السلام عليكم
1- تقدرين تشترين القطوة من سوق اليمعه بس نصهم مريضين,او من حولي بارك, او تقدرين تاخذينها من شخص مربيها جذي تضمنين انه مهتم فيها و في بموقع المزاد وايد ناس يعرضون قطاوتهم للتبني او البيع.
2- اول ماتاخذين القطوة على طول تودينها للبيطري يسوون لها فحص كامل و يحددون لج مواعيد تلتزمين فيها لتطعيم القطة, انا عن نفسي اوديها بيطري السالمية لان قريب علي.
3-اهم شي بالنسبة للقطة انج تهتمين بنظافتها كل يوم تمسحين عيونها بماي دافي منعا لحدوث التهابات او فيروسات للعين,تنظفين اذنها بكلينكس منعا للفطريات,تسبحينها كل فترة مع تنشيفها بالاستشوار عشان ماتاخذ برد.
4- لاغراض الي راح تحتاجينها: صندوق ليتربوكس,تراب تحصلينه من اي جمعية,صحن ماي و صحن اكل خاص فيها,اكل يكون دراي فود او ويت فود النوعية الالمانية ينصحون فيها, سلة على قفص لتسهيل نقلها للبيطري ,كلينكس معقم خاص للقطط تحصلينه بدايسو المحل الياباني بسيتي ستر,شامبو خاص للقطط, مشط اسنان حاده للمناطق الي يكون فيها شعر خفيف, مشط مثل مال اليهال لراحة القطوة, و مشط اللين تقدرين تستخدمينة للزل او المناطق الي يطيح فيها الشعر , رول يلزق الشعر للملابس, اذا كانت القطة صغيرة في العاب مخصصة للقطط, مقص صغير لقص تشابك الشعر,اذا كنتي تبين القطوة تكون قوية تاخذين لها فيتامين سي من البيطري تحصلينه كل يوم تعطينها,اذا ماكنتي تبين القطوة تركب على فراشج اخذي لها فراش القطط وخليها تتعود عليه.
بالنسبة اذا تاخذين ذكر او انثى , اذا كنتي بتاخذين ذكر عادة يطلب التزاوج من عمر 10 اشهر و فوق ولمن الذكر يطلب التزاوج راح يرش البول بكل مكان بالبيت لجذب القطط و القطط الذكور ماعندها فترة معينة للتزاوج فتطلب التزاوج تقريبا اي وقت وماراح يسكت او يوقف رش البول الا لمن يتزوج وراح يحاول ينحاش من البيت بكل الطرق هذا اذا كان طالب التزاوج بس تقدرين تسوين له عملية اخصاء واهيا عملية بسيطة ماتسبب له الم لكن من الناحية الانسانية تخلي الواحد يتردد انه يسوي هالعملية لقطة معنه فيها فوايد له و منها هم فيها اضرار مثل قلة نشاط القط مما يسبب له البدانة او ظهور حصوات , اما اذا بتاخذين انثى راح تطلب التزاوج من عمر 8 اشهر عادة تكون فترة تزاوجها كل 3 او 4 اسابيع و راح تزعجج بالمواء بس ما ترش البول بالبيت الا في حالات نادرة و هم تقدرين تسوين لها ملية عقم بس مانصحج فيها لانها عملية مؤلمة للقطة و فيها خياط .
حبيبتي لا تخلين القطوة تتخالط مع قطاوة الشوارع لان ممكن تنقل لها جراثيم او فيروسات حتى لو كانت مطعمة, دايما لازم تحرصين ان القطوة تتعرض لأشعه الشمس كل فترة لاتحبسين القطوة لانها راح تصاب بالاكتآب حاولي تمشطينها كل يوم حتى لا يتناثر شعرها بكل مكان و استمتعي بجودها معاج لانها كائن جدا حساس
اتمنى اني فدتج و تقبلي مروري
