مابي أشتغل شنو غصب؟؟شنو الدبرة؟والكل يبيني أرد للشغل

[no0ona_100]

السلام عليكم
شلوونكم خواتي شخبااركم مبرووك عليكم العشر و عيدكم مبااارك
وكل عاام وانتووو اهلكم و احباابكم و الكويت بالف خييييييييييييييير

المهم
مشكلتي غريبه من نوعها وابي النصح والارشااااد الله يوفقكم

خواتي انا متزوجه ولله الحمد..كنت اشتغل قبل العرس و قدمت استقاالتي و زوجي وأهله عندهم علم بالاستقاااله

بصرااحة تأقلمت على شغل ربة المنزل..و انا كان دواامي بالتدريس حييييييييل كرف وتعب وعرق خخخ
اخذ معاشي من هني و اقطه على عيادات التجميل و الصوالين من هني

ومن كثر التعب بالشغل جاني قولون والتهاب جيوب انفيه وحساسية وتشققاات بالقدم
المهم انا قبل العرس ما شرطت الوظيفة ولا الزوج أكد على أهمية الوظيفة...........

والأحين بعد مروووور فترة.....الكل يبيني أرد أشتغل بالتدريس(زوجي ، امه، عايلتهم كلهم)
حدددددي مستغربه؟؟؟؟

مايبووني اقعد فالبيت بطاليه على قولتهم؟؟؟؟

وانا اعرف نفسي ....أتعب حييل و تلووع جبدي واعصب اذا جاني ظغط عمل ، وكنت كاارهة الوظيفه لأن عايلتنا ماتسمح لنا الا بهذي الوظيفه(المعلمه) ادري مهنة شريفه....بس انا شخصيا تعبت منها ،،،تعبت نفسيا وجسديا

البنات المراهقات ولا الصغااار التعاامل معهم جدا صعب احس عقلي يصغر ويااهم
وجسديا من الشيل والحط و المشي والقوومه والدرج ووو الخ
حتى مااديا ..كنت وااايد اقط من معااشي على الشغل

خلاااااااااااااااااااااص ملليت من الشغل ....

والحين ابي اقنعهم اني مو محتااجه أو مو حاابه الشغل؟؟؟شلوون عطووني افكااار

استخرت ارجع للشغل ولا ...وحسيت اني مااابي اشتغل مرة ثاانية خلاص كرهت الدواام لاتقوولون انتقلي ..كلهم نفس الشي

قبل العرس كنت عزوبية و فعلا كنت ابي اشتغل اقزر وقتي
بس الحين احس يكفي شغل البيت (ماعندي خدامه) والمسؤووليه

هم يبووني اشتغل عشاان اصرف على نفسي ....ب هم قالو هالحجي...
تكفووون انصحوووني شنو الدبرة

مابي اشتغل ...كيف اقنعهم بكلام منطقي

 

[kindar]

رد : مابي أشتغل شنو غصب؟؟شنو الدبرة؟والكل يبيني أرد للشغل

واخيييرا ارد اول وحده :ggdw:

اختي اذا ريلج مو قاصره شي والحمدالله عايشين بخير ونعمه مولازم تشتغلين وانتي قوليله انا ابي اهتم فيك وبعيالي وانا مرتاحه جذي وانت مومقصر علي الحمدالله،، ويمكن خالتج قاعده تحن على ريلج ف قوليلها خالتي احنا مرتاحين وريلي يبيني اجابله واجابل عياله واذا ريلج اصر حولي اداريه ترى مو كراف ومعاشج راح يقل بس بتلقين راحتج انشالله والله يكتبلج اللي فيه الخير

 

[فخامه كبريائي]

رد : مابي أشتغل شنو غصب؟؟شنو الدبرة؟والكل يبيني أرد للشغل

حولي اداريه ...صج المعاش مو نفس المعلمه ..بس تقزيرة سوالف و شغلهم راحه ..

 

[blue diamond]

قوليلهم باختصار انج صليتي استخاره وطلع انج مو حابه ترجعين للشغل
وماكو أحسن من الاستخاره
وشغل البيت ماخذ وقتج ومعيل الاسره شرعيا موجود >> قطي هالنغزة لأهله وله

 

[غيمه ظميانه]

انا مع فخامه حولي اداريه

والمعاش زين يساعد شوي

 

[بنننت أبوووهااا]

رد : مابي أشتغل شنو غصب؟؟شنو الدبرة؟والكل يبيني أرد للشغل

اذا مرتاحه ماديا ماعليج من كلام الناس قنعي زوجج بالكلام الحلو بيقتنع ابدى ماعليج راحتج الحريم يموتون اذا وحده يصرف عليها زوجها يبونج حمار مكده سوري على التشبيه

 

[lolayasmeen]

ما في شي يخلي بعض الريايل يغير رايه في الشغل غير الحمل لو انج حامل جان تلقينه هو اللي ما يخليج تشتغلين

 

[بنت شرق]

حولى اداريه على راى البنات احسن لج من قعده البيت يمكن راح تملين اذا طولتى

 

[noo7a]

يمكن انتي مرتاحه ماديا و مو حاسه بقاصر لان ريلج مو مقصر عليج
بس يمكن اهو مو مرتاح ماديا و قاعد يضغط على نفسه عشان ما يقصر عليج عشان جذي يبيج تردين للشغل
ردي دوامج و حولي اداريه

 

[يمة يادلبي]

شوفي انا معاهم إذا معاش ريلج شوية ومايكفي لأن الحين الدنيا غالية وباجر ان شالله بتييين اعيال واكيد تبين توفرينلهم كلشي وماتخلين عليهم قاصر
واذا لي هالدرجة انتي كارهة مهنة التدريس شوفيلج شغلة ثانية وماتوقع اهلج بيعارضون لان ريلج الحين الي صار مسئول عنج مو اهما

اما اذا معاش ريلج ماشالله راهي فـ من حقج تقعدين واتريحين بالبيت والي مو عاجبه مو لازم اهم شي انتي وريلج تكونون متفقين

 

[(المباركيه)]

مولازم تقنعينهم هم شكو اصلا ماتبين تداومين لا تداومين اهم شي زوجك يقتنع عشان تفتكين من حنته اما الباقي طاااااااااااااااف .

 

[لوازم العائلة]

استخيري بعد

 

[Vouge]

رد : مابي أشتغل شنو غصب؟؟شنو الدبرة؟والكل يبيني أرد للشغل

إذا ريلج مو راضي إلا تدريس بيني له إنج ما تبين تدرسين

و حاولي تتوظفين في الوزارات الهادية .. شغل خفيف و معاش حلو
و دوري لج إدارة نظيفة و بس


و موفقة يا رب

 

[miss_jamsheer]

حولي اداريه مافيه كرف وشغل وماادري اذا نفس المعاش ولا لا

 

[no0ona_100]

لو أقدر أحول اداارية جاان حولت بس ماااقدر انا ماعندي الجنسية

 

[( مي )]

والأحين بعد مروووور فترة.....الكل يبيني أرد أشتغل بالتدريس(زوجي ، امه، عايلتهم كلهم)
حدددددي مستغربه؟؟؟؟

مايبووني اقعد فالبيت بطاليه على قولتهم؟؟؟؟

اهل زوجج وعايلتهم شكووووووووووووو
هذي أمور وقرارات بينج وبين زوجج بس اهم مالهم شغل بمثل هالمواضيع
شغلة ثانية
اذا زاد ضغط زوجج عليج ،، بما انج كنتي مدرسة حاولوا بواسطة انج تكونين ادارية بروضة ،، عالأقل ادارية + روضة يمكن لي ال 12 ونص ويخلص دوامج ..​

 

[عايدوش]

رد : مابي أشتغل شنو غصب؟؟شنو الدبرة؟والكل يبيني أرد للشغل

اختي انة مريت بهالمرحلة بعد الزواج قدمت استقالتي و قعدت في البيت و ريلي ما كان مقصر معاي في شي ،
بس بعدين بعد كم سنة زواج انة اللي قلت ابي اشتغل لأني احس اني معزولة عن العالم و الحياة العملية تري مو الوحدة تشتغل عشان المعاش لا ، يكون عندج كيانج ، حياتج العملية ، زملائج ، زميلاتج ، صدقيني ، بعدين راح تلهين شوي و راح يكون لج خصوصياتج ، و الرياييل صدقيني يحبون المرة اللي لها كيانها و حياتها العملية ، شكثر ننظف في البيوت صدقي راح تملين .
هذي نصيحة اخت مجربة .
و الحين الحمد لله صارلي سنة اشتغل حتى اهوا صار يهتم فيني اكثر و انة ما عندي وقت قبل كنت انة كل شوي من الفراغ ادق عليه و اهوا يطنش يقول مشغول الحين اهوا يدق علي و انة اقوله مشغولة .

 

[صمت المرافئ]

رد : مابي أشتغل شنو غصب؟؟شنو الدبرة؟والكل يبيني أرد للشغل

شوفي حبيبتي
فعلا التدريس متعب
إذا تقدرين حولي اداريه
بس يبيلها واسطة
وإذا مالج خلق بالمره على الشغل
أهم شي اقنعي زوجج بس
مالج شغل بالباجي
إذا اهو اقتنع ما راح يهمج راي الباجي
ومادام القاضي راضي اشدخلك يا فاضي
وسلامتج​

 

[الغاليه نونو]

انا بقول لج عن تجربتي وانتي كيفج

انا يوم كنت صغيره كنت موظفه واشتغلت بالصحه وكانيت اياام حلوه لي صداقات حتي بره الكويت وكنت انسانه مهمه هههههههههههههههه حتي حمولتي يحسبون لي الف حساب يعني محدش احسن من حد

وعقب مااكبروا عيالي ودشوا المدارس قدمت استقالتي وقعدت بالبيت شفت الصداقات خفت والاتصالات اختفت بيني وبين الناس لاني انشغلت مع بيتي وعيالي وشوي شوي مريت بظروف مايعلمها الا ربي سبحانه وتسهلت اموري بفضل من الله العيال اكبروا وتغيرت امور وايده بحياتي بس بيني وبين نفسي احن شوي عالشغل واقول الحمدلله ربي عوضني بريال مومقصر عني بشي وعيال الله يهديهم ويصلحهم دامهم بصحه وعافيه هذى اكبر نعمه

انا نوعيتي اموت علي بيتي احب البيت بشكل موطبيعي واحب الكرف والشغل بالبيت وكل شي يتعلق بامور البيت انا اللي اسويها اللهم سوالف الكهربا والبنيان علي الشايب

مالج بالطويله مرت الايام والسنين ويت الفرصه اتوظف مارديتها وقبلت فيها والحين اشتغلت موناقصني شي الشهاده لله بس حسيت اني بغير شوي من روتين حياتي والحمدلله رديت علي الشغل بمكان تتمناه كل وحده وتغيرت حياتي وااااااااااااايد وايد هذا وانا عيوز موو مثلج بعدج صغيره

الحين تقولين مابي اشتغل بس تأكدي بتمرين بمرحله بتقولين لي متي انا قاعده جذي لا شغل ولا عمل
دام انتي بعدج صغيره والفرصه يت لي عندج وتقدرين تنتجين وفيج طاقه لا تبخلين فيها علي ديرتج اللي عطتج وااااايد فكري اشلون تردين الجميل حق هالديره

وفي حديث عن الرسول صلي الله عليه وسلم قال فيما معناه

اللي يكتم علما عن الناس يلجمه الله يوم القيامه بلجام من نار
ومن سلك طريقا يلتمس به علما سلك الله له طريقا الي الجنه
انتي بصحه وعافيه ومافيج شي يمنعج من التدريس وهالوظيفه حلوه وزينه اخذى الموضوع من النواحي الشرعيه وعقبها قرري براحتج يمه

انا نا أيد البنت الموظفه تترك وظيفتها ولا أأيد اللي ماتكمل تعليمها ولا أأيد ربات البيوت انهم يقعدون يحطون ريل علي ريل واهمه قادرين يسوون شي بالمجتمع كلش كلش لووو تحطيلج بسطه تبيعين فيها علج وحلاو اهم شي مااتكونين عطاليه بطاليه

 

[أنفاسي دخون]

اذا زوجش ما عليه قاصر ومعاشه يكفيه يصرف على البيت والعيال وما يتضايق ماديا لا ترجعين للكرف

واهله وعايلته شكو داومتي او لأ !!!!!!!! صدق لقافه وتدخل باللي ما يخصهم

انتي اقنعي زوجش انش تتعبين نفسيا وجسديا بالدوام وما تقدرين توفقين بين البيت والشغل وقولي له اذا داومت بقصر بحقك وحق بيتك وعيالك وانا عندي عايلتي واستقرارها اهم من الوظيفه والله يهديه لش ويسخره ويفكش من حنة اللي عنده