ممكن مساعدتكم ياكويتيات

[نبتة حنان]

اهلين عزيزاتي

انا اختكم من السعوديه وراح ازوركم الثلاثاء ان شاء الله مدة 3 ايام وبما ان المده قصيره حابه تساعدوني بالاماكن الحلوه:eh_s(6):

علما بأني اول ازوركم ومااعرف اي شي عن الكويت:denya:

طلباتي ابغى سكن متوسط السعر قريب للمارينا اذا امكن..

اسواق ماابغى ماركات عالميه لانها عندنا بالسعوديه ابغى محلاتكم الحلوه اللي تكون فيها دراعات وفساتين وبلايز حجابات اللي تكون مخيوطه عندكم ومن تصاميمكم.
وين اجد ملابس الاطفال عندكم؟
ومحلات الاقمشه مو الفخمه الاسترتشات والأقطان وين الاقيها؟

وسؤالي عن الافنيوز ايش يتكون منه..ومحلاته والمطاعم وجلساتها..

وهل فيه اماكن جلسات اخر الليل بعد ماتقفل المراكز..

ومتى يبدأ دوام المراكز ومتى ينتهي وهل تقفل المحلات فترة الظهر ام لا؟؟؟

واسواقكم الشعبيه هل فيها شي يستاهل الزياره علما بأني اهتم بالازياء..

وترشيحكم للمطاعم والكافيهات الحلوه علما بأني اهتم بالطعم وليس الفخامه.

وابغى افضل مكان للترفيه مثل الهادبارك هل هي حلوه ام لا وفيها العاب اطفال حلوه لعمر سنه ونص؟ومتى افضل وقت لزيارتها؟؟


الله يعافيكم ساعدوني لاني مره متحمسه ازوركم:q8:

 

[j-r-n-r]

حياج الله بديرتج الثانية الكويت طبعا لو بشرحلج عندنا وايد اماكن حلوة بالنسبة للأفنيوز مول وااايد كبير محلات مطاعم العاب سينما كل شي موجود يبيله يوم كامل وعندج سوق شرق حلو وتقدرين تقعدين بالقهاوي بره وتلاقين مقابله مستشفى الأميري نفس دخلته في بيت ديفا وبيت شرق في سغلات حلوة وعندج بعد المارينا مول والفنار ولبكوت بالفحاحيل القعدة فيه على النوافير حلوة ومقابلة المنشر وعندج بجانب مجمع الصالحية معرض دار الصالحية راح يكون فيه معرض عبي ودراريع وبخور وايد راح يعجبج ويمه في خياط عنده شغلات جاهزة .وبالنسبة للأسواق الشعبية عندج سوق السالمية اللي نسميه سيتي سنتر في بجامات دراريع وخرابيط وايد وطبعا المباركية .... وحياج الله

 

[j-r-n-r]

نسيت اقولج الأسواق من 10حتى 10 والجمعه حتى 12 مساءا

 

[نبتة حنان]

سوق شرق حلو وتقدرين تقعدين بالقهاوي بره وتلاقين مقابله مستشفى الأميري نفس دخلته في بيت ديفا وبيت شرق في سغلات حلوة

مشكوره عزيزتي بس شلون بيت ديفا وبيت شرق مافهمت وينهم بالظبط

والخياط اللي قلتي كيف اسعاره؟

لان فيه عندنا بالسعوديه نفس البضاعه لكن اسعارها تخلف
يعني مانشتري من مكان وحنا مطمنين نخاف نلاقيها بسعر اقل:0bee2e8d89:

وماتعرفين وين الاقي الشغلات الحلوه للأطفال ابغى ولادي..

 

[كويتيه ذربه]

في شقق سكنيه يعني فندق شفته مقابل المارينا ويكون جنب الاسواق الشعبيه وفاشن مل والجوهره والنصر وبالسياره 5 دقايق وانتي توصلين سوق السالميه (سيتي سنتر) طبعا هالسوق في العاب حق اليهال وكل شي راح تلاقينا ورخييييييييص وكل شي فيه هذا يبيلج على الاقل نص يوم وبتلاقين كل شي
والافنيوز اتوقع معظم محلاتها عندكم لان اغلبها ماركات عالميه
واي استفسار عندج انا حاضره

 

[~La PearLa~]

حياج الله اختي
و توصلون بالسلامه ان شاء الله

و بالنسبه للاسئله
- الفندق شوفي الموضوع المثبت عن الفنادق و اسعارها (لان ماعندي خبره بفنادقنا )

- ملابس الاطفال موجوده بالمجمعات .. كل مجمع اكيد تلقين فيه محل للأطفال مثلا بأفنيوز عندج (بروي) و (مذركير) (باباز اند ماماز) و(h&m) غيرهم ، و يم مركز سلطان السالميه شارع سالم المبارك عندج مذركير ،، و بعد بنفس الشارع تلقين (سنتر بوينت) للكبار و الصغار و اسعاره رخيصه.. و انا مو متزوجه و لا عندي عيال بس اللي اعرفهم كتبتهم و بكل مكان بتلقين للأطفال ان شاء الله

- للأقمشه روحي (البلوكات) بمنطقة شرق .. مكان كبير واااسع خاص للخامات و الكلف .. و سئلي عن بلوك رقم 1 و بهالمكان بتلقين الاقطان و الاسترتجات اليوميه واسعارهم زينه المتر بدينار تقريبا او اكثر او اقل

- الافنيووز الله يسلمج .. كبييير جدا .. كل شي فيه وكل هذا 3 اجزاء من 5 ماكمل الافتتاح بعد و رااح تتعبون يبيله يوم كامل.. ملابس كبار و صغار.. احذيه.. ادوات رياضيه..ساعات .. اكسسوارات..مكياج ..أثاث.. الكترونيات .. سينما و جنه 12 سينما نسيت ارقامهم من كثر مارحت ههه.. و المطاعم بكل زاويه راح تشوفين مطعم لبناني .. ايطالي.. فرنسي .. ايراني .. امريكي .. فاست فوود .. آيسكريم .. كفيهات .. ستاربكس وغيره غيره الكثيييير و في مطاعم لها قعدات خارجيه اذا كان الجو حلوو قعدي فيها .. و في بعد عند الناافوره مطاعم و القعده حلوه عندهاا .. و بالافنيوز المحلات لجميع الطبقات .. تلقين غالي و تلقين رخيص .. وفيه مثل جمعيه اسمها كارفوور و هذي عالم اخر هههه

.- و لجلسات الليل مممممم المراكز تسكر 10 بليل و بالعطل 11 ، غالبا بليل نتمشى عالبحر وقعدات البحر .. او نكون بالسينما.. ان شاء الله يفيدونج البنات اكثر .. ماكو شي ببالي

- اغلب المجمعات تفتح 10 و تسكر 10 و ماتسكر الظهر و بالعطل تتاخر اكثر لي 11 و على حسب الزحمه مرات

- الاسواق الشعبيه : سوق السالميه ستي سنتر ، كبير و يشمل كل شي .. فيه ملابس صناعة الكويت .. و ملابس للبيت وملابس داخليه و مكياج رخيص و اغلب المحلات اسعارهم رخيصه بس من كثر ماتشترين تطير فيه الفلوس بسررعه لوول و فيه جمعيه فيها كل شي

-المطاعم ماعرف شنو اكتبلج على حسب نوع المطعم : انا احب بيتزا اكسبرس .. شيليز .. شارع المطاعم (في عنه موضوع بهالقسم) كله سندويشات على 200 فلس .. مادري شقولج الديره كلها مطاعم بكل زاويه مطعم.. جد مو غشمره راسي عورني من كثر المطاعم اللي ببالي موعارفه شنو اكتب .. بس بكل مكان تروحينله راح يكون عندج عدة اختيارات

-اماكن الترفيه كثييره .. بس لطفل عمره سنه .. راح تلقين بالمجمعات العاب .. مثل افنيوز فيه (بروي) حتى مادري اذا فيه لهالعمر واهو خاص للطفل من العاب و ملابس و صالون وادوات عنايه و كل شي .. و القسم الجديد من السوق كان قسم كامل للالعاب كبير و حلو .. و سوق السالميه فيه شركة طفل المستقبل.. وموذاكره بعد وين العاب للاطفال

طولت وااااااااااااااااايد بالكلام بس والله حبيت افيدج
و اذا عندج اي سؤاال حاااااااظرين​