محتاره ومتوهقه ... في احد يساعدني؟؟؟

[bnt eldera]

السلام عليكم
شلونكم بنات
بغيت أسألكم وان شالله تريحوني وتجاوبوني وما تدقروني نفس كل مره:eh_s(22)::eh_s(10):
ابي اسأل عن حليب اليهال شلون اذا باخذ معاي ما راح يأخذونه مني بالمطار؟؟
لأني اللي اعرفه بالمطار يكونون متشددين حيل
واذكر بمطار ميونخ خذو منا بطل الماي
فمنو سافرت ومعاها ياهل وخذت معاها حليب وعادي طوفوها
ناطره ردكم:eh_s(8):*

 

[bnt eldera]

شدعوه بنات 11وحده دشت و ولا وحده ردت ليش عاد!!!!!!؟؟؟؟؟؟؟؟؟

 

[حمامة مكه]

انا ولا مره سافرت دول اجنبيه حدي في الخليج

ان شاالله البنات بيفدونج

 

[غرررررام]

الى اعرفه حليب الاطفال ممنوع ما يدخل معاج بالطياره​

 

[bnt eldera]

حمامه مكه مشكوره يكفي انج دشيتي ورفعتيلي الموضوع ما قصرتي

 

[bnt eldera]

غرام
امبيه شسوي عيل شلون خو حليب يهال مو قنبله معاي
ضيقتي خلقي
شالدبره عيل
عالعموم تسلمين ما قصرتي*

 

[Samurai]

اي والله
شلون اللي. معاها اطفال رضع

مستحيل ما يرضون بالحليب

يمكن تاخذين البودر وتطلبين منهم الماي بالطياره
او اخذي ماي العبوه الصغيره ام ٥٠ مللي لان الممنوع ١٠٠ مللي واكثر
اللي يفيدج خطوط الطيران نفسها. دقي عليهم وسأليهم

وهذا قريته من موقع الاماراتيه :

تسري بعض الاستثناءات على الأدوية، حليب/ أغذية الأطفال والمتطلبات الغذائية الخاصة، إلا أن الأمر يتطلب توفير وسيلة ملائمة ومناسبة للتحقق من طبيعة هذه الأدوية والمواد الغذائية.
ولتسهيل عملية التفتيش وتلافي الحصول على صورة مشوشة باستخدام الأشعة السينية، يتعين تقديم مثل هذه الأكياس البلاستيكية الشفافة بمعزل عن أمتعة اليد الأخرى والمعاطف والسترات وأجهزة الكمبيوتر المحمولة، بهدف فحصها بشكل منفصل باستخدام الأشعة السينية.

 

[hanoona]

تاخذين علب الحليب بالجنطة ماكو مشكلة لان اهم اشدراهم اصلا
خاصة اذا خشيتيهم عدل ما كو مشكلة
اما بالنسبة لرضعة الطفل لا ما تدخل الطيارة يعني انتي اذا بغيتي تدخلين الطيارة راح يقولون لك ممنوع اي سوائل فعادي اهم شي تكونين مرضعة البيبي وقبل ما تدخلين اذا قالو لك ممنوع ترمينه بشرط تكونين عامله حسابك ومعاك علبة بجنطتك اللي راح تدخل معاك ماراح يقولون شي اذا علبه وحده واذا دخلتو الطيارة تطلبين ماي وتسويين جديد او تكونين ماخذة ماي صحة بس مو مفتوح ( جديد )
ادري طولتها بس قصدي اهم مايسمحون بالسوائل فتكونين عامله حسابك انك تقدرين تسويله حليب بالطيارة وبعد مايبون يشوفون انك ماخذه علب وايد فتكون معاك بالطيارة علبه وحده والباقي بالشحن مع الملابس وانشالله اكون رديت عليك

 

[bnt eldera]

Samurai
يعطيج العافيه على الرد
أنا خايفه من المطار مو من الطياره عادي بالطياره أحط بالمقسم مال الحليب وأخذ منهم ماي بس بالمطار أخاف يأخذونه مني
يعني أنا باخذ معاي تقريبا ٥ قواطي حليب لان مده طويله فأخاف ما يعدونهم ومو عارفه اسأل منو

 

[bnt eldera]

Hanoona
مشكوووووووووره بعد عمري ريحتيني
لان أنا كلش ما تحاتي الطياره بس احاتي القواطي اللي بالجنطه الكبيره مع الشحن

 

[hanoona]

العفو حبيبتي
والله انا دايم اسافر واخذ حليب اكثر من اللي احتاجه علشان تعرفين اخاف يمكن ما الاقي نفس النوع
بس شنو اسوي اخشهم بين الملابس ولا عمره احد كلمنا
وانشالله تروحين وتردين بالسلامة

 

[bnt eldera]

الله يسلمج يا الغاليه
اي أنا فكرت اوزع الحليب على جنطتين

 

[مشتطة وبس]

سمحي لي على لقافتي ............. احنا خوات .......... اذا رايحة سياحة ليش ما تخلينه عند امج او خواتج.......... اريح له هناك تغيير جو وحوسة حرام .......... لكن اذا مضطرة طبعا شي ثاني
انا بصراحة بخلي ولدي بو 5 شهور عند اختي حرام انا وهو نتأذى ولايدري وين رحنا ووين جينا... بس بيييب لها صوغع جنطة ماركة ( ماتسوى علي طلعت علي اكثر من بيع السوق )

 

[bnt eldera]

مشتطه لا عادي شدعوه أخذي راحتج
الكل يقولي نفس كلامج بس ان خليتها وويلاه وان خذيتها هم وويلاه
بس ادري ان ما خذيتها ما راح استانس لان أنا ااحاتيها وايد ومتعلقه فيها حيل معنى أمي وخالتي ما يقصرون بس اعرف نفسي ما اقدر أنا أداوم الصبح وبالي كله معاها شلون اذا بسافر صج ما اقدر فخليها اطلع لي قرون ولا اقلب السفره من وناسه لي مناحه وبجي

 

[bnt eldera]

لوووووول ضحكتيني عالجنطه اللي بتشترينها أنا ما بسوي نفسج اشتري جنطه حقي احسن p:

 

[برميتا]

ما اتوقع يسوون لج سالفة ع الحليب اللي بالجنطة الكبيرة
لأن حتى لو تحطين أكل مالهم شغل

بس فرضاً سوولج سالفة
حسبي حسابج تشترين حليب من هناك
خو مو رايحة صحرا انتي
كل شي عندهم

 

[bnt eldera]

اي ادري مو رايحه صحرا بس هذا حليب ومو اي نوع يطيح على الصاهل ويمشي خاصه ان بنتي بالعصب حصلت لها حليب طاح عليها تلعوزت
عالعموم مشكوره ويعطيج العافيه

 

[om_7sin]

اشوه بنات طمنتوني انا باخذ حق بنتي حليب

 

[bnt eldera]

يالله زين نزلت الموضوع عشان تستفيدون معاي
أدعيلي الله يسهل علي واسافر وتمشي أموري

 

[يالبيه]

عاااااادي انا دايم اخذ معاي بالشنطه الكبيره قواطي الحليب وعمره ماقالو شي ومعاي بشنطة اليد حليب جاهز عادي