معلمات رياض الاطفال ممكن استفسر وجوابوني رجاءااا دخلووووووووو

[sosooo]

السلام عليكم يااحلى معلمات اطفال شخباركم انشالله كلكم بصحه وعافيه
انا عندي بنتين بس وحده اكبر من الثانيه بسنه بدخلهم مع بعض الروضه اقدر ولا لا ؟
انا بناتي حيل خوافات ودلوعات ومايختلطون مع الناس حيل ومايسولفون الا معاي ومع ابوهم
ويخافون حيل من اللي نفس اعمارهم خاصه صبيان مع انا نطلع ونشوف اطفال نفس اعمارهم بس بناتي مايختلطون
سؤال هل الطفل ينصدم لما يداوم ؟ اول يوم ؟ خايفه حيل على بناتي والله اني ابجي وافكر بهالسالفه مادري ليش
لانه بناتي لما نروح عزايم ولا نروح بيت امي بس يقعدون عندي مايتحركون وخوافات واللحين اذا راحو الروضه
ومالقوني شيسوون راح ينصدمون !!!
انا خايفه يتخرعون مادري ليش
شسوي :krkrkr: وماابي اروح معاهم عشان ماحب لاحظات الوداع (يعني اقطهم واروح الدوام) :krkrkr:
اتعذب :krkrkr: شسوي هل اقدر اوصي احد عليهم ؟والله يابنات بناتي حييل حييل خوافات شسوي انا تعبت
ابوهم غصب بيوديهم الروضه يقول خل يختلطون مع الناس
متى يتعود الطفل ؟ ابي اقولهم انهم بيدخلون الروضه بس مادري اشلون ؟ لانه العام بدخل بنتي الكبيره وبجت وطلعتها
اللحين شسوي شقولهم .؟؟ ومشكورين ماقصرتو وسلامتكم

تكفوووووووون ابي حل تكفووووووووووووووووووون ردو علي

 

[anona79]

عادة الأطفال أول اسبوع بجي بس ..... شوي شوي يتعودون خاصة اذا كانت معلمة حنونة وياهم
انا مرت علي حالات شكثر ثاني اسبوع ماتقولين هذيل كانوا يبجون تلقينهم اسم الله عليهم مؤذينه هذا وهذاك
وبعدين لازم تخلينهم يتعودون وانتي عطيهم مقدمات مثلا الروضة حلوة فيها العاب وألوان وراح يصير عندج أصدقاء وايد
ولازم يتعودون خاصة انه وراهم المرحلة الإبتدائية شنو راح تسويين معاهم حزتها
وعموما الروضة تأجلت لي آخر شهر 11
الله يخليهم لج

 

[dr-MamLoOo7a]

وعليكم السلام
هلا عمري الحمدلله ابخير ليلحين <<<<
والله شوفي في اول الدوام في حفلات او يوم مفتوح اعتقد عشان الاطفال اليدد مستوى اول لان شي طبيعي يكونون متخوفين في البدايه و بعدين انصحج الحين ادربينهم شوي شوي مثل انج اتزورين اهلج مثل العاده و تاخذينهم معاج اقصد الاهل البعاد اللي ماشافوهم يعني من ابعيد وشوي شوي يتعودون
عالناس و اذا على انج ما تبين تخلينهم شي طبيعي راح يتلفتون و يدورونج و اذا بجوو راح يبجون وايد لانج مو بس ام لانج مصدر ثقه عندهم و امان و اذا انحشتي من وراهم راح يفقدون الثقه فيج مره وحده اي لا تتفاجئين لان الطفل باول مرحله عمري الحضانه و الروضه يكون مفاهيم عن الاشياء اللي حوله و يعطي احكام و صعبه انج اتغيرين الاحكام اللي حطها عنج او عن العالم و البيئه من حوله فما انصحج تنحاشين من وراهم لان الاطفال جذي راح يدشون بحاله عصبيه و يبجون و ما يتقبلون اي شي من المعلمه لانها مصدر مجهول بالنسبه له و اتمنى انج استفدي مني هذا كل اللي عندي و بالتوفيق ​

 

[nero]

خل كل وحده بروحها

عوديهم يعتمدون على نفسهم

لو خليتهم يدشون يميع راح يتعبونج بعدين وماكو فايده

لان حتى لو رضو يداوموون .. بينعزلون بروحهم عن الكل وما راح يتجاوبون مع احد

 

[قمر شمر]

أختي بس حبيت انصحج ان اول يوم دوام لا تروحين معاهم لان بناتج من النوع الدلوع
وإذا شافوج بتزيد المشكلة
ولازم تتحكمين بعواطفج وتعطينهم المجال يواجهون المجتمع وبجذي بتقوى شخصيتهم بعد
ارجو إني أكون افدتج

 

[ArEEj]

شوفي هالرابط ان شاء الله يساعدج

http://q8yat.net/showthread.php?t=86782

 

[moone GRL]

بناتج متعلقين فيج وانتي مساعدتهم على هالشي

من قبل الدوامات المفروض مهيأتهم .. يعني قصي لهم قصص عن الروضة واذكري لهم شنو فيها العاب واطفال ثانين بيكون عندهم اصدقاء .. ومري على يوم عند الروضة وريهم روضتهم قولي لهم هذي بداومون فيها الصبح بتروحون المدرسة مثل فلان وفلان احد من اهلهم اطفال بسن روضة عشان يتحمسون .. وديهم السوق وخليهم يشترون ملابس الروضة كل اغراض الروضة يختارونها واول ماترجعون البيت اتفقي معاهم تبقى بروح ليما تبدا الدوامات يستخدمونها

صدقيني ما تبدا الدوامات الا هم حدهم متشوقين على الروضة

اما اذا بقيتي على حالج جذي ماكو فايدة هذا بيخليهم يتعلقون فيج اكثر ويتدلعون .. واحسن شي لاتوصلينهم انتي الروضة اول الايام اذا شفتي انهم ليما الحين متعلقين فيج خلي الابو يوديهم .. والله يعينكم

 

[عذوب@]

انا عندي لج نصيحه لازم ادوسين على قلبج وخلي الامر عادي ترى والله بسيط
انا اختي كانت نفسج بس اهي عندها ولد اول يوم بجى لين تعب وغلطت اختي اهي اللي ودته لانه بس يشوفها يبجي ويتعلق فيه
بس ثاني اسبوع تعود وصار عنده ربع وكل يوم يقولنا فلان سوى وفلان رااح
انتي خلي ابوهم يوديهم اول بيبجون بعدين بيتعودون ويصير عندهم رفيجات وانتي غلطتج انج عودتيهم يكون دايم يمج لازم تعودينهم يعتمدون على روحهم
وانشالله قلت شي تستفيدين منه

 

[عذوب@]

انا عندي لج نصيحه لازم ادوسين على قلبج وخلي الامر عادي ترى والله بسيط
انا اختي كانت نفسج بس اهي عندها ولد اول يوم بجى لين تعب وغلطت اختي اهي اللي ودته لانه بس يشوفها يبجي ويتعلق فيها
بس ثاني اسبوع تعود وصار عنده ربع وكل يوم يقولنا فلان سوى وفلان رااح
والمعلمات وااايد حنونين ويعرفون يتعاملون مع الطفل لا تخافين
انتي خلي ابوهم يوديهم اول بيبجون بعدين بيتعودون ويصير عندهم رفيجات وانتي غلطتج انج عودتيهم يكون دايم يمج لازم تعودينهم يعتمدون على روحهم
وانشالله قلت شي تستفيدين منه