مسألة رياضيات

[!amorra!]

السلام عليكم ورحنة الله وبركاته​

أنا عندي مشكله ​

ما احب شي اسمه رياضيات ​

احب اي ماده الا الرياضيات كانت حصة سودا بحياتي وحتى بالكلية كانت محاضرة اي مادة بالرياضيات يوم اسود :bbbiu:​

كان الدكتور يكتب المسأله ​

ويطلب منا انطلع المعطيات واللي اهيا مفاتيح حل المسأله ​

لازم نرتبها وبواسطة القانون نقدر نحل المسأله ​

كانت اصعب مسأله عندي شلون اطلع س و ص ..!!​

كان الدكتور يحل المسأله ونحل معاه ونطلع الناتج وكان يقول ردو البيت وعيدوا عالمسأله اكثر من مره بالبدايه راح تغلطون وتعرفون اغلاطكم بس مره بعد مره راح تعرفون تحلونها
طبعا انا ارد وماابطل الكتاب الا بليلة الامتحان < ترا خذيت D بالماده :bbbiu:​

لان اغلبي وقتي نايمه بالمحاضره او متنحه باللوح انطر تخلص ضيعت على نفسي اهم درس بحياتي ​

اعترف اني شخصية فضيييعه عنيده وغير صبوره وانفعاليه وحساسه​

مكس من الصفات السلبيه اللي تعبتني فعلا ​

على اني ضيعت سنين وانا اقرا كتب طور من نفسك وتعلم الصبر الا انه ماتغير الحال ابدا ​

وكلمالي انطوي عن الناس لان مااستحمل وكلمالي اقرب من اللابتوب ​

امسك اللابتوب بالساعات الناس يقولون يحليلها هاديه ماتأذي بس من اتفه موقف افقد اعصابي وانفعل فالكل ينصدم ويقولون خلوها على لابتوبها :eh_s(2):​

وانا اقرا واقرا ماخليت موضوع بمنتديات العالم كله الا واقراها واحس اني صرت مفكره بس عند اقل موقف ارد مثل ما انا ​

الا ان سافرت ​

بديت انزل واختلط بالناس فعلا ​

طبعا اجانب ماينفع اصارخ او ازعل ​

ناس عمليين تبتسمين بويهم يبتسمون يتنفسين ينفسون ​

قامت تصيرلي مواقف متنوعه​

يمر علي باليوم الواحد 20 موقف​

مزاجي بالبدايه اذا موقف حلو استانس اذا موقف سيء اتعب نفسيا وهكذا طول اليوم مزاجي صاعد نازل ​

اول شهر شهرين نفس الطريقه ​

لان بالغربه تعتمدين على نفسج تنزلين تشترين اغراضج مافي ميري روحي الجمعيه :bbbiu:​

تتعرضين للنصب تتعرضين لمعامله موزينه ​

انا كنت اسكت كنت اخاف صرت انطوائيه ​

رحت مره كافيه الا هالمره الكبيره المحجبه تطلب قهوه ​

جان تعاملها اللي تبيع بنفسيه ومالها خلق​

جان ترد المره وتقول خلاص انا مابي الطلب لكن ابي اقلبل المدير لان انا دخلت اطلب قهوه مو عشان اتعامل هالتعامل البايخ ..انتوا جذي تتعاملون مع زباينكم بعدم احترام جان تخترع الموظفه وتقعد تعتذر لها ​

هالموقف صحاني خلاني اراقب واشوف شلون الناس تتعامل قمت اقلد​

مره قاعده بكافيه ودخلت بنت مو جميله لكن فيها جاذبيه وملح شلون دخلت مشيتها ثقه طريقتها بالكلام سويت زوم عليها ​

ثاني يوم قلدتها حسيت بثقه فعلا ​

وهكذا ​

وصرت اتعامل مع المواقف السيئه بهالطريقه​

اول مره اعصب ثاني مره اعصب ثالث مره اعصب اقل الرابعه اعصب اقل لي الموقف ال 500​

صار ينتهي بمجرد مااطلع من المكان :rerrerek:​

لما ارد الكويت قمت اختلط ببنات عماتي وخالاتي والجمعات كنت اراقب الحجي شنو العيب وشنو الصح وشنو المواقف اللي تنمسك علي ​

شلون اتكلم ومتى اسكت ​

صرت ادور العزايم والمناسبات عشان ابرز نفسي عقب ماكنت اكره شي اسمه عزيمه وجمعات نسائيه ​

صرت اطب واتفنن بالطبخ بعد ​

كل هذا ماعلمنياه كتاب طور ذاتك والا كيف تصبح واثق من نفسك ​

كل هذا تعلمته لما قمت اعتمد على نفسي واختلط بالناس اغلط مره مرتين عقبها اتعلم​

نفس مسألة الرياضيات من اول مره ماراح نعرف نحلها لكن مع التكرار والاعاده راح نحلها بسهولة.. الانسان كائن يتعلم من التجارب والاخطاء تبقى الافكار اللي بالكتب مجرد افكار لين تتعرض للتجربه التجربه راح تقوي هالافكار فيكم وتخليها واقع جربوا اختلطوا بالناس راقبوهم شلون يتحجون مره بعد مره راح تصيرون اقوى وتملكون اعظم شخصية ايجابية مقبله على الحياه :eh_s(15):​

واعذروني عن اي خطأ انا حبيت اشاركم بتجربتي بالحياه :eh_s(7):​

 

[xxx]

وعليكم السلام

مشكورة على نقل تجربتج الناجحه

 

[مريااانه 4]

ماشالله
مشكوووره على نقل تجربتج
عاد الرياضيات سالفته سالف معاي
احس بالمحاضره كلش مافهم شي

 

[*مطبخ الذواقة*]

بارك الله فيج وما قصرتي ومعاج حق بالتشبيه الحياة فعلا مثل المسائل نتعرض فيها لمواقف اول مرة ممكن نفشل وما نعرف شلون نتصرف لكن مع الوقت بتصير هالمواقف بسيطه ونحلها بسهوله

 

[PuPa^^SWeeT]

شدني العنوااااان


وفعلا مادة الرياضيات



تعتمد بالاساس على حل المسائل





وبالحياة اليومية يتطلب مناا بعض الاستيراتيجيات لحل المسائل


ومع التكراااار تلاقينا نتعلم من اخطاءنا و نحل مشاكلنا بسلاسة