مكتباتنا .. صور تنطق شغفاً

[أنثى اليمامة]

وااااو بنات مكتباتكم رووعه ...

هويه مرتبه وانيقه ٫ رووتوو تعرفين احلى شي الفوضى بس انتي مكتبه وطنيه ماشاء الله << ههه انا افشل قدامكم لاني صراحه بديت اقرآ بانتظام من جم سنه واجمع كتبي << والا الثروه القوميه الله يسلم الوالده يعني ما خلت بعد الدراسه وبعد ما غيرنا بيتنا ما خلت تصرفت بالثروه القوميه تصرف قتلني حتت حتت

المهم سلطات عليا ما نقدر نقول لها شيء ... بس رو تو عادي يعني اسكن معاكم لنا مكان انا وهويه ... ترا انا ٩ ساعات دوام مقسمه علي اليوم يعني مو مزعجه بس بالليل والظهاري اكون متواجه اقرأ


​

 

[نبض الجود]

نبض الجود

الله يعافيج حبيبتي ..إذا عندج مكتبة ولو صغيرة صوريها لنا .. وإذا ما عندج صدقيني بمجرد وجودها يشجعج هالشي على القراءة أكثر وأكثر

آي ان شاءالله بصورها لكم عن قريب ..

 

[نبض الجود]

روايات و قصص الجيب

صوريلي شكلها ..

اذكر بالتسعينات واول الـ 2000 كان فيه روايات بوليسيه حجمها صغير ..
وكل كتاب روايه وحده ..
وكانت سلسله مجموعه كبيره ..
واوراقها مو قويه ولا غلافها قوي نفس الحين
جنها اوراق عادي تنطوي بسرعه ..

اتمنى صراحه القاها الحين ..

بس ناسيه اسمها​

 

[RowTow]

السلام عليكم المنتدى مو طبيييعي صار لي يومين مو قادره أدخل مادري شفيه. هزيه تلقين كل اللي تبينه إذا تعرفين وين تدورين. آنا بعد قريت المجلات هاذي ز ربيت عليها. ههه حياج أنثى إنتي و هويه البيت بيتكم, اخذوا راحتكم نبض الروايات أجنبيه و الا عربيه؟ إذا أجنبيه يمكن قصدج عن روايات عالمية للجيب. مثل هاذي هذول كلهم تلقينهم متوفرين بمكتبة الظمني.

 

[RowTow]

مو قادره أصحح الأغلاط الإملائيه. و مو راضي يفتح, ستين مره أسوي رفرش. و لازق لي السطور ببعض! المنتدى مع الكل جذي و الا بس معاي؟

 

[نبض الجود]

المنتدى من يومين معلق ..
مرات يدخل ومااقدر ارد .. ومرات مايدخل كلش ..

لا الروايه جنه عربيه ..
لا مو الجيب
بس بنفس حجمها او اصغر بشوي وغلافها ورقه عاديه خفيفه ..
جنها اوراق جريده الروايه وحتى الغلاف ..​

 

[وهج الحب]

السلام:
انا قلت باصور الكبت اللي اخزن به الكتب بس الصور شوي مرتجة ..

وانا لا انوي اني اعمل مكتبة كبيرة لان مرتاحة مع فكرة الكبت لان عندي كتب قديمة واحس ان هالطريقة ارتب واحفظ...

1- هذا الرف الاول ..




2- الرف الثاني ...



3- الرف الثالث ....




4- الكبت كامل ....



5- هذا الكبت موجود به فقط الكتب الجديدد التي لم اقرائها وعددها 257
واختار من هذه الكتب عدد 20 كتاب لمدة شهر اقرا فيهم واظعهم بمكتبة بغرفتي وهي خاصة لان فيها صور وديكورات وتعبانه اشيلهم واصور وارجع ...

 

[وهج الحب]

والله فكرة .. انج تروحين تشترين الكتب اللي قريتيهم وانتي صغيرة .. شكلي بسويها بس تهقين راح ألقى شي؟؟ انا طفولتي أيام القراءة كانت بمنتصف الثمانينات يعني كل شي انقرض هههههه

طفولتي كانت مع مجلة ماجد ومجلة سعد ومجلة العربي الصغير ... ياربي ما أروع العربي الصغير
وكنت أقرا مجلدات سوبرمان وباتمان وأجاثا كريستي .. بس أجاثا كريستي اللي خاطري أشتري كتبها الحين عشان على قولتج أستعيد ذكريات الطفولة

حدي طلعت عن الموضوع رجعتيلي حنين الماضي ..

بس صج مكتبتج وايد حلوة ألف عافية الله يهنيج ويبارك لج فيها :stars:

السلام:
الشئ الغريب انج لما ترجعين تقرين الكتب اللي كانت تجذبك يوم كنتي صغيرة ما تحسين بنفس الشعور القديم ...
بس خلي سوبرمان وربعة على صوب هذول مالهم زمان بس من فترة اشتريت عبير ابي اقراها ما قدرت اكملها حسيتها تافهه وقريت اشباح وارواح لانيس منصور بعد حسيتها تافهه وما صدقت اللي فيها ...

راح الانبهار والوااو اللي كنت احسه وانا صغيرة صرت اقرأ الكتاب ...واحلل وانتقد وافند وراحت المتعة ...

 

[نبض الجود]

وهج مكتبتج حلوه بس يبيلها ترتيب ..
احس ودي امسكها وارتبها
عشان يسهل عليج تطلعين كتب ..
لان اذا بتشيلين كتاب من تحت بيطيح اللي فوق ..​

 

[GofiSho]

هوية غريب

مشكورة على هالموضوع الفتاك

نطلع فيه من جو القراءة بس نظل حووول الكتب

مكتبتك ماشاءالله حلووووووووو حيل

تفتح النفس حتى الوان المكتب تشجع لللقراءة

انت تدخلين القلب و مكتبتك مثلك

:*

روتو

انت عاد يبيلك تعزمينا على شاي برفقةهالمكتبة و الكتب الزيينة ههههههه

و ماشاء الله مجموعة الجيب عندك عيوووون صارت تشوف نجوم ييوم شفتها

ماشاء الله

_

وهج

ماشاء الله عليك

انا مثل حالتك و كل ما اممي تمر عليهم

تهددني ياترتبنهم يا ارميهم بالزباللة ههههههه

عليك بالعافية حبيبتي

**

انا بالنسبة لي حااليا مسافرة لين رديت اصور لكم عفستي هههههه

و الله يهنيكم يابنات و يزيدكم
و يكسيكم الحلم و العلم و الصحة

:*

 

[lailosh]

حلوه مكتباتكم

وناسه احب اشوف مكتبات

 

[هوية غريب]

أنثى اليمامة .. انتي مكتبتج داخل كمبيوترج .. خلاص عندي فكرة اخذي برنت سكرين وحطيها لنا ... ماكو فكة


وهج .. كلامج صحيح .. ننبهر واحنا صغار .. وعقب ما نتجاوز المرحلة العمرية السابقة نحس بتفاهة ما كنا نقرأ ونبدي نقرأ بنظرة مختلفة وتحليل كنا مرتاحين منه واحنا صغار .. لكن تصدقين تظل أجاثا كريستي استثناء ..


GofiSho .. حبيبة قلبي انتي .. ناطرين رجعتج بالسلامة إن شاء الله عشان نشوف عفستج ههههه .. حافظج الله قلبي


ليلوش .. حياج حبيبتي صوري اللي تقدرين عليه .. ناطرينج

 

[هوية غريب]

وهوجة .. كبتاتج تونس .. تبارك الرحمن .. طلعت يمكم ما عندي كتب كلش

والله فكرة الكبت .. إذا ما عندج مكان تحطين مكتبة يظل الكبت أوفر للمساحة .. بس انتي مرتبتهم بحيث انج تشوفين عناوين كل الكتب الموجودة .. ليش بنات تقولون مو مرتبة :eh_s(10):

روتو حبيبتي .. الروايات العالمية للجيب للصغار ولا تنفع لنا؟؟ شكلهم يشوق

ومكتبة الظمني أعتقد يوصلون مو جذي ولا بطلوا؟؟

 

[RowTow]

نبض مو قادره أستوعب الشرح, قصدج إنها مو من روايات الجيب بس صغيره؟
ممكن قصدج السنابل؟
مو قادره أتصور شكل الكتاب.

غويفيشو هههه حياج الله.
و على فكرة روايات الجيب آنا قاريتهم كلللهم. ههه كفر تو كفر مثل ما يقولون.
لأنها كانت متعتي أيام المراهقه.
و رديت قبل فتره قريت عشرات الأعداد منهم.

هويه آنا أغاثا كريستي ما أقدر أقعد جم شهر من غير لا أقرالها روايه.
بس أنصحج بترجمة أجيال الكتب البيض. مع إنهم ألحين مو قاعدين يصدرون مادري شفيهم. الخيار الثاني السود ملوت جرير, ترجمتهم مو ذاك الزود, بس أحسن من الطبعات القديمه.
تذكرين الطبعات القديمة, اللي عناوينها رنانه, الموت الأخيرررر, الجريمة المستحييييله و هالأسماء اللي مألفينها من عندهم ههه.

شوفي الروايات العالمية ملوت الجيب مترجمينلج الروايه و مختصرينها و مراعين فيها سن اللي راح يقرون, مناسبه حق الناشئه.
بس ممكن تناسبنا سلسله ثانيه من عندهم, اللي ورا الصوره اللي آنا مصورتها أخير شي, الكتب اللي شوي متان و طوال شي بسيط.
هذولا ترجمه "شبه" كاملة لبعض الروايات العالمية و تناسب عمرنا أكثر.
إذا تحبين أصورلج جم وحده منهم عشان تشوفين شكلهم لما أرجع البيت.
و الله آخر خبري بالظمني إنهم لا زالوا يوصلون, و قبل فتره كانوا مسوين خصم.

ما شاء الله وهج آنا أحيي فيج التزامج. ودي لو أرجع حق قراءتي اللي كنت أقراها قبل, بس دوامي طاحنني
فمقلة جدااا بالقراءه.

 

[هوية غريب]

ههه ضحكتيني روتو.. طلعوا أسماء روايات أجاثا كريستي مألفينها من عندهم مو اهو نفس اسم الرواية بالإنجليزي؟؟ هههه يسوونها ربعنا

الله يعافيج إذا رجعتي البيت صوريلي روايات الجيب اللي تناسب عمرنا .. خاطري أشتريها وأعيش جو قراءتي وانا صغيرة اللي كلها بوليسي وغموض

السنة اللي طافت استرجعت بعض من شغفي لقراءة الغموض في كتاب الجانب المظلم لعبد الوهاب السيد .. لكنه ما كان مناسب لعمري .. يناسب بنت عشرينية في بداية قراءاتها مو لي

 

[RowTow]

ههه ضحكتيني روتو.. طلعوا أسماء روايات أجاثا كريستي مألفينها من عندهم مو اهو نفس اسم الرواية بالإنجليزي؟؟ هههه يسوونها ربعنا

الله يعافيج إذا رجعتي البيت صوريلي روايات الجيب اللي تناسب عمرنا .. خاطري أشتريها وأعيش جو قراءتي وانا صغيرة اللي كلها بوليسي وغموض

السنة اللي طافت استرجعت بعض من شغفي لقراءة الغموض في كتاب الجانب المظلم لعبد الوهاب السيد .. لكنه ما كان مناسب لعمري .. يناسب بنت عشرينية في بداية قراءاتها مو لي

كل العناوين مألفينها من عندهم ههه
عشان يجذبون القارئ.
أصورهم إن شاء الله لما أرد البيت.
شوفي تبين غموض يناسب عمرنا اقري لدان براون. و أنصحج بملائكة و شياطين على وجه الخصوص. روووعه.

 

[هوية غريب]

اشتريت مؤلفاته لما رحت تركيا قبل 3 شهور .. الكتب عندهم وايد رخيصة .. 3 مؤلفات حق دان براون طلعواعلي ب 7,5 دينار

بس ما عندي ملائكة وشياطين ..

أشتريها إن شاء الله عن قريب

 

[أنثى اليمامة]

ههههه هويه خليني ساكته لا تفشليني ،،، مشتريه جهاز جديد ماك برو وما اعرف شلو اخذ البرنت سكرين هههه

الكتب وايده رخيصه من تركيا تدرين انا مره شفت بس روايه شيفره دافنشي ب ٥ دنانير ... عموماً انا ما اشتري الا بالمعرض ..

انتهز الفرض واسال مره اخرى علي المجلدات تاريخ الافكار السياسيه .. اذا حصلتوه بآي مكتبه امانه تبلغوني بنات صار ٣ شهور ادور عليهم وخلصت من الكويت

​

 

[RowTow]

هذولا مترجمات كتابي.

آنا أرشح الكونت دي مونت كريستو و قلوب ضاله. و جين إير مع إني ما قريتها من عندهم. بس موجودة.
الكونت دي مونت كريستو روعه. و قلوب ضاله صحيح إن الشخصيات ما تعجبني بس تعرفت من خلالها على حضاره مختلفه. قلوب ضاله من تأليف طاغور.
و بعد حذار من الشفقه مش بطاله.
آنا كارنينا, نهائيا ما أبلعها هالروايه. لا حبكه و لا شخصيات تعجبني.
آآآ و طبعا أنصحج بالبؤساء. هم ما قريتها منهم بس إذا مو قاريتها لازم تقرينها.

 

[GofiSho]

ماشاء الله عليكم بنات ..

انا من كثر المعاناة اللي ألقاها بدوارة الكتب و الروحة للمكتبة ..

و تهدديدات امي انها تقط عفشي بالسكة لين مارتبتهم

..

صرت احمل اغلب اللي ابيه بالنت مع الايباد

صار مريح بالنسبة لي و ماكو وجع راس و روح و تعالي و مالقيت