ماذا بعد الرجيم ؟؟ 2012 ( خلاصة تجربتي والفايدة للكل )

[قطوووة]

السلام عليكم ورحمة الله وبركاته ..

بعد قرابة 6 أشهر في مشواري الرجيمي الإلتزامي .. حبيت أخصص هالموضوع لتجربتي وشنو استفدت
وشنو تعلمت وألخص أهم المعلومات والفوايد اللي اكتشفتها وشلون وصلت وزني المثالي ..
طبعا ماكو شي من غير تعب جسدي او نفسي ( مابي اخرعكم بس .. اللي يبي شي يتعب عليه )
أحب بهالموضوع أقولكم ان ماكو شي صعب ولا أكو شي مستحيل دام في إرادة ..
وان شاء الله أرد على كل استفساراتكم وأشكر كل اللي راسلوني بالخاص
وحبيت احط كل شي بالعام لتعم الفايدة للكل

قبل أن ابدا احب اذكر ان بديت مشواري بتاريخ 11-7-2011 مع شركات الدايت
وهذي يومياتي :

• ¨°•√♥ يومياتي مع .. كالوري كنترول ♥√•°¨
• ◥◥ يومياتي مع .. هيلث كمبني Health Company◤◤
• ♨ يؤمياتي مع فرش دايت.. ♨

تابعوني ..

​

 

[قطوووة]

في البداية كان وزني مايقارب الـ 69 .. ونزلت شي بسيط ..
بس قلت أكمل تحت اشراف مختصين احسن .. بديت مع الشركات ..
وكان عندي مرض سكر ماكنت اخذ علاج اول الاشهر وهذا كان سبب اني ماانزل بسرعه
وماكنت امارس اي نوع من انواع الرياضة

بعد مابديت اخذ علاج سكر + مشي ساعه شبه يومي
بديت أخسر وزن بشكل أكبر ..

رجيمي كان ..

بدون أي حبوب .. او أي نوع من المنتجات الخاصة بالرجيم


لاني من غير المؤيدين لها بأي حال من الأحوال ..

وما أنصح فيها أي أحد ..

بس كنت اخذ حبوب اسمها فات برنر .. سألت عنها دكتور تغذية قال انها ماتفيد الا مع الرياضة ..

بعد فترة سألت دكتورتي (بروفسورة بمجال علم الأدوية )

قالت لي انها لها تأثير عالكبد عالمدى البعيد .. لذلك وقفتها فوراَ







الوزن اللي كنت : 69
الوزن الحالي 58

الطول : 159

والان اعتبر وزن مثااااااالي ..


يتبع

 

[LuLiTa]

ما شالله عليج



كملي متابعينج على احر من الجمر ��

 

[قطوووة]

عند الإلتزام بالرجيم
لازم يكون تحت اشراف مختصين .. رجيمات النت كثيرة .. بس هل هي تناسبنا ؟؟

طبعا أتكلم عن الرجيمات الصحية اللي فيها كل شي وتشمل المجموعات الغذائية باعتدال


أنا ضد
الرجيمات الكيميائية ورجيم الفواكهه واي رجيم يعتمد على أي نوع واحد من الأكل .


الرجيم الصحي اللي يكون مفصل لج خصيصا لجسمج .. هو اللي يخليج تنزلين صح
وماتخسرين نظارة بشرتج ولا شعرج

بالعكس يزيد من قوة وصحة بشرتج وشعرج وكل شي عموما حتى النفسية سبحان الله

 

[قطوووة]

الاجسام مختلفة .. جسم المرا غير عن جسم الرجل ..
وكل جسم يحرق على حسب العضل الموجود فيه .. كل مازاد العضل.. زاد الحرق

ممكن رجيم معين يفيدني .. لكن مايفيدج .. لذلك لا تعتمدين على شي معين ..

ماراح أتكلم عن رجيمات فصائل الدم لان صراحة ماتثير اهتمامي واساسا ماني مقتنعه فيها ولا اعرف عنها شي

شلون نعرف جم سعره حرارية نحتاج ؟؟؟؟

أكثر قدر تقدر تستهلكه باليوم هو :
وزنك × 20 ( حيث ان كل كيلو يحتاج 20 سعره )
مثال وزني 60

60×20 =1200 سعره حرارة



أقل قدر تقدر تستهلكه باليوم هو :
وزنك × 15 ( حيث ان كل كيلو يحتاج 15 سعره )
مثال وزني 60

60×20 =900 سعره حرارة


الحسبه طبعا للشخص العادي .. مو الشخص الرياضي لانه يحتاج اكثر طبعا

اي شخص وزنه 60 كيلو ..

ما يقل اكله باليوم عن 900 كالوري ولا يزيد عن 1200

ان قل ما يحرق وان زاد راح يزيد وزنه

لذلك .. تحسبين وزنج وتضربينه .. وتشوفين جم تحتاجين



#الموضوع من كتابتي أتمنى عند النقل ذكر المصدر#
منتدى كويتيات : قطوووة

 

[&موناليزا&]

موضوع حلو ومفيد

مشكورة حبيبتي

 

[قطوووة]

اي رجيم يحتاج ...


إرادة .. ودافع قوي يخليج تستمرين فيه ..هدف تبين توصلين له أو حافز


مشكلتنا احنا البنات نبي نسوي رجيم عشان عندنا عرس ونبي نضعف ونلبس أكشخ نفنوف ونصير أحسن جسم ..

ايه ليش ننطر عرس ولا سبب يخلينا نسوي رجيم بو اسبوع ونوقف ؟؟؟؟؟؟
ليش ماتعطين جسمج حقه وتسوين رجيم لين تنزلين اللي تبينه واكثر وبدون عرس !!

طبعا عندنا ناس من تسمع كلمة رجيم عبالها فلم رعب واكل ماصخ ومايشبع ، وهذا غلط
انا وحدة من الناس كنت جذي ..

الرجيم اكلي كل اللي تبين باعتداااااااااال .. اي شي تبينه لاتحرمين نفسج منه ( بس مو تاخذين قنجة عيش على ابو مو حارمة نفسج )


الرجيم هو ضبط عاداتج الغذائية بكل بساطة .. راقبي أكلج

احنا ماشاء الله شعب كريم وعزايم وولائم واطباق حلو وهاات يا انواع واشكال ومن اغلى مكان


تخيلي اي قطعه صغيرونه من الحلو جم كالوري فيها ؟؟؟؟

من 100 الى 300 او حتى 400 كالوري .. اذا مو اكثر ..
وتخيلي بالعزومة او الجلسة الوحدة انتي شكثر تاكلين ..

اهي صينية رايحة .. صينية رادة .. هذا غير الجاي المتروس شكر يابوووووووي




أول خطوة من الوعي .. انج تنتبهين لنوعية اكلج وتحكمين بالكمية بواقعيه ..

أهم شي .. انج تكونين ع قناعه تاااااااااااااامه انج مسوية الرجيم
عشانج انتي وانتي وبس
مو عشان عرس
مو عشان زوج
مو عشان رفيجاتج
مو عشان سفر


عشاااانج انتي بالدرجة الأولى ..

لان لو كان الرجيم لاحد الاسباب اللي راحت .. راح توقفين بمجرد زوال السبب
​

 

[Laidy n3ooma]

مشكووووووووره

 

[حياة زوجي]

موضوع راااااااااااااااااائع
وانا راح اتابعج واشجعج وياريت تحطين صور رجيمج علشان البنات يستفيدون
:eh_s(7)::eh_s(7)::eh_s(7):

 

[اخر زيارة]

يسلموووووو غلاتي جعلها في موازينك

 

[قطوووة]

ما شالله عليج



كملي متابعينج على احر من الجمر ��

موضوع حلو ومفيد

مشكورة حبيبتي

مشكووووووووره

حياكم الله وان شاء الله راح اكتب لكم معلومات تصدمكم


راح اكتب بالردود القادمة شنو الفاكهه اللي لا كليتيها تعطيج -70 سعره حرارة

لاحظوا قلت سااااالب 70 .. يعني تاكلينها وتخسرين كالوري






تابعوني ..

 

[SH5SH5]

واو ابداع ما شاء الله ..

بانتظارج ..

 

[نــور الدنيــآآ]

ما شاء الله
مبروووك عليج الوزن و إن شاء الله للأحسن

 

[قطوووة]

موضوع راااااااااااااااااائع
وانا راح اتابعج واشجعج وياريت تحطين صور رجيمج علشان البنات يستفيدون
:eh_s(7)::eh_s(7)::eh_s(7):

يسلموووووو غلاتي جعلها في موازينك

واو ابداع ما شاء الله ..

بانتظارج ..

ما شاء الله
مبروووك عليج الوزن و إن شاء الله للأحسن

اشكر ردودكم حبيباتي .. وان شاء الله تابعو كل المعلومات لانها بجد
تفيدكم بشكل ماتتصورونه
اللي تستفيد .. اتمنى انها تدعي لأمي الله يشفيها ..
واني اتخرج وافرحها :d

 

[^بنوته^]

موضوع روعه صراحه متابعتج حبيبتي والله لا يحرمنا من هالدرر ​

 

[دموع واهات]

اب اب
يعطيج العافيه

 

[صمت اللـ ي ـالي]

مششكوورة

وباااانتظااارج

 

[جهراويه مووووت.]

ماشالله عليج

وويارب اوصل نفس وزنج قوولوو امين

 

[B7rainia]

مشكوره ع الموضوع

بس عندي سؤال محيرني سالفه ان نضرب الوزن في ٢٠ وفي ١٥

شلووووووون؟! مثلا انا طولي ١٧٢ ووزني نهايه الخمسينات ورفيجتي طولها ١٥١ ووزنها نفسي نهايه الخمسينات

معقوله لازم ناكل نفس الشي!! مايصيرررر انا ضعيفه وهي متروسه

انا اقول الحسبه الصحيحه لازم تاخذ الطول بعين الاعتبار مو بس الوزن ان شالله فهمتو قصدي

 

[*حبيبة أعمامها*]

صار لي تقريبا خمس سنين و انا اقول بسوي رجيم..من اوصل اسبوعين..يروح المفعول و ارجع آكل عادي و انسى أني مسويه رجيم أساسا..كلامج خلاني أفكر زياده على المليون مره اللي فكرت فيها..ناطرتج تكملين باجي الموضوع عشان يزيد التشويق عندي..طبعا الكميه اللي نزلتيها مقارنة بالكميه اللي المفروض أني أنزلها تطلع و لا شي بالنسبه حق وزني الزايد لأن آنا حدي ريضه..

حدي ناطرتج تكملين الموضوع..و الله يشفي أمج و ينجحج و يخرجج يا رب ;***