مستجـــدة؟ 10 نصايح مهمة تفيدج ..

[Lulu Morales]

السلام عليكم ورحمة الله و بركاته


أحب ابارك للخريجات اليدد من مرحلة الثانوية
و مبرووك القبول لجميع أنواع الكليات و الجامعات

.
.
.

اليوم يا أختي / المستجـــدة
راح أفيدج بنصايح مهمة لج
حاولي تتبعينها طوال مشوارج العلمي في هالمرحلة اليديدة في حياتج ...

1 / التعارف

في بداية دخولج الكلية او الجامعة حاولي تسألين عن كل شي ما تعرفينه
عن الاقسام و الدكاترة و المبنى - راح تلاقين قوائم يساعدونج
لكن لا تستحين انج تسألين البنات المستمرين بصورة لبقة و مهذبة
انخرطي مع الحشد واصنعي طريقك بنفسك :eh_s(8):


2 / الصداقة

بطبيعة الانسان انه كائن اجتماعي لذلك لا يحب العزلة مهما كان
لذا من المتوقع انج راح تدورين على صديقات يكونون نفس ميولج و اهتماماتج
الصداقة في مرحلة الجامعة وايد حلوة و غالبا يكتب لها بالاستمرار لانها تأتي في مرحلة النضج
لكن الحذر ثم الحذر ثم الحذر من رفيقات السوء !
يمكن سمعتي هالجملة وايد من امج و اختج و غيرهم ..
لكن يا اختي خذي هالنصيحة مني ..
الصديقة الصالحة الطيبة مو بس راح تطلع معاج و تستانسون وكل هالامور
لكــــــن وقت الجد راح تحثج على الجد وعلى الدراسة
راح تحافظ على تركيزج و تساعدج في دروسج
راح تدش معاج بقروب و تسوي معاج بروجكت و تسعى لج ولها بالخير
الحذر من اللي يخليج تتهاونين عن دراستج او انها تخليج تهملينها !


3 / حدود الصداقة

اذا كنتي في جامعة و حرم مختلط
احذري من فئة الشباب الغير سويين ..
لان راح تمر عليج مواقف من الشباب يطلبون منج نوت المحاضرة او شرح وما الى ذلك ..
انتي كـ مستجدة قد تكونين على النية .. بس صدقيني الامر ادهى من ذلك ..
هل تعلمين ان هناك شباب يتراهنون على البنات؟
هل تعلمين ان هناك شباب لا يحترمون البنت اللي تكلم شباب بالجامعة؟
هل تعلمين ان البعض يمثل ان اخلاقه محترمه واهو عكس ذلك؟
من الطبيعي ان يكون هناك انجداب بين الجنسين .. لكن الله حذر من هذه العلاقات المحرمة !
وصدقيني ما تسوى عليج ان سمعتج تخترب عشان نوووت او نظرة !
الشباب ما يرحمون ..!
احدثج من الواقع .. عفي نفسج اختي وتحاشي هالنوعية !


4 / الثقة

حلو ان الواحد يثق بصديق له او زميل
لكـــــــن مو اي بنت تثقين فيها !!
راح تمر عليج نوعية من البنات يماشونج بس عشان ياخذون تحضيرج او تلخيصج !
او في بنات يماشونج بس عشان تغطين عليهم عند الدكتور .. او تساعدينهم في بروجيكت .. الخ
هالنوعية من البنات انا شخصيا ما احبهم :eh_s(4):
واذا شفت البنت انها مو كفو تلخصيي و مو مهتمه بالماده اساسا - كله تغيب وتيي اخر شي تاخذ تعبي - اصارحها واقولها اسفه ماقدر اعطيج لان لـــــــو عطيتج راح اضرج ماراح افيدج !!
وبالتالي البنت ماراح تعتمد على نفسها بحياتها وهالشي راح يضرها
خلج صارمة مع هالنوعية ولا تكونين لقمة سهلة لهم !



5 / المنظر الخارجي

حرية شخصية؟ صح
لج الحرية تلبسين اللي تبين
لكن انج ما تتعدين على حريات الاخرين بعد ..
شلون ؟ انا اقولج شلون ..
غض البصر مو بس عالرجال .. حتن المرأة تغض بصرها ..
المرأة تفتن والرجل ايضا يفتن .. !
حطــــــي في بالج شغلة وراح تغيرين من طريقة لبسج للاحسن اكيد ..
هــــو : إنج يايه مكان تعليمي و حرم جامعي !
انتي مو طالعة ولا رايحة تتمشين ولا تتعشين برا ..
الهدف من وجودج بهالمكان اهو انج تتعلمين والمكان له حرمته و آدابه ..
لا داعي للمبالغة في اللبس او المكياج وغيره من هالامور السطحيه :eh_s(15):
اهتمي بالملابس المريحة اللي تساعدج تحوسين من مبنى ليه مبنى وما تتعبج اذا دوامج طويل وياخذ نص يومج ..


6 / التحضير

مهما كانت المادة صعبة و دسمة
انتي بإمكانج تبسيطها و تحليلها الى اجزاء مفهومه
حاولي تعملين لج ملخصات لكل مادة من اول الكورس
كتبي اهم الشرح و التخطيط مع الدكتور و تابعيه اول ب أول
سألي الدكتور عن اي استفسار تبينه - من واجبه انه يفهمج
اذا استصعب عليج الامر - سألي البنات و زملائج
زهبي نفسج للامتحان من مدة
ولا تحكرين عمرج بالواجبات و المهام حده حده اخر الكورس !


7 / البروجيكت + برزنتيشن

مرحلة الجامعة مرحلة تعدج نفسيا و مهنيا انج تكونين قادرة على بناء شخصيتج بصورة سوية و بكل ثقة !
نمي مهارات الابداع عندج لمن دكتور يطلب منج بروجيكت
استخدمي وسائل التكنولوجيا في شرح البرزنتيشن ..
بوربوينت + بروجيكتور + وسائل للشرح + مطويات توزع للبنات + عمل اسئلة بعد الشرح + عرض فيديو قصير .. الخ
لا تعتمدين على احد في عمل شغلج !!!
حـــرام تاخذين درجات على شي انتي ما تعبتي عليه !
حطي في بالج ان ربج يحاسبج ويراقبج ..
لمن تاخذين تقرير او احد يسويلج شغلج عند احد المكاتب اللي تدفعين لها فلوس = هذا يسمى غش !
ويكون في علمج الدكتور رااااااااح يعرف اذا هذا شغل طالبة ولالا !
اعتمدي على نفسج و اكتسبي الأجر
بالاخير العلم عبادة


8 / الدكاترة

سألي عن الدكاترة قبل لا تاخذين المادة
جمعي اكبر عدد ممكن من التعليقات
و قارني منو اكثر اللي مدح الدكتور او اللي ذمه ؟
روحي شوفي درجات الدكتور على بابه؟ هل مستواها جيد او خافس فيهم؟
ايضا سألي عن طبيعة المادة اذا كانت صعبة ولالا ..
في بنات ما يدرسون وما يبون الدكتور المهتم والدقيق وراح يذمونه لج !
وفي بنات مهتمين بدراستهم حتن لو مو شطار و راح يمدحون الدكتور ..
ابتعدي عن البنات اللي يحبون يغيبون وما يأدون واجباتهم - هذيل دايما يذمون الدكاترة
وراح يحبون المتساهلين جدا جدا ويرفعونهم السما !


9 / المكتبة

جم منكم تعرف تكتب تقرير من كتب وما تعتمد على الانترنت؟
اتوقع اقل من 10%
انا ادري ان هذا عصر التكنولوجيا لكن ما يمنع انج تقرين و تفيدين نفسج
كونج في هالعمر هذا من المخري جدا انج ما فتحتي كتاب او بحثتي في كتب
وراح تمرج كثير من المقررات اللي تطلب منج بحث في الكتب و تحوسين بالمكتبات
فـ هل انتي مستعده؟
العملية مو صعبة ابدا .. غير انها يبيلها تركيز و وقت ..
راح تكونين في بعض المقررات اللي تطلب منج عمل استبانة او بحث علمي وغيره ..
الموضوع جدا مختلف عن اللي كنتي متعوده عليه في مرحلة الثانوية :eh_s(15):
اذا استصعب عليج الامر وما عرفتي شلون طريقة البحث سألي دكتورج .. ولا تستحين بالعكس هذا دليل انج مهتمه !



10 / الوقت

آخر شي اهو الوقت .. لان اذا تحكمتي بالوقت راح تقدرين تأدين كل الـ 9 نصايح اللي فوق و بسهولة !
ان ادارة الوقت من سمات الناجحين ..
ودج تكونين ناجحة؟
- رتبي وقتج بين وناستج و دراستج ..
- أدي مهامج اللي تطلب منج أول بأول ..
- طلعي بالبريك اذا تبين .. لكن حسبي حساب الزحمة و المسافط عشان لا تتأخرين على كلاسج !
- صادقي اللي يحثونج على الدراسة .. لان معاهم راح تختصرين الوقت و تشتغلون مع بعض ..
- لخصي المواد الصعبة بألوان حلوة و خرائط ذهنية ..
- اشتري نوت و مستلزمات انتي تحبينها عشان تشجعج حق كل يوم دراسي ..
- رتبي جدولج .. حــــــاولي يكون بداية المحاضرات الصبح افضل من ما يروح عليج يومج كله ..
- قومي مبجر قبل محاضرتج بساعتين عشان الزحمة ولا تتأخرين
- خلج قد المسؤولية انتي كبيرة وماراح تقبل اعذارج نفس قبل ..

.
.
.
.
.

هاذي 10 نصائح لكل مستجدة وايضا الطالبات المستمرات يقدرون يستفيدون منها :eh_s(9):
اتمنى لكم مرحلة جامعية حلووة و الله يوفقكم يارب

​

 

[سارونه الامورة]

مشكورة حبيبتي على النصائح والكلام وصدقتي في كلامش واهم شيء حضور المحاضرات لايلعب عليكم احد يقول مرة وحدة بس نغيب لالا المرة هذي محتاجتها لشيء ضروري مثلا مريضه لاسمح الله ولاشيء واهم شيء بعد احترام الدكتور والدكتورة ونصيحة لاتطيحون الميانه بين الدكاتره ترى الدكتور مراح يعطيش الا حقش واللي تستحقينه وبس واهتمي بمذاكرة كل محاضرة في يومها ولاتاجلينها والويك اند خصصي لش يوم تراجعين كل شيء وباقي الايام والاوقات استانسي فيها عاادي ونصيحة البسي لبس يليق بوحدة جايه تعلم لاتلبسين شيء والناس ياخذون عنش فكرة غلط واهتمي بدراستش اهم شيء وحطي ببالش انش جايه تعلميييين وتجيبين معدل عاااالي ونصيحة بعد لاتصادقين اي وحدة لالا واذا صادقتي خلي لصداقتكم حدود وبس وفي المحاضرة اول ماتدخلسن خلي الجوال سايلنت واجلسي اما اول وحدة او ثاني وحدة لان اذا جلستي وراء وحتى من باب التغيرر مراح تفهمين شيء لان اللي وراء بس يسولفون او على جوالاتهم والدكتور ياخذ فكرة عن اللي وراء انهم جايين يلعبون ويحطهم براسه ويحفظ اشكالهم واسمائهم وحتى لو احتاجوا الدرجه مايعطيهم لانهم مايستحقون واي سؤال ماتفهمينه بالمحاضرة لاتستحين اسالي الدكتور او اذا رجعتي البيت وراجعتي المحاضرة ومافهمتي شيء ارجعي للدكتور اساليه ولاتقولين بعدين او تتكيسلين ...والله يوفقكم.




واعذريني صاحبة الموضوع بسس حبيت انصح البنات اللي بيدخلون يقرون الموضوع

 

[أم فلان الفلاني]

يعطيج العافيه على النصايح

 

[بنتmbc1]

يعطيج العافية اختي
كلامج كله ممتاز 100%
وهذا يفيدنا كمستجدات او مستمرات

بارك الله فيج

ما اقدر الا ان اككد ع كلامج :*

 

[lonelya-w7danya]

مشكورة و ماقصرتي الكلام عين العقل

 

[Duoi]

كلامج عدل 100 ٪ بس اخالفج بشغله وحده بس
وهي " القوائم "
نصيحتي للمستجدين ابعددوا عن القوائم
مايجي من وراهم الا عوار الراس والمشاكل غير اذيتهم وقت الانتخابات

انا ما اقولج لاتسأليهم بالعكس سألي وخذي مصلحتج منهم
بس نصييييحة من اخت خليج رسمية
وانا عن نفسي علاقتي معهم من بعيد لبعيد
و اعرف اخبار الكلية من تويتر مايقصر خو

 

[أحلى البشر]

موضوع اكثر من رائع سلطتي الضوء على امور مهمه حيل نادرا ما احد يتطرق لهاا
وعندي تعقيبين عليهم
الاول: الصداقه,, يمكن بالفصل الاول او بالسنه الاولى ماراح تكونين صداقات قويه وعادي جدا تقزرين بريكج بروحج بالكفتريا او المكتبه لانج اصلا ضايعه والمكان غريب عليج فهالشي طبيعي جدا عالسنه الثانيه تلقين نفسج مكونه قروبات وين مارحتي تمشين وتسلمين وبأي وقت بريك تلقين بنات رفيجات معاج فلا تحاتون مثلي بالبدايات تعقدت هههههه
الثاني: الدكاتره اكتشفت ان البنات اذواق اللي اشوف شرحه ممل وطويل وغير مفهوم غيري تشوفه العكس واللي اشوفه توب واحب شرحه غيري تذمه وتسبه يعني كذا مره اكل مقلب بالدكاتره ومدح البنات

 

[^^طالبه^^]

الموضوع جداَ مفيد تسلم اياديج ومتعوب عليـه

 

[~mmm~]

وايد استفدت
يعطيج العافيه

 

[Miss.Nony]

يعطيج الف عافيه ، ما قصرتي♥

 

[أحلى بنوووته]

يعطيج العافيه
بالنسبه لي الصداقه ثاني اهم شي بهالمرحله بعد الدراسه
لان يكسر الملل مو بس كله دراااسه يعطيج دافع تداومين كافي هالمرحله احلى مرحله بالعمر
سألو مجرب صارلي سنتين بالكليه ماكونت صداقات اللهم زماله بس
وكرهت الكليه بهالسبب بالبريك كله قاعده بروحي:""(

 

[^^طالبه^^]

احلا شيء بالكليه ترافجين بنات عن نفسي متخرجه من التجاري قعدت سنتين ونص تعرفت علي اكثر من 60 بنت بس الي اتواصل معاهم الحين ثنتين بس لان هذول احسن ثنتين فيهم ما اقول الباقي شينات بس الباقي يا متزوجه ومو فاضيه لصداقات يا لها سوالف بايخه واذا دريت ابتعد عنها انا اقولج خليها زميلة دراسـه وانتي بتقعدين بالكليه 4 سنين ومعدنها ببين اكيد بهالاربع سنين صدقوني بس احسني التصرف حتي لو مو زينه حاولي تبتعدين عنها بهدوء ماعمري جرحت احد بس اقطع عنها واهي تفهم بروحهآ

 

[خجل~]

جزاح الله خيرر ،


موضوع يستاهل الرفع

 

[gala q8]

يعطيج العآفيه على النصآيح مع إني مو " مستجـــــــــده " <~ ونآآسه مآ آدري شكووؤؤ لووول p; بس واايد إستآنست على هالنصآآيح ,,


وفعلآ الصديقآت بالكليه لأبد تكون محدوده لا تكون الصدآقه أكثر من " دراسه - و أسأله خاصه بالمحاظره " والحمدالله كل اللي أعرفهم فتره كورس وبس , مع إني لي الحين متواصله معاهم مسجآت و جذي ,, ~ بس مو معناتها أروح معاها و واطلع و زيارات لا ,,

و أهم شششي بنااات الوووقت والله ,, ترا تفرق لأ تخلين شي يشغلج عن محاظرتج ,,
يآ كثر ما أنطردنا بسبه أشياااء تافهه ,, ~

و لأزم إنتي قاعده بالمحاظره قبلها بـ ربع سآعه على الآقل ,, ~حآولي ما تتآخرييييين ,, ~

و أهم شي لا تدخلين من دون دفتر و قلم !! لوووول ,, ~



و الله يوفق الكل يآرب , ~ و عسآهآ بدايه سنه حلوووه , ~

 

[راتشيل]

يلموا علي الموضوع الرائعه

 

[أحلى الحور]

يعطيج العافيه الموضوع ابداع استفدة منه حيل
صج بعض المشاكل اللي طرحتيها واجهتني وخاصتا اني كنت اتساهل بالبحوث وما اقدمهم الا اخر الكورس واسويه بسرعه بسرعه عشان موعد التسليم طبعا غير البنات اللي يكونون من زمان مسوينه وعلى راحتهم ومتفنتقين فيه وحتى التلخيص ما كنت الخص وكنت ادرس قبل الامتحان بيوم والنتيجه كل المواد اخذت فيهم d وانخسف معدلي بس ان شالله هالكورس بشد حيلي ومايردني الا الـa

 

[lovkom]

مشكووووووووره حييييل استفدت لإني مستجده
يعطيج الله العافيه

 

[..الشيخه حلاها..]

يعطيج العافييييييييييه جزاج الله خييييييييييييييييير <3

 

[wrdeya0]

موضوعج جمييييييييييل جدا واستفدت منه كوني مستجده
مشكوووره وااااجججججججد
على النصايح الحلوه ي عسسسسل ​

 

[كوكو شانيل.]

بنات نبي نصايح للدراسه شلون نقدر انييب a او +b