مرض السكر .. مساعده

[Maaya]

السلام عليكم
بنات انا عندي استفسار بخصوص مرض السكر
وحده من رفيجاتي تقدم لها واحد فيه سكر واهي تدري ان هالمرض منتشر وشي عادي
بس اعرفت ان السكر صار فيه من كان عمره 16 سنه والحين ياخذ ابر وعمره 30
واخوه هم فيه سكر
اهي تحاتي وخايفه من حياتها معاه وتحاتي عيالها منه بالمستقبل ..
بما اني دايما اسولف لها عن منتدى كويتيات طلبت مني اعرض مشكلتها وخوفها لكم يمكن في بنات عندهم خبره او مر عليهم ناس نفس الشي اهي تحاتي اعيالها بالمستقبل يمكن يورثهم السكر خصوصا انه صار فيه واهو صغير .. تقول بنات خالها خوفوها يقولون الريال يورث للعيال بنسبه حيل كبيره اكثر من المرا..
انتوا شرايكم بنات وللعلم البنت مو صغيره ..
ويعطيكم العافية مقدما ..​

 

[براونيز]

والله ماعندي فكره بس احلى رفع لعيونج​

 

[دريم]

حبوبه لسكر النوع الاول مايورث
نسبة الوراثه 6%

لاتحتاتي اذا هو يصلي ودينه تماام خليها تاخذه

 

[chanel N22]

السلام عليكم يالغاليه
الحمدلله السكر ابتلاء والكويت فيها نسبة عاليه وانا اعرف ناس فيهم سكر ومرته حملت من اول شهر والحمدلله ولدهم مافيه شي والله الحافظ واعرف وحده لا اهي ولازوجها فيهم سكر وعيالهم اثنين فيهم سبحان الله ماله دخل والمرض من الله وابتلاء والله ييرفع عنهم ولايبلانا يارب العالمين

 

[رغد الدنيا]

حبوبه اذا يصلي ويصوم واخلاقه زينه توافق انا اخصائية تغذيه وتمر علي حالات مثل اللي متقدم لها بس ينتظم على العلاج والغذاء والحركه ويتظبط السكر وتكون حياته طبيعيه ان شاءالله

 

[al3sooola]

اهم شي الاخلاق وبعدين اذا خايفه على عيالها هذا الشي عند الله خل تسخير افضل لها بس لا تقعد تفكر بالمرض عادي وما فيها شي

 

[aboora]

قل لن يصيبنا الا ماكتب الله لنا

فعلاً أهم شي الأخلاق

 

[Maaya]

ماقصرتوا بنات ويعطيكم ألــف عافية

 

[Maaya]

Up Up Up
بنات الله يعافيكم منو عندها معلومات اكثر او مار عليها ناس نفس الشي؟

 

[حسنة المندسمة]

عادى لا تخاف والسكرى مقدور عليه بالعلاج وما أعتقد إنه وراثى خليها توكل على الله مادام الرجال ما فيه عيوب وأدعيلى الله يوفقنى ويحقق إللى فى بالى

 

[صاعقة بيوتي]

ما اعتقد انه السكر نوع واحد وراثي . انا ولد اخوي فية سكر من عمره اربع سنين او اقل مع انه ولا احد بعايلتنا من قريب او بعيد ولا بعايلة امه فيه سكر. واكو واحد عنده سكر من عمرة 12 والحين متزوج وعند عيال. حبيبتي اذا اخلاقه زينه خليها تصلي استخارة وتتوكل على الله. بس اهم شي يكون الريل مهتم بصحته وسكره منتظم

 

[Maaya]

يعطيكم العافية ماقصرتوا
أختي صاعقة بيوتي انتي ذكرتي ان في واحد من عمره 12 فيه سكر والحين عنده اعيال ..
ممكن بليز اعرف شلون وضع اعياله الصحي؟

 

[معزوفة عشق&]

الله الحافظ ومو شرط الاولاد يورثون كل شي من الاب
وبعدين مرض السكر مو ذ1ك المرض الخطير مثل السرطان وغيره اللهم اجرنا

خليها تستشير اهلها وتستخير ربها والله يوفقها ويسسعدها ...

 

[بدورة القمورة]

عاااااااااااااااااااااااااااااااااااااادى لا تخاف

وبعدين الكويت 7 دوله بعالم مرض السكري

 

[الجورى 2007]

يالغلا عادى ما يعلم الغيب الا الله يقولون المرض لدام فيه له علاج ما يعتبر مرض يابنت الحلال ناس صاحين ما فيهم هالمرض وسبحان الله صار بعيالهم وناس فيهم سكر وعيالهم من فضل الله صاحين هذا علم الغيب فيه امراض وراثية اخطر مثل التشوهات الوراثية واللوكيميا وغيرها ربى يعافينا لدام انسان صالح وترضون دينه واخلاقه فزوجوه واستخيرى وربى يوفقك

 

[زهره]

بالنسبه للزوج اذا كان مهتم بنفسه وعلاجه وسكره طبيعى مافى مشكله لكن اذا من الناس اللى تهمل علاجها وسكره دايما عالى فهذا يعرضه لمشاكل صحيه مستقبلا قد تؤثر عليه كرجل..لكن اذا كان ملتزم بالعلاج فتوكلى على الله اذا كان ممن ترضون دينه واخلاقه وبالنسبه للوراثه فهو يورث لكن ليس بالضروره اذا اهتميتى مستقبلا بصحة اولادك وطعامهم وديرى بالج من السمنه ..اتمنالج التوفيق تحياتى