نهى الأحمد]

هلا والله باتشي ياقلبي

نورتي قسم المناقشات


شكثر صادفت حريم صوتهم ماشاءالله يوصل لابعد مدى ههههههه


والله انا اشوف انه الصوت العالي مايليق على الحرمة خصوصا لما يكون صوتها عالي في الاماكن العامة

يعني في بيتها تصارخ مثل ما تبي

بس في الاماكن العامة ليش التفت نظر الناس لي لما اتكلم بصوت عالي؟؟


ذكرتيني يا باتشي بجارة اختي

عليها صوت تبارك الرحمن تصك على صفارة الانذار خخخخخخخ


مرة كلمت اختي بالتلفون وكانت زايرتها اهي وجم وحده

مجرد تسولف سوالف عادية صوتها اعتقد وصل لجيراننا بعد هههههههه


ذوقا من الحرمة انه يكون صوتها خافت ومعتدله بتصرفاتها خارج البيت

 

[فطوم 84]

صاجه والله وايييد اشوف هالنوعيه
والمشكله مره شفت وحده جذي. تصارخ وصوت عالي ويمشي وراها واحد صوته واطي ماينسمع. ماسك ياهل. ولا. اكتشف انه هالانسان الاليف اللطيف
زوجها. سبحان الله دايما ام لسان العوووبه اللي ماتستحي زوجها فقير مسكين


ليش ماني عارفه!!!

عموما حلاة المره صوتها واطي هادي وياحريمنا تكفوووون تكفووووون بطلوا حش. بطلوا حش


انا مره جذي واقفه بمستوصف والكاتبه صوتها عالي وتحش بوحده مع رفيجتها. وانا ماده ايدي ابي ورقتي بمشي. وهاذي اي عمي بعينها وهات ياحش
وانا ناطره. الحش والقالات وجاي الضحي متي يخلص. ااااااه. هالنوعيات تنرفززز بسكم.

والله بسكم حش هههههههههههه تعطلون اشغالنا علشان. حشكم المليغ


الله يهديهم ويصلحهم

 

[شادن33]

هههههههههههههههه
باتشوووو امبيه انا مرات جذي بس مااقصد والله ومااطلع غسيلي هههه
اكون مع بنتي المراهقه وحضرتها مايعجبها العجب واتلاقيني افتر وياها في المحل واختار هذا لاء انزين هذا لاء
واحتر وأقولها انزين اني اشتبيييين وترد يماااا لاتصرخين انا اكون مو بحاسيتي والله وما اقصد اصرخ خخخخ لو ريلي وياااي بيزنطني مايحب الصوت العالي بالسوق
وبس ترا مو على طول جذي بس لما تينني بنتي لووووول ولا انا الييييفه

 

[ضــمــاد]

تسملين باتشي عالموضوع الحلووو :eh_s(17):​

أنا لي وجهة نظر بالموضوع ​

عن نفســي .. صوتي جدا ً جدا ً هادي ​

وماينسمع على قولت امي واحيانا لما اكلمها بمكان عام تقولي طولي صوتج ضماد مااسمع​

لانه انا عندي قناعه تامه انه الأنثى الحقيقيه يهمها انها تحافظ على انوثتها سواء ​

كانت في البيت او بمكان عام لكن البيئه لها دور وتأثــر​

مثلا ً أخوي اللي بأولى ثنوي ​

معاه دكتوراه بالحنه ورنه امبيه ماحب اواعده على شي يطحن يحن ياكل القلب ​

ينرفزني يخليني أضطر أصرخ عليه من قمة راسي :eh_s(14):



ولا ماراح افتك من حنته وأسئلته وتحقيقه اللي ماينتهي واذا صرخة



تتحول حنته عالواتساب :eh_s(2):
​

اعطيج مثال .. أمي مواعدته تاخذ له تومز بس ماحددت متى ​

اهي واتسابات شغاله بالليل أمي تقولي لا مو طبيعي حتى بالواتساب حنه ورنه ​

يمه متى تشترين لي يمه متى نروح يمه ويمه ويمه ويدري انه هالفتره امي حدها مشغوله ​

امبيه مايسكت يسأل ترليون سؤال بالدقيقه ​

فتشوفينني معاه ينقلب الصوت الهادي الى زئير الاسد :eh_s(4):​

أمبيه والله يشلع القلب و يرفع ضغطي ( رفيجتي تقول الله يعينج فترة مراهقه وتعدي )​

وكل مايرتفع ضغطي منه يرتفع صوتي وادري انه هالشي غلط وجم مره ​

حاولت امسك نفسي معاه واكلمه بهدوء بس عمك أصمخ فأختمها بصرخه من قمة راسي​

فهذا مثال .. ​

أعرف بنات قبل لا يتزوجون قمة بالهدوء .. لكن من تزوجوا وصار عندهم عيال ​

امبيه تغيروا صراخ × صراخ .. ووحده منهم أكون قاعده يمها تكلمني بصوت عالي ​

يمكن اهي مو حاسه بنفسها انه صوتها عالي .. لانها تعودت عاللصراخ ​

عرفتي قصدي ​

بالمقابل رفيجة امي .. أمبيه هـاديه جدا جدا جدا وبــااااااااااردهـ ​

بناتها طلعوا عليها لما يتكلمون قمه بالنعومه صوتهم خفيف وهادي ​

فأنا أشوف عالبيئه ​

 

[blue ocean]

اهي ياخيتي اللي تتصرف جذي بأماكن عامه صراحه مالها غير كلمه وحده " هــلاقه "



ولا حول ولاقوه فيهم يعني مالبيد حيله ... اذا اهي بعد هالعمر مو عارفه تضبط محركات لسانها

جدام العالم شبتسوي بالبيت بتقطع ريلها وبتحطه عالفحم وتشويه :eh_s(4):

غالبآ اللي تصرخ وتعلي صوتها بالاماكن العامه تكون من الناس اللي تفتقر لـــ اللياقه والذوق العام

بشكل عام ... يعني عليه العوض ومنه العوض ..​

 

[الزورق222]

ياحرام لاتكون صقهه ماتسمع بعض الناس اللى مايسمعون زين او عندهم مشكلة بسيطة فى الاذن اصواتهم تكون عالية .. واذا كانت سليمة وماتعانى من مشاكل بالسمع فاكيد هى زكيا زكرياا فى البيت عادى صارخى سوى اللى تبين بس براا فى ادب وذوق مو من المفروض احد يتجاوزه ..

 

[ReD&FoSHia]

يمكن نبراتهم جهورية شوي
يعني عالية
ويمكن فيها شي معصبة
مادري والله
كيفها اتصرخ ولا اتقصر صوتها
اخذ شغلي و ارد
بس بالمستوصف عييب اتصرخ يعني الناس مرضى

 

[Şhώasha . . ~]

في ناس متعمدين وفي ناس لا
يعني انا من النوع اللي ماحس بنفسي اني اصارخ وانا واتكلم
واتحلطم بصوت عالي لووووول

وبعدين يوم تعصبين غصبا عنج تصرخن ><"

 

[ReeMoh]

لوول فشلة الصوت العالي سواء للحرمه او الريال بس الواحد ساعات يطلع من طوره

 

[Tom ♥ Jerry]

,



هاذي وحده اعتبرها بكل آختصار " بلا أنوثة " !
و بالنسبه حق الي يتكلمون بالتلفون .. ترا بعضهم بدون وعي تلاقينهآ
تعلي صوتهآ شوي شوي لمآ يعلى ويعلى
انا عمتي ليه يت تتكلم بالتلفون آول شي ترد عادي بعدين تتحجى بصوت عالي !!
مو قصدها تزعج الناس ، بس تقول كلا عبالي عيالي مآ يسمعون هههه :/

 

[عادت ذكرياتي]

ما تدرين الوحدة فيهم شنو حالتها يمكن السمع عندها ضعيف أو مو مستوعبة وفي منهم يمرون بحالات الله يعلم فيها وبظروفهم ^_^


هذا رايي ونحط للناس أعذار %%%

 

[غرور 9]

هالمناذج اتغث خصوصا من صباح الله خيراففففففف الواحد يالله يرد السلام ع الي يسلمون عليه وهذولا الحريم تلعلع من الصبح
مرا كنت ناطره الصبح وانا يايه الدوام في طابور كلعاده ع البصمه
وناطرتهم ايخلصون ولا اسمع البنات بالرسبشن وحده صوتها شقولكم مو نشاز مو نهيق مو مو مو ماينوصف ابد اتقول والله ان مانسيتها اسم ولدها ماكون افلانه بصوت عاليييييييييي


الحمدالله والشكر بس


ولاتنسون الرسول عليه الصلاة واله وسلم ذكر ان ابغض الاصوات الي تكون عاليه ووصفها بنهيق الحمير
والله المستعان

 

[المكسيكيه]

كيفهم صرخوا ولا ما صرخوا

 

[Patcholli]

مشكورين حبيبات قلبي واشكر كل من شاركت بموضوعي

شدون حياتي انتي فهمت وجهة نظرج لا انا اقصد الي يكون طبع فيها تمشي وتتكلم بالشارع بصوت عالي مو بمواقف خاصه يعني اكيد اي واحد يعصب ممكن ينفعل او يعلي صوته بدون احساس بس واحد متعود يلعلعل حتى واهو يسولف باشياء عاديه هاذا قصدي

بنات اللي يقولون كيفهم ندري ان كيفهم محد قال مو كيفهم احنا قاعدين نقول ان شكلهم كلش مو حلو جدام الناس وننصح حرام يمكن وحده مو حاسه بروحها والناس يقولون عنها هيلقيه واهي مو قصدها وثاني شي صوت المراه عوره يعني هم حلو ان الوحده تكون ذات صوت واطي ومايعلى صوتها بالاماكن العامه والاسواق جدام الرياييل
^_^ واكيد بالنهايه كيفهم احنا ننصح وانبهم بس مانحاسب ^_^

 

[Perfume]

Patcholli انا هالسالفة ترررفع ظغطييي
والمشكلة انها موجودة بأمي الغالية وارثتها من يدتي
لما تتكلم بالتلفون سواء في البيت او بره ، لما تزف اخواني او حتى كلام عادي لاااازم الفريج كله يسمع
حاولت فيها بس ماكو فايدة يعني خلاص اهيا تعودت وماتقدر تغير هالطبع
امي الله يخليها حيييل تبالغ يعني حتى لو سوالف عادية وماتستاهل هم تصارخ والكل يسمع لووول
عطوني طريقة شلون اخليها تتغير

 

[bella 81]

ما تدرين الوحدة فيهم شنو حالتها يمكن السمع عندها ضعيف أو مو مستوعبة وفي منهم يمرون بحالات الله يعلم فيها وبظروفهم ^_^


هذا رايي ونحط للناس أعذار %%%

عدل كلامج نفس الي كنت بقوله

 

[ليه الجفآ]

اعتبر هنوعيه مسترجله ... تنافخ وتصارخ يعني فقدت انوثتها .. بهدوئها وبمشيتها ومستحاها ..

 

[قموووره]

لووووووووووووووووووووووول بدعت المره مسكينه ههههههههههه
في ناس طبيعتهم جذيه صوتهم عالي مع ان هالعاده مو حلوه خصوصا للمره عاد حتى الريال لي صار صوته عالي زياده عن اللزوم باماكن عامه ننقد عليه شلون المره ؟​

 

[قموووره]

ما تدرين الوحدة فيهم شنو حالتها يمكن السمع عندها ضعيف أو مو مستوعبة وفي منهم يمرون بحالات الله يعلم فيها وبظروفهم ^_^


هذا رايي ونحط للناس أعذار %%%

اتصدقين كان عندنا واحد بالدوام جذيه لمه يتكلم يصارخ من قمة راسه وانا اقول شفيه هذا ؟؟ ليش يصارخ جذيه ؟ صوته مزعج حيل الطابق الي اهو فيه الكل يسمعه ما شاء الله جنه مركب سماعات تبارك الرحمن وبعدين لمه سالت عنه عرفت ان الريال ما يسمع فعباله الناس ما يسمعونه بعد وعليه​