مساعدة على القراءة بالانجليزي

[Time out]

السلام عليكم شلونكم بنات عفيه بنات ساعدوني انا احب القراءة واايد واقرى بالعربي وحدي متشوقة اقرى بالانجليزي بس انا مو ذاك الزود بالانجليزي بس مو وايد ضعيفة يعني اقدر امشي بالقراءة وودي اشتري كتاب يكون سهل من حيث الكلمات والجمل والمفهوم العام يعني مع الوقت والقراءة اكيد بصير شاطرة بالانجليزي وتصير القراءة وايد سهله علي
ابيكم تنصحوني بشنو ممكن اني ابدى القراءة فيه واذا واجهتني صعوبة بشي ما فهمته شنو اقدر اسوي
وشكرا وسامحوني على الاطاله

 

[هوية غريب]

رد : مساعدة على القراءة بالانجليزي

هلا حبيبتي

أذكر أول ما بديت أقرا إنجليزي كان عمري 12 سنة .. شريت من العجيري مجموعة قصصية (للأطفال بعمر 8 سنوات) بس طبعاً كانت مليئة بالمفردات الصعبة علي .. كنت أقعد على كل صفحة نص يوم بس أترجم .. وكنت على ما أخلص القصة تطلع روحي هههههه بس قمة المتعة لما أخلص القصة وانا فاهمتها

بعدين بعمر 20 سنة استصعبت هالشغلة .. قمت لقيت بالمكتبات قصص تكون مكتوبة صفحة عربي وصفحة إنجليزي .. يعني إذا فتحتي الكتاب من اليمين تلقين الصفحات العربي .. والعكس إذا فتحتيه من اليسار تلقين الصفحات إنجليزية .. وبجذي أي كلمة ما تفهمينها ترجعين للصفحة العربية وتقرين المعنى وتستفيدين ..

وايد فادتني هالطريقة .. أعتقد تلقين هالنوع من القصص في العجيري .. سأليهم عن القصص اللي فيهم عربي وإنجليزي مع بعض .. أذكر شريت ثنتين (نساء صغيرات) و(سندباد) .. وتلقين مثلهم وايد

والله يوفقج

 

[حساسة مصر]

رد : مساعدة على القراءة بالانجليزي

بصراحة ماعنديش علم في الكتــب

:blueSmCLR:

 

[LUXURY]

هلا يا قلبي

شوفي فكرة هويه للقصص اللي صفحه عربي صفحه انجليزي وايد حلوه
وتلقينهم باغلب المكتبات متوفرين واذكر ريلي يابلي انا كارنينا من فيرجن واهي عباره عن 4 مجلدات بس لان عربي انجليزي
وتقدرين تروحين جرير عندهم كاتبه اسمها سيسيليا اهرن cecelia ahern
كلنا ملاحظه سهولة وسلاسة اللغه بكتبها
طبعا اول شئ لازم تحسين بصعوبه شوي لان شئ يديد عليج بس مع الوقت تتعودين
وخلي يمج ديكشينري علشان الكلمات الصعبه تطلعينها بس الافضل علشان تقوين اللغه عندج تستنتجين المعنى من النص
ولا تيئسين كملي
انا تره مدرسة انجليزي بس خلال هالجم شهر بديت مع البنات اقرا مره ثانيه اول شي حسيت بصعوبه واركز بعمق
ومع الوقت الشئ يسهل وقرايتي تصير اسرع واستيعابي يزيد
بس لاتاخذين كتب قصص كلاسيك بالمره خليج على الكاتبه اللي قلتلج عنها
موجوده قصصها بجرير ولها قصص بموقع 4shared.com تقدرين تنزلينلج وحده منهم وتشوفين تعجبج والا لا وتشوفين الاسلوب
وحياااااااج الله
وتفضلي معاننا بالموضوع المثبت لقارئات الenglish :hjy5jewf:

 

[ScarletteO'Hara]

انا من رايي تبلشين بكتب حيل سهلة يعني كتب اطفال او مراهقين
و شوي شوي تصدعدين لي كتب الyoung adults
بعدين كتب الadults
احسن طريقة لج عاد انتي قبل ما تشترين الكتاب تصفحيه على اول جم صفحة و اقريه
اذا حسيتي ان اسلوب الكاتب ممكن تفهمينه اخذيه
و ازيد على الي ذكرته عزيزتي luxury
حبيت اذكر لج كتب mitch albom
tuesdays with morrie
و
for one more day
مع انهم كتب adults
بس حيييييل اسلوبه سهل و ما توقعه صعب على احد خصوصا و انتي مو ضعيفة بالانجليزي
عموما اخذي لج فرة بموضوع الانجلش الي مثبت راح تحصلين لج تشكيله من الكتب مع وصف لها
راح تستفيدين وايد منه

 

[ScarletteO'Hara]

و نسيت اقول لج
اذا مثلا حصلتي اسم كتاب
دشي على موقع امازون و ابحثي عنه
يحطون لج جم صفحة من الكتاب هم ممكن تقرينهم و تشوفين اذا اييوز لج و لا لأ

 

[RowTow]

رد : مساعدة على القراءة بالانجليزي

و عليكم السلام و الرحمه

حبيبتي أتوقع البنات فادوج ما شاء الله عليهم, و كل شي بأوله صعب.
بس نصيحتي حقج عشان ما تملين حيل لا تقعدين تترجمين كل كلمه ما عرفتيها, بالذات إذا مرت عليج كذا مفرده ما فهمتيها بالصفحه الوحده. حاولي تفهمين الكلمة بسياق الجمله.

و إذا زهقتي من كتاب و ما قدرتي تستمرين روحي حق كتاب ثاني, العيب من الكتاب مو منج
و حتى بالعربي ممكن تكون في كتب ما تقدرين تكملينها.

و القراءة هي اللي راح تحسن لغتج.

 

[رحيل المرافيء]

رد : مساعدة على القراءة بالانجليزي

شوفي هالرابط
حطته العضوة بلاك ويتش
وفيه مستويات للقراءة

http://www.vb.eqla3.com/showthread.php?t=607007



وهذا رابط للقصص القصيرة
وحدة من العضوات حطته مدري منو
http://www.rong-chang.com/qa2/

 

[قطوة@@]

رد : مساعدة على القراءة بالانجليزي

ان شاء الله البنات ما يقصرون
و موفقه ان شاء الله

 

[Time out]

امبييه بنات ما ادري شقولكم يعطييييييييكم الف عافية وما قصرتو كلكم بدون استثناء والله اني تشجعت وااااايد واستانست بعد على ردودكم وان شاء الله كل اللي قلتوه بسويه باذن الله بدعيلكم من كل قلبي بالتوفيق يا رب :yaaaaaarb:

 

[Time out]

اي صح بنات نسيت لاقولكم اموت في فلم ذهب مع الريح وفلم twilight و قريتهم بالعربي وخاطري اقراهم بالانجليزي تنصحوني اقراهم الحين ولا انطر شوي وسامحوني على الاطاله

 

[RowTow]

رد : رد: مساعدة على القراءة بالانجليزي

اي صح بنات نسيت لاقولكم اموت في فلم ذهب مع الريح وفلم twilight و قريتهم بالعربي وخاطري اقراهم بالانجليزي تنصحوني اقراهم الحين ولا انطر شوي وسامحوني على الاطاله

حيبيتي Twilight اقريه إذا تبين, مع إنه طويل بس معاصر و أكيد الكلمات راح تكون سهله لج.
أما الكلاسيكيات فأنصحج تنطرين عليهم شوي.
​

 

[الإسراء]

والله آنا من شريت الآي باد نزلت برنامج ibooks واااايد حلو وفادني ..
نزلت كتاب wenie the poh ( ويني ذا بوه ) صج القصة حلوة ومو مالت يهال .. طويلة وفيها كلمات بسيطة وحلوة تتعلمين معاها ..
وكتاب how to study هم بالآي باد نزلته ..
وفوق كل هذا الآي باد يقدم لج خدمة dictionary أي كلمه ما عرفتها تدورينها وتطلعين معناتها ..
فأنصحج تشترين الآي باد وتنزلين كتب منها وتقرين ..

 

[love love]

انا بعد واايد استفدت مشكورين ومشكورة صاحبه الموضووع

 

[Time out]

مشكورين بنات
مشكورة حبيبتي rowtow وما تقصرين ان شاء الله بشتري الكتاب

تسلمين حبيبتي الاسراء الفكرة وايد حلوة
حياج الله اختي love love

 

[انثى الكويت]

رد : مساعدة على القراءة بالانجليزي

هاي بنات شلونكم انا من زمان حابه اقرى الانجليزي واتعلمها بعد ابي اتكلم انجليزي واكتبها ابي اصير فلته فيها
المهم قبل لا اقرى هالموضوع
اختي تدرس بلندن وقلت لها سالي اساتذه عندج شلون ابلش ادرس قالت لي اوكي

دقت علي وقالت لي اول شي اشتري قاموس وحفظي كل يوم خمس كلمات
وقالت اشتري اطلس الناطق وتعلمي النطق الصحيح للكلمات حتى لو مافهمتي المعنى وللحين ما شريته
وقالت لي اقري كل يوم خمس اسطر مع النطق الصحيح وقاعده احاول

انا طول عمري ودي اقرى انجليزي وكتب وجذي والصراحه يوم دشيت هالموضوع اختي رحيل المرافئ ما قصرتي صراحه على الموقعين
نزلت كل القصص الي بالموقع الاول
والثاني عجييييييييييييب يعلم النطق الصحيح للكلمات
وقاعده اتشجع معاكم والحين بروح اقرى الموضوع المثبت عن كتب الانجليزية

وادعولي اكون معاكم وايييه يوم من الايام واقرى معاكم اي كتاب انجليزي​

 

[Tom ♥ Jerry]

رد : مساعدة على القراءة بالانجليزي

.


أول شي ابدي بقراءه الكتب الصغار ملوت الصغار حق الممتدئين بقراءه اللغه الآنقليزية !
حتى لو تقرين قصص يهال بالآنقلش ، بعدين شوي شوي رآح تتعودين على القراءه !
اقري كل يومـ ، و الكلمه الي صعبه عليج حآولي تطلعين معنآتهآ و تعرفين شلون تنطقينهآ !
رآح تعرفين صدقيني بس شوي شوي ، محد أنولد من بطن أمه " عآلم "
كل شي على التعود ، اذا عودتي نفسج بعد سنه سنتين بتشوفين نفسج بلبل بالآنقلس

.

 

[Time out]

مشكووورة حبيبتي انثى الكويت طريقتج ان شاء الله بطبقها لان وايد انصحوني فيها

وحبيبتي توم وجيري مشكورة حبيبتي ان شاء الله بشتري قصص لليهال واقراهم لعيالي بالمره انا واهم نتعلم

 

[هرانية وأفتخر]

رد : مساعدة على القراءة بالانجليزي

في كتب اللي تكون صفحة عربي و صفحة انجليزي وايد مفيدين
و اقري قصص يهال و اذا تمكنتي دشي بقصص الكبار
ترى في مستويات كل ماتمكنتي من مستوى دشي باللي بعدة



هرانية وأفتخر​

 

[Time out]

هاي بنات اشلونكم ان شاء الله بخير حبيت اشكر كل وحدة ردت على الموضوع وساعدتني مشكووورين وما قصرتوا وعساكم على القوه
بالنسبة لاختي لرحيل المرافىء حبيت اقولج اني حملتج كل القصص اللي بالرابط الاول وبلشت بقراءة قصة April in moscow والصراحة ان القصة حيل كانت سهلة والحمدالله ما واجهتني فيها اي صعوبة واستمتعت حدي بالقصة والرابط الثاني سيفته عندي وهم بلشت بالقصة الاولى , مشكورة حبيبتي وما قصرتي
واختي luxury تسلمين حبيبتي على ذكر اسم الكاتبة cecelia ahern شريتلها ثلاث كتب
واختي scarletteo`hara تسلمين حبيبتي على ذكر الكاتب mitch albom شريتله كتاب
اما باقي البنات احب اشكركم كلكم وكل وحده قالت طريقة جاري تطبيقها والحمدالله
الحين ابي اقولكم على الكتب اللي شريتها من مكتبة جرير


اول شي الكاتبة cecelia ahern
ps,I love you
where rainbows end
the gift
ثاني شي الكاتب mitch albom
the five people you meet in heaven <<<< شريته
tuesdays with morrie
for one more day
الكتاب الاول شريته والثانيين كانو مخلصين وان شاء الله بس ينزلون اشتريهم
وشريت كتاب love in the time of cholera وكتاب the notebook احب الفلم حيل
هاذي مشترواتي وان شاء الله انها تعجبكم ولا تحرموني من تشجيعكم
وسامحوني اذ طولت عليكم :fun: