معلمات الروضة ساعدونى

[ام الملاعق]

بنات الناظرة طلبت منى بدون سابق انذار انى استلم صف وقامت هاليومين بصبغ الفصول واليوم نروح العصر نشوفها ونرتبها مادرى من وين اشترى الستاير الملونة للاطفال وامس شريت زولية وابى اعرف من وين اشترى البطاقات الكبيرة اللى نحط عليها انتاج الطفل والكلمات والاعداد اللى يشكلونها الاطفال بليز

 

[زلابيا]

روحي ايكيا او لاند مارك ...

بس تره مو كل شي بالصف انتي تحطينه!!

وبعدين شلون توكم تسوون لصفوف؟؟؟ اليهال مداومين صرلهم اسبوع وين قعدوتهم؟؟

بالنسبه حق اللوحات الكبيره مالت الانتاج تلقينها بدسمان

والله يعينكم

 

[:: عائشه بقلبي ::]

من وين اشترى الستاير الملونة للاطفال ؟
من صفاة الغانم --- اشتري طاقه وفصليها لصفك
واللي يبقى منها حطيه حق الطاولات وسعرها كامله 7 دنانير وانا خيطتهم ب 4 دناير بس

وابى اعرف من وين اشترى البطاقات الكبيرة اللى نحط عليها انتاج الطفل والكلمات والاعداد اللى يشكلونها الاطفال بليز؟
اشتري لط طاقه خام ستان من الكلف ب 3 دنانير ولبسيها البوردرات اللي بصفك
بعدين اشتري لك وسائل كرتون ملونه وقصيهم اشكال وردو وحطي عليهم الشفاف مال الشهايد وعلقى انتاج اطفالك ارخص واحسن

والسجاد --------- تلقينهم يهبل عند ابو خمسين يينن او السوق الايراني

الكوشيات ايكيا

والباجي من ابو ميه

 

[ياسمينا]

خام الستاير اشتري طاقه كامله وفصلي منها ستاير ومفارش للطاولات تلقينه بمحلات التنجيد او تروحين صفاة الغانم
ولوحات الانتاج تلقين مربعات او فراشات بلاستيك عند الاسره او دسمان جاهزين والفنيه مستهلكات من بيتكم وابو ميه تاخذين سلال وزينه وخرابيط
اشكثر

 

[ام الملاعق]

مشكورين يازلابيا والخنساء وياسمينا على المساعدة واللى سالت عن الاطفال وين حطيناهم بصالة النشاط فى نص دوام يوم الاربعاء والصبغ مخلص اللا امس الظهر وطنشت فى الروضة ومارحت رحت لايكيا زحمة ماتتصورون ولقيت عندهم الستاير الملونة وهذى شاريتهم مدرسة عندنا ماحبيت اشترى مثلها لكن وين صفاة الغانم بالضبط ؟ وشرايكم بستاير من خام الاورغنزا احسهم حلوين خصوصا الاخضر الفاقع؟

 

[أوركيد]

وشرايكم بستاير من خام الاورغنزا احسهم حلوين خصوصا الاخضر الفاقع؟

ما انصحج بالاورجنزا..اخذي القطن احسن والبق ومايغبر نفس الاورجنزا ..

وغسيله اسهل ..

 

[ياسمينا]

صفاة الغانم بالشويخ مقابل مركز سلطان الجمله او بالفحيحيل

 

[منورة]

اختي اذكر قبل سنتين لما استلمت صف خذيت الستاير شيفون وفية خامات ثانية من سيرز اللي بالضجيج الحين مادري عنة



بالنسبة للوحة الانتاج للاطفال حلاتها تسوينا بنفسج وكلة من ابوامية


شوفي هالفكرة فية اكياس على شكل بلوزة اخذيهم وجيبي حبل وعلقية على لوحة الانتاج الخشب وعلقي هالبلايز مثل حبل الغسيل ولاتنسين المشابك وزيني اللوحة بالفراشات وشمس وورود يعني كانة منظر طبيعي وحديقة فيها حبل الغسيل

طبعا شفت اللوحة وحدة سوتها طلعت روووعة وما كلفتها شي


واي سؤال انا حاضرة

 

[لوميه]

روحي بلوك واحد البندري تلقين خام رخيص و حلووو


البوردات : جاهزين من دسمان
واذا تبين تفنتقين روحي بوميه و لزقي عليهم ورد وفراش و خرابيط ...

او اخذي ملف الشهادات و لزقي عالاطراف ريبون شريط ملون من عند الكلف ..


بالنسبه لباجي الشغلات الله يخلي الاسواق الشعبيه ، مثل رامز و طقته ...