مدرسات الاجتماعيات للمرحلة المتوسطه ساعدووني

[قطرة عسل]

انا مدرسة اجتماعيات للمرحلة المتوسطه

بليز ابلات ابي اسوي نموذج درس للصف الثامن او السابع اللي مسويه حق هالمرحلتين تقولي شنو سوت وحق اي مرحلة فيها وشلون ابدعت بالدرس

كنت مخططه ع الكورس الثاني بس صادف موعد ولادتي لا تقصروون ابلاتي:yaaaaaarb:

 

[(عسل وقشطة)]

انتي تبين تسوي درس نموذجي قصدج صح
سوي بور بوينت
واسئله وهدايا
مثلا كل وحدة تعطينها رقم وعندج ارقام واسحبي رقم والي يطلع رقمها تجاوب
وبس
وانتوا الباقي يفيدونج

 

[ميونة الحلوة]

انا عمري ما سويت درس لكن عندي بوربوينت حق تاسع اذا حابه تشوفينه و تاخذين عنه فكرة

شوفي تقدرين اذا انتي شاطرة بالبوربوينت سوي بس لا تسوين ابدا في ثامن لان منهجه جامد و ممل سوي بسابع عندج درس المياه مثلا حلو تسوين عنه و تقدرين تجيبين مثلا صور عن اشكال المياه و فيديو تدورين باليوتيوب اعطيج امثلة

و تجيبين هدايا من بو 100 فلس و تسوين اسئله في النهاية و توزعين الهدايا على الطالبات

التحضير تسوينه كذا نسخه و يا حبذا لو ملونة و شكلها حلوو تنحط عند باب مدخل الغرفة الي بتسوين فيها الدرس عشان الابلات الي يدخلون ياخذون نسخة

اتمنى اكون افدتج

 

[قطرة عسل]

يعطيكم العااافيه وماقصرتوا

درس المياه حلو بس هم ابي شي روعه يشد

 

[Miss nerd]

عندج مثلا اب سابع درس مال الحضارت القديمة الآشورية و ما ادري شنو
احنا ١٠ كان عندنا تقريبا نفس الدرس لاني كنت دارستهو همن امدرسته اختي الي اب سابع
حطي صور عن الحضارات
خلي كل بنت اتييب شي يتعلق اب حضارات مثلا الحضارة المصرية
خلي البنات ايسوون مجموعات و كل مجموعة اتكفل اب شي
و اذا ممكن لبس
و سوي دائرة فيها ألوان و فيها بالنص سهم
قومي كذا طالبه اتفر السهم و راح يوقف عند لون
و انتي تكونين حاطة اسئلة على ورقة اب نفس اللون
يعني لو وقف علي اللون الأزرق سؤالها راح أيكون بالورقة الي لونها ازرق و الي تجاوب عطيها درجة مشاركة او هدية او اي شي او عطي مجموعتها نقطة لي اخر الدرس المجموعة الي تحصل اعلى نقاط اتفوز و جذي
ممكن اتسوين بوربوينت او اتحطين الصور على الايباد كطريقة يديدة او تشغلين اغنية بالايباد اثناء الشرح او اللعبة مثلا لو عن الماء تشغلين قطورة او اي شي
ممكن بنات ايمثلون مشهد اب اول الحصة له علاقة بالدرس
و بعد شنو ... اتوزعين على الموجودين بروشور او كيك صغير او اي شي له علاقة بالدرس
و بس هذا الي أعرفة اتمنى اكون فدتج اب شي *