مطلوب مرشد لعايله قطريه

[ماسه قطريه]

السلام عليكم ورحمة الله وبركاته
شحالكم ياهل الكويت يارب اتكونون في اتم الصحه والعافيه
والله ودي اجي الكويت هالفتره سياحه وتسوق بس المشكله انا وزوجي اول مره نجي الكويت وماندل شي خير شروالكويت مشاءالله كبيره فامترددين فممكن حد يساعدنا ا

 

[tabooLA^_^]

اول شي حياكم الله بديرتكم ...

و ثاني شي ترى الكويت صغيره و ماتضيع وايد ..بس انتي حددي الاماكن اللي تبين تروحين لها و سويلج جدول و من سأل ماضاع مثلا تسالون اي شخص بالشارع راح يديلكم اي مكان تبونه ... او اذا كنتوا يايين بطياره فالتاكسي كل مكان يدلوونه ...

و اذا تبين تسوق ... عندج مجمعااات الدنيا بالكويت و كل واحد يقول الزين عندي بس انتي حددي شنو اللي تبينه و ان شاء الله ماراح نقصر وياج ...

 

[*alzain kella*]

يا هلا بأهل قطر ...

ترا ديرتنا اصغيرا و ما تضيع أبد مثل ما قالت تبوله

و انتي حددي و جهتج و طلباتج بس و فالج طيب :eh_s(6):

حياج الله بالكويت

 

[sara-q8]

حيــالله اهــل قطــر ..

حيـاكم بالكويت ..ديــرتكم الثــانيه .. واي شي تونه احــنـا حاضرين ..

ومثل مـاقالتلج اختي ..الكويــت صغيره وماتضيــع ..

لاتترددين ..الكويت حلــوه ولازم تجيــن تشــوفيــنهــا ..

اذا تبين انا اعطيج اهم المجمعات عندنا وعناوينها ..

واحسن الفنادق الي قريبه من السوق ..واسماء الماطعم والقهاوي الي تستاهل تروحين لهـا ..

واي استفسار انــا حــاظره ..

 

[g6awi]

قولي شنو ميوولكم ؟

اول شي حياكم الله بديرتنا

شنو تحبون ؟ سووق ؟ اماكن ترفيهيه ؟ معالم سياحيه ومتاحف

وان شاء الله نفيدج

 

[ماسه قطريه]

ياربي يحفظكم ياهل الكويت حدكم ذوق والله
الله يعلم قبل اكتب الموضوع اني كنت متردده لكن الحين خلاص عزمت اجي انشاء الله
اول شيالسكن نبي شقق مفروشه اتكون راقيه و ترفيه عندي ولدي عمره سنه ايموت على الماي مادري اوديه ايام النساء ولا ايام العائلات وانا قعد اتفرج ابي اسبح انا بعد وابي الاسواق حق الملابس والجلابيات والعبايات و كل شي
بس ابي وحده خبيره بسواق الكويت من الغالي لين الرخيص
وتسلمون على كل شي مقدما :eh_s(6)::eh_s(6)::eh_s(6):

 

[tabooLA^_^]

ان شاء الله تستانسييين في الكويت و كل مررره تزوريينا


اول شي الشقق المفروشه ...
في عندج منظقة بنيدالقار .. كلها شقق مفروشه .. و نظيفه ... منها خالد هاوس ...

و إذا تبين ترفيه لولدج ولج .. عندج الأكوابارك .. اتأكدلج بيوم الحريم و تروحين انتي ويا ولدج تستانسوون .. و قريبه بعد من منظقة بنيدالقار ..

امممممم ..

الأسواق الماركات العاديه . حق اللبس اليومي و هالسوالف عندج وااايد .. مثل

الأفنيوز << فيه كل شي تبينه من ملابس اكسسوارات عطورات الكترونيات احذيه جناط

سوق شرق .. حلو بعد انا بصراحه ارتاح له و هم بعد قريب من بنيد القار

المارينا ... عجييب فيه محلات و مطاعم وااايد و بالذات مارينا كريسنت ..

360 ... بصراحه مارحت له بس يمدحونه

المهلب ... في ملابس حلوه بعد ... و هم ملابس سهره و مطاعم بعد

اممممم اذا تذكرت قلت لج ..

تبين محلات دراريع ... عند مجمع الاوقاف صج قديم بس دراريعه حلوه و اهوا بمنطقة دسمان يم بنيدالقار ...

و هم منطقة الفروانيه حلو شغلهم للدراريع و العبي وجذيه بس البنات يفيدونج اكثر لأني مو ذاك الزود فيها ...

تبين المحلات الغاليه .. عندج مجمع الرايه ... الصالحيه ... فيلا مودا .. فيهم كل الماركات العالميه ... و هم الأفنيوز فيه جم ماركه ...
يعني انصحج الأفنيووز تخلين له يووم بروحه .. لأنه فيه اشياااء واااااااايد .. ملابس و مطاعم و كافيهات و سينمااات ...

المطااااااااعم وايد وايد وايد بالكويت شوفي تقارير البنااات و ختاري جم واحد و رووحييله ..

و ان شاء الله اكووون افدتج و اي سؤاال انا و البنات حاااضريين

 

[زهرااا]

حياكم
بس والله الكويت صغيره
اهم شي اذا تحبون السوق روحوا الافنيوز

 

[ماسه قطريه]

مشكوره اختي تبوله والله ماقصرتي انتي المفروض كنافه مو تبوله الله يسعدج انشاء الله
ومشكوره اختي زهرااا على ترحيبج اخجلتوني والله بكرمكم هذا قبل لادش الكويت وجذي بس ماعليكم امر ممكن اسعار بعض الشقق وارقام تلفوناتهم عشان الحجز وتسلموووووووووووووووووووووووون

 

[BaTTy]

هذا رقم خالد هاوس اذا حابه تتصلين تسألين
0096522552006

و هذا سايت فيه فنادق الكويت و الشقق و هم تأجير سيارات يمكن تحتاجينه
http://www.kuwaithotels.info/

ان شالله اكون فدتج
و حياج الله

 

[بنت الأصول]

هلا وغلا باهل قطر حياج الله بديرتج الكويت صج جونا حار بس ماعليه الاسواق والمحلات والمطاعم كلها مكيفه

بالنسبه للاسواق اول شي روحي للافنيوز حلو وكبير وفيه كوفيهات ومطاعم تتغدون او تتعشون فيها والمحلات اشكال وانواع

بس طبعا انتي ماتبين اماكن الماركات لان اغلبها عندكم وتبين اشياء تتميز فيها الكويت علشان لما تردين تكونين شاريه شي متميزه فيه انه من الكويت

اذا تبين دراريع وجلابيات رووووعه و خيصه فوق ماتتخيلين روحي على يوم لسوق العربيد بمنطقه الفروانيه اهو صج شكله مو كلش بس ماعليج عادي صعدي فوق واخذيلج فره على محلات الدراريع (الجلابيات ) تصلح هدايا ولج برمضان لانها حلوه وموديلات موموجوده عندكم
بعدها بالنسبه للملافع والعبي بنفس المجمع بالسرداب بتلاقين محلات عبي وملافع لفي فيها بتحصلين شغلات حلوه ورخيصه للملافع والعبي وبعد بنفس المنطقه لما تخلصين من العربيد روحي للشارع القريب منه سوق النمران سنتر فيه محلات ملافع وعبي اسعراها حلوه

بعدها بمنطقه الفروانيه بعد فيه كذا مجمع مثل العربيد بلازا والحمرا مول تقدرين تتسوقين منهم وبعدها في الشارع نفسه مطاعم حلوة واغلبها كبائن للعائلات تعشو فيها يعني خلي يوم للمجمع الافنيوز ويوم حق اسواق الفروانيه
وعندج السالميه يبيلها يوم بعد لان فيها كذا مجمع ابتداء بشارع سالم المبارك من مجمع المارينا مول وهذا امتداده للشارع الثاني بعد ومجمع الفنارو الصالحيه والبستان و زهرة

عندج بعد بالسالميه لازم تروحين له سوق سيتي سنتر (سوق المعلم ) منطقه كامله حلو هالسووق لملابس البيت البجايم قمصان البيت وبجايم الاطفال وملابس الخدم يعجبني حيل لاني احصل كل شغلات البيت فيه وفي محلات بو 100 فلس تونس

امممممممممممم بعد شنو

واذا بتونسين ولدج روحي الاكوا بارك وافضل يوم عوايل علشان تستانسين انتي وزوجج وولدج موحلوه تروحين يوم حريم وزوجج مسكين يقعد بروحه وموشرط تتسبحين يكفي زوجج وولديج لان فيه احواض سباحه لعمر سنه ونص
عموما اذا اخذتو تاكسي اطلبو اي شي منه وهو يدليكم لان سواوايق الكويت عفاريت يعرفون كل مكان خو الكويت مو من كبرها فديتها جنها قوطي صلصل بس اطعم صلصل خخخخخخخخخخخ

وعندج الشاليليهات تقدرون تحجزون لكم يوم واحد في منتجع العقاريه روعه يوميته ب50 او 60 دينار وتسبحي انتي وزوجج على راحتكم
والله الاماكن مالها حد عندنا ولو اني مودايخه ومانمت عدل جان رتبت لج خوش جدول بس يالله تشرفينا وحياج الله اختي

 

[هلااا]

هلا والله بأهل قطر
ومـــــاسة قطر


البنات ماقصروا وضحوا أكثر الأسواق في الكويت
بس بغيت أدعوج لزيارة سوق الفحيحيل

الفحيحيل تتبع محافظة الأحمدي وتقع على البحر وتبعد عن العاصمة أقل من نص ساعة
وتقريبا نص المنطقة أسواق تجارية

فيها المجمعات الفخمة وبضاعتها متفاوتة الأسعار مثل
مجمع الكوت فيه محلات ومطاعم وسينما وكافيهات وجلسات في الهواء الطلق
مجمع المنشر ملاصق لفندق روتانا فيه محلات ومطاعم وكافيهات وألعاب أطفال
مجمع أجيال صغير وفيه محلات ومطاعم وسينما وألعاب أطفال

وفيها مجمعات حلوووه وأسعارها معقولة مثل :
مجمع سلمان / مجمع العنود / وسنتر بوين/ سناء / اللولو

أتمنى أفدتج :68_asmilies-com:
وإن شاء الله نزوركم في قطر عن قريب ​

 

[بعيون مغليك]

شوفي حبيبتي عندكم خطين لازم تعرفونهم بالكويت هههههههههههه


خط البلاجات امتداده شارع الخليج فيه السالميه وشارع كامل يحتوي على مارينا مول الزهره الفنار ليلى جاليري واسواق وايد

الخط الثاني الدائري الخامس هذا على ناحيه الشمال تحصلين الافينوز من جهة الجهراء وتحصلين ستي سنتر على صوب الرميثية فيه اغلب بدلات الكويتين العملية

الدائري السادس فيه 360 بس كله ماركات !! يعني سالت عن شحاطه وانتي بالكرامة ب60 وفوق بس رووعة والله واغلب المحلات ما انفتحت فيه

بس القمة عن الكويتيتن والي يونسهم الافينوز فيه جمعيه وفيه حديقة وفيه العاب وفيه مطاعب وفيه كل الماركات بالكويت


وانا عن نفسي كل المجماعات الغت عندي لانها كلها متجمعه في الافينوز عرفتي كل المحلات هناك

عندج الكوت المشي على البحر وايد روعه

عندج شغله ودايما نسويها ههههههههههه

اذا تبون تقعدون على شاطي الشويخ قبل الجسر يعني تكونون على خط الخليج لين تحصلون لفه مكتوب عليها الشاميه اخذوها وقبل لا تنزلون من الجسر فيه لفة ثانية يمين مكتوب دولة الكويت اخذيها تحصلين مطاااعم كباب وااااااااايد بس كلهم ولا شيء عندج مطعم كباب الحجة فيه 2 دربالج الي عليه طق مطاقق معروف ومبين وحتى مطعمه تشوفين الي يشتغلون فيه هو صج لشيعي بس الله وكيلج حتى الاماراتين نشوفهم هناك = )

 

[kakawa_q8tiya]

يا هلا حبيبتي الكويت ترحب فيكم و اعتقد البنات ما قصرو معاج حياااااااااااااااج

 

[كويتيه حلووووه]

والله الكويت مو كبيره ماتحتاج مرشد

اشتري نفيقيتر او ملاح مادري شيسمونه بالعربي

واخذي اسامي المجمعات وبرمجيه عليه والله ماراح تضيعين

واهم شي تروحين الافنيوز انا وايد احب هالسوق واذا تبين دراريع حلوه حاولي تروحين انسام الخلف بس اتوقع اسعارها شوي غاليه لانه ياي رمضان وهم عندج الفروانيه شغدلهم حلو حق الدراريع

واذا حق ولدج روحي الاكوابارك ولازم تروجين المركز العلمي على البحر يايبين بطاريق صغيره اتيين والسينما اي ماكس 3 دايمنشن هم حلوه

وحديقه الشعب هم شغل عدل

البنات كفوو ووفو

ونورتي الكويت

 

[tolay]

انصحج بزيارة مدينة الملاهي المدينة الترفيهية حلوووه فيها العاب حق الكبار والصغار ومطاعم وكل شي .... منطقة الدوحه

او روحي حديقة الشعب هم بعد مدينة ملاهي والعابها عجيبه ... منطقة السالمية


اذا مادلون سألو اي احد يدليكم