ما اعرف اسامي الخامات

[مشتطـه]

بنات انا ذويقة والحمدلله ولي قدرة عجيبه اني
أبدع بالخامات والخيايطة


بس عيبي ما اعرف اسامي الخامات ومن ادش البلوكات أكتئب
لان عجولـة ف وايد الجأ للجاهز
أو الشي اللي اشوفة بمكان واقوله خيطلي مثله

الحين قررت اشتري خامات واسوي الموديلات اللي عندي



طلبي أبي منكم شنو احسن الخامات العملية

يعني عندي موديلات ناعمه للطلعات
مابي استقبالات عندي وايد

ابي الخامات الي مثل ملوت المحلات اللي بالافنيوز

شسمهم يعني أبي لي دشيت محل قتله طلع لي هالخام وهالخام

لو سااده
بس شنو أحسن نوع
والله ما اعرف

يعني عندي موديل دانتيل يدش عالبدلة شوي بشكل ذرب مادري شنو الخام
الي احطه تحته ؟


بليز عطوني اسامي الخامات




أعرف الحراير
وأعرف الجاكار

وأعرف الشانتون



بس سوالف كريب حرير وشيفون حرير وجذي ما اعرف شنو احسن شي للقميص
يعني مثلا طقة قمصان زارا وجذي

وشنو احسن شي للبنطرون بعد
لان في خامات ما القى لهم بنطرونات بالسوق


ناطرتكم يالذويقات

 

[مشتطـه]

@@
@@
@@

67 مشاهده و لا رد

شدعوه ؟

صدمتوني ؟

 

[مس استي لودر]

انشالله يفيدونج البنات

 

[Dalo3h]

حياتي نفسج غشيمة عبالي في اسامي قلت استفيد

يفيدونج البنات انشالله

 

[مها77]

حبايبي الاسماء مو مشكله اللحين اقدر احط لكم عشرين اسم لكن اشلون تميزونها ؟؟؟؟
مع الاسف المحلات مافي امانه يعني اقوله ابي جورجيت حرير بيور سلك يطلع لي جورجيت بولستر

اقوله طلع لي فالنتينو يا باني يعطيني الاندونيسي او اقوله الفتتفه الفرنسي يطلع لي التفته موديل فرنسي وصناعتها كوري

مع اني اتعامل معاهم من سنين ويدرون اني خبره بالخام

ولما اقوله مو هذا اللي طلبته يقولي كله نفس الشي محد يفرق واحسن لج وفري بالسعر

مع العلم ان سعر الاصلي احيانا ما يفرق عن التقليد جم دينار مع فرق الكولتي


علشان جذي لما تروحين لازم تنتبهين على الالوان لان الالوان الباهته او الفاقعه زياده دليل ان الخام صيني او اندونيسي

بعد طريقة اللمعه كل ما زادت اللمعه يدل هذا على ان الخام رخيص

ولما تطلبين خام سألي عن صناعته

وانتبهي لما يقولج موديل فرنسي او موديل ايطالي هذا يعني ان تقليد للفرنسي والايطالي

سأليه صناعته وين

من ناحية الصناعه ارقى شي الفرنسي والايطالي عقبها الياباني والكوري وعقبها الصيني والاندونيسي

بالنسبه للخامات العمليه عندج

السترج طبعا تعرفينه بس مع الاسف النوعيات اللي بالسوق عندنا كلش مو شي ما تلاقين نفس الشغلات اللي بره الراقيه

اذا تبين سالي عن استرج القطن واسترج الحرير

وعندج الفوال السويسري احتمال تلاقينه صاير مو موجود بالسوق او الايطالي والياباني فيي منه ساده وفي مشجر

طبعا الفوال اهو خام قطن خفيف اثقل من الشاش بس حلو وبارد ويناسب القمصان للصيف بس شوي شفاف

وعندج بعد الحرير الفلنتينو الياباني اهو حرير ناعم ثقيل وراقي ولمعته خفيفه بعد ينفع للقمصان

وللتنانير او النطلونات ممكن تاخذين الكريب الياباني خامه خشنه وراقيه

عندج اللنن بانواعه في الواقف وفي الخفيف بس انا ما احبه يتعفس بسرعه

عندج الستان فاي ينفع للجاكيتات لان خامته واقفه في منه الكوري يكون سعره معقول وفي الفرنسي سعره 10دنانير للمتر بعد واقف لكن الخامه ارقى والوانها احلى

وفي الستان فاي الايطالي اخف من الفرنسي شوي ونفس سعره

طبعا الدانتيل اشلون تميزين الفرنسي عن الباجي

الفرنسي عرضه يكون من 90سم الى 110 سم نادر ما يوصل 120سم ودايم يكون على شكل كوبونه يعني كل 3 امتار مع بعض او 5 امتار مع بعض وسعر المتر من 25 دينار وطالع
وغير الحاشيه تكون مرتبه واحيانا الحاشيه اللي فوق غير اللي تحت

يعني لما احد يعطيج خامه ويقولج فرنسي عرضه 150 هذا جذاب

في الدانتيل الكوري يصير عرضه 150 سم وسعره من 15 وطالع

وعقبه عاد يصير الكوري والصيني كله عرضه 150 سم وتكون الطاقه كبيره فيها 22متر

امبيه هذرت وايد بس شسوي اموت على الخام وين ما اسافر ادور سوق الخام مالهم
عموما الخام يبيله تروحين تتمشين بالبلوكات وتشوفين وتتعلمين قبل ما تشترين مع الوقت تصير عندج خبره
اي سؤال ثاني من عيوني

واتمنى اكون افدت

 

[Angel_store]

موفقه

 

[MiSS B.K]

اااااااااب لعيونج

 

[رانيا6]

اااااااااب لعيونج

 

[Dar-AlJuman]

عشان تتعلمين شوي شوي ، شوفي الليبل مال الملابس الجاهزه يكون مكتوب عليه نوعية الخام وسوي شوي راح تعرفين الاسامي ، دار الجمان للأزياء الراقيه 55045409:eh_s(7):

 

[مشتطـه]

يابعد عمري يا مها

حيييل فدتيني مشكورة ماقصرتي
وعسى الله يبارك لج بشغلج تسلمين




مشكورين بنات عالردود

 

[ناتشوو]

رفع
ماقصرت المها
وهم
فكرة الجمان حلوة

 

[brettey]

القطن الستريتش زين للبنطلونات اذا تبين نفس طقه مانغو
واذا تبينه ثقيل القبرديين زين
بس شقولج اغلبهم جذابييين الي يبيعون

عندج الفوال واااايد حلو

 

[Mona Lisa]

اب لعيونج

 

[انشودة المطر]

لرفع

 

[العمر]

لرفع

 

[عاشقة الدوحة]

اذا تبين بلوزة عملية عندج ( لنن) وعندج القطن الطبيعي
واذا تبين تنورة ثقيلة ومب ناعمة عندج سكادا وتنفع للبنطلون بالنسبة لي احلى من الجنز
وعندج كريب الحرير يعني تقريبا حرير بس ثقيل حلو للتنانير بس يمكن طاحت موضة هالتنانير بهالقطعة الحين،
صارت التنانير شيفون وتور مزموم او مكسر

 

[بحر الذكريات]

خوش موضوع ماقصرو البنات